Wiib’ mil chi saaj aj pleet, xb’aan laj Arnold Friberg

19–25 agosto: “Te’kole’q rix xb’aan lix sachb’a-ch’oolejil wankilal a’an”

Alma 53–63

Naq ilb’il lix “ch’ina teep aj pleet” laj Helaman (Alma 56:33) re saaj winq chi junpak’aleb’ li teep chi aj pleet aj Lamanita, maajo’q’e raj te’ruuq chixq’axb’aleb’ ru. Moko k’iheb’ ta laj pleet re laj Helaman, ut “tz’aqal saajeb’,” ut “maajun wa ke’pleetik chaq” (Alma 56:46–47). Li wankeb’ wi’ a’an chanchan tana li wanko wi’ laa’o naq wan naq naqeek’a naq moko k’iho ta ut naq numtajenaq lix yalb’al qix ut li ch’a’ajkilal wanko wi’ sa’ roso’jikeb’ li kutan a’in, sa’ li qapleet rik’in laj Satanas ut lix wankilal li maa’usilal sa’ li ruchich’och’.

A’ut kiwan li wankilal rik’in lix teep laj Helaman li moko kiwan ta rik’ineb’ laj Lamanita, li maak’a’ rilom rik’in lix k’ihaleb’ ut lix seeb’aleb’ chi pleetik. Eb’ a’an ke’xsik’ ru laj Helaman, jun li profeet, re tixjolomiheb’ (chi’ilmanq Alma 53:19); ke’tzole’ chaq xb’aaneb’ lix na’, naq wi ink’a’ neke’wiib’an xch’ool, li Dios tixkoleb’” (Alma 56:47); ut kiwan “xnumtajenaqil lix paab’aaleb’ chirix li k’a’ru tzolb’ileb’ chaq chixpaab’ankil.” Xb’aan a’an, ke’kole’ rix xb’aan “lix sachb’a-ch’oolejil wankil li Dios” (Alma 57:26). Jo’kan ut, naq laa’o naqanumsiheb’ lix pleet li yu’am, naru taawanq xkawilal qach’ool. Lix teep aj pleet laj Heleman naxk’ut chiqu naq “wan jun li Dios tiik xnaʼlebʼ, ut li ani inkʼaʼ nekeʼwiibʼan xchʼool, … ebʼ aʼan teʼkoleʼq rix xbʼaan lix sachbʼa-chʼoolejil wankilal aʼan” (Alma 57:26).

Li na’leb’ re tzolok sa’ li ochoch ut sa’ li iglees

Alma 53:10–22; 56:43–49, 55–56; 57:20–27; 58:39–40

Xpaab’ankil li Dios nikinixtenq’a chixq’axb’al ru li xiw.

Wi maak’a’ raj xpaab’aaleb’ lix saaj aj pleet laj Helaman, wan rajb’al naq te’xuwaq. A’b’an sa’ xk’ab’a’ lix paab’aaleb’, wan rajb’al naq kawaqeb’ wi’chik xch’ool. Naq yooqat chirilb’al resileb’ a’an sa’ Alma 53–58, k’e reetal li k’a’ru nakatxtenq’a chixnumsinkil laa xiw rik’in paab’aal chirix li Kristo. Naru nakawileb’ tz’aqal li raqal a’in: Alma 53:10–22; 56:43–49, 55–56; 57:20–27; ut 58:39–40. Sa’ li kaaxukuut a’in naru nakatz’iib’a li na’leb’ nakataw.

Chan ru rilb’aleb’ lix saaj aj pleet laj Helaman:
K’a’ut naq kaweb’ xpaab’aal chirix li Kristo:
K’a’ru ke’xb’aanu re xk’anjelankil lix paab’aaleb’ chirix li Kristo:
Chan ru naq li Dios kirosob’tesiheb’:

Re tooq’axonq sa’eb’ li qamusiq’ejil pleet, naqaj ajwi’ ru lix wankil li Jesukristo. Chan ru naru taak’ul lix wankil? Sik’ lix sumenkil a’an sa’ li raatin li Awa’b’ej Russell M. Nelson, “Roksinkil lix wankil li Jesukristo sa’ li qayu’am” (Jolomil ch’utub’aj-ib’ re abril 2017). Naru nakajuntaq’eeta lix na’leb’ a’an rik’in lix b’aanuhomeb’ laj pleet re laj Helaman.

Chirix xtzolb’aleb’ li na’leb’ a’in, k’oxlaheb’ li musiq’ejil pleet wankat wi’. Tz’iib’a li eek’asinb’ilat chixb’aanunkil re xk’anjelankil laa paab’aal chirix li Jesukristo.

Chi’ilmanq ajwi’ Neil L. Andersen, “Eb’ li rahob’tesinb’il,” Jolomil ch’utub’aj-ib’ re octubre 2018; “Xaqxo toowanq,” Eb’ li B’ich, 164; “Recurrir al poder de Dios en nuestra vidas” (video), Biblioteca del Evangelio; Temas del Evangelio, “Fe en Jesucristo,” Biblioteca del Evangelio.

Ink’a’ ke’wiib’an xch’ool, xb’aan laj Joseph Brickey

Alma 58:1–12, 31–37; 61

Eb’ lix tzolom li Jesukristo ink’a’ neke’ch’a’ajko’ xch’ool sa’ junpaat.

Laj Helaman ut laj Pahoran ke’ru raj chi ch’a’ajko’k xch’ooleb’ xb’aan li ke’xk’ul. Laj Helaman ink’a’ kixk’ul li tenq’ choq’ reheb’ lix teep aj pleet, ut laj Pahoran, us ta maak’a’ xmaak, kijite’ xb’aan laj Moroni li kixye naq ink’a’ yoo chixtaqlankil li tenq’ a’an (chi’ilmanq Alma 58:4–9, 31–32; 60). K’a’ru naxk’e xkawil aach’ool rik’in chan ru ke’xsume a’an sa’ Alma 58:1–12, 31–37 ut Alma 61? K’a’ut naq ke’sumen chi jo’kan?

Li Elder David A. Bednar kixye naq laj Pahoran kixk’ut chi chaab’il li tuulanil, ut kixk’ut naq “eb’ li reetalil li tuulanil q’axaleb’ loq’ ut ninqeb’ xwankil neke’chal sa’ xyu’am li Kolonel” (“Tuulan ut kub’enaq xch’ool,” Jolomil ch’utub’aj-ib’ re abril 2018). K’oxla chan ru naq li Kolonel kixk’ut li tuulanil. Chi’ilmanq, jo’ eetalil, Mateo 27:11–26; Lukas 22:41–42; Jwan 13:4–17. Chan ru naru nakataaqe lix b’aanuhom a’an?

Alma 60:7–14

Teneb’anb’il sa’ inb’een xwaklesinkileb’ li wankeb’ chinsutam.

Laj Moroni kixtz’iib’a naq taawanq xmaak laj Pahoran chiru li Dios wi ink’a’ tixk’e li ajb’il ru xb’aaneb’ li teep aj pleet aj Nefita. K’a’ru nakatzol sa’ Alma 60:7–14 chirix rilb’aleb’ li kristiaan li wankeb’ sa’ rajb’al ru? Kʼaʼru naru nakabʼaanu re naq taak’e reetal li neke’raj ru laa was aawiitz’in ut taatenq’aheb’?

Alma 62:39–51

Wi tuulan inch’ool, eb’ li ch’a’ajkilal re li yu’am a’in naru neke’xsutq’isi inch’ool rik’in li Dios.

K’e jun li mol ut jun li paaps sa’ li ha’ yoo chi woqxink re aatenq’ankil chixk’oxlankil naq naru nakasik’ ru “q’unaak” malaj “kawuuk” xb’aaneb’ laa ch’a’ajkilal. Naq yookeb’ chi chaq’ak li mol ut li paaps, il Alma 62:39–51, ut k’e reetal chan ru naq li tenamit ke’xk’ul lix k’anjel laj Helaman chirix xraqik li najtil pleet keʼwan wiʼ rik’ineb’ laj Lamanita. Naru nakajuntaq’eeta a’an rik’in chan ru naq ke’xk’ul lix k’utum 13 chihab’ chaq rub’elaj a’an (chi’ilmanq Alma 45:20–24). Chan ru naq eb’ laj Nefita jalan jalanq li ke’xk’ul us ta juntaq’eet li ch’a’ajkilal ke’wan wi’? Naq ak chaq’ chik li mol ut li paaps, jor li mol ut set li paaps. Chan ru naq jalan li ke’xk’ul xb’aan xtiqwal li ha’? K’a’ru yookat chixtzolb’al chirix li naru naqasik’ ru xk’ulb’al rik’ineb’ li qach’a’ajkilal? Chan ru naru nakasutq’isi aawib’ rik’in li Dios sa’ xyiheb’ laa ch’a’ajkilal?

Oksi li nak’ulman sa’ li junkab’al. Wi nakatk’utuk sa’ jun tzoleb’aal sa’ li Iglees, patz’ reheb’ li komon naq te’xwotz k’a’ru xe’xtzol sa’ rochocheb’. Qayehaq, patz’ reheb’ k’a’ru xe’xtzol chirix li ch’a’ajkilal ut li tuulanil naq xe’xchiq li mol ut li paaps.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Alma 53:20–21; 56:47–48

Naru ninwan chi tiik chiru li Dios jo’ ke’wan lix saaj aj pleet laj Helaman.

• Wankeb’ naab’al li k’anjeleb’aal naru nakawoksi re xwotzb’al li seraq’ chirix lix pleet laj Helaman, jo’eb’ li jalam-uuch sa’ li tusleb’ aatin a’in ut sa’ “Ch’ol 34: Laj Helaman ut li wiib’ mil chi saaj aj pleet” (Eb’ li Esilal sa’ lix Hu laj Mormon, 93–94). Li perel re kok’ k’anjel re li xamaan a’in naru naxtenq’aheb’ laa kok’al chixk’oxlankil chan ru naru neke’wan jo’ lix teep aj pleet laj Helaman. Re xtenq’ankileb’ xtikib’ankil a’an, naru nakawotz chan ruheb’ li saaj aj pleet a’in jo’ naxye sa’ Alma 53:20–21. Naru ajwi’ nekeb’icha “Taqak’am raatin li Qaawa’” (B’ichleb’aal choq’ reheb’ li Kok’al, 92–93).

Alma 56:45–48; 57:21

Naru ninwan chi tiik chiru li na’leb’ neke’xk’ut inna’ inyuwa’ sa’ tiikilal.

• Eb’ lix saaj aj pleet laj Helaman ke’xjultika lix paab’aaleb’ lix na’ naq ke’xk’ul jun ch’a’ajkilal. Naru nakawil Alma 56:46–48 rik’ineb’ laa kok’al ut nakab’oqeb’ chixk’eeb’al reetal k’a’ru ke’xk’ut lix na’eb’ li saaj winq a’in chiruheb’ chirix li paab’aal. Naru nakapatz’ reheb’ k’a’ru neke’xtzol rik’ineb’ xna’ xyuwa’—malaj jalan chik li kristiaan tiikeb’ chi paab’ank—chirix li Kolonel. K’a’ut naq aajel ru li ab’ink “chi tzʼaqal re ru”? (Alma 57:21).

• Chan ru naru laa’at—jo’eb’ lix na’eb’ li saaj aj pleetinel—nakak’eheb’ laa kok’al chixnaw naq wan laa paab’aal chirix li Dios? Re xb’aanunkil, naru nakawotz chan ru naq laa paab’aal nak’anjelak sa’ laa yu’am. Qayehaq, chan ru naq a’an “katxkol” naq “ink’a’ kiwiib’an aach’ool”?

Li riyajil li paab’aal, xb’aan laj Jay Ward

Alma 53:10–18

Naru ninpaab’ lin sumwank rik’in lin Choxahil Yuwa’.

• Laa kok’al maare naru neke’aatinak chirix jun hoonal naq kiwan ani kixb’aanu li xyeechi’ihom reheb’. K’a’ru ke’reek’a naq kib’aanuman li yeechi’inb’il chaq? Naru nakawil Alma 53:10–18 ut nakapatz’ reheb’ laa kok’al naq te’xk’e reetal chan ru naq laj Helaman, lix tenamit laj Ammon, ut eb’ li ralal lix tenamit laj Ammon ke’xk’uub’ ut ke’xpaab’ lix yeechi’ihomeb’, malaj lix sumwankeb’. Naru nakawotz chan ru naq li qaChoxahil Yuwa’ nakatrosob’tesi naq nakapaab’eb’ laa sumwank.

Alma 61:3–14

Naru ninsik’ ru naq ink’a’ tinjosq’oq.

K’oxla xpatz’b’al reheb’ laa kok’al naq te’xk’oxla jun hoonal b’ar wi’ ke’jite’ chixb’aanunkil k’a’ruhaq li ink’a’ ke’xb’aanu. Ye reheb’ chan ru naq kik’ulman a’in rik’in laj Pahoran (chi’ilmanq Alma 60–61; chi’ilmanq ajwi’ “Ch’ol 35: Laj Moroni aj taqlanel ut laj Pahoran,” Eb’ li Esilal sa’ lix Hu laj Mormon, 95–97). Re xnawb’al k’a’ru kixb’aanu laj Pahoran, k’ehomaq eehoonal chirilb’aleb’ ru li raqal sa’ Alma 61:3─14. K’a’ru kixb’aanu laj Pahoran naq kijite’ xb’aan laj Moroni? (chi’ilmanq Alma 61:2–3, 8–9). K’a’ru naqatzol chirix li kuyuk maak rik’in li Kolonel? (chi’ilmanq Lukas 23:34).

Re xtawb’al xkomon chik li na’leb’, chi’ilmanq li hu Amigos re li po a’in.

Yaal, qawa’, wankeb’ ut ajlanb’ileb’ chixjunil, xb’aan laj Clark Kelley Price