Septiembre 16–22: “Yangadmo ti Ulom ket Agragsakka.” 3 Nephi 1–7
“Septiembre 16–22: ‘Yangadmo ti Ulom ket Agragsakka.’ 3 Nephi 1–7,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2023)
Iti sumagmamano a wagas, maysa a makaparagsak a panawen tapno agbalin a maysa a mamatpati ken ni Jesucristo. Naipatungpalen dagiti padto—dagiti naindaklan a pagilasinan ken milagro kadagiti tao ti nangipasimudaag nga asidegen a maipasngay ti Mangisalakan. Iti sabali a bangir, maysa met idi a nakaddadanag a panawen kadagiti mamatpati gapu ta iti baet dagiti amin a milagro, impilit dagiti di mamatpati a “nalpasen ti kanito” para iti pannakaipasngay ti Mangisalakan (3 Nephi 1:5). Nakaigapu dagitoy a tao “nga agikkisda iti amin a pagilian” (3 Nephi 1:7) ket nangilatangda pay iti aldaw a mangpapatay kadagiti amin a mamatpati no ti pagilasinan nga impadto ni Samuel a Lamanite—maysa a rabii nga awan ti sipnget—ket di napasamak.
Kadagitoy a mapannubok a kasasaad, ni propeta Nephi ket “immawag a sipapasnek iti Dios nga agpaay kadagiti taona” (3 Nephi 1:11). Makaparegta ti sungbat ti Apo iti siasino man a maipasango iti pannakaidadanes wenno panagduadua ket kasapulanna a maammuan a ti lawag ti mangparmekto iti sipnget: “Yangadmo ti ulom ket agragsakka; … tungpalek amin dagiti saok babaen iti ngiwat dagiti nasantuan a propetak” (3 Nephi 1:13).
Dagiti Kapanunotan iti Panagsursuro iti Pagtaengan ken iti Simbaan
Ti panagbalin a napasurot iti ebanghelio ni Jesucristo ket agkasapulan iti anus ken panagkagumaan.
3 Nephi 1–7 iladawanna dagiti tao a napasurot ken ni Jesucristo ken iti ebangheliona ken dagiti dadduma pay a saan a napasurot. Ania ti nakaigapuan ti nagdumaan dagitoy a grupo? Maysa a tsart a kas iti sumaganad ti makatulong kadakayo a mangurnos kadagiti kapanunotanyo:
Bambanag a mangpakapuy iti pannakapasurot wenno kumbersion.
Bambanag a mangpapigsa iti pannakapasurot wenno kumbersion.
Agdamag kadagiti personal a saludsod bayat ti panagadalyo. Kas pagarigan, bayat ti panangileppasyo iti daytoy a tsart, mabalinyo ti agsaludsod a kas iti “Ania ti adalen para kaniak ditoy?” Daytoyto ti mangyeg iti inspirasion manipud iti Espiritu Santo.
Ammo ti Nailangitan nga Amayo a ti biagyo ket iramannanto dagiti kanito a narigat, uray pay nakabutbuteng. Ngem kayatna met a mapasaranyo ti rag-o. Basaen ti 3 Nephi 1:1–23 tapno maammuan dagiti rason a nasken a mabuteng dagiti napudno a Nephite. Ania ti rason nga inted ti Apo kadakuada tapno “agragsak[da]”?
Inusar ti Mangisalakan ti ragup ti balikas nga “agragsakkayo” iti sumagmamano a gundaway—kas pagarigan, iti Mateo 14:24–27; Juan 16:33; Doktrina ken katulagan 61:36; 78:17–19. Ania ti makaawis iti riknam maipapan kadagitoy nga awis? Mabalinyo a basaen dagiti nailikmut a bersikulo tapno maawatan dagiti kasasaad a nagkunaan ti Mangisalakan kadagitoy a balikas. Iti tunggal kasasaad, ania dagiti rason nga intedna tapno matulonganna dagiti tao a mangsango kadagiti pagbutbutnganda? Kasano nga inaramidna daytoy para kadakayo?
Ibilang ti panagadal iti bitla ni President Russell M. Nelson a “Joy and Spiritual Survival” (Liahona, Nob. 2016, 81–84). Ania ti isuro kadakayo ni Presidente Nelson maipapan iti panangsapul iti rag-o iti ania man a kasasaad? Kitaen no namin-ano nga inusar ni Presidente Nelson ti balikas a pokus. Nalabit a mabalinyo nga idilig ti panangipokus iti maysa a kamera wenno dadduma pay a lens iti panangipokus ken ni Jesucristo. Kasano nga ad-adda ti panangipokusyonto Kenkuana?
Kitaen met iti “Grief,” “Hope,” “Mental Health,” wenno dadduma pay a topiko iti benneg a “Life Help” ti Gospel Library.
Ipatungpalto ti Apo dagiti amin a balikasna iti panawenna.
Basaen ti 3 Nephi 1:4–7 ket panunotenyo no kasano ti mabalin a nariknayo no maysakayo kadagiti namati. Ania ti inaramidda a nangpatalinaed a napigsa ti pammatida? (kitaen iti 3 Nephi 1:4–21 ken 5:1–3). Kasano a naipatungpal dagiti balikas ni Samuel? (kitaen iti 3 Nephi 1:19–21). Kasano nga impatungpal ti Apo dagiti balikasna iti biagmo?
Impakdaar ni Mormon, “Adtoy, disipulonak ni Jesucristo” (3 Nephi 5:13 Ania ti kayat a sawen daytoy a ragup ti balikas kadakayo? Ibilang ti panangsukisok iti 3 Nephi 1:4–15; 5:12–26; 6:10–15; ken 7:15–26, a mangsapsapul kadagiti kababalin, kannawidan, ken aramid dagiti disipulo ni Cristo.
Kitaen met iti “I’m Trying to Be like Jesus,” Children’s Songbook, 78.
No usarek ti pammati ken ni Jesucristo, diak kasapulan ti agbuteng.
Mabalin nga aglaon ti padas dagiti Nephite kadagiti bunggoy dagiti mannanakaw kadagiti adalen a makatulong kadakayo kadagiti naespirituan a peggad a sangsanguenyo. Sapulenyo dagitoy nga adalen iti 3 Nephi 2:11–12 ken 3:1–26. Kas pagarigan, mabalinyo a sapulen dagiti balikas ni Giddianhi 3 Nephi 3:2–10 ket idasig dagitoy kadagiti wagas a mabalin a pangpadasan ni Satanas a mangallilaw kadakayo. Ania ti masursuroyo manipud iti pagwadan ni Lachoneus?
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Nagparang ti maysa a baro a bituen idi nayanak ni Jesucristo.
Ti panid ti aktibidad iti daytoy a lawas makatulong kadagiti annakyo a makasursuro maipapan kadagiti milagro a nasaksian dagiti Nephite idi nayanak ni Jesus. Mabalinyo pay nga usaren ti “Kapitulo 41: Dagiti Tanda iti Panakayanak ni Cristo” (Dagiti Estoria iti Libro ni Mormon, 114–16) a mangisuro kadakuada iti daytoy nga estoria—wenno tapno matulongan ida a mangisarita iti daytoy kadakayo.
Kanayon a maipatpatungpal dagiti balikas dagiti propeta.
Bayat ti panagbasayo ken dagiti annakyo iti 3 Nephi 1:4–10, awisenyo ida nga agsarita maipapan iti no kasano a mabalin a narikna ti maysa kadagiti namati nga agbibiag iti dayta a panawen. Bayat ti panangbasada iti nabati pay a pakaammuan kadagiti bersikulo 11–15, mabalinda nga isingasing dagiti wagas a mangileppas iti daytoy a binatog: “Ti adalen iti daytoy nga estoria para kaniak ket …”
Nalabit a matulongannakayo dagiti annakyo a mangpanunot kadagiti dadduma pay a panawen idi tinungpal ti Dios dagiti karina a naited babaen ti propetana. Mabalin a kayatda ti agsapul kadagiti ladawan dagitoy nga estoria iti Libro ti Arte ti Ebanghelio (kitaen, kas pagarigan, iti num. 7–8 ken 81). Paibinglayyo kadakuada no ania ti ammoda maipapan kadagitoy nga estoria, agraman iti no kasano a naipatungpal dagiti kari ti Dios. Aggigiddan a basaenyo ti 3 Nephi 1:20, ket ibinglayyo ti bukodyo a panagsaksi kadagitoy a kinapudno.
Tulonganyo dagiti annakyo a mangtakuat no apay a naguummong dagiti Nephite ken dagiti bendision a dimteng kadakuada iti 3 Nephi 2:11–12 ken 3:13–14, 24–26. Apay a napateg nga agguummongtayo ita kadagiti pamiliatayo ken iti simbaantayo?
Ammoyo kadi ti maysa nga adalen a banag a mangisuro maipapan iti pigsa ti panagkaykaysa? Nalabit a mabalin a padasen dagiti annakyo ti mangtukkol iti maysa a stick ket kalpasanna mangtukkol iti sangareppet a stick wenno mangpigis iti maysa a papel ket kalpasanna mangpigis kadagiti nagtutuon a papel. Kasano a maipadatayo kadagiti stick wenno papel?
Kalpasan ti aggigiddan a panangbasa iti 3 Nephi 5:13, awisenyo dagiti annakyo a mangulit iti ragup ti balikas a “Maysaak a disipulo ni Jesucristo.” Tapno masursuro no ania ti kaipapanan ti panagbalin a maysa a disipulo ni Jesucristo, aggigiddan a basaen ti sumagmamano kadagitoy a pagarigan: dagiti napasurot a Lamanite (kitaen iti 3 Nephi 6:14), Mormon (kitaen iti 3 Nephi 5:12–26), ken Nephi (kitaen iti 3 Nephi 7:15–26) Mabalinyo pay a sapulen dagiti kapanunotan iti maysa a kanta kas iti “I’m Trying to Be like Jesus” (Children’s Songbook, 78–79).
Iti maysa a papel, tulonganyo dagiti annakyo a mangpatugot iti imada ken manggetteng iti napatugotan. Isurat ti “Maysaak a disipulo ni Jesuscristo” iti maysa a bangir, ken awisem ida a mangidrowing iti maysa a banag a mabalinda nga aramiden tapno agbalinda a disipulo iti sabali pay a bangir.
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
Saksian dagiti Nephite ti aldaw nga awan rabii
Maysa nga Aldaw, maysa a Rabii, ken maysa nga Aldaw, ni Walter Rane.