21–27 octubre: “Moko kiru ta kiwan junaq tenamit li sa wi’chik xch’ool”

3 Nefi 27–4 Nefi

Eb’ lix k’utum li Jesukristo maawa’eb’ yal ch’ina-usil na’leb’ re xk’oxlankil. Nokohe’xmusiq’a chi wulak jo’ chanru a’an. Li hu 4 Nefi naxk’ut chan ru naq lix evangelio li Kolonel naru chixjalb’al xch’ool jun kristiaan. Chirix lix k’ulunik li Jesus sa’ xyanqeb’, kiraqe’ li wech’ok-ib’ ke’wan wi’ laj Nefita rik’ineb’ laj Lamanita chiru k’iila cient chihab’. Li wiib’ chi tenamit na’nookeb’ ru xb’aan li wech’ok-ib’ ut li q’etq’etil, ke’ok jo’ “junajeb’, ralal xk’ajoleb’ li Kristo” (4 Nefi 1:17), ut “kiwan chixjunil li k’a’aq re ru reheb’ sa’ komonil sa’ xyanqeb’” (4 Nefi 1:3). “Lix rahom li Dios … kiwan sa’ xch’ooleb’ li tenamit,” ut “moko kiru ta kiwan junaq tenamit li sa wi’chik xch’ool sa’ xyanq chixjunileb’ li tenamit li yo’ob’tesinb’ileb’ xb’aan ruq’ li Dios” (4 Nefi 1:15–16). Chi jo’ka’in naq eb’ lix k’utum li Kolonel ke’xjaleb’ xch’ool laj Nefita ut laj Lamanita. Chan ru yookeb’ chixjalb’al laa ch’ool laa’at?

Li na’leb’ re tzolok sa’ li ochoch ut sa’ li iglees

3 Nefi 27:1–12

Lix Iglees li Jesukristo k’ab’a’inb’il rik’in xk’ab’a’ a’an.

Naq eb’ lix tzolom li Kolonel ke’ok chixxaqab’ankil lix Iglees chiru li ch’och’, ke’wan jun xpatz’omeb’ li maare wankeb’ li te’k’oxlanq re naq moko aajel ta ru—k’a’ru taawanq choq’ xk’ab’a’ li Iglees? (chi’ilmanq 3 Nefi 27:1–3). K’a’ru xatzol chirix lix aajelil ru li k’ab’a’ej a’in rik’in lix sumehom li Kolonel sa’ 3 Nefi 27:4–12?

Li Kolonel kixk’utb’esi lix k’ab’a’ lix Iglees sa’ li kutan a’in sa’ Tzol’leb’ ut Sumwank 115:4. Tz’il rix li junjunq chi aatin sa’ li k’ab’a’ej a’an. Chan ru nokohe’xtenq’a li aatin a’in chixnawb’al aniho, k’a’ru naqapaab’, ut chan ru toowanq?

Chi’ilmanq ajwi’ Russell M. Nelson, “Tz’aqal xk’ab’a’ li Iglees,” Jolomil ch’utub’aj-ib’ re octubre 2018; “Jesucristo declara el nombre de Su Iglesia y Su doctrina” (video), Biblioteca del Evangelio.

3 Nefi 27:10–22

Lix Iglees li Jesukristo k’ojob’anb’il sa’ xb’een lix evangelio.

Chirix xch’olob’ankil naq lix Iglees tento naq “kab’lanb’il sa’ xb’een lix evangelio” (3 Nefi 27:10), li Kolonel kixch’olob’ k’a’ru lix evangelio. Chan raj ru taak’os ru li kixye a’an sa’ 3 Nefi 27:13–22? A’ yaal li kixye, k’a’ru naraj naxye choq’ re li Iglees—ut choq’ aawe laa’at—li wank chi kab’lanb’il sa’ xb’een lix evangelio?

Tz’iib’a li k’a’ru nakatzol. K’e reetal li kixk’ut li Kolonel chiruheb’ lix tzolom sa’ 3 Nefi 27:23–26. K’a’ut naq aajel ru xtz’iib’ankil resil li musiq’ejil numsihom? K’a’ru nakaweek’a naq tento taatz’iib’a chirix naq xattzolok chirix lix k’anjel li Kolonel sa’ 3 Nefi?

3 Nefi 28:1–11

“Kʼaʼru li nekeraj?”

K’a’ raj ru taaye wi ta li Kolonel tixpatz’ aawe, jo’ kixpatz’ reheb’ lix tzolom, “K’a’ru li nakawaj wik’in?” (3 Nefi 28:1). K’oxla a’in naq yooqat chirilb’al 3 Nefi 28:1–11. K’a’ru nakatzol chirix li rajom xch’ooleb’ lix tzolom rik’in chan ru ke’xsume lix patz’om? Chan ru naq li rajom aach’ool yoo chajalb’al naq yookat chixyu’aminkil lix evangelio li Jesukristo?

Eb’ li b’ich neke’xk’utb’esi chi kok’ aj xsa’ li rajom qach’ool—“K’e insantilal” a’an reetalil a’in (Eb’ li B’ich, 74). Naru nakataw jun li b’ich li naxk’utb’esi li rajom aach’ool.

3 Nefi 29–30

Lix Hu laj Mormon a’an jun reetalil naq yoo chi tz’aqob’resiik ru lix k’anjel li Dios sa’ roso’jikeb’ li kutan.

K’oxlaheb’ li eetalil li neke’xk’e chanaw naq chalk re k’a’ruhaq. Qayehaq, chan ru nakanaw naq chalk re li hab’ malaj naq chalk re li saq’ehil malaj li hab’alq’e? Jo’ naxye sa’ 3 Nefi 29:1–3, chan ru naru nakanaw naq lix k’anjel li Dios re xch’utub’ankil lix tenamit “ak xtikla xtzʼaqobʼresinkil ru”? (chi’ilmanq ajwi’ 3 Nefi 21:1–7). K’e ajwi’ reetal, sa’ 3 Nefi 29:4–9, li k’a’ru te’xtz’eqtaana raj li kristiaan sa’ li qakutankil. Chan ru naq lix Hu laj Mormon naxkawob’resi laa paab’aal chirix li k’a’aq re ru a’in?

4 Nefi 1:1–18

Xtaaqenkil lix k’utum li Jesukristo nak’amok sa’ li junajil ut li sahil ch’oolejil.

Chan raj ru li wank chiruheb’ li chihab’ chirix lix k’ulunik li Kolonel? Naq yooqat chirilb’al 4 Nefi 1:1–18, naru nakatz’iib’a li ke’osob’tesiik wi’ li kristiaan. Naru ajwi’ nakajuch’ malaj nakak’e reetal li k’a’ru ke’xsik’ ru xb’aanunkil li kixtenq’aheb’ chi osob’tesiik chi jo’kan sa’ xyu’ameb’. K’a’ru kixk’ut li Jesus chiruheb’ li kixwaklesi xch’ooleb’ chixsik’b’al ru li us? Wahe’ junjunqeb’, a’ut toj wankeb’ naab’al chik naru nakataw: 3 Nefi 11:28–30; 12:8–9, 21–24, 40–44; 13:19–21, 28–33; 14:12; 18:22–25.

K’oxla k’a’ru naru nakab’anu re xtenq’ankil laa junkab’al, laa teep, malaj laa k’aleb’aal re taanimanq li junajil ut sahil ch’oolejil wankex wi’. K’a’ru naru nakab’aanu re numtaak sa’ xb’een li jachok-ib’ ut chi wulak chi “junajat” rik’in xkomoneb’ chik li ralal xk’ajol li Dios? B’arwan reheb’ lix k’utum li Jesukristo naru tate’xtenq’a chixb’aanunkil a’in?

Ra xyeeb’al naq li tenamit a’in chanchan re Sion, li yeeb’il resil sa’ 4 Nefi, ki’ok chi po’e’k. Naq yooqat chirilb’al 4 Nefi 1:19–49, k’e reetaleb’ li k’oxlahom ut li b’aanuhom li ke’raqok reheb’ li sahil ch’oolejil ut li junajil ke’wan wi’. K’a’ru naru nakab’aanu re risinkileb’ li k’oxlahom malaj li b’aanuhom a’an?

Chi’ilmanq ajwi’ Moises 7:18; D. Todd Christofferson, “Eb’ li tenamit li te’ruuq chi kanaak,” Jolomil ch’utub’aj-ib’ re octubre 2020; Reyna I. Aburto, “Sa’ junajil ch’oolej,” Jolomil ch’utub’aj-ib’ re abril 2018; Temas del Evangelio, “Diversidad y unidad en La Iglesia de Jesucristo de los Santos de los Últimos Días,” Biblioteca del Evangelio.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

3 Nefi 27:3–8

Laa’in komon re lix Iglees li Jesukristo.

• Re xk’utb’al naq aajel ru lix k’ab’a’ lix Iglees li Jesus, aatinan rik’ineb’ laa kok’al chirixeb’ lix k’ab’a’eb’ a’an. K’a’ut naq aajel ru li qak’ab’a’? Chirix a’an naru nekeril 3 Nefi 27:3 re xsik’b’al li patz’om ke’xye li tzolom re li Jesus. Tenq’aheb’ laa kok’al chixtawb’al xsumenkil sa’ 3 Nefi 27:5–8. K’a’ut naq nim xwankil lix k’ab’a’ li Iglees?

• Naru nakatenq’aheb’ laa kok’al chixk’oxlankil li jalan jalanq ch’uut li wankeb’ wi’, jo’ lix junkab’aleb’ malaj li Tzoleb’aal reheb’ li Kok’al. Patz’ reheb’ naq te’xye k’a’ru nawulak chiruheb’ xb’aan naq wankeb’ sa’ li ch’uut. Chirix a’an naru nekeb’icha “Lix Iglees li Jesukristo” (B’ichleb’aal choq’ reheb’ li Kok’al, 48), ut teeye k’a’ut naq nekexb’antioxin xb’aan naq komonex sa’ lix Iglees li Kolonel.

3 Nefi 27:13–16

Lix Iglees li Jesukristo k’ojob’anb’il sa’ xb’een lix evangelio.

• Li Kolonel kixch’olob’ lix evangelio sa’ 3 Nefi 27. Naru nakach’olob’ chiruheb’ laa kok’al naq li aatin evangelio naraj naxye “chaab’il esilal.” K’a’ru li chaab’il esilal naqataw sa’ 3 Nefi 27:13–16? Oksi li perel re kok’ k’anjel re li xamaan a’in re xk’utb’al naq lix Iglees li Kolonel k’ojob’anb’il sa’ xb’een lix evangelio.

3 Nefi 27:30–31

Li qaChoxahil Yuwa’ nasaho’ xch’ool naq eb’ li ralal xk’ajol neke’q’aj rik’in a’an.

• Naru nekeb’aanu jun b’atz’unk sa’ li tixmuq wi’ rib’ jun komon ut lix komoneb’ chik te’xsik’. A’in naru nekexxtenq’a chi aatinak chirix li sahil ch’oolej naqeek’a naq natawman ani sachb’il. Chirix rilb’al 3 Nefi 27:30–31, naru teetz’il rix chan ru teetenq’a eerib’ cherib’il eerib’ chi kanaak chi nach’ rik’in lee Choxahil Yuwa’ re naq “maajun … sachenaq.”

4 Nefi

Xtaaqenkil li Jesukristo naxk’e xsahil inch’ool.

• Re xtenq’ankileb’ laa kok’al chi tzolok chirix lix sahileb’ xch’ool li tenamit sa’ 4 Nefi, naru nakak’ut chiruheb’ xjalam-uucheb’ li kristiaan li saheb’ xch’ool. Chirix a’an, naq yooqex chirilb’aleb’ li raqal 2–3 ut 15–17 (malaj “Ch’ol 48: Tuqtuukilal sa’ li ch’och’ America,” Eb’ li Esilal sa’ lix Hu laj Mormon, 136–137), naru neke’xk’ut chi ru’uj ruq’ eb’ li jalam-uuch naq nakaye k’a’ruhaq sa’ li seraq’ li nak’ehok sahil ch’oolej.

• Re xtenq’ankileb’ li kok’al chixb’aanunkil li nak’utman sa’ 4 Nefi 1:15–16, naru nakaseraq’i reheb’ resilal hoonal b’ar wi’ naq eb’ li kristiaan yookeb’ xjosq’il chirib’ileb’ rib’. Patz’ reheb’ naq te’xk’utb’esi chan raj ruhaq li hoonal a’an wi ta wan “lix rahom li Dios” sa’ li qach’ool.

Re xtawb’al xkomon chik li na’leb’, chi’ilmanq li hu Amigos re li po a’in.

Li Jesus rik’ineb’ li oxib’ chi tzolom aj Nefita, xb’aan laj Gary L. Kapp