« ថ្ងៃទី ១៨–២៤ ខែ វិច្ឆិកា ៖ ‹ ដើម្បីឲ្យអំពើអាក្រក់ត្រូវបាត់អស់ទៅ › ។ អេធើរ ៦–១១ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )

« ថ្ងៃទី ១៨–២៤ ខែ វិច្ឆិកា ។ អេធើរ ៦–១១ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៣ )

I Will Bring You Up Again out of the Depths [ យើងនឹងលើកអ្នកឡើងពីជម្រៅនៃសមុទ្រ ] ដោយ ចូណាថាន់ អាធើរ ក្លាក

ថ្ងៃទី ១៨–២៤ ខែ វិច្ឆិកា ៖ « ដើម្បីឲ្យអំពើអាក្រក់ត្រូវបាត់អស់ទៅ »

អេធើរ ៦–១១

អស់រយៈពេលរាប់រយឆ្នាំក្រោយពីសាសន៍យ៉ារេឌត្រូវបានបំផ្លាញ ពួកសាសន៍នីហ្វៃបានរកឃើញការបំផ្លិចបំផ្លាញនៃអរិយធម៌ពីបុរាណរបស់ពួកសាសន៍យ៉ារេឌ ។ ក្នុងចំណោមការបំផ្លិចបំផ្លាញទាំងនេះគឺជាកំណត់ត្រាដ៏អាថ៌កំបាំងមួយ គឺផ្ទាំង « មាសសុទ្ធ » ដែល « ពេញដោយឆ្លាក់ត្រា » ហើយពួកសាសន៍នីហ្វៃ « ចង់ដឹងហួសប្រមាណ » ដើម្បីអានវា ( ម៉ូសាយ ៨:៩; ២៨:១២ ) ។ សព្វថ្ងៃនេះ បងប្អូនមានសេចក្ដីសង្ខេបអំពីកំណត់ត្រានេះ ហើយវាត្រូវបានហៅថាគម្ពីរអេធើរ ។ នៅពេលដែលពួកសាសន៍នីហ្វៃបានអានវា « ពួកគេបានពោរពេញទៅដោយការសោកសៅ » ដោយដឹងអំពីការដួលរលំដ៏សោកសៅនៃពួកសាសន៍យ៉ារេឌ ។ « ទោះជាយ៉ាងណាក៏ដោយ គង់តែដំណើររឿងនេះបានផ្ដល់ដល់គេនូវការចេះដឹងជាច្រើន ម្ល៉ោះហើយ ទើបគេបានអររីករាយ » ( ម៉ូសាយ ២៨:១២, ១៨ ) ។ បងប្អូនក៏ប្រហែលជាអាចរកឃើញគ្រាដ៏សោកសៅនៅក្នុងគម្ពីរនេះផងដែរ ។ ប៉ុន្តែបងប្អូនក៏អាចរីករាយនឹងអំណោយទាននៃចំណេះដឹងនេះផងដែរ ។ ដូចមរ៉ូណៃបានកត់ត្រាថា « គឺជាប្រាជ្ញានៅក្នុងព្រះ ដែលការណ៍ទាំងនេះត្រូវបានបង្ហាញដល់់អ្នក … ដើម្បីឲ្យអំពើអាក្រក់ត្រូវបាត់អស់ទៅ ហើយថាពេលវេលានឹងមកដល់ ដែលអារក្សសាតាំងកពុំអាចមានអំណាចទៅលើដួងចិត្តនៃកូនចៅមនុស្សបានទេ » ( អេធើរ ៨:២៦ ) ។

គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ

អេធើរ ៦:១–១២

ព្រះអម្ចាស់នឹងដឹកនាំខ្ញុំឲ្យឆ្លងកាត់ដំណើរក្នុងជីវិតរមែងស្លាប់របស់ខ្ញុំ ។

បងប្អូនអាចនឹងរកឃើញគំនិតយោបល់ខាងវិញ្ញាណបាន ប្រសិនបើបងប្អូនប្រៀបធៀបការធ្វើដំណើររបស់ពួកសាសន៍យ៉ារេឌឆ្លងកាត់មហាសមុទ្រ ទៅនឹងការធ្វើដំណើររបស់បងប្អូនឆ្លងកាត់ជីវិតរមែងស្លាប់នេះ ។ ឧទាហរណ៍ តើព្រះអម្ចាស់បានប្រទានអ្វីខ្លះដែលបំភ្លឺផ្លូវរបស់បងប្អូន ដូចជាថ្មនៅក្នុងភេត្រារបស់ពួកសាសន៍យ៉ារេឌ ? តើភេត្រា ឬខ្យល់ដែល « បក់មិនឈប់ឈរឆ្ពោះទៅកាន់ដែនដីសន្យា » នោះអាចតំណាងឲ្យអ្វី ? ( អេធើរ ៦:៨ ) ។ តើបងប្អូនរៀនអ្វីខ្លះមកពីសកម្មភាពរបស់ពួកសាសន៍យ៉ារេឌកាលពីមុន អំឡុងពេល និងបន្ទាប់ពីការធ្វើដំណើរនេះ ? តើព្រះអម្ចាស់កំពុងដឹកនាំបងប្អូនឆ្ពោះទៅកាន់ដែនដីសន្យារបស់បងប្អូនយ៉ាងដូចម្ដេច ?

« ច្រៀងសរសើរតម្កើងដល់ព្រះអម្ចាស់ » ។ ពួកសាសន៍យ៉ារេឌបានសម្តែងនូវការដឹងគុណ និងសេចក្ដីស្រឡាញ់របស់ពួកគេចំពោះព្រះតាមរយៈបទចម្រៀង និងការសរសើរ ( សូមមើល អេធើរ ៦:៩ ) ។ បងប្អូនអាចស្វែងរក ឬបង្កើតឱកាសដើម្បីប្រើតន្ត្រី និងទីបន្ទាល់ដ៏ស្មោះដើម្បីសរសើរដល់ព្រះនៅឯគេហដ្ឋាន និងនៅឯព្រះវិហារផងដែរ ។ ឧទាហរណ៍ វាអាចជាការសមរម្យក្នុងការច្រៀងទំនុកតម្កើងមួយបទ ដូចជាបទ « Praise the Lord with Heart and Voice » ( ទំនុកតម្កើង ល.រ. ៧៣ ) នៅពេលសិក្សា អេធើរ ៦:១–១២ ។

គ្រួសាររបស់សាសន៍យ៉ារេឌនៅក្នុងភេត្រារបស់ពួកគេ — Baby on Board [ ទារកនៅលើទូក ] ដោយ ឃេនឌុល រ៉េយ ចនសុន

អេធើរ ៦:៥–១៨, ៣០; ៩:២៨–៣៥; ១០:១–២

« ដើរយ៉ាងរាបទាបនៅចំពោះព្រះអម្ចាស់ » ។

ថ្វីបើអំនួត និងភាពទុច្ចរិតមើលទៅហាក់ដូចជាមានពេញក្នុងប្រវត្តិសាស្ត្ររបស់ពួកសាសន៍យ៉ារេឌក្ដី ក៏មានគំរូនៃការបន្ទាបខ្លួនជាច្រើននៅក្នុងជំពូកទាំងនេះផងដែរ—ជាពិសេសនៅក្នុង អេធើរ ៦:៥–១៨, ៣០; ៩:២៨–៣៥ និង ១០:១–២ ។ សូមពិចារណាអំពីសំណួរដូចខាងក្រោម ដែលអាចជួយបងប្អូនឲ្យរៀនមកពីគំរូទាំងនេះបាន ៖ ហេតុអ្វីបានជាពួកសាសន៍យ៉ារេឌទាំងនេះបន្ទាបខ្លួននៅក្នុងស្ថានភាពទាំងនេះ ? តើពួកគេបានបង្ហាញនូវការបន្ទាបខ្លួនរបស់ពួកគេតាមរបៀបណា ? តើជាលទ្ធផល ព្រះប្រទានពរដល់ពួកគេដោយរបៀបណា ? សូមពិចារណាអំពីអ្វីដែលបងប្អូនអាចធ្វើដោយស្ម័គ្រចិត្តដើម្បី « ដើរយ៉ាងរាបទាបនៅចំពោះព្រះអម្ចាស់ » ( អេធើរ ៦:១៧ ) ជាជាងត្រូវបានបង្ខំឲ្យរាបទាប ( សូមមើល ម៉ូសាយ ៤:១១–១២; អាលម៉ា ៣២:១៤–១៨ ) ។

សូមមើលផងដែរ ឌែល ជី រិនឡាន់ « Do Justly, Love Mercy, and Walk Humbly with God » Liahona ខែ វិច្ឆិកា ឆ្នាំ ២០២០ ទំព័រ ១០៩–១១២ ។

អេធើរ ៧–១១

ខ្ញុំអាចក្លាយជាអ្នកដឹកនាំដូចជាព្រះគ្រីស្ទបាន ។

ជំពូកទី ៧–១១ នៃគម្ពីរអេធើរមានថ្លែងយ៉ាងហោចណាស់ដល់ទៅ ២៨ ជំនាន់ ។ ទោះបីជាមានសេចក្តីលម្អិតតិចតួចត្រូវបានផ្តល់ឲ្យនៅក្នុងកន្លែងតូចបែបនេះក៏ដោយក្តី ក៏មានគំរូមួយបានលេចឡើងយ៉ាងលឿនអំពីផលវិបាកនៃភាពជាអ្នកដឹកនាំដ៏សុចរិត និងទុច្ចរិត ។ តើបងប្អូនរៀនអ្វីខ្លះអំពីភាពជាអ្នកដឹកនាំមកពីគំរូនេះ—ទាំងអវិជ្ជមាន និងវិជ្ជមាន—នៃស្ដេចដែលបានរាយព្រះនាមនៅខាងក្រោមនេះ ?

អូរៃហា—អេធើរ ៦:៣០; ៧:១
ស៊ូល—អេធើរ ៧:២៣–២៧
យ៉ារេឌ—អេធើរ ៨:១–៧, ១១–១៥
អេមើរ និងកូរីអានទុម—អេធើរ ៩:២១–២៣
ហេត—អេធើរ ៩:២៦–៣០
សែស—អេធើរ ១០:១–២
រីពឡាគិស—អេធើរ ១០:៥–៨
ម៉ូរីអានតុន—អេធើរ ១០:៩–១១
លិប—អេធើរ ១០:១៩–២៨
អេថិម—អេធើរ ១១:១១–១៣
ព្រះយេស៊ូវគ្រីស្ទ—ម៉ាថាយ ១៨:១–៤; ២០:២០–២៨; ២៣:១១

អែលឌើរ ឌៀថើរ អេហ្វ អុជដូហ្វ បានផ្តល់ដំបូន្មានដ៏មានប្រយោជន៍អំពីភាពជាអ្នកដឹកនាំនៅក្នុងសារលិខិតរបស់លោក « The Greatest among You » ( Liahona ខែ ឧសភា ឆ្នាំ ២០១៧ ទំព័រ ៧៨–៨១ ) ។ សូមពិចារណាសិក្សាសារលិខិតនេះ—ជាពិសេសដំណើររឿងទាំងឡាយដែលលោកប្រាប់—គឺការស្វែងរកគោលការណ៍ ឬលំនាំនៃភាពជាអ្នកដឹកនាំដូចជាព្រះគ្រីស្ទ ។ តើបងប្អូនបានឃើញថ្នាក់ដឹកនាំបង្ហាញពីគោលការណ៍ ឬលំនាំទាំងនេះនៅពេលណាដែរ ?

នៅពេលបងប្អូនពិចារណានូវអ្វីដែលបងប្អូនបានរៀន សូមគិតអំពីឱកាសដែលបងប្អូនអាចមានដើម្បីដឹកនាំ ឬមានឥទ្ធិពលទៅលើអ្នកដទៃនៅក្នុងគេហដ្ឋាន សហគមន៍ និងការហៅបម្រើក្នុងសាសនាចក្ររបស់បងប្អូនជាដើម ។ តើបងប្អូនអាចអភិវឌ្ឍគុណសម្បត្តិនៃភាពជាអ្នកដឹកនាំដូចជាព្រះគ្រីស្ទបានយ៉ាងដូចម្ដេច ទោះបីជាបងប្អូនមិនមានភារកិច្ចដឹកនាំជាក់លាក់ក្ដី ?

សូមមើលផងដែរ Gospel Topics « Serving in Church Callings » នៅលើបណ្ណាល័យដំណឹងល្អ; « គោលការណ៍នៃភាពជាអ្នកដឹកនាំនៅក្នុងសាសនាចក្រ » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៤.២ ( នៅលើគេហទំព័រChurchofJesusChrist.org ) ។

អេធើរ ៨:៧–២៦

ព្រះអម្ចាស់មិនធ្វើការនៅក្នុងភាពងងឹតទេ ។

នៅពេលមនុស្សឃុបឃិតគ្នាដើម្បីរក្សាអំពើទុច្ចរិតរបស់ពួកគេជាការសម្ងាត់ នោះពួកគេបានចូលរួមនៅក្នុងបក្សព័ន្ធសម្ងាត់ហើយ ។ បន្ថែមពីលើបក្សព័ន្ធសម្ងាត់ដែលបានពិពណ៌នានៅក្នុង អេធើរ ៨:៧–១៨ ឧទាហរណ៍ផ្សេងទៀតអាចរកបាននៅក្នុង ហេលេមិន ១:៩–១២; ២:២–១១; ៦:១៦–៣០ និង ម៉ូសេ ៥:២៩–៣៣ ។ សូមពិចារណាដាក់ខគម្ពីរទាំងនេះប្រៀបធៀបជាមួយនឹង នីហ្វៃទី២ ២៦:២២–២៤ ដែលនីហ្វៃបានពិពណ៌នាពីរបៀបដែលព្រះអម្ចាស់ធ្វើកិច្ចការរបស់ទ្រង់ ។ តើបងប្អូនគិតថា ហេតុអ្វីមរ៉ូណៃត្រូវបានបញ្ជាឲ្យសរសេរអ្វីដែលលោកបានសរសេរអំពីបក្សព័ន្ធសម្ងាត់ទាំងឡាយ ?

តើបងប្អូនរៀនអ្វីខ្លះមកពីគម្ពីរអេធើរ ដែលអាចជួយបងប្អូនឲ្យទទួលបានពរជ័យដែលបានពិពណ៌នានៅក្នុង អេធើរ ៨:២៦ ?

គំនិតសម្រាប់បង្រៀនកុមារ

អេធើរ ៦:១–១២

ខ្ញុំអាចទុកចិត្តលើព្រះវរបិតាសួគ៌ឲ្យលួងលោមខ្ញុំ នៅពេលខ្ញុំភ័យខ្លាច ។

មនុស្សគ្រប់រូបមានពេលលំបាក—សូម្បីតែក្មេងតូចៗក៏ដោយ ។ ប្រហែលជាបងប្អូនអាចជួយកូនៗរបស់បងប្អូនឲ្យស្វែងរកពាក្យ និងឃ្លានៅក្នុង អរធើរ ៦:១–១២ ដែលបង្ហាញពីរបៀបដែលពួកសាសន៍យ៉ារេឌបានទុកចិត្តលើព្រះនៅក្នុងអំឡុងពេលដ៏លំបាក និងគួរឲ្យខ្លាច ។ សូមពិចារណាចែកចាយជាមួយគ្នានូវបទពិសោធន៍មួយចំនួន នៅពេលដែលព្រះបានជួយដល់បងប្អូនក្នុងអំឡុងពេលដ៏លំបាកនៅក្នុងជីវិតរបស់បងប្អូន ។

អេធើរ ៦:៩, ១២, ៣០; ៧:២៧; ១០:២

ការចងចាំនូវអ្វីដែលព្រះអម្ចាស់បានធ្វើ នាំមកនូវការដឹងគុណ និងសេចក្តីសុខសាន្ត ។

បន្ទាប់ពីការទៅដល់ដែនដីសន្យាដោយសុវត្ថិភាព ពួកសាសន៍យ៉ារេឌបានមានអំណរគុណយ៉ាងខ្លាំងរហូតដល់ពួកគេ « ស្រក់ទឹកភ្នែកដោយសេចក្ដីអំណរ » ( អេធើរ ៦:១២ ) ។ បងប្អូនអាចបំផុសគំនិតកូនៗរបស់បងប្អូនឲ្យមានអំណរគុណចំពោះពរជ័យរបស់ព្រះ ដោយជួយពួកគេឲ្យស្វែងរកឃ្លាមកពី អេធើរ ៦:៩, ១២ ដែលបង្ហាញពីរបៀបដែលពួកសាសន៍យ៉ារេឌបានសម្តែងការដឹងគុណរបស់ពួកគេចំពោះព្រះ ។ កូនៗរបស់បងប្អូនអាចចូលចិត្តច្រៀងដូចជាពួកសាសន៍យ៉ារេឌដែរ បទដែលសម្តែងពីការដឹងគុណដូចជាបទ « ព្រះវរបិតាស្រឡាញ់ខ្ញុំ » ( សៀវភៅចម្រៀងកុមារ ទំព័រ ១៦–១៧ ) ។ សូមឲ្យកូនៗរបស់បងប្អូនប្រាប់បងប្អូនអំពីរឿងមួយចំនួនដែលពួកគេមានអំណរគុណ ។
ប្រហែលជាកូនៗរបស់បងប្អូនអាចអាន អេធើរ ៦:៣០; ៧:២៧ និង ១០:២ ហើយស្វែងរកនូវអ្វីដែលស្ដេចសុចរិតទាំងនេះចងចាំ ។ តើវាប៉ះពាល់ដល់របៀបដែលស្តេចទាំងនោះដឹកនាំប្រជាជនរបស់ពួកទ្រង់យ៉ាងដូចម្ដេច ? បងប្អូន និងកូនៗរបស់បងប្អូនអាចពិភាក្សាអំពីវិធីដើម្បីរំឭកខ្លួនឯងអំពីអ្វីដែលព្រះបានធ្វើសម្រាប់យើង ។ ឧទាហរណ៍ ប្រហែលជាកូនៗរបស់បងប្អូនអាចសរសេរអំពីរឿងនោះ ឬគូររូបភាពក៏បាន ។ បងប្អូនអាចណែនាំថា ពួកគេគួរតែមានទម្លាប់ទៀងទាត់មួយក្នុងការកត់ត្រាពរជ័យដែលពួកគេកត់សម្គាល់ថាបានមកពីព្រះ ( សូមមើល « O Remember, Remember » [ វីដេអូ ] នៅលើបណ្ណាល័យដំណឹងល្អ ) ។

អេធើរ ៧:២៤–២៧

ខ្ញុំមានពរ នៅពេលខ្ញុំធ្វើតាមព្យាការីរបស់ព្រះ ។

ប្រហែលជាបងប្អូន និងកូនៗរបស់បងប្អូននឹងរីករាយក្នុងការសម្តែងរឿងមួយចំនួនដែលព្យាការីបានបង្រៀនយើងឲ្យធ្វើ ។ បងប្អូនថែមទាំងអាចប្តូរវាទៅជាល្បែងមួយផងដែរ ដែលបងប្អូនទាយថាតើសកម្មភាពនេះតំណាងឲ្យអ្វី ។ ការណ៍នេះអាចរៀបចំកូនៗរបស់បងប្អូនឲ្យពិភាក្សាអំពីមូលហេតុដ៏សំខាន់ដើម្បីធ្វើតាមព្យាការីរបស់ព្រះ ។ បន្ទាប់មក បងប្អូនអាចអាន អេធើរ ៧:២៤–២៧ ដើម្បីស្វែងយល់អំពីអ្វីដែលបានកើតឡើង នៅពេលដែលមនុស្សគោរពតាមព្យាការីរបស់ព្រះ ។ តើការធ្វើតាមព្យាការីនៅសព្វថ្ងៃនេះប្រទានពរដល់យើងដោយរបៀបណា ?

អេធើរ ៩:២៨–៣៥; ១១:៥–៨

ព្រះអម្ចាស់មានសេចក្តីមេត្តាករុណា នៅពេលខ្ញុំប្រែចិត្ត ។

ការស្វែងរកលំនាំគឺជាជំនាញសិក្សាព្រះគម្ពីរដ៏មានប្រយោជន៍មួយ ។ គម្ពីរអេធើរមានលំនាំដដែលៗដែលគូសបញ្ជាក់អំពីសេចក្ដីមេត្តាករុណារបស់ព្រះអម្ចាស់ ។ ដើម្បីជួយកូនៗរបស់បងប្អូនឲ្យរកឃើញលំនាំនេះ សូមអញ្ជើញពួកគេឲ្យអាន អេធើរ ៩:២៨–៣៥ និង អេធើរ ១១:៥–៨ ដោយស្វែងរកភាពស្រដៀងគ្នារវាងដំណើររឿងទាំងពីរនេះ ។ តើយើងរៀនអ្វីខ្លះមកពីដំណើររឿងទាំងនេះ ? ប្រហែលជាកូនៗរបស់បងប្អូនអាចស្វែងរករូបភាពនៅក្នុង សៀវភៅរូបភាពដំណឹងល្អ អំពីមនុស្សដទៃទៀតនៅក្នុងព្រះគម្ពីរដែលបានប្រែចិត្ត ហើយត្រូវបានអភ័យទោស ។

សម្រាប់គំនិតបន្ថែម សូមមើលទស្សនាវដ្ដី ប្រិយមិត្ត ប្រចាំខែនេះ ។

ភេត្រារបស់ពួកសាសន៍យ៉ារេឌនៅលើសមុទ្រ — Jaredite Barges [ ភេត្រារបស់ពួកសាសន៍យ៉ារេឌ ] ដោយ ហ្គែរី អើណេស ស្ម៊ីធ

ទំព័រសកម្មភាព ៖ ព្រះវរបិតាសួគ៌បានជួយពួកសាសន៍យ៉ារេឌឲ្យសាងសង់ភេត្រា