« ថ្ងៃទី ១១–១៧ ខែ វិច្ឆិកា ៖ ‹ ហែកវាំងនននៃការឥតជំនឿ › ។ អេធើរ ១–៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )
« ថ្ងៃទី ១១–១៧ ខែ វិច្ឆិកា ។ អេធើរ ១–៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៣ )
The Jaredites Leaving Babel [ ពួកសាសន៍យ៉ារេឌកំពុងចាកចេញពីប៉មបាបិល ] ដោយ អាលប៊ីន វេសេលកា
ថ្ងៃទី ១១–១៧ ខែ វិច្ឆិកា ៖ « ហែកវាំងនននៃការឥតជំនឿ »
អេធើរ ១–៥
ខណៈដែលវាគឺជាការពិតថា របៀបរបស់ព្រះគឺខ្ពស់ជាងរបៀបរបស់យើង ហើយយើងគួរតែចុះចូលទៅតាមព្រះឆន្ទៈរបស់ទ្រង់ជានិច្ច ទ្រង់ក៏លើកទឹកចិត្តយើងឲ្យគិត និងធ្វើសកម្មភាពដោយខ្លួនយើងផងដែរ ។ នោះជាមេរៀនមួយដែលយ៉ារេឌ និងបងប្រុសរបស់លោកបានរៀន ។ ឧទាហរណ៍ គំនិតនៃការធ្វើដំណើរទៅកាន់ដែនដីថ្មីមួយដែលជា « ជម្រើសលើដែនដីទាំងអស់នៃផែនដី » ហាក់ដូចជាចាប់ផ្ដើមដោយ យ៉ារេឌ ហើយព្រះអម្ចាស់បានប្រទានតាមសំណើនេះដោយមានបន្ទូលទៅបងប្រុសរបស់យ៉ារេឌថា « ម្ល៉ោះហើយ យើងនឹងធ្វើសម្រាប់អ្នក ដោយព្រោះអ្នកបានអំពាវនាវដល់យើងអស់ពេលដ៏យូរយ៉ាងនេះ » ( សូមមើល អេធើរ ១:៣៨–៤៣ ) ។ ហើយនៅពេលដែលបងប្រុសរបស់យ៉ារេឌត្រូវការពន្លឺនៅក្នុងភេត្រា ដែលនឹងនាំពួកគេទៅកាន់ដែនដីដែលបានសន្យារបស់ពួកគេ នោះព្រះអម្ចាស់បានសួរសំណួរមួយ ដែលយើងតែងតែសួរ ទ្រង់ ថា ៖ « តើអ្នកចង់ឲ្យយើងធ្វើអ្វី ? » ( អេធើរ ២:២៣ ) ។ ទ្រង់ចង់ឮនូវគំនិត និងបញ្ញារបស់យើង ហើយទ្រង់នឹងព្រះសណ្ដាប់ ហើយប្រទានការបញ្ជាក់របស់ទ្រង់ ឬប្រទានការទូន្មានផ្សេងៗដល់យើងបើទ្រង់មិនប្រទានតាមសំណើទេនោះ ។ ពេលខ្លះ រឿងដែលបំបែកយើងចេញពីពរជ័យនានាដែលយើងស្វែងរកនោះគឺ « វាំងនននៃការឥតជំនឿ » ហើយបើយើងអាច « ហែកវាំងនន » ( អេធើរ ៤:១៥ ) នោះចោលបាន នោះយើងប្រហែលជាភ្ញាក់ផ្អើលចំពោះអ្វីដែលព្រះអម្ចាស់កំពុងមានព្រះឆន្ទៈចង់ធ្វើដើម្បីយើង ។
សូមមើលផងដែរ « The Lord Appears to the Brother of Jared » ( វីដេអូ ) នៅលើបណ្ណាល័យដំណឹងល្អ ។
គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ
នៅពេលខ្ញុំទូលទៅកាន់ព្រះអម្ចាស់ ទ្រង់នឹងមានព្រះហឫទ័យអាណិតអាសូរដល់ខ្ញុំ ។
អេធើរ ១:៣៣–៤៣ ប្រាប់អំពីការអធិស្ឋានបីយ៉ាងរបស់បងប្រុសរបស់យ៉ារេឌ ។ តើបងប្អូនរៀនអ្វីខ្លះមកពីការឆ្លើយតបរបស់ព្រះអម្ចាស់ចំពោះការអធិស្ឋាននីមួយៗទាំងនេះ ? សូមគិតអំពីគ្រាមួយដែលបងប្អូនមានបទពិសោធន៍អំពីសេចក្តីអាណិតអាសូររបស់ព្រះអម្ចាស់ នៅពេលបងប្អូនទូលទៅទ្រង់នៅក្នុងការអធិស្ឋាន ។ បងប្អូនអាចនឹងចង់កត់ត្រានូវបទពិសោធន៍នេះ ហើយចែកចាយវាជាមួយនឹងនរណាម្នាក់ដែលអាចនឹងត្រូវការស្ដាប់ឮទីបន្ទាល់របស់បងប្អូន ។
សូមមើលផងដែរ « ការអធិស្ឋានស្ងប់ស្ងាត់ » ទំនុកតម្កើង ល.រ. ៧៨ ។
ខ្ញុំអាចទទួលវិវរណៈសម្រាប់ជីវិតរបស់ខ្ញុំបាន ។
ប្រធាន រ័សុល អិម ណិលសុន បានមានប្រសាសន៍ថា « ខ្ញុំសូមអង្វរបងប្អូនឲ្យបង្កើនសមត្ថភាពខាងវិញ្ញាណរបស់បងប្អូនដើម្បីទទួលបានវិវរណៈ ។… សូមជ្រើសធ្វើកិច្ចការខាងវិញ្ញាណដែលបានតម្រូវឲ្យធ្វើ ដើម្បីរីករាយនឹងអំណោយទាននៃព្រះវិញ្ញាណបរិសុទ្ធ ហើយស្ដាប់ឮព្រះសូរសៀងនៃព្រះវិញ្ញាណឲ្យបានញឹកញាប់ ហើយកាន់តែច្បាស់ » ( « Revelation for the Church, Revelation for Our Lives » Liahona ខែ ឧសភា ឆ្នាំ ២០១៨ ទំព័រ ៩៦ ) ។
នៅពេលបងប្អូនសិក្សា អេធើរ ២; ៣:១–៦; ៤:៧–១៥ តើបងប្អូនបានរៀនអ្វីខ្លះអំពី « កិច្ចការខាងវិញ្ញាណ » ដែលប្រធាន ណិលសុន បានមានប្រសាសន៍នេះ ? បងប្អូនអាចគូសចំណាំដោយពណ៌មួយទៅលើសំណួរ ឬកង្វល់ដែលបងប្រុសរបស់យ៉ារេឌមាន និងអ្វីដែលលោកបានធ្វើ ហើយយកពណ៌មួយទៀតដើម្បីបងប្អូនគូសចំណាំអំពីរបៀបដែលព្រះអម្ចាស់បានជួយដល់លោក និងបានប្រាប់ពីព្រះទ័យរបស់ទ្រង់ឲ្យលោកបានដឹង ។
ទាំងនេះគឺជាសំណួរមួយចំនួនដើម្បីជួយបងប្អូនឲ្យចាប់ផ្ដើម ៖
-
តើបងប្អូនចាប់អារម្មណ៍អ្វីខ្លះ អំពីវិធីដែលព្រះអម្ចាស់ឆ្លើយតបទៅនឹងសំណួររបស់បងប្រុសរបស់យ៉ារេឌនៅក្នុង អេធើរ ២:១៨–២៥ ?
-
តើបងប្អូនអាចប្រើ អេធើរ ៣:១–៥ ដើម្បីជួយនរណាម្នាក់ដែលកំពុងរៀនពីរបៀបអធិស្ឋានយ៉ាងដូចម្ដេច ?
-
តើអ្វីដែលអាចរារាំងបងប្អូនមិនឲ្យទទួលវិវរណៈមកពីព្រះអម្ចាស់ ? ( សូមមើល អេធើរ ៤:៨–១០ ) ។ តើបងប្អូនអាចទទួលបានវិវរណៈមកពីទ្រង់កាន់តែញឹកញាប់ដោយរបៀបណា ? ( សូមមើល អេធើរ ៤:៧, ១១–១៥ ) ។
-
តើបងប្អូនគិតថា វាមានន័យយ៉ាងណាដើម្បី « ហែកវាំងនននៃការឥតជំនឿ » នៅក្នុងជីវិតរបស់បងប្អូនចោល ( អេធើរ ៤:១៥ ) ។
តើបងប្អូនរៀនអ្វីទៀតពីបងប្រុសរបស់យ៉ារេឌអំពីវិវរណៈផ្ទាល់ខ្លួន ?
អែលឌើរ ឌែល ជី រិនឡាន់ បានបង្រៀនអំពី « A Framework for Personal Revelation » ( Liahona ខែ វិច្ឆិកា ឆ្នាំ ២០២២ ទំព័រ ១៦–១៩ ) ។ សូមពិចារណាគូរស៊ុមរូបភាព និងសរសេរធាតុទាំងបួននៃលក្ខខណ្ឌនៅលើផ្នែកនីមួយៗ ។ តើលក្ខខណ្ឌនេះអាចជួយបងប្អូនឲ្យ « បង្កើនសមត្ថភាពរបស់បងប្អូនដើម្បីទទួលបានវិវរណៈ » ដោយរបៀបណា ?
សូមមើលផងដែរ Gospel Topics « Personal Revelation » នៅលើបណ្ណាល័យដំណឹងល្អ ។
តាមរយៈការវាយផ្ចាលរបស់ទ្រង់ ព្រះអម្ចាស់អញ្ជើញខ្ញុំឲ្យប្រែចិត្ត ហើយមករកទ្រង់ ។
សូម្បីតែព្យាការីដ៏អស្ចារ្យដូចបងប្រុសរបស់យ៉ារេឌក៏ត្រូវព្រះអម្ចាស់វាយផ្ចាលដែរ ។ តើបងប្អូនរៀនអ្វីខ្លះមកពី អេធើរ ២:១៤–១៥ អំពីការវាយផ្ចាលរបស់ព្រះអម្ចាស់ ? សូមគិតអំពីរបៀបដែលការវាយផ្ចាលរបស់ព្រះអម្ចាស់ និងការឆ្លើយតបរបស់បងប្រុសរបស់យ៉ារេឌ អាចបានជួយរៀបចំលោកសម្រាប់បទពិសោធន៍របស់លោកនៅក្នុង អេធើរ ៣:១–២០ ។
ព្រះអម្ចាស់នឹងរៀបចំខ្ញុំឲ្យឆ្លងកាត់ « ទីជម្រៅដ៏ធំ » របស់ខ្ញុំ ។
ពេលខ្លះការឆ្លងកាត់ « ទីជម្រៅដ៏ធំ » គឺជាវិធីតែមួយគត់ដើម្បីបំពេញតាមព្រះទ័យរបស់ព្រះសម្រាប់យើង ។ តើបងប្អូនមើលឃើញភាពស្រដៀងគ្នាអ្វីខ្លះនៅក្នុង អេធើរ ២:១៦–២៥ ទៅនឹងជីវិតរបស់បងប្អូន? តើព្រះអម្ចាស់បានរៀបចំបងប្អូនសម្រាប់ឧបសគ្គនានារបស់បងប្អូនយ៉ាងដូចម្តេច ? តើទ្រង់សុំឲ្យបងប្អូនធ្វើអ្វីខ្លះនៅពេលឥឡូវនេះ ដើម្បីត្រៀមខ្លួនសម្រាប់អ្វីដែលទ្រង់តម្រូវឲ្យបងប្អូនធ្វើនៅពេលអនាគត ?
សូមមើលផងដែរ អិល ថត បាជច៍ « Consistent and Resilient Trust » Liahona ខែ វិច្ឆិកា ឆ្នាំ ២០១៩ ទំព័រ ៤៧–៤៩ ។
សូមអនុវត្តអ្វីដែលបងប្អូនរៀន ។ ការសិក្សាដំណឹងល្អគួរតែបំផុសគំនិតយើងឲ្យផ្លាស់ប្ដូរជីវិតរបស់យើង ។ បន្ទាប់ពីអាន អេធើរ ៤:១១–១២ ហើយ បងប្អូនអាចនឹងរាយបញ្ជីឥទ្ធិពលមួយចំនួននៅក្នុងជីវិតរបស់បងប្អូន ហើយពិចារណាថាតើឥទ្ធិពលទាំងនោះបញ្ចុះបញ្ចូលបងប្អូនឲ្យធ្វើអំពើល្អឬយ៉ាងណា ។ តើបងប្អូនមានអារម្មណ៍បំផុសគំនិតឲ្យធ្វើការផ្លាស់ប្តូរអ្វីខ្លះ ?
សាក្សីទាំងឡាយថ្លែងទីបន្ទាល់អំពីភាពពិតពេញលេញនៃព្រះគម្ពីរមរមន ។
នៅពេលដែលបងប្អូនអានការព្យាកររបស់មរ៉ូណៃនៅក្នុង អេធើរ ៥ សូមពិចារណាអំពីគោលបំណងរបស់ព្រះអម្ចាស់នៅក្នុងការរៀបចំសាក្សីជាច្រើននៃព្រះគម្ពីរមរមន ។ តើសាក្សីណាខ្លះដែលបានបំផុសគំនិតបងប្អូនឲ្យជឿថា ព្រះគម្ពីរមរមនគឺជាព្រះបន្ទូលរបស់ព្រះ ? តើព្រះគម្ពីរមរមនបានបង្ហាញបងប្អូននូវ « ព្រះចេស្ដានៃព្រះ និងព្រះបន្ទូលរបស់ទ្រង់ផង ដោយរបៀបណា ? ( អេធើរ ៥:៤ ) ។
គំនិតសម្រាប់បង្រៀនកុមារ
ព្រះវរបិតាសួគ៌ព្រះសណ្ដាប់ ហើយឆ្លើយតបការអធិស្ឋានរបស់ខ្ញុំ ។
-
ប្រសិនបើបងប្អូនចេះភាសាមួយដែលកូនៗរបស់បងប្អូនមិនចេះទេ សូមផ្តល់ការណែនាំសាមញ្ញមួយចំនួននៅក្នុងភាសានោះ ( ឬចាក់សំឡេងជាភាសាផ្សេងទៀត ) ។ បងប្អូនអាចប្រើវិធីនេះដើម្បីពន្យល់អំពីមូលហេតុដែលបងប្រុសរបស់យ៉ារេឌបានអធិស្ឋានសូមជំនួយនៅក្នុង អេធើរ ១:៣៣–៣៧ ។ សូមសង្កត់ធ្ងន់លើព្រះទ័យរបស់ព្រះអម្ចាស់ចំពោះការអធិស្ឋាននេះ និងរបៀបដែលទ្រង់បានឆ្លើយតប ( សូមមើលផងដែរ « ជំពូកទី ៥០ ៖ ពួកសាសន៍យ៉ារេឌចាកចេញពីទីក្រុងបាបិល » ដំណើររឿងព្រះគម្ពីរមរមន ទំព័រ ១៤៣–១៤៤ ) ។
-
កូនៗរបស់បងប្អូនអាចសម្តែងធ្វើជាសង់ភេត្រា នៅពេលបងប្អូនអាននៅក្នុង អេធើរ ២:១៦–១៧ ។ បន្ទាប់មក បងប្អូន និងកូនៗរបស់បងប្អូនអាចអានអំពីបញ្ហាដែលពួកសាសន៍យ៉ារេឌមានជាមួយនឹងភេត្រារបស់ពួកគេ ( សូមមើល អេធើរ ២:១៩ ) និងវិធីផ្សេងៗទៀតដែលព្រះអម្ចាស់បានឆ្លើយតបទៅនឹងការអធិស្ឋានរបស់បងប្រុសរបស់យ៉ារេឌ ( សូមមើល អេធើរ ២:១៩–២៥; ៣:១–៦ ) ។ ទំព័ររូបភាព និងសកម្មភាពនៅចុងបញ្ចប់នៃគម្រោងមេរៀននេះអាចជួយបងប្អូន និងកូនៗរបស់បងប្អូនឲ្យប្រាប់ដំណើររឿងនេះបាន ។ តើយើងរៀនអ្វីខ្លះមកពីបងប្រុសរបស់យ៉ារេឌអំពីការអធិស្ឋាន ? សូមចែកចាយបទពិសោធន៍មួយដែលបងប្អូនបានអធិស្ឋានទូលសូមជំនួយ ហើយព្រះវរបិតាសួគ៌បានជួយដល់បងប្អូន ។
ខ្ញុំត្រូវបានបង្កើតតាមរូបភាពនៃព្រះ ។
-
កាលកូនៗរបស់បងប្អូនធំឡើង នោះពួកគេនឹងប្រឈមមុខនឹងសារលិខិតខុសឆ្គងច្រើនអំពីព្រះ អំពីខ្លួនពួកគេ និងរូបកាយរបស់ពួកគេផងដែរ ។ បងប្អូនអាចសុំឲ្យពួកគេជួយបងប្អូនស្វែងរកសេចក្ដីពិតអំពីប្រធានបទទាំងនេះនៅក្នុង អេធើរ ៣:៦–១៦ ។ ដើម្បីបញ្ជាក់ពីសេចក្ដីពិតដែលបានបង្រៀននៅក្នុង អេធើរ ៣:១៣, ១៥ បងប្អូនអាចមើលរូបភាពព្រះអង្គសង្គ្រោះជាមួយគ្នា ហើយអញ្ជើញកូនៗរបស់បងប្អូនឲ្យចង្អុលទៅផ្នែកផ្សេងៗនៃព្រះកាយរបស់ទ្រង់ ។ បន្ទាប់មក ពួកគេអាចចង្អុលទៅផ្នែកនៃរាងកាយរបស់ពួកគេ ។ បងប្អូនក៏អាចច្រៀងជាមួយគ្នានូវបទចម្រៀងមួយបទ ដែលទាក់ទងទៅនឹងរូបរាងកាយរបស់យើងដូចជាបទ « ព្រះបានប្រទានវិហារឲ្យខ្ញុំ » ( សៀវភៅចម្រៀងកុមារ ទំព័រ ៧៣ ) ។ បងប្អូន និងកូនៗរបស់បងប្អូនអាចនិយាយអំពីមូលហេតុដែលបងប្អូនមានអំណរគុណចំពោះរូបកាយរបស់បងប្អូន ។
យើងត្រូវបានបង្កើតតាមរូបភាពនៃព្រះ
សាក្សីបីនាក់បានថ្លែងទីបន្ទាល់អំពីព្រះគម្ពីរមរមន ។
-
មរ៉ូណៃបានបញ្ជាក់ថា សាក្សីទាំងបីនាក់នឹងជួយបង្កើតសេចក្ដីពិតនៃព្រះគម្ពីរមរមន ។ ដើម្បីបង្រៀនពីអត្ថន័យនៃពាក្យសាក្សី បងប្អូនអាចសុំឲ្យកូនៗរបស់បងប្អូនពិពណ៌នាពីអ្វីដែលពួកគេបានឃើញ ឬមានបទពិសោធន៍ដែលអ្នកដទៃមិនបានឃើញ ឬមានបទពិសោធន៍ ។ នៅពេលបងប្អូនអាន អេធើរ ៥ ជាមួយគ្នា បងប្អូនអាចនិយាយអំពីមូលហេតុដែលព្រះប្រើសាក្សីនៅក្នុងកិច្ចការរបស់ទ្រង់ ។ បងប្អូនក៏អាចចែកចាយជាមួយគ្នាទៅវិញទៅមកផងដែរ អំពីរបៀបដែលបងប្អូនដឹងថា ព្រះគម្ពីរមរមនគឺពិត និងរបៀបដែលបងប្អូនអាចចែកចាយសាក្សីរបស់បងប្អូនជាមួយអ្នកដទៃបាន ។
សម្រាប់គំនិតបន្ថែម សូមមើលទស្សនាវដ្ដី ប្រិយមិត្ត ប្រចាំខែនេះ ។
Sowest Thou More Than This? [ តើអ្នកបានឃើញអ្វីក្រៅពីនេះទេ ? ] ដោយ ម៉ាកុស អាឡិន វិនសិន