Ether ej Tilekek ilo Ro̧n̄in Dekā eo, jān Gary Ernest Smith

Nobōm̧ba 25–Tijem̧ba 1: “Kōn Tōmak Men Otemjeļo̧k Rej Kūrm̧ool”

Ether 12–15

Kanaan ko an Ether n̄an riJared ro raar “men ko reļļap im kabwilōn̄lōn̄” (Ether 12:5). Eaar “kanooj ba n̄an er kōn men ko otemjeļo̧k, jān jino in armej” (Ether 13:2). Eaar lo “raan ko an Kraist” im Jerusalem Ekāāl ilo Raan-ko Ālikatata (Ether 13:4). Im eaar ekōnono kōn “kōjatdikdik ilo m̧ool kōn laļ eo em̧m̧anļo̧k, aaet, em̧ool jikin eo ianbwijmaron̄ in pein Anij” (Ether 12:4). Bōtaab riJared ro raar joļo̧k naan ko an, kōn ejja un eo wōt armej ro emakijkij aer joļo̧k naan in kanaan ko an ro rikarejeran Anij rainin—“kōnke raar jab [loi]” (Ether 12:5). Ebōk tōmak n̄an tōmak ilo kallim̧ur ko ak kakkōl ko kōn men ko jejjab maron̄ loi, ejja āinwōt eaar bōk tōmak an Ether n̄an kanaan kōn “men ko reļļap im kabwilōn̄lōn̄” n̄an armej ro ejjeļo̧k aer tōmak. Eaar bōk tōmak n̄an Moronai n̄an lōke bwe Irooj emaron̄ bōk an “m̧ōjņo̧ ilo jeje” im ukōte n̄an kajoor (lale Ether 12:23–27). Ej kain tōmak eo me ej kōm̧m̧an bwe jen “pen im dim, iien otemjej baptoa ilo jerbal ko rem̧m̧an, in kar tōl n̄an kaiboojoj Anij” (Ether 12:4). Im ej kain tōmak eo me “men otemjeļo̧k renaaj kūrm̧ool” (Ether 12:3).

Ļōmnak ko n̄an Ekkatak ilo M̧weeo im ilo Kabun̄

Ether 12

Tōmak ilo Jisōs Kraist emaron̄ tōlļo̧k n̄an menin bwilōn̄ ko.

Ejjeļo̧k oktak tōre in, jen kar tōre ko an Ether, bwe armej ro raar kōņaan lo kam̧ool m̧okta jen tōmak ilo Anij im An kajoor. Ta eo kwoj katak jān Alma 12:5–6 kōn ļōmņak in?

Ilo am̧ riiti Ether 12, kwomaron̄ jeje kakeememej aolep iien kwoj loe naan eo “tōmak.” Ļōmņake ta kajjojo jon̄ak ej kwaļo̧k kōn tōmak. Kajjitōk ko āinwōt kein emaron̄ jipan̄: Ta in tōmak? Ta meļeļe in n̄an kōjerbal tōmak? Ta ko leen tōmak ilo Jisōs Kraist? Kwomaron̄ barāinwōt je ļōmņak ko am̧ kōn kam̧ool ko kwar būki “ālikin mālejjon̄ in ami tōmak” (Ether 12:6).

Lale Russell M. Nelson, “Kraist Em̧ōj an Jerkakpeje; Tōmak ilo E Enaaj Kōm̧akūt Toļ ko,” Liaona, Māe 2021, 101–4.

Kōtļo̧k an ro jet kwaļo̧k, im jet iien rikaki. Em̧m̧anļo̧k an armej jeļā n̄e ej wōr aer iien n̄an kwaļo̧k ta eo rej jeļā ak bōlen katakin ilo bar juon wāween. Men̄e ilo m̧weeo ak ilo kabun̄, ļōmņak in kōtļo̧k an ro jet, ekoba jodikdik ro, n̄an kwaļo̧k m̧ōttan katak eo.

Ether 12:1–9, 28, 32

Jisōs Kraist ej letok n̄an kōj “juon kōjatdikdik eļapļo̧k an em̧m̧an.”

Ilo kakobaba n̄an ļōmņak ko rem̧wilaļ kōn tōmak, Ether 12 ebar lōn̄ men ko ej kwaļo̧k kōn kōjatdikdik. Kōtļo̧k bwe kajjitōk kein ren tōl am̧ ekkatak.

• Ta kar un ko me Ether eaar wōr ippān n̄an “kōjatdikdik ilo m̧ool kōn laļ eo em̧m̧anļo̧k”? (lale Ether 12:2–5).

• Ta jibadbad eo an juon an̄kō? Ta eo kōjatdikdik ej kōm̧m̧ane n̄an jetōb eo am̧ ejjeļo̧k oktak jen ta eo juon an̄kō ej kōm̧m̧ane n̄an juon wa? (lale Ether 12:4).

• Ta eo jej aikuj kōjatdikdik kake? (lale Ether 12:4; Moronai 7:41).

• Elmen an gospel eo an Jisōs Kraist kar lewaj n̄an kwe “juon kōjatdikdik em̧m̧anļo̧k”? (Ether 12:32).

Bar lale Moronai 7:40–41; Jeffrey R. Holland, “Juon Kōjatdikdik Emeram,” Liaona, Māe 2020, 81–84.

Ether 12:23–29

Jisōs Kraist emaron̄ ukōt m̧ōjņo̧ ko aō n̄an kajoor.

N̄e jej riiti jeje ko rekajoor an Moronai, epidodo n̄an meļo̧kļo̧k bwe eaar inepata kōn “m̧ōjņo̧ ilo jeje” eo an im kar mijak bwe armej ro renaaj kar kajirere kōn naan ko an (lale Ether 12:23–25 N̄e kwaar en̄jake m̧ōk kōn m̧ōjņo̧ ko am̧ make, riit kōn en̄taan ko an Moronai—im uwaak eo an Rilo̧mo̧o̧r—ilo Ether 12:23–29) Kwomaron̄ bar kōļmenļo̧kjeņ kōn tōre eo Jisōs Kraist ekar jipan̄ eok kile am̧ m̧ōjņo̧ im kōm̧m̧an bwe kwon kajoor—men̄e Ekar jab lukkuun joļo̧ki. Bar ļōmņak kōn m̧ōjņo̧ ko kwoj mour kaki kiiō. Ta eo kwoj aikuj kōm̧m̧ane n̄an bōk kallim̧ur eo an Rilo̧mo̧o̧r n̄an “kōm̧m̧an mennin m̧ōjņo̧ ko ren erom kajoor”? (Ether 12:27).

Ļōmņak in lale eoon kein ilaļ n̄an lale elmen an ro jet ilo eoon kein kar bōk kajoor jen jouj eo an Jisōs Kraist:

• Inōk (Moses 6:31–34; 7:13)

• Moses (Exodus 4:10–12; 14:31)

• Gideon (Ri Ekajet ro 6:12–16; 8:22–23)

• Piter (Luk 5:8–10; 22:55–62; Jerbal 4:13–21)

• Moronai (Ether 12:23–29)

• Josep Smith (Josep Smith—Bwebwenato 1:28; Katak im Bujen Ko 35:17; 135:3)

Bar lale Unin Kōnono ko an Gospel, “Grace,” Gospel Ļaibrāre; “The Lord Is My Light,” Hymns, no. 89.

Ether 13:13–22; 14–15

Kōjekdo̧o̧n rikanaan ro an Irooj ej likūt eō ilo jetōbin kauwōtata.

Āinwōt juon kiin̄ an riJared ro, ilo bwebwenato, ekar juon jerbal ekauwōtata. Menin eaar eļap tata m̧ool n̄an Koriantumur, lōn̄ in wōt “ em̧m̧aan ekajoor … kappukot n̄an ko̧kkure e” (Ether 13:15–16). Ilo Ether 13:15–22, kile ta eo Koriantumur eaar kōm̧m̧ane n̄an kōjparok e make im ta eo rikanaan Ether eaar kapilōk e n̄an kōm̧m̧ane ijello̧kin. Ilo am̧ riiti aolepān bok in Ether, kōlmenļo̧kjeņ kōn kaje ko kōn kōjekdo̧o̧n rikanaan ro. Ta eo ej waļo̧k n̄an armej ro ke “Jetōb eo an Irooj [ej] bōjrak an m̧akūtkūt ippāer”? (Ether 15:19). Ta eo Irooj ej kōņaan bwe kwon ekkatak jān bwebwenato kein? Ļōmņake ta eo kwonaaj kōm̧m̧ane n̄an ļoor rikanaan ro An.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

Ether 12:6–22

Tōmak ej tōmak ilo men ko jejjab loi.

• Ļōmņak in jipan̄ ajri ro nejum̧ āliji ippam̧ “Tōmak ej men ko kōjatdikdik kaki im jab loi” jān Ether 12:6. Kwaļo̧k pija ko rej kwaļo̧k kōn waanjon̄ak ko an tōmak ilo Ether 12:13–15, 19–21 (lale Gospel Art Book, no. 78, 85, im peij in m̧akūtkūt eo an wiik in). Kōtļo̧k bwe ajri ro nejum̧ ren kōmeļeļeik ta eo rejeļā kōn kajjojo bwebwenato. Errein jet iaan kajjitōk ko n̄an jipan̄ eok kōnono kōn waanjon̄ak ko an tōmak.

  • Ta eo armej ro rekar kōjatdikdik kake?

  • Elmen an kar mālijjon̄ tōmak eo aer?

  • Ta eo ekar waļo̧k kōn wōt aer tōmak?

  Kwomaron̄ bar kwaļo̧k en̄jake ko ilo am̧ kōjerbal tōmak.

Ether 12:4, 32

Kōjatdikdik ej āinwōt juon emjak n̄an aō jetōb.

• N̄an meļeļe ta eo Ether 12:4 ej katakin kōn kōjatdikdik, kwe im ajri ro nejum̧ maron̄ lale juon pija in juon tim̧a im juon an̄kō. Etke tim̧a ko raikuj an̄kō? Ta eo enaaj waļo̧k n̄an juon tim̧a n̄e ejjeļo̧k an an̄kō? Ilo am̧ riiti Ether 12:4 ippān doon, kōnono elmen an kōjatdikdik jipan̄ kōj ilo wāween an an̄kō eo jipan̄ tim̧a eo. Kajjitōk ippān ajri ro nejum̧ n̄an jin̄aik juon pijain tim̧a im juon an̄kō bwe ren maron̄ katakin doon kake kōn kōjatdikdik.

• N̄e ajri ro nejum̧ raikuj meļeļein kōjatdikdik, jipan̄ er pukote ilo Unin Tōl n̄an Jeje ko Rekwojarjar, “Hope” (Gospel Library). Ekkar n̄an kōmeļeļein ilo Ether 12:4, 32, ta eo jej aikuj in kōjatdikdik kake? (bar lale Moronai 7:40–42). Jipan̄ ajri ro ļōmņake naan ko jet kōn kōjatdikdik, ippān naan ko me rej oktakin kōjatdikdik. Kwomaron̄ bar kwaļo̧k n̄an doon m̧ool ko jet an gospel in me ej lewaj n̄an eok kōjatdikdik.

Ether 12:23–29

Jisōs Kraist emaron̄ jipan̄ eō bwe in kajoor.

• Jet iien ajri ro rej ioon jekjek ko n̄e rej en̄jake m̧ōjņo̧, āinwōt kar Moronai. Jipan̄ ajri ro nejum̧ lo unin an Moronai kar en̄jake wāween in ilo Ether 12:23–25, im kajjitōk ippāer n̄e rekar en̄jake ejja en̄jake rot in. Innām kajjitōk ippāer n̄an riiti eoon 26–27 im pukote elmen an Irooj kar jipan̄ Moronai.

• Bōlen ajri ro nejum̧ remaron̄ jin̄aik juon men eo em̧ōjņo̧ im juon men ekajoor. Innām kajjitōk ippāer n̄an kobaik naan ko ilo jin̄a ko aer jān Ether 12:23–29 me ej kwaļo̧k ewi wāween an Rilo̧mo̧o̧r maron̄ jipan̄ kōj ukōt m̧ōjņo̧ ko ad n̄an kajoor. Rōjan̄ ajri ro nejum̧ n̄an ļōmņake juon m̧ōjņo̧ eo ewōr ippāer im pukot jipan̄ eo an Rilo̧mo̧o̧r n̄an erom̧ kajoor. Kwomaron̄ bar kwaļo̧k juon en̄jake me Rilo̧mo̧o̧r eaar jipan̄ eok erom kajoor n̄an kōm̧m̧ane juon men epen.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Naan in Kanaan ko an Ether Raar Kabwilōn̄lōn̄, jān Walter Rane