Xtiqb’al li aatin C

Choq’ re li Tzoleb’aal reheb’ li Kok’al—Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak

Eb’ li b’ich reheb’ li kok’al numtajenaq xwankileb’ re xtenq’ankileb’ li kok’al chi tzolok chirix lix k’uub’anb’il na’leb’ li qaChoxahil Yuwa’ re sahil ch’oolejil ut chirixeb’ li na’leb’ re lix evangelio li Jesukristo. Naq eb’ li kok’al neke’b’ichan chirixeb’ li na’leb’ re li evangelio, li Santil Musiq’ej naxch’olob’ xyaalalileb’ li na’leb’ a’an. Eb’ li aatin ut li son te’kanaaq sa’ xk’a’uxleb’ ut raameb’ li kok’al chiru chixjunil lix yu’ameb’.

Sik’omaq xtenq’ li Musiq’ej naq nekekawresi eerib’ chixk’utb’al li evangelio rik’in li b’ichank. Wotzomaq lix nawom eech’ool chirixeb’ li yaal nekeb’icha. Tenq’ahomaqeb’ li kok’al chixk’eeb’al reetal chan ru naq li b’ichank naxk’am rib’ rik’in li yookeb’ chixtzolb’al ut chixnumsinkil sa’ rochocheb’ ut sa’ li Tzoleb’aal reheb’ li Kok’al.

Li tenq’anel na’leb’ chirix li k’anjel reheb’ li kok’al sa’ li ch’utam re li loq’laj wa’ak

Rik’in xb’eresihom li obiisp, li k’anjel reheb’ li kok’al sa’ li ch’utam re li loq’laj wa’ak nak’ulman chi kok’ aj xsa’ sa’ jun reheb’ li po sa’ xraqik li chihab’. Jo’ awa’b’ejil re li Tzoleb’aal reheb’ li Kok’al ut aj b’eresinel b’ich, k’anjelanqex rik’in laj tenq’ aj k’ehol na’leb’ re li obiisp li naxjolomi li Tzoleb’aal reheb’ li Kok’al re xk’uub’ankil li k’anjel.

Tento naq li k’anjel tixk’e xhoonaleb’ li kok’al chixyeeb’al resil li k’a’ru xe’xtzol a’an ut lix junkab’aleb’ sa’ ochoch ut sa’ li Tzoleb’aal reheb’ li Kok’al chirix lix Hu laj Mormon, jo’eb’ ajwi’ li b’ich li xe’xb’icha chiru li chihab’. Naq nekek’uub’ li k’anjel a’in, k’oxlahomaq chan ru naru tixtenq’aheb’ li komon chixk’oxlankil li Kolonel ut eb’ lix k’utum.

Wi ka’ajwi’ junjunqeb’ li kok’al wan sa’ li teep malaj uq’ej, k’oxlahomaq chan ru lix junkab’aleb’ naru neke’tz’aqon sa’ li k’anjel rochb’eeneb’ lix kok’al. Jun komon sa’ li obiispil naru taa’aatinaq re xraqb’al li ch’utam.

Naq nekek’uub’ li k’anjel, chijultiko’q eere li na’leb’ a’in:

• Ink’a’ us xb’aanunkil li practica choq’ re li k’anjel li tixmaq’ raj naab’al hoonal reheb’ li tzoleb’aal sa’ li Tzoleb’aal reheb’ li Kok’al malaj li junkab’al.

• Ink’a’ us roksinkileb’ li jalam-uuch, li disfraz, ut li video sa’ li ch’utam re li loq’laj wa’ak.

Chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 12.2.1.2.

Xch’olob’ankil li hoonal re b’ichank

5 k’asal (awa’b’ejil re li Tzoleb’aal reheb’ li Kok’al): Li tijok sa’ xtiklajik, jun raqal sa’eb’ li loq’laj hu malaj eb’ lix raqalil li paab’aal, ut jun yaab’asinb’il aatin

20 k’asal (aj b’eresinel b’ich): Hoonal re b’ichank

Li awa’b’ejil re li Tzoleb’aal reheb’ li Kok’al ut aj b’eresinel b’ich neke’xsik’eb’ ru li b’ich rajlal po re xka’jultikankileb’ li na’leb’ yookeb’ chixtzolb’aleb’ li kok’al sa’ xtzoleb’aaleb’ ut sa’ rochocheb’. Jun xtusulaleb’ li b’ich li neke’xka’jultikaheb’ li na’leb’ a’in naru neke’tawman sa’ li hu a’in.

Naq nakak’uteb’ li b’ich chiruheb’ li kok’al, kanab’eb’ chixwotzb’al li ak xe’xtzol chirixeb’ li seraq’ ut li tzol’leb’ li k’utb’ileb’ sa’eb’ li b’ich. Patz’ reheb’ li kok’al naq te’xwotz li neke’xk’oxla ut neke’reek’a chirixeb’ li na’leb’ sa’eb’ li b’ich.

Li B’ichleb’aal choq’ reheb’ li Kok’al a’an li tz’aqal k’anjeleb’aal choq’ re li b’ichank sa’ li Tzoleb’aal reheb’ li Kok’al. Us ajwi’ roksinkileb’ li b’ich sa’ xb’ichleb’aaleb’ li ninq ut sa’ li hu Amigos. Yalaq paay chik chi b’ich li taa’oksimanq sa’ li Tzoleb’aal reheb’ li Kok’al, tento naq k’ulub’anb’ilaq xb’aan li obiispil (chi’ilmanq Jolomil K’anjenel Hu, 12.3.4).

Eb’ li b’ich choq’ re li hoonal re b’ichank

Enero

• “Lix Hu laj Mormon naxk’ut,” B’ichleb’aal choq’ reheb’ li Kok’al, 62–63

• “Paab’eb’ li taqlahom,” B’ichleb’aal choq’ reheb’ li Kok’al, 68–69

• “Li b’arb’ookil ch’iich’,” Eb’ li B’ich, 176

Febrero

• “Kaw lix ch’ool laj Nefi,” B’ichleb’aal choq’ reheb’ li Kok’al, 64–65

• “Ninnaw naq raab’ilin,” B’ichleb’aal choq’ reheb’ li Kok’al, 42–43

• “Sik’ li us,” Eb’ li B’ich, 151

Marzo

• “Sa’ li santil ochoch,” B’ichleb’aal choq’ reheb’ li Kok’al, 99

• “Naq nakub’e lin ha’,” B’ichleb’aal choq’ reheb’ li Kok’al, 53

• “Xwakli Jesus,” B’ichleb’aal choq’ reheb’ li Kok’al, 44

Abril

• “Natijok jun ch’ina al,” B’ichleb’aal choq’ reheb’ li Kok’al, 6–7

• “Ma chaab’il anajwan xinb’aanu arin?,” Eb’ li B’ich, 143

Mayo

• “Li rahok cherib’il eerib’,” B’ichleb’aal choq’ reheb’ li Kok’al, 74

• “Kawaq inch’ool,” B’ichleb’aal choq’ reheb’ li Kok’al, 85

• “Chinaatenq’a re tinkuyeb’ xmaak,” B’ichleb’aal choq’ reheb’ li Kok’al, 52

Junio

• “Lix nawom inch’ool,” Eb’ li B’ich, 78

• “Taqak’am raatin li Qaawa’,” B’ichleb’aal choq’ reheb’ li Kok’al, 92–93

• “Jun li profeet,” B’ichleb’aal choq’ reheb’ li Kok’al, 58–59

Julio

• “Nawaj tinwanq choq’ jun li misioneer,” B’ichleb’aal choq’ reheb’ li Kok’al, 90

• “Raab’ilin xb’aan li Dios sa’ choxa,” B’ichleb’aal choq’ reheb’ li Kok’al, 16–17

• “Li paab’aal,” B’ichleb’aal choq’ reheb’ li Kok’al, 50–51

Agosto

• “Naq nintzol li loq’laj hu,” Eb’ li B’ich, 179

• “Li ochoch chanchan choxa,” Eb’ li B’ich, 191

Septiembre

• “Ab’i, ab’i,” B’ichleb’aal choq’ reheb’ li Kok’al, 142

• “Xwab’i resilal li xk’ulman chaq najter,” B’ichleb’aal choq’ reheb’ li Kok’al, 35

• “Chinwanq raj jo’ li Jesus,” B’ichleb’aal choq’ reheb’ li Kok’al, 40–41

Octubre

• “Taruuq toowanq aran sa’ choxa,” B’ichleb’aal choq’ reheb’ li Kok’al, 98

• “Lix iglees li Jesukristo,” B’ichleb’aal choq’ reheb’ li Kok’al, 48

Noviembre

• “Sik’ xb’aanunkil li tiikilal,” B’ichleb’aal choq’ reheb’ li Kok’al, 80

• “Ninpaabʼ li Kristo,” Ebʼ li Bʼich, 75

Diciembre

• “Tintzol, tink’oxla, tintijoq,” B’ichleb’aal choq’ reheb’ li Kok’al, 66

• “Sa’ xwa’leb’aal xul,” B’ichleb’aal choq’ reheb’ li Kok’al, 26–27

• “Kixtaqla li Ralal,” B’ichleb’aal choq’ reheb’ li Kok’al, 20–21

Oksi li b’ich re xk’utb’al li tzol’leb’

Nab’aanuman li hoonal re b’ichank re naq eb’ li kok’al neke’ru chixtzolb’aleb’ li na’leb’ re li evangelio. Eb’ li na’leb’ a’in naru tatxmusiq’a naq nakak’uub’ chan ru xk’utb’aleb’ li na’leb’ re li evangelio li wankeb’ sa’eb’ li b’ich ut sa’eb’ li b’ich choq’ reheb’ li kok’al.

Rilb’aleb’ ru li raqal reheb’ li loq’laj hu. Choq’ re naab’al reheb’ li b’ich sa’ li B’ichleb’aal choq’ reheb’ li Kok’al ut xb’ichleb’aaleb’ li ninq, tz’iib’anb’ileb’ li raqal sa’eb’ li loq’laj hu wankeb’ rilom rik’in li b’ich. Tenq’aheb’ li kok’al chirilb’aleb’ ru junjunq reheb’ li raqal a’an, ut aatinanqex chirix chan ru naq eb’ li raqal reheb’ li loq’laj hu wankeb’ rilom rik’in li b’ich. Naru ajwi’ nakatz’iib’a xtusulal junjunq reheb’ li raqal reheb’ li loq’laj hu chiru li pizarron ut taakanab’eb’ li kok’al chixjuntaq’eetankil li junjunq raqal rik’in jun li b’ich malaj rik’in jun raqal sa’ jun li b’ich.

Xnujob’resinkil li yamyo. Tz’iib’a raatinul jun raqal re li b’ich chiru li pizarron chi ink’a’ taatz’iib’a junjunq reheb’ li aatin mas aajeleb’ ru sa’ li b’ich a’an. Chirix a’an, patz’ reheb’ li kok’al naq te’xb’icha li b’ich, ut naq te’rab’iheb’ li aatin li neke’xnujob’resiheb’ li yamyo. Naq neke’xnujob’resi li junjunq yamyo, aatinan chirixeb’ li na’leb’ re li evangelio nakatzol rik’ineb’ li aatin li yookex chixnujob’resinkil.

Xwotzb’al jun xnawom ch’oolej. Wotz sa’ junpaat lix nawom aach’ool chiruheb’ li kok’al chirixeb’ li na’leb’ re li evangelio li neke’tawman sa’ li b’ich. Tenq’aheb’ li kok’al chixtawb’al ru naq rik’in li b’ichank, naru neke’xwotz lix nawom xch’ooleb’ ut neke’reek’a li Musiq’ej.

Xaqliik jo’ aj yehol nawom. Kanab’eb’ li kok’al chixk’eeb’aleb’ xhoonal re xaqliik ut xwotzb’al li neke’xtzol sa’ li b’ich li yookeb’ chixb’ichankil malaj li neke’reek’a chirixeb’ li na’leb’ k’utb’il sa’ li b’ich. Patz’ reheb’ k’a’ru neke’reek’a naq yookeb’ chi b’ichank, ut tenq’aheb’ chixk’eeb’al reetal lix wankil li Santil Musiq’ej.

Roksinkileb’ li jalam-uuch. Patz’ reheb’ li kok’al naq tate’xtenq’a chixtawb’al malaj chixyiib’ankileb’ jalam-uuch li neke’xk’ul rib’ rik’in li aajel ruhil aatin malaj ch’ol aatin sa’ li b’ich. Patz’ reheb’ naq te’xwotz chan ru naq eb’ li jalam-uuch neke’xk’ul rib’ rik’in li b’ich ut li k’a’ru k’utb’il sa’ li b’ich. Qayehaq, wi yookat chixk’utb’al li b’ich “Li b’arb’ookil ch’iich’” (Eb’ li B’ich, 176), naru nakak’eheb’ li jalam-uuch sa’ li tzoleb’aal malaj rub’eleb’ li chunleb’aal li neke’xk’ut li aatin aajeleb’ ru sa’ li b’ich (jo’ b’arb’ookil ch’iich’, raatin li Dios, tixk’ut li b’e, ut aaleek). Kanab’eb’ li kok’al chixxokb’aleb’ li jalam-uuch ut chixtaqsinkileb’ sa’ iq’ sa’ tz’aqal xtusulaleb’ ru naq yooqex chixb’ichankil li b’ich sa’ komonil.

Roksinkil jun ch’ina k’anjeleb’aal. Naru nakawoksi k’a’ruhaq li tixmusiq’a li aatinak chirix jun li b’ich. Li b’ich “Li paab’aal” (B’ichleb’aal choq’ reheb’ li Kok’al, 50–51) na’aatinak chirix jun ch’ina iyaj. Naru nakak’ut jun li iyaj chiruheb’ li kok’al ut taaye reheb’ naq yooko chixk’anjelankil li qapaab’aal naq naqaw jun li iyaj; li na’leb’ a’in naru tixmusiq’a jun aatinak chirix chan ru naru taqak’anjela li qapaab’aal chirix li Jesukristo, jo’ ch’olob’anb’il sa’ li b’ich.

Xkanab’ankileb’ chixwotzb’al lix numsihomeb’ a’an. Tenq’aheb’ li kok’al chixk’eeb’al reetal chan ru naq laq’lookeb’ li na’leb’ k’utb’il sa’ li b’ich rik’in li neke’xnumsi rik’ineb’ li na’leb’ a’in sa’ xyu’ameb’. Rub’elaj naq teeb’icha “Sa’ li santil ochoch” (B’ichleb’aal choq’ reheb’ li Kok’al, 99) naru nakakanab’eb’ li kok’al chixtaqsinkileb’ li ruq’ wi rilomeb’ jun sutaq jun li santil ochoch. Naq yooqeb’ chi b’ichank, b’oqeb’ chi k’oxlak chirix li neke’reek’a naq neke’ril jun li santil ochoch.

Roksinkileb’ li patz’om. Wan naab’al paay chi patz’om naru nakawoksi naq yookex chi b’ichank. Naru nakapatz’ reheb’ li kok’al k’a’ru xe’xtzol sa’ li junjunq raqal re li b’ich. Naru ajwi’ nakapatz’ reheb’ naq te’xk’oxlaheb’ li patz’om li neke’sumeek xb’aan li b’ich. A’in naru nekexxk’am sa’ jun aatinak chirixeb’ li na’leb’ k’utb’il sa’ li b’ich.

Roksinkileb’ li uq’ej. Patz’ reheb’ li kok’al naq te’xk’oxla chan ru naru te’reek’asi li ruq’ re xtenq’ankileb’ chixjultikankil li raatinul jun li b’ich. Qayehaq, naq nekeb’icha li xkab’ raqal re “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 16–17), naru nakakanab’eb’ li kok’al chixkutb’aleb’ li xsa’ ruheb’ rik’in ru’uj ruq’eb’, chireek’asinkileb’ rib’ jo’ chanchan jun li peepem, ut chixk’eeb’aleb’ li ruq’ chirix lix xikeb’. Patz’ reheb’ naq te’xk’e ruq’eb’ sa’ xb’een li raameb’ naq te’xb’icha: “Raab’ilin xb’aan li Dios sa’ choxa.”