30 nō Tītema–5 nō Tēnuare : « E haere te fa’aho’i-fa’ahou-ra’a mai tei fafauhia mai »

Te fa’aho’i-fa’ahou-ra’a-hia mai te ’īra’a o te ’evanelia a Iesu Mesia

Nāhea ’outou i te fa’ahanahana i te 200ra’a o te matahiti o te hō’ē ’ohipa tei tupu ’o tei fa’ataui i te ao nei ? ’O te uira’a ïa tā te Peresidenira’a Mātāmua ’e tā te pupu nō te Tino ’Ahuru ma Piti ’āpōsetolo i feruri, ’a piri mai ai te ’āva’e ’Ēperēra 2020, e tāpa’o ra i te 200ra’a o te matahiti o te ’ōrama mātāmua a Iosepha Semita. « ’Ua uiui mātou e ti’a ānei e fa’ati’a i te hō’ē ’ōfa’i fa’aha’amana’ora’a », tē ha’amana’o ra te peresideni Russell M. Nelson. « Ma te ferurira’a rā i te tupura’a o te tua’ā’ai hō’ē roa ’e nā te ao nei o te ’Ōrama Mātāmua, ’ua fāri’i mātou ma te māere e hāmani i te hō’ē tihi ha’amana’ora’a ’eiaha i te ’ōfa’i tarai ’aore rā i te ’ōfa’i ’arā, i te mau parau rā […] ’aita i nana’ohia i ni’a i te ‘papa ’ōfa’i’ e nana’ohia rā i ni’a i te mau ‘papa ta’ata’ o tō tātou ’ā’au. [2 Korinetia 3:3] » (« A fa’aro’o iāna », Liahona, Me 2020, 90).

Te parau o te tihi ha’amana’ora’a tā rātou i hāmanihia ’oia ho’i « Te fa’aho’i-fa’ahou-ra’a-hia mai te ’īra’a o te ’evanelia a Iesu Mesia : Hō’ē poro’i nā te ao nei nō te piti-hānere-ra’a o te matahiti ». E tihi ha’amana’ora’a ’eiaha noa nō te ’ōrama mātāmua, nō te mau mea ato’a rā tā Iesu Mesia i rave—’e e rave fa’ahou nei—mai te tau mai ā. ’Ua ha’amata te fa’aho’i-fa’ahou-ra’a-hia mai o tāna ’evanelia, i te taime ’a fāriu atu ai te hō’ē ta’ata i te Atua ’e ’a fa’aro’o ai iāna. E tāmau noa te reira mai teie te huru : hō’ē ’ā’au, hō’ē ’itera’a mo’a i te taime hō’ē—’oia ato’a tō ’oe.

Mana’o nō te ’apo i te ha’api’ira’a i te ’utuāfare ’e i te fare purera’a

« ’Ua here te Atua i tāna mau tamari’i nā te mau fenua ato’a o te ao nei ».

I tō ’oe mana’o, nō te aha te hō’ē poro’i nō ni’a i te fa’aho’i-fa’ahou-ra’a mai, e ha’amata ai nā roto i te hō’ē fa’ahitira’a parau nō te here o te Atua ? ’A ’imi maita’i ai ’oe i te poro’i, ’a ’imi i te mau fa’a’itera’a nō te here o te Atua nō « tāna mau tamari’i nā te mau fenua ato’a o te ao nei ». Nāhea te fa’aho’i-fa’ahou-ra’a-hia mai o te ’evanelia i te tauturu ia ’oe ’ia putapū i tōna here ?

Hi’o ato’a Gerrit W. Gong, « Te mau nūna’a ato’a, te mau ’ōpū ato’a, ’e te mau reo ato’a », Liahona, Novema 2020, 38–41.

’Ua ha’amata te fa’aho’i-fa’ahou-ra’a mai ma te hō’ē pāhonora’a i te hō’ē uira’a.

E nehenehe e parau ē, ’ua ha’amata te Fa’aora i te fa’aho’i-fa’ahou-ra’a mai i tāna ’evanelia ma te pāhonora’a i te hō’ē uira’a. I tō ’oe mana’o, e aha Te poro’i a te fa’aho’i-fa’ahou-ra’a mai nō te hō’ē ta’ata e uira’a tāna nō ni’a i te Atua, te ’evanelia, ’aore rā « te fa’aorara’a o tōna vairua » ? E nehenehe ato’a ’oe e ’imi maita’i te Iosepha Semita—’Ā’amu 1:5–20 nō te hi’o, e aha tā ’oe e ’apo mai nā roto mai ia Iosepha Semita, nō ni’a i te ’itera’a mai i te mau pāhonora’a i te mau uira’a nō te ’evanelia.

Fa’ata’ara’a maita’i nō roto mai The Desires of My Heart [Te mau hina’aro o tō’u ’ā’au], nā Walter Rane.

’Ua fa’aho’i fa’ahou mai Iesu Mesia i tāna ’Ēkālesia.

E aha tā ’oe i ’ite nō ni’a i « te ’Ēkālesia a te Mesia i roto te Faufa’a ’Āpī », ’o tā te Fa’aora i fa’aho’i fa’ahou mai nā roto mai ia Iosepha Semita ? ’A feruri i te ’imi-maita’i-ra’a i teie mau pāpa’ira’a mo’a ’e ’a tāpura i te tahi tuha’a o tāna ’Ēkālesia :

• Mataio 16:15–19

• Mareko 16:15–18

• Luka 6:12–13

• Te ’Ohipa 4:34–35

• 1 Korinetia 15:29

• Ephesia 4:11–15

I muri iho, e nehenehe ’oe e fa’atū’ati i te mau pāpa’ira’a mo’a i ni’a nei ’e i tō raro nei, ’o tē fa’ata’a nei e mea nāhea Iesu Mesia i te fa’aho’i-fa’ahou-ra’a mai i te reira mau tuha’a o tāna ’Ēkālesia nā roto mai ia Iosepha Semita :

• Te Haa’pi’ira’a Tumu ’e te mau Fafaura’a 18:37–38 ; 107:23–24

• Te Ha’api’ira’a Tumu ’e te mau Fafaura’a 51:3 ; 70:14

• Te Ha’api’ira’a Tumu ’e te mau Fafaura’a 84:64–72

• Te Ha’api’ira’a Tumu ʼe te mau Fafaura’a 110:11–16

• Te Ha’api’ira’a Tumu ’e te mau Fafaura’a 124:31, 36

• Te Hīro’a Fa’aro’o 1:6

Nō te aha ’oe i māuruuru ai i te fa’aho’i-fa’ahou-ra’a-hia mai te ’evanelia a Iesu Mesia ?

’Ua tāmata Elder Jeffrey R. Holland ’e tāna vahine i te hō’ē taime e feruri, e aha te mea tā rāua i putapū ma te orara’a hou te fa’aho’i-fa’ahou-ra’a-hia mai te ’Ēkālesia. « E aha tā māua e hina’aro e roa’a mai ? » ’ua uiui rāua ia rāua iho. ’A tai’o i tō rātou mau ’itera’a i roto « Hō’ē ’ana’ana pāpū roa nō te tīa’ira’a » (Liahona, Mē 2020, 81–82). Nāhea te fa’aho’i-fa’ahou-ra’a mai i te tauturu ia ’oe ’ia fa’atupu i tō ’oe mau tīa’ira’a pae vārua ?

« E haere te fa’aho’i-fa’ahou-ra’a mai tei fafauhia i mua ».

’Ua feruri a’ena ānei ’oe ia ’oe iho ’ei tuha’a nō te fa’aho’i-fa’ahou-ra’a-hia mai te ’evanelia ? ’A feruri na i teie mau parau a te peresideni Dieter F. Uchtdorf : « I te tahi taime tē fa’ariro nei tātou i te fa’aho’i-fa’ahou-ra’a-hia mai te ’evanelia mai te hō’ē ’ohipa oti hope roa, tei muri a’e na ia tātou […] Te ti’ara’a mau, te fa’aho’i-fa’ahou-ra’a mai, e ’ohipa tupu tāmau noa te reira ; tē ora nei tātou i roto i teienei » (« Tē ta’oto ra ānei ’outou i roto i te fa’aho’i-fa’ahou-ra’a mai ? », Liahona, Mē 2014, 59).

’A fa’aineine ai ’oe nō te ’imi maita’i e mea nāhea te ’evanelia i te fa’aho’i-fa’ahou-ra’a-hia mai i te mau matahiti 1800, e nehenehe ’oe e ha’amata ma te ferurira’a, e mea nāhea te reira i te fa’aho’i-fa’ahou-ra’a-hia mai i roto i tō ’oe orara’a. ’A tai’o te poro’i nō te fa’aho’i-fa’ahou-ra’a mai ma te mau uira’a mai teie te huru i roto i te ferurira’a : Mea nāhea tō’u ’itera’a e parau mau te reira ? Nāhea vau ’ia ’āmui atu i roto i te fa’aho’i-fa’ahou-ra’a mai i teie mahana ?

« ’Ua vētea te mau ra’i ».

E aha te aura’a te parau « ’ua vētea te mau ra’i » nō ’oe ? E aha te tāpa’o tā ’oe e ’ite ra—i roto te poro’i nō te fa’aho’i-fa’ahou-ra’a mai, i roto i te ’Ēkālesia i teie mahana, i roto i te mau pāpa’ira’a mo’a, ’e i roto i tō ’oe orara’a—ē ’ua vētea mau te mau ra’i ?

E nehenehe ato’a ’oe e tu’u mai « Te hiti mai nei te mahana » (Te mau Hīmene, N 1) ’ei tuha’a nō tā ’oe ’imi-maita’i-ra’a. E aha tā ’oe i ’ite mai i roto i teie hīmene ’o tē ’āmui mai i tō ’oe hāro’aro’ara’a i te pereota « ’ua vētea te mau ra’i » ?

Hi’o ato’a Quentin L. Cook, « Te ha’amaita’ira’a nō te heheura’a tāmau i te mau peropheta ’e nō te heheura’a i te ta’ata hō’ē, nō te arata’i i tō tātou orara’a », Liahona, Mē 2020, 96–100.

’Apo ’āmui i te ha’api’ira’a. ’Ua ani manihini te peresideni Nelson ia tātou ’ia « ’imi maita’i ma te ’ōmo’e [te poro’i nō te fa’aho’i-fa’ahou-ra’a mai] ’e [tō tātou] mau melo o te ’utuāfare ’e te mau hoa » (« Fa’aro’o iāna », 92). ’A feruri nāhea ’oe i te fa’aō mai i te tahi ta’ata i roto i tā ’oe ’imi-maita’i-ra’a.

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mau mana’o nō te ha’api’i i te tamari’i

« Tē parau pāpū atu nei mātou »

• ’A tai’o ai ’outou i te mau tuha’a o te poro’i nō te fa’aho’i-fa’ahou-ra’a mai ’e tā ’outou mau tamari’i (’aore rā ’a māta’ita’i ai i te video i te tai’ora’a te peresideni Nelson i te reira), ’a tauturu ia rātou ’ia ’ite mai i te mau pereota e ha’amata ma te parau « tē parau nei mātou », « tē ha’apāpū nei mātou », ’aore rā « tē fa’a’ite pāpū nei mātou ». E aha te mau parau mau tā tō tātou mau peropheta ’e mau ’āpōsetolo e fa’ahiti nei ? Penei a’e e nehenehe ’outou e tā ’outou mau tamari’i e fa’a’ite i tō ’outou iho ’itera’a pāpū nō te tahi o teie ā mau parau mau.

  The Restoration of the Fulness of the Gospel of Jesus Christ

  President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.

« E mau uira’a […] tā Iosepha Semita ».

• E nehenehe e riro e mea ’ana’anatae nō tā ’outou mau tamari’i ’ia hi’o haere i te tahi mau uira’a ’o tā Iosepha Semita i uiui, ’e ’o tei arata’i atu i te fa’aho’i-fa’ahou-ra’a mai o te ’evanelia a te Fa’aora. ’A tauturu ia rātou ’ia ’ite mai i te tahi mau hi’ora’a i roto Iosepha Semita—’Ā’amu 1:10, 29, 68. Nāhea tātou i te ha’amaita’ira’ahia i teie mahana, nō te mea ’ua pāhono mai te Atua i te mau uira’a a Iosepha Semita ?

• E nehenehe ato’a ’outou e hōro’a i tā ’outou mau tamari’i i te rāve’a ’ia parau mai i te mau uira’a tā rātou e vai ra. E aha tā tātou i ’apo mai nā roto mai ia Iosepha Semita, nō ni’a e nāhea ’ia ’ite mai i te mau pāhonora’a ? (hi’o Iosepha Semita—’Ā’amu 1:8–17 ; hi’o ato’a te mau ’īrava 3 ’e 4 o « This Is My Beloved Son [’O tā’u tamaiti here teie] », Children’s Songbook [Te mau hīmene nā te mau tamari’i], 76).

« ’Ua haere mai te mau ve’a o te ra’i nō te ha’api’i ia Iosepha ».

• ’O vai te mau « ve’a o te ra’i [tei] haere mai e ha’api’i ia Iosepha » ? E ’ana’anatae paha tā ’outou mau tamari’i ’ia ’imi mai i tō rātou mau hōho’a i roto te Buka hōho’a ’evanelia (hi’o te mau nūmera. 91, 93, 94, 95). Nāhea te mau ve’a tāta’itahi i te tauturura’a ’ia « fa’aho’i-fa’ahou-hia mai te ’Ēkālesia a Iesu Mesia » ? E tauturu te mau pāpa’ira’a mo’a tei fa’ata’ahia i roto te ’api fa’a’ana’anataera’a nō teie hepetoma, i tā ’outou mau tamari’i ’ia pāhono i teie uira’a.

’Ua fa’aho’i fa’ahou mai Iesu Mesia i tāna ’Ēkālesia.

• Nāhea ’outou i te tauturu i tā ’outou mau tamari’i ’ia māramarama, e aha te aura’a te fa’aho’i-fa’ahou-ra’a mai te ’Ēkālesia a te Fa’aora ? E nehenehe paha rātou e hāmani i te hō’ē pare ’ōhie i te mau rā’au ri’iri’i ’aore rā i te mau hāpaina ’e ’ia « fa’aho’i fa’ahou mai » ’aore rā ’ia hāmani fa’ahou, i te reira. ’Aore rā, mai te peu ’ua mono tā ’outou mau tamari’i i te hō’ē ’ohipa nō te mea ’ua mo’e ’aore rā ’ua parari te reira, e nehenehe ’outou e fa’aau i te reira ’ohipa i te Fa’aora i te fa’aho’i-fa’ahou-ra’a mai i tāna ’Ēkālesia. E tauturu ia rātou ’ia ’ite mai i te mau tuha’a pāpū maita’i i fa’ahitihia i roto te poro’i nō te fa’aho’i-fa’ahou-ra’a mai ’o tā te Fa’aora i fa’aho’i fa’ahou mai.

« ’Ua vētea te mau ra’i ».

• Nō te fa’ahōho’a i te aura’a o teie pereota « ’ua vētea te mau ra’i », e nehenehe paha ’outou e fa’a’ite atu i te hō’ē poro’i i tā ’outou mau tamari’i, nā mua a’e i muri i te hō’ē ’ōpani tei tāpirihia, ’e i muri iho nā roto i te hō’ē ’ōpani tei mātara. E vaiiho ato’a ia rātou ’ia fa’a’ite mai, te tahi i muri mai i te tahi, te hō’ē poro’i. E aha te mau poro’i a Iesu Mesia nō tātou ? E aha te ’ohipa i tupu tei tauturu ia tātou ’ia ’ite ē, ’ua vētea te mau ra’i nō tātou ?

Nō te tahi atu mau mana’o, ’a hi’o te ve’a Hoa nō teie ’āva’e.