Zvita 30–Ndira 5: “Kudzorerwa Kwakavimbiswa Kunoenderera Mberi”

Kudzorerwa kweKuzara kweVhangeri raJesu Kristu

Unopemberera sei mhembero yemakore 200 echiitiko chakashandura nyika? Uyo ndiwo mubvunzo Vatungamiri Vokutanga neChikwata chevaApositora vane Gumi neVaviri wavakafungisisa nezvawo apo Kubvumbi wa2020 pawaiswedera, uchisvitsa makore 200 kubva paChiratidzo Chokutanga chaJoseph Smith. “Takafunga kana shongwe yaifanira kuvakwa,” Mutungamiri Russell M. Nelson vakayeuka. “Asi apo patakafunga pamusoro peshanduro yakakosha yemunhoorondo yose uye yepasi rose yeChiratidzo Chokutanga ichocho, takanzwa kukurudzirwa kugadzira chiyeuchidzo kwete chegiranaiti kana ibwe asi chemashoko … , kwete kuti chivezerwe ‘mumahwendefa emabwe’ asi kuti chivezerwe ‘mumahwendefa enyama’ emwoyo yedu [2 Vakorinte 3:3]” (“Munzwei,” Liahona, Chivabvu 2020, 90).

Chiyeuchidzo chemashoko chavakagadzira chine musoro wenyaya unoti “Kudzorerwa kweKuzara kweVhangeri raJesu Kristu: Chiziviso cheMakore Mazana Maviri kuNyika.” Ichi chiyeuchidzo kwete kuChiratidzo Chokutanga chete asiwo kuzvinhu zvose zvakaitwa naJesu Kristu—uye zvaachiri kuita—kubvira ipapo. Kudzorerwa kwevhangeri Rake kwakatanga apo munhu mumwechete paakatendeukira kuna Mwari uye akaMunzwa. Kunoenderera mberi nenzira imwecheteyo: mwoyo mumwechete, chiitiko chinoyera chimwechete panguva—kusanganisira chako.

Mazano eKudzidza Kumba uye kuChechi

“Mwari vanoda vana Vavo munyika dzose dzepanyika.”

Mumaonero ako, sei chiziviso pamusoro peKudzorerwa chichitanga nemashoko ari pamusoro porudo rwaMwari? Apo paunonzvera chiziviso ichi, tsvaka kuratidzwa kworudo rwaMwari “kuvana Vavo munyika dzose dzapanyika.” Kudzorerwa kwevhangeri kwakakubatsira sei kunzwa rudo Rwavo?

Onawo Gerrit W. Gong, “All Nations, Kindreds, and Tongues,” Liahona, Mbudzi 2020, 38–41.

Kudzorerwa kwakatanga nemhinduro kumubvunzo.

Zvinokwanisa kutaurwa kuti Muponesi akatanga Kudzorerwa kwevhangeri Rake nokupindura kumubvunzo. Ishoko ripi raunonzwa kuti chiziviso cheKudzorerwa chinaro kumunhu ane mibvunzo pamusoro paMwari, vhangeri, kana “ruponeso rwemweya wake”? Unogonawo kunzvera Joseph Smith—Nhoroondo 1:5–20 kuti uone zvaunokwanisa kudzidza kubva kuna Joseph Smith pamusoro pekuwana mhinduro kumibvunzo yevhangeri.

Onawo Topics and Questions, “Seeking Answers [Kutsvaka Mhinduro],” Gospel Library.

Chikamu chakabva kuThe Desires of My Heart [Zvido zveMwoyo Wangu], naWalter Rane

Jesu Kristu akadzorera Chechi Yake.

Unozivei pamusoro “peChechi yaKristu yeTestamente Itsva,” iyo Muponesi yaakadzorera kuburikidza naJoseph Smith? Funga kunzvera zvinyorwa zvitsvene izvi uye nokudongorodza zvimwe zvimiro zveChechi Yake:

• Mateo 16:15–19

• Marko 16:15–18

• Ruka 6:12–13

• Mabasa aVaApostora 4:34–35

• 1 Vakorinte 15:29

• VaEfeso 4:11–15

Chinotevera, unokwanisa kufananisa zvinyorwa zvitsvene zviri pamusoro neizvo zviri pazasi, izvo zvinotsanangura kuti Jesu Kristu akadzorera sei zvimiro izvozvo zveChechi Yake kuburikidza naJoseph Smith:

• Dzidziso neZvibvumirano 18:37–38; 107:23–24

• Dzidziso neZvibvumirano 51:3; 70:14

• Dzidziso neZvibvumirano 84:64–72

• Dzidziso neZvibvumirano 110:11–16

• Dzidziso neZvibvumirano 124:31, 36

• Misimboti yeChitendero 1:6

Sei uchivonga neKudzorerwa kwevhangeri raJesu Kristu?

Gosa Jeffrey R. Holland nemudzimai wavo pane imwe nguva vakamboedza kufungidzira kuti vangadai vakanzwa sei kurarama Chechi isati yadzorerwa. “Chii chatinoshuvira kuti dai taiva nacho?” vakazvibvunza. Verenga pamusoro pezviitiko zvavo muna “A Perfect Brightness of Hope” (Liahona, Chivabvu 2020, 81–82). Kudzorerwa kwakabatsira sei kuzadzikisa tariro dzako dzepamweya?

Onawo Topics and Questions, “Apostasy and the Restoration of the Gospel [Kutsauka noKudzorerwa kweVhangeri],” Gospel Library.

“Kudzorerwa kwakavimbiswa kunoenderera mberi.”

Wakambozvifunga here iwe sechikamu cheKudzorerwa kwevhangeri? Funga pamusoro pemashoko aya kubva kuna Mutungamiri Dieter F. Uchtdorf: “Dzimwe nguva tinofunga nezve Kudzorerwa kwevhangeri sechimwe chinhu chakapedzwa, chatova kumashure kwedu. … Chokwadi ndechekuti, Kudzorerwa inzira inoenderera mberi; tiri kurarama mairi izvozvi” (“Are You Sleeping through the Restoration?,” Liahona, Chivabvu 2014, p. 59).

Apo paunogadzirira kunzvera kuti vhangeri rakadzorerwa sei mumakore ekuma1800, ungangotanga nekufungisisa kuti rakadzorerwa sei muupenyu hwako. Verenga chiziviso cheKudzorerwa uine mibvunzo yakaita seiyi mupfungwa: Ndakasvika sei pakuziva kuti ichi ichokwadi? Ndinotora chinhanho sei muKudzorerwa nhasi?

“Matenga akazaruka.”

Ndevo yokuti “matenga akazaruka” inorevei kwauri? Umboo hupi hwaunoona—muchiziviso cheKudzorerwa, muChechi nhasi, mumagwaro matsvene, uye muupenyu hwako—hwokuti matenga akazaruka zvechokwadi?

­ ­

Onawo Quentin L. Cook, “The Blessing of Continuing Revelation to Prophets and Personal Revelation to Guide Our Lives,” Liahona, Chivabvu 2020, 96–100.

Dzidzai pamwechete. Mutungamiri Nelson vakatikoka kuti “tinzvere [chiziviso cheKudzorerwa] tiri toga uye nenhengo dzemhuri [yedu] neshamwari (dzedu)” (“Munzwei,” 92). Funga pamusoro pokuti ungasanganisira sei vamwe mukudzidza kwako.

­

Mazano eKudzidzisa Vana

“Tinozivisa zvakakomba.”

• Apo paunoverenga zvikamu zvechiziviso cheKudzorerwa nevana vako, vabatsire kuwana mitsetse inotanga nezvirevo zvakaita sekuti “tinozivisa,” “tinotaura pachena,” kana kuti “ tinopupura.” Ndezvipi zvokwadi zviri kuziviswa nevaporofita nevaapositora vedu? Pamwe iwe nevana vako munokwanisa kugoverana uchapupu hwenyu pachenyu hwezvimwe zvezvokwadi zvimwechetezvo izvi.

  The Restoration of the Fulness of the Gospel of Jesus Christ

  President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.

“Joseph Smith … akanga ainemibvunzo.”

• Zvingava zvinonakidza kuvana vako kuongorora mimwe yemibvunzo iyo Joseph Smith yaakanga ainayo yakatungamirira kuKudzorerwa kwevhangeri reMuponesi. Vabatsire kuwana mimwe mienzaniso muna Joseph Smith—Nhoroondo 1:10, 29, 68. Takaropafadzwa sei nhasi nokuda kwokuti Mwari vakapindura mibvunzo yaJoseph Smith?

• Ungangopawo vana vako mukana wokutaura pamusoro pemibvunzo yavainayo. Chii chatinodzidza kubva kuna Joseph Smith pamusoro pekuwana mhinduro? (ona Joseph Smith—Nhoroondo 1:8–17

“Vatumwa vokudenga vakauya kuzorairidza Joseph.”

• Ndivanaani vaiva “vatumwa vokudenga [avo] vakauya kuzorairidza Joseph”? Vana vako vangangonakidzwa nekutsvaka mifananidzo yavo muBhuku reMifananidzo yeVhangeri (ona nhamba. 91, 93, 94, 95). Mumwe nemumwe wevatumwa ava akabatsira sei “kumisa zvakare Chechi yaJesu Kristu”? Zvinyorwa zvitsvene zvakapuwa mupeji yechiitwa yesvondo rino zvinokwanisa kubatsira vana vako kupindura mubvunzo uyu.

Jesu Kristu akadzorera Chechi Yake.

• Ungabatsira sei vana vako kunzwisisa zvazvinoreva kuti Chechi yeMuponesi yakadzorerwa? Pamwe vanokwanisa kuvaka shongwe irinyore nemabhuroko kana nemakapu uye “voidzorera,” kana kuivaka patsva. Kana kuti, kana vana vako vakambofanira kutsiva chimwe chinhu nokuda kwokuti chakarasika kana kupwanyika, unokwanisa kuenzanisa chiitiko ichocho kuMuponesi achidzorera Chechi Yake. Vabatsire kuwana zvimwe zvinhu chaizvo zvakataurwa muchiziviso cheKudzorerwa izvo zvakadzorerwa neMuponesi.

“Matenga akazaruka.”

• Kuratidza izvo zvinorehwa nendevo inoti “matenga akazaruka,” munokwanisa kugoverana shoko nevana vako, pokutanga uri kuseri kwesuo rakavharwa uye zvino nepasuo rakashama. Ita kuti vatore zvijano zvekugoverawo shoko. Ndeapi mashoko ayo Jesu Kristu aainawo kwatiri? Zviitiko zvipi zvakatibatsira kuziva kuti matenga akazaruka kwatiri?

­.