Sacred Grove [Chisango Chinoera], naGreg K. Olsen

Ndira 13– 19: “Ndakaona Murazvu weChiedza”

Joseph Smith—Nhoroondo 1:1–26

Ungangoti Dzidziso neZvibvumirano ibhuku remhinduro kuminamato: zvizhinji zvezvakazarurwa zvinoera zviri mubhuku iri zvakauya mumhinduro kumibvunzo. Mubvunzo wakatanga zvose—uyo wakaparura kudururwa kwezvakazarurwa zvemazuva ekupedzisira—wakabvunzwa nemukomana ane makore gumi nemana. “Hondo yemanzwi nezhowe-zhowe yekusiyana kwemafungiro” (Joseph Smith—Nhoroondo 1:10) zvakanga zvasiya Joseph Smith akavhiringidzika pamusoro pechitendero uye hukama hwake naMwari. Pamwe unokwanisa kuanzwisisa manzwiro iwayo. Tinowana mazano anopikisana akawanda uye manzwi anonyengetedza muzuva redu ranhasi. Apo patinenge tichida kupatsanura mashoko aya kuti tiwane chokwadi, tinokwanisa kuita zvakaitwa naJoseph. Tinokwanisa kubvunza mibvunzo, kunzvera magwaro matsvene, kufungisisa, uye pokudzesira tobvunza Mwari. Mumhinduro kumunamato waJoseph, murazvu wechiedza wakadzika kubva kudenga. Mwari Baba naJesu Kristu vakazviratidza uye vakapindura mibvunzo yake. Uchapupu hwaJoseph hwechiitiko chinoshamisa ichocho hwunozivisa pachena noushingi kuti ani zvake “[asina] ungwaru anogona kukumbira kuna Mwari, uye agowana” (Joseph Smith—Nhoroondo 1:26). Tinokwanisa tose kutambira zvakazarurwa, kunyangwe kana zvakazarurwa izvozvo zvisiri muchimiro chechiratidzo chokudenga, tinokwanisa kuwana nzwisiso huru inojekeswa nefemero yokudenga.

Mazano eKudzidza Kumba uye kuChechi

Joseph Smith—Nhoroondo 1:1–26

Joseph Smith ndiye Muporofita weKudzorerwa.

Chinangwa chenhoroondo yaJoseph Smith chaiva chokutiita kuti “tizive zvokwadi” nokuti chokwadi pamusoro paJoseph kazhinji chinokanganiswa (Joseph Smith—Nhoroondo 1:1). Apo paunoverenga Joseph Smith—Nhoroondo 1:1–26, chii chinosimbisa uchapupu hwako hwedaidzo yake yohumwari?

-

Joseph Smith—Nhoroondo 1:5–25

Ndinokwanisa sei kugamuchira mhinduro kumibvunzo yangu?

Wakambova “usina ungwaru” here kana kunzwa kuvhiringidzika pamusoro pesarudzo yawaifanira kuita? (Joseph Smith—Nhoroondo 1:13). Chiitiko chakava naJoseph Smith muna 1820 chinokwanisa kushanda semutoo wakanaka wezvakazarurwa zvako pachako. Semuenzaniso, apo paunotsvagurudza muJoseph Smith—Nhoroondo 1:5–25, tsvaka zviitiko zvaunokwanisa kufananidza nazvako. Chii chaunodzidza pamusoro pezvitevera:

• Kugadzirira kwakaita Joseph Smith kuchiitiko chinoera mumunamato? (ona ndima 8, 11, 14–15).

• Basa rekunzvera magwaro matsvene mukutsvaka zvakazarurwa? (ona ndima 11–12).

• Izvo zvekuita apo paunosangana nerupikiso (ona ndima 15–16, 21–26).

• Kutambira uye kuita chimwe chinhu pamhinduro dzaunogamuchira (ona ndima 18-25).

Koka kugovera. Kutsvagurudza mumagwaro matsvene kunokoka femero kubva kuMweya Mutsvene. Kugovera femero idzi kunokwanisa kukoka Mweya Mutsvene kuti upupure kune vamwe, pamwechete nekumunhu ari kugovera.

­ -

Ungangotsvakawo imwe mienzaniso mumagwaro matsvene yevanhu vachitaurirana naMwari. Mifananidzo iri muBhuku reMifananidzo yeVhangeri kana mamwe mabhuku eHuyai, Munditevere inokwanisa kukupa mazano. Edza kupindura mibvunzo yakadorongodzwa kare kumuenzaniso woga woga waunowana. Ndezvipi zviitiko zvawakava nazvo pakugamuchira mhinduro kuminamato? Chii chaunokwanisa kuita kubatsira vamwe kuti vave nezviitiko zvakanaka?

Onawo Russell M. Nelson, “Munzwei,” Liahona, Chivabvu 2020, 88–92; Topics and Questions, “Personal Revelation [Zvakazarurwa zveMunhu Pachake],” Gospel Library.

Joseph Smith—Nhoroondo 1:15–20

Joseph Smith akaona Mwari Baba neMwanakomana Wavo, Jesu Kristu.

Joseph Smith akavimba kuti Mwari vaizopindura munamato wake, asi haana kukwanisa kumboziva kuti mhinduro iyoyo yaizoshandura zvakadii upenyu hwake—uye nyika. Apo paunoverenga pamusoro pechiitiko chaJoseph, fungisisa pamusoro pokuti mhedzisiro dzeChiratidzo Chokutanga dzakashandura sei upenyu hwako.

Semuenzaniso, Chiratidzo Chokutanga chakazarura zvokwadi zvakati wandei pamusoro paMwari Baba neMwanakomana Wavo, Jesu Kristu, izvo zvaiva zvakasiyana nezvaitendwa nevanhu vazvinji mumazuva aJoseph. Apo paunoverenga Joseph Smith—Nhoroondo 1:15–20, funga pamusoro pokunyora pasi nzira dzakasiyana siyana dzekupedzisa ndevo yakaita seino: “Nokuda kwokuti Chiratidzo Chokutanga chakaitika, ndinoziva kuti…”

Ndeapi manzwiro auinawo apo paunofungisisa chiitiko chaJoseph nezvinhu zvose zvakaitika nokuda kwacho?

Onawo “Ask of God: Joseph Smith’s First Vision” (video), Gospel Library.

Kumbira kuna Mwari: Chiratidzo Chekutanga chaJoseph Smith

Iri ifirimu pfupi rakagadzirirwa Miziyamu yeNhoroondo yeChechi rinoratidza Chiratidzo Chekutanga chaJoseph Smith, kusanganisira ruzivo rwakatorwa kubva murondedzero dzose dzaJoseph Smith.

Chikamu chakabva kuIf Any of You Lack Wisdom [Kana Paine Mumwe Wenyu Asina Ungwaru], naWalter Rane

Joseph Smith—Nhoroondo 1:15–20

Sei kuine rondedzero dzakasiyana-siyana dzeChiratidzo Chokutanga?

Munguva yeupenyu hwake, Joseph Smith akanyora chiitiko chake muChisango Chinoera nguva dzinokwana ina, kazhinji achishandisa munyori. Pamusoro paizvozvo, rondedzero dzevamwe dzakati wandei dzakanyorwa navanhu vaiva vanzwa Joseph achitaura pamusoro pechiratidzo chake. Kunyangwe zvazvo rondedzero idzi dzichisiyana mune rumwe ruzivo, zvichienderana nemunyori, vateereri, uye mamiriro ezvinhu, kazhinji kacho dzimwechetedzo. Uye rondedzero yoga yoga inowedzera rumwe ruzivo urwu rwunotibatsira kunzwisisa zvirinani chiitiko chaJoseph Smith, nenzira imwecheteyo mabhuku aMateo, Marko, Ruka naJohane yaanotibatsira kunzwisisa zvirinani hushumiri hweMuponesi.

Onawo Topics and Questions, “First Vision Accounts [Rondedzero dzeChiratidzo Chokutanga],” Gospel Library.

Joseph Smith—Nhoroondo 1:21–26

Ndinokwanisa kuramba ndiri pachokwadi kune zvandinoziva, kunyangwe kana vamwe vakandiramba.

Mushure meChiratidzo chake Chokutanga chinoshamisa, Joseph Smith akada kugoverana nevamwe chiitiko chake. Rupikiso rwaakasangana narwo rwakamushamisa. Apo paunoverenga rondedzero yake, chii chinokukurudzira kuramba uri pachokwadi kuuchapupu hwako? Ndeipi mimwe mienzaniso—kubva mumagwaro matsvene, kuna teteguru, kana kuvanhu vaunoziva—inokupa ushingi hwekuramba uri pachokwadi kuzviitiko zvepamweya zvawakava nazvo?

­

­

Mazano eKudzidzisa Vana

Joseph Smith—Nhoroondo 1:3–14

Joseph Smith aiva akagadzirira kuva muporofita waMwari.

• Kudzidza pamusoro pehudiki hwaJoseph Smith kunokwanisa kubatsira vana vako kumunzwisisa iye pachake apo pavanodzidza kubva kuzviitiko zvake. Pamwe vanokwanisa kubata mufananidzo waJoseph Smith uye vogovera izvo zvavanoziva pamusoro pake. Kana zvichidikanwa, mungangowedzera zvimwe zvokwadi pamusoro pake kubva muJoseph Smith—Nhoroondo 1:3–14 (onawo “Chitsauko 1: Joseph Smith and His Family,” muDoctrine and Covenants Stories, 6–8, kana vhidhiyo inoenderana nazvo muGospel Library). Chii chakaitika kuna Joseph Smith chakabatsira kumugadzirira kuva muporofita. Ndezvipi izvo Mwari zvavangangova vari kutigadzirira kuti tiite?

  Chapter 1: Joseph Smith and His Family: 1805–1820

Chikamu chakabva kuJoseph Smith’s First Vision [Chiratidzo Chokutanga chaJoseph Smith], naGreg Olsen

Joseph Smith—Nhoroondo 1:10–13

Mwari vanokwanisa kupindura mibvunzo yangu kuburikidza nemagwaro matsvene.

• Funga pamusoro pekuratidza vana vako mabhuku akasiyana siyana, kusanganisira magwaro matsvene. Vabatsire kufunga mibvunzo iyo mabhuku aya yaanokwanisa kupindura. Zvino munokwanisa kuverenga pamwechete Joseph Smith—Nhoroondo 1:10–11 kuti muwane kuti mibvunzo ipi iyo Joseph Smith yaaiva nayo uye kuti ndedzipi mhinduro dzaakawana mumagwaro matsvene.

• Vana vako vangangokwanisa kuwana mashoko mundima 12 anotsanangura kuti kuverenga Jakobo 1:5 kwakashandura sei Joseph. Zvino munokwanisa kugoverana zviitiko umo ndima yemumagwaro matsvene mayakava neshanduro ine simba pauri. ­ ­

Joseph Smith—Nhoroondo 1:10–17

Baba Vokudenga vanonzwa uye vanopindura minamato yangu.

• Kutanga hurukuro pamusoro pematauriro atinoita naBaba Vokudenga, pamwe iwe nevana vako munokwanisa kubvunzana mibvunzo muchishandisa nzira dzakasiyana-siyana dzokutaurirana, dzakaita semashoko anotumira pambozhanhare, kuridzirana runhare, kana tsamba inonyorwa nemaoko. Tinobvunza sei mibvunzo kunaBaba Vokudenga? TinoVaratidza sei kuti tinovada uye tinoVaremekedza muminamato yedu? Verengai pamwechete Joseph Smith—Nhoroondo 1:16–19 uye mokurukura mapinduriro akaita Baba Vokudenga munamato waJoseph Smith. Iwe nevana vako munokwanisa zvino kugoverana zvakaitika pamakakumbira rubatsiro kuna Mwari uye mukagamuchira mhinduro.

Joseph Smith—Nhoroondo 1:17–19

Joseph Smith akaona Mwari Baba neMwanakomana Wavo, Jesu Kristu.

• Vana vaduku vangangonakidzwa nekumira vakatambanudza maoko vachinyepedzera kuva miti iri muChisango Chinoera apo paunenge uchivataurira pamusoro peChiratidzo Chokutanga. Kumbira vana kuti vazungunuke sevari kufuridzwa nemhepo apo paunotaura pamusoro paJoseph achinamata. Wozovakumbirawo kuti vamire vasingazungunuki uye vakanyarara apo paunovataurira kuti Baba Vokudenga naJesu vakazviratidza kuna Joseph.

• Vana vakuru vangangonakidzwa nekushandisa mumwechete kana yakawanda yemifananidzo iri muchidzidzo chino kukutaurira zvavanoziva pamusoro peChiratidzo Chokutanga. Vakurudzire kuti vaverenge Joseph Smith—Nhoroondo 1:14–17 uye vagovere pfungwa dzavo uye manzwiro avo pamusoro pechiitiko chaJoseph

  Chapter 2: Joseph Smith’s First Vision: 1820

­

Truth Restored [Chokwadi Chakadzorerwa], naLeon Parson