Enero 6–12: “Dumngegkayo, O Dakayo a Tattao”

Doktrina ken Katulagan 1

Idi Nobiembre 1831, maysa ket kagudua a tawen pay laeng ti naisubli a Simbaan ni Jesucristo. Nupay dumakdakkel, maysa pay laeng daytoy idi a saan nga am-ammo a grupo dagiti napudno a mamatpati nga agbibiag iti medio babassit nga ili, nga indauluan ti maysa a propeta nga adda iti katengngaan ti duapulo ti edadna. Ngem imbilang ti Dios dagitoy a mamatpati nga agbalin a katulonganna ken mensaherona, ket tinarigagayanna a maipablaak iti lubong dagiti paltiing nga intedna kadakuada.

Doktrina ken Katulagan benneg 1 ket pakauna, wenno panangyam-ammo ti Apo, kadagitoy a paltiing. Nalawag nga ipakitana nga uray no bassit laeng ti miembro ti Simbaan, awan ti bassit maipapan iti mensahe a kayat ti Dios nga ibinglay dagiti Santona. Daytoy ti maysa a “timek a pammallaag” para iti amin “nga agindeg iti daga,” a mangisursuro kadakuada nga agbabawi ken mangipasdek iti “agnanayon a katulagan” ti Dios (dagiti bersikulo 4, 8, 22). Dagiti katulongan a mangidandanon iti daytoy a mensahe ket “dagiti nalupoy ken nanumo.” Ngem dagiti napakumbaba a katulongan ket isuda laeng ti awagan ti Dios—idi ken ita—a mangiruar iti Simbaanna “iti di pannakaaw-awat ken iti kasipngetan” (dagiti bersikulo 23, 30).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 1

“Dumngegkayo, O dakayo a tattao”

Ti maysa a pakauna ket mangyam-ammo iti libro. Itudona dagiti tema ken panggep ti libro ket makatulong kadagiti agsagsagana nga agbasa. Bayat ti panangbasam iti benneg 1—ti “pakauna” ti Apo iti Doktrina ken Katulagan (bersikulo 6)—sapulem dagiti tema ken panggep nga inted ti Apo para kadagti paltiingna. Ania ti masursurom a makatulongto kenka iti panagadalmo iti Doktrina ken Katulagan daytoy a tawen? Kas pagarigan, mabalinmo nga utoben no ania ti kaipapanan ti “denggen ti timek ti Apo” kadagitoy a paltiing (bersikulo 14) wenno “sukimaten dagitoy a bilin” (bersikulo 37).

Kitaen met iti pakauna iti Doktrina ken Katulagan.

Doktrina ken Katulagan 1:4–6, 23–24, 37–39

Agsao ti Apo babaen kadagiti katulonganna, agraman dagiti propeta iti ud-udina nga aldaw.

Mangrugi ken aggibus tibenneg 1 iti palawag ti Apo nga agsao Isuna babaen kadagti napili a katulonganna (kitaen kadagiti bersikulo 4–6, 23–24, 38). Isuratmo no ania ti masursurom manipud iti daytoy a paltiing maipanggep:

• Ti Apo ken ti timekna.

• No apay a kasapulan iti aldawtayo dagiti propeta.

Ania ti mariknam a makaawis nga aramiden kas bunga ti no ania ti masarakam?

Kaano a nakangngegka iti timek ti Apo babaen iti timek dagiti katulonganna? (kitaen iti bersikulo 38).

Mabalinmo met a panunoten ti maysa a gayyem a di makaammo maipapan kadagiti sibibiag a propeta benneg 1 a makipagbasbasa kenka. Ania dagiti saludsod a mabalin nga adda iti gayyemmo? Ania dagiti bersikulo a kayatmo a pagsaritaan iti gayyemmo tapno matulongam a makaawat no kasano ti riknam maipapan iti kaadda dagiti propeta iti aldawtayo?

Mabalin nga interesadoka a mangammo nga idi nagtataripnong ti maysa a konseho dagiti panglakayen idi 1831 tapno pagsaritaanda ti maipapan iti panangipablaak kadagiti paltiing ni Joseph Smith, simmupiat ti sumagmamano a tao iti ideya. Nabainanda iti kinakapuy ni Joseph iti panagsurat, ket nagdanagda amangan ta makaigapu iti ad-adu pay a parikut para kadagiti Santo ti panangipablaak kadagiti paltiing (kitaen iti Saints, 1:140–43). No kamengka daytoy a konseho, kasano koma a tamingem dagitoy a pakaseknan? Ania dagiti nalawag a pannakaammo ken pannakaawat a masarakam iti benneg 1 a mabalin koma a nakatulong? (kitaen, kas pagarigan, kadagiti bersikulo 6, 24, 38).

Ibilang ti panangiraman iti maysa a himno kas iti “Come, Listen to a Prophet’s Voice” (Hymns, no. 21) iti panagadal ken panagdaydayawmo. Agsapul kadagiti ragup ti balikas iti himno a mangisuro kadagiti isu met laeng a pagbatayan a kas kadagiti bersikulo iti benneg 1.

Kitaen met iti Topics and Questions, “Prophets,” Gospel Library.

Kasaritanatayo ti Dios babaen dagiti katulonganna, dagiti propeta.

Doktrina ken Katulagan 1:12–30, 34–36

Tulongannak ti Pannakaisubli a mangsango kadagiti karit dagiti ud-udi nga aldaw.

Iti Doktrina ken Katulagan benneg 1, ilawlawag ti Apo no apay nga insublina ti ebangheliona. Kitaen no mano dagiti gapu a mailistam bayat ti panangbasam kadagiti bersikulo 12–23. Iti padasmo, kasano a maipatpatungpal dagiti panggep ti Apo para iti Pannakaisubli?

Ammo ti Apo nga addanto nadagsen a karit ti aldawtayo (kitaen iti bersikulo 17). Ania ti masarakam kadagiti bersikulo 17–30, 34–36 a tumulong kenka a makarikna iti talna ken panagtalek iti laksid dagitoy a karit?

Kitaen met iti Russell M. Nelson, “Embrace the Future with Faith,” Liahona, Nob. 2020, 73–76.

Doktrina ken Katulagan 1:19–28

Usaren ti Apo “dagiti nalupoy ken nanumo” a mangipatungpal iti aramidna.

Bayat ti panangbasam iti Doktrina ken Katulagan 1:19–28, mabalinmo nga utoben no ania ti kaipapanan ti agbalin a maysa a katulongan ti Apo. Ania dagiti kababalin a kayat ti Apo a maaddaan dagiti katulonganna? Ania ti ipatpatungpal ti Apo babaen kadagiti katulonganna? Kasano a maipatpatungpalen dagiti padto kadagitoy a bersikulo iti intero a lubong ken iti bukodmo a biag?

Sapulem ni Jesucristo. Ti panggep dagiti nasantuan a kasuratan ket mangipaneknek iti Mangisalakan ken ti ebangheliona. Bayat ti panangbasam ti Doktrina ken Katulagan 1, ibilangmo ti panangmarka wenno panangisurat kadagiti bersikulo a mangisuro kenka iti maysa a banag maipapan ken ni Jesucristo.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 1:4, 37–39

Babaen kadagiti propetana, ballaagannak ti Apo maipapan iti naespirituan a pagpeggadan.

• Tapno mangirugi iti panaglilinnawag maipapan kadagiti ballaag manipud iti Apo, mabalinmo nga isarita maipapan kadagiti ballaag nga awatentayo manipud kadagiti dadduma a tao maipapan kadagiti pagpeggadan a saantayo a makita. Mabalin a mairaman ti sumagmamano a pagarigan ti nagalis a suelo, umad-adani a bagyo, wenno umas-asideg a kotse. Nalabit a mabalinmo ken dagiti annakmo a kitaen dagiti pagarigan dagiti ballaag a pagilasinan ket idiligyo dagitoy a ballaag kadagiti ballaag nga ited kadatayo ti Apo. Segun iti Doktrina ken Katulagan 1:4, 37–39, kasano a ballaagannatayo ti Apo? Ania ti imballaagna kadatayo iti nabiit? Nalabit a mabalinmo a buyaen wenno basaen dagiti paset dagiti mensahe ti kaudian a sapasap a komperensia ket sapulem dagiti pagarigan ti “timek a pammallaag” ti Dios.

• Aggigiddan nga agkansion iti maysa a kanta maipapan kadagiti propeta, kas iti maudi a berso ti “Follow the Prophet” (Children’s Songbook, 111). Ibinglaymo ti pammaneknekmo nga agsao ti propeta iti balikas ti Dios.

Doktrina ken Katulagan 1:17

Tulongannak ti Pannakaisubli a mangsango kadagiti karit dagiti ud-udi nga aldaw.

• Tapno mayallukoy ti panaglilinnawag maipapan iti Doktrina ken Katulagan 1:17, mabalinmo ken dagiti annakmo ti mangipapan nga agsagsaganakayo para iti panagbiahe. Ania koma ti maimpakeyo? No ammom a nasaksakbay nga agtudo wenno agkupas ti goma ti luganmo wenno busmo, kasano nga apektuan dayta ti wagas a panagsaganam iti panagbiahe? Aggigiddan a basaen ti bersikulo 17, ket pagsasaritaan no ania ti naammuan ti Apo a mapasamak kadatayo. Kasano a nagsagana Isuna para iti daytoy? (No kasapulan, ilawlawag a ti “kalamidad” ket maysa a didigra wenno nakaam-amak a banag.) Kasano a matulongannatayo dagiti bilin ti Dios a mangsango kadagiti karit ti panawentayo?

Doktrina ken Katulagan 1:17, 29

Inawagan ti Apo ni Joseph Smith nga agbalin a propeta.

• Tapno maammuan ti maipapan iti akem ni Joseph Smith iti panangisubli iti ebanghelio ti Mangisalakan, mabalinmo ken dagiti annakmo ti mangkita iti ladawan ti Mangisalakan ken ladawan ni Joseph Smith (kitaen dagiti ladawan iti daytoy a balabala) ken pagsaritaan no ania ti inted kadatayo ti Mangisalakan babaen ken Joseph Smith. Mabalin a mangsapul dagiti annakmo kadagiti pagarigan iti Doktrina ken Katulagan 1:17, 29. Ibagam kadagiti annakmo no kasano nga ammom a ti Dios “inawaganna ti katulongak a ni Joseph Smith, Jun., ket kinasaona manipud iti langit” (bersikulo 17).

© 1998 David Lindsley

Doktrina ken Katulagan 1:30

Ti Simbaan ni Jesucristo dagiti Santo iti Ud-udina nga Aldaw ti “pudno ken nabiag a simbaan” ti Apo.

• Ania ti kaipapananna no sawen a ti Simbaan ket “pudno ken nabiag”? Tapno malawlawagan ti panagpanunot dagiti annakmo maipapan iti daytoy a saludsod, nalabit a mabalinmo nga ipakita kadakuada dagiti ladawan dagiti sibibiag a bambanag ken saan a sibibiag a bambanag—kas iti sibibiag a mula ken natay a mula. Kasano nga ammotayo a sibibiag ti maysa a banag? Kalpasanna mabalinyo a basaen ti Doktrina ken Katulagan 1:30 ken pagsaritaan no ania ti mabalin a kaipapanan para iti Simbaan tapno agbalin a “pudno ken sibibiag.”

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Iti Sibay dagiti Natalinaay a Danum, ni Simon Dewey