Sagrado a Kakaywan, ni Greg Olsen

Enero 13–19:“Nakitak ti Kasla Adigi a Lawag”

Joseph Smith—Pakasaritaan 1:1–26

Mabalinmo a kunaen a ti Doktrina ken Katulagan ket maysa a libro dagiti sungbat iti karkararag: adu kadagiti sagrado a paltiing itoy a libro ti dimteng kas sungbat kadagiti saludsod. Ti saludsod a nangirugi amin—ti maysa a nangtignay iti pannakaibukbok ti paltiing iti ud-udina nga aldaw—ket insaludsod ti maysa nga ubing a lalaki nga agtawen iti 14. Maysa a “sinnait ti sasao ken di agressat a panagsisinnupanget ti kapanunotan” (Joseph Smith—Pakasaritaan 1:10) ti nakaigapuan ni Joseph a natikaw maipapan iti relihion ken ti relasionna iti Dios. Nalabit a mariknam ti kas iti dayta. Adu ti masarakantayo nga agsusupadi a kapanunotan ken makaguyugoy a timek iti aldawtayo. No kayattayo nga urnosen dagitoy a mensahe ken sapulen ti kinapudno, maaramidtayo ti inaramid ni Joseph. Mabalintayo ti agdamag kadagiti saludsod, agadal kadagiti nasantuan a kasuratan, agutob, ken iti kamaudiananna agsaludsod iti Dios. Kas sungbat iti kararag ni Joseph, bimmaba ti kasla adigi a lawag manipud iti langit. Nagparang ti Dios nga Ama ken Jesucristo ket sinungbatanda dagiti saludsodna. Ti pammaneknek ni Joseph iti dayta nainmilagruan a padas ket natured a mangipakdaar a mabalin ti siasino man “nga [agkurang] iti kinasirib ti dumawat iti Dios, ket maikkanto” (Joseph Smith—Pakasaritaan 1:26). Makaawattayo amin, no saan a nailangitan a parmata, ngem nalawlawag a parmata, a silnagan ti nailangitan a lawag.

Dagiti Kapanunotan iti Panagsursuro iti Pagtaengan ken iti Simbaan

Joseph Smith—Pakasaritaan 1:5–26

Ni Joseph Smith ti Propeta ti Pannakaisubli.

Ti panggep ti pakasaritaan ni Joseph Smith ket tapno ipakaammona kadatayo “iti kaadda dagiti pagbatayan” agsipud ta ti kinapudno maipanggep ken ni Joseph ket masansan a makillo (Joseph Smith—Pakasaritaan 1:1). Bayat ti panangbasam iti Joseph Smith—Pakasaritaan 1:1–26, ania ti mangpapigsa iti pammaneknekmo iti nadiosan a takemna?

Kitaen met iti Saints, 1:3–19.

Joseph Smith—Pakasaritaan 1:5–25

Kasano a makaawatak kadagiti sungbat dagiti kararagko?

Napadasam kadin ti “agkurang iti kinasirib” wenno nakarikna iti pannakatikaw maipapan iti pangngeddeng a kasapulam nga aramiden? (Joseph Smith—Pakasaritaan 1:13). Ti padas nga adda ken Joseph Smith idi 1820 ket mabalin nga agserbi a nasayaat a pagtuladan para iti bukodmo a personal a paltiing. Kas pagarigan, bayat ti panangsukisokmo iti Joseph Smith—Pakasaritaan 1:5–25, sapulem dagiti padas a mainaigmo. Ania ti masursurom maipanggep iti:

• Kasano a nagsagana ni Joseph para iti sagrado a padas iti kararag? dagiti bersikulo 8, 11, 14–15).

• Ti akem ti panagadal iti nasantuan a kasuratan iti panagsapul iti paltiing? (kitaen kadagiti bersikulo 11–12)

• Ania ti aramidem no maipasangoka iti oposision? kitaen kadagiti bersikulo 15–16, 21–26).

• Ti panangawat ken panagtignay kadagiti sungbat a maawatmo? (kitaen kadagiti bersikulo 18–25).

Yawis ti panagbibinninglay Ti panagsukisok kadagiti nasantuan a kasuratan ket mangawis kadagiti impresion manipud iti Espiritu Santo. Ti panangibinglay kadagitoy nga impresion ket makaawis iti Espiritu Santo a mangsaksi kadagiti dadduma, kasta met iti indibidual a mangibingbinglay.

Ania dagiti nayon a nalawag a pannakaammo ken pannakaawat [insights] a mabalin a magun-odmo manipud iti artikulo ni Presidente Henry B. Eyring “The First Vision: A Pattern for Personal Revelation”? (Liahona, Peb. 2020, 12–17).

Mabalinmo pay a sapulen ti dadduma pay a pagarigan kadagiti nasantuan a kasuratan dagiti tao a makisarsarita iti Dios. Dagiti ladawan iti Libro ti Arte ti Ebanghelio wenno dadduma pay a libro ti Umaykayo, Sumurot Kaniak a makaited kenka kadagiti kapanunotan. Padasen ti panangsungbat kadagiti saludsod a nailista iti napalabas para iti tunggal pagarigan a masarakam. Ania dagiti padasmo iti panangawat kadagiti sungbat iti kararag? Ania ti maaramidam a mangtulong kadagiti dadduma a maaddaan met kadagiti nasayaat a padas?

Kitaen met iti Russell M. Nelson, “Hear Him,” Liahona, Mayo 2020, 88–92; Topics and Questions, “Personal Revelation,” Gospel Library.

Joseph Smith—Pakasaritaan 1:15–20

Nakita ni Joseph Smith ti Dios nga Ama ken ti Anakna, ni Jesucristo.

Nagtalek ni Joseph Smith a sungbatan ti Dios ti kararagna, ngem saanna a ninamnama no kasano dayta a sungbat ti mangbalbaliw iti biagna—ken ti lubong. Bayat ti panangbasam maipapan iti padas ni Joseph, utobem no kasano a nabalbaliwan ti Umuna a Parmata ti biagmo.

Kas pagarigan, impalgak ti Umuna a Parmata ti sumagmamano a kinapudno maipapan iti Dios Ama ken ti Anakna, ni Jesucristo, a maigiddiat iti pammati ti adu a tattao iti aldaw ni Joseph. Bayat ti panangbasam iti Joseph Smith—Pakasaritaan 1:15–20, ibilangmo ti panangisurat iti nadumaduma a wagas a mangkumpleto ti maysa a palawag a kas iti daytoy: “Gapu ta napasamak ti Umuna a Parmata, ammok a …”

Ania dagiti riknam bayat ti panangutobmo iti padas ni Joseph ken amin a banag a naggapu iti daytoy?

Kitaen met iti “Ask of God: Joseph Smith’s First Vision” (video), Gospel Library; “Joseph Smith’s First Prayer,” Hymns, no. 26.

Agdawat iti Dios: Umuna a Parmata ni Joseph Smith.

Ababa a pelikula a pinataud para iti Church History Museum a mangiladladawan iti Umuna a Parmata ni Joseph Smith, agraman dagiti detalye a naadaw iti tunggal pakaammuan ni Joseph Smith.

Detalye manipud iti No Asino Man ti Agkurang iti Kinasirib, ni Walter Rane

Joseph Smith—Pakasaritaan 1:15–20

Apay adda dagiti nadumaduma a pakaammuan ti Umuna a Parmata?

Kabayatan ti panagbiagna, nairekord ni Joseph Smith ti padasna iti Sagrado a Kakaywan iti saan a nababbaba iti uppat a daras, a masansan nga agus-usar iti maysa a parasurat. Mainayon pay, ti sumagmamano a pakaammuan ket insurat dagiti dadduma a tao a nakangngeg ken ni Joseph a nagsarita maipapan iti parmatana. Nupay aggigiddiat dagitoy a pakaammuan iti sumagmamano a detalye, depende iti autor, agbasbasa ken dumdumngeg, ken kasasaad, no saan man ket agtutunosda. Ket mangnayon ti tunggal pakaammuan kadagiti detalye a mangtulong kadatayo tapno nasaysayaat a maawatan ti padas ni Joseph Smith, kas met laeng iti panangtulong kadatayo dagiti uppat nga Ebanghelio ti Baro a Tulag tapno nasaysayaat a maawatantayo ti panagministro ti Mangisalakan.

Kitaen met iti Topics and Questions, “First Vision Accounts,” Gospel Library.

Joseph Smith—Pakasaritaan 1:21–26

Makapagtalinaedak a napudno iti no ania ti ammok, uray no didak awaten ti dadduma.

Kalpasan ti naisangsangayan nga Umuna a Parmatana, gagangay a kayat ni Joseph Smith nga ibinglay ti padasna kadagiti dadduma. Ti oposision a sinangona ti namagsiddaaw kenkuana. Bayat ti panangbasam iti pakaammuan ni Joseph, ania ti mangparegta kenka tapno agtalinaed a napudno iti pammaneknekmo? Ania dagiti dadduma pay a pagarigan—manipud kadagiti nasantuan a kasuratan, ti kapuonam, wenno dagiti tao nga am-ammom—a mangted kenka iti tured nga agtalinaed a napudno kadagiti naespirituan a padas a napasaramon?

Kitaen met iti Gary E. Stevenson, “Nourishing and Bearing Your Testimony,” Liahona, Nob. 2022, 111–14.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Joseph Smith—Pakasaritaan 1:3–14

Naisagana ni Joseph Smith nga agbalin a propeta ti Dios.

• Ti panagadal maipapan iti kinaagtutubo ni Joseph Smith ket makatulong kadagiti ubbing a manginaig kenkuana bayat ti panagsursuroda manipud kadagiti padasna. Nalabit a mabalinda nga iggaman ti ladawan ni Joseph Smith ken ibinglayda no ania ti ammoda maipapan kenkuana. No kasapulan, mabalinmo nga inayon ti sumagmamano a kinapudno maipapan kenkuana manipud iti Joseph Smith—Paksaritaan 1:3–14 (kitaen pay iti “Kapitulo 1: Ni Joseph Smith ken ti Pamiliana,” iti Dagiti Estoria iti Doktrina ken Katulagan, 6–8, wenno ti katupagna a video iti Gospel Library). Ania ti napadasan ni Joseph a nakatulong a nangisagana kenkuana nga agbalin a propeta? Ania ti mabalin nga isagsagana kadatayo ti Dios nga aramidentayo?

  Chapter 1: Joseph Smith and His Family: 1805–1820

Detalye manipd iti Umuna a Parmata ni Joseph Smith, ni Greg Olsen

Joseph Smith—Pakasaritaan 1:10–13

Masungbatan ti Dios dagiti saludsodko babaen kadagiti nasantuan a kasuratan.

• Ibilangmo ti panangipakita kadagiti annakmo iti nadumaduma a libro, agraman dagiti nasantuan a kasuratan. Tulongam ida a mangpanunot kadagiti saludsod a mabalin a sungbatan dagitoy a libro. Kalpasanna, mabalin nga aggigiddan a basaenyo ti Joseph Smith—Pakasaritaan 1:10–11 tapno maammuan no ania dagiti saludsod ni Joseph Smith ken no ania dagiti sungbat a nasarakanna kadagiti nasantuan a kasuratan.

• Mabalin a kabaelan dagiti annakmo a mangsapul kadagiti balikas iti bersikulo 12 a mangiladawan no kasano a ti panangbasa iti Santiago 1:5 ket nangapekto ken ni Joseph. Kalpasanna mabalinmo nga ibinglay dagiti padas iti tunggal maysa a ti maysa a paset ti nasantuan a kasuratan ket addaan iti nabileg nga impluensia kadakayo. Mabalinyo pay ti agkansion iti maysa a kanta maipapan kadagiti nasantuan a kasuratan, kas iti “Search, Ponder, and Pray” (Children’s Songbook, 109). Ania ti isuro ti kanta maipapan iti no apay nga agbasatayo kadagiti nasantuan a kasuratan?

Joseph Smith—Pakasaritaan 1:10–17

Denggen ken sungbatan ti Nailangitan nga Ama dagiti kararagko.

• Tapno mairugi ti panaglilinnawag maipapan iti no kasano ti pannakisaritatayo iti Nailangitan nga Ama, nalabit a mabalinmo ken dagiti annakmo ti agsaludsod iti tunggal maysa babaen ti panangusar iti nadumaduma a wagas ti komunikasion, kas iti mensahe ti text, awag iti telepono, wenno surat. Kasano nga agsaludsodtayo iti Nailangitan nga Ama? Kasano nga ipakitatayo Kenkuana nga ay-ayaten ken dayawentayo Isuna kadagiti kararagtayo? Aggigiddan a basaen ti Joseph Smith—Pakasaritaan 1:16–19 ken pagsasaritaan no kasano a sinungbatan ti Nailangitan nga Ama ti kararag ni Joseph Smith. Kalpasanna mabalinmo ken dagiti annakmo ti mangiburay kadagiti padasmo idi nagpatulongka iti Dios ket nakaawatka iti sungbat.

Joseph Smith—Pakasaritaan 1:17–19

Nakita ni Joseph Smith ti Nailangitan nga Ama ken ti anakna, ni Jesucristo.

• Mabalin a maragsakan dagiti babassit nga ubbing nga agtakder a nakaunnat dagiti takiagda nga agpammarang a kayo iti Sagrado a Kakaywan bayat ti panangibagam kadakuada ti maipapan iti Umuna a Parmata. Kiddawem kadagiti ubbing nga agtaytayabda a kasla maipugso ti angin bayat a sarsaritaem maipapan iti panagkararag ni Joseph. Kalpasanna kiddawem kadakuada nga agtakderda a sitatalna unay ken naulimek no ibagam kadakuada a nagparang ti Nailangitan nga Ama ken ni Jesus ken ni Joseph.

• Mabalin a magustuan dagiti in-inauna nga ubbing nga agusar iti maysa wenno ad-adu pay kadagiti ladawan iti daytoy a balabala tapno ibagada kadakayo no ania ti ammoda maipapan iti Umuna a Parmata. Allukoyem ida nga agibasar iti Joseph Smith—Pakasaritaan 1:14–17 ken tapno ibinglayda dagiti kapanunotan ken riknada maipapan iti padas ni Joseph (kitaen met iti “Kapitulo 2: Umuna a Parmata Joseph Smith,” in Dagiti Estoria iti Doktrina ken Katulagan, 9–12, wenno ti katupagna a video iti Gospel Library).

  Chapter 2: Joseph Smith’s First Vision: 1820

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Naisubli a Kinapudno, ni Leon Parson