Detalye manipud iti Inawagannak iti Naganko, ni Michael Malm

Enero 20–26: “Umasidegto ti Puspuso dagiti Annak kadagiti Ammada”

Doktrina ken Katulagan 2; Joseph Smith—Pakasaritan 1:27–65

Tallo a tawenen manipud idi nagparang ti Dios nga Ama ken ti Anakna, ni Jesucristo, ken ni Joseph Smith iti kakaywan, ngem di pay nakaawat ni Joseph manipud idi kadagiti ania man a nayon a paltiing. Rinugianna ti nagsiddaaw no saan a naragsakan ti Apo kenkuana. Kas iti amin kadatayo, nakaaramid isuna kadagiti biddut, ket nariknana a nagbasol babaen kadagitoy. Nupay kasta adda latta pinaaramid ti Dios kenkuana. Ket ti aramid a nakaawagan ni Joseph ket adda pakainaiganna iti no ania ti paaramid ti Dios kadatayo. Isangbay ni Joseph iti Libro ni Mormon; maawistayo a mangibinglay iti mensahena. Awaten ni Joseph dagiti tulbek ti priesthood a mangisubli iti puspuso dagiti annak kadagiti ammada; makaawattayo itan kadagiti ordinansa para kadagiti kapuonantayo kadagiti templo. Naibaga ken ni Joseph dagiti padto a maipatungpalto iti mabiit; maawagantayo a tumulong a mangipatungpal kadagitoy a padto. No makiramantayo iti aramid ti Dios, manamnama a maipasangotayo iti oposision ken uray pay pannakairurumen, kas iti naaramid iti Propeta. Ngem maaddaantayo met iti pammati nga aramidennatayonto ti Apo a ramramit kadagiti imana, kas iti inaramidna ken ni Joseph.

Kitaen met iti Saints, 1:20–48.

Dagiti Kapanunotan iti Panagsursuro iti Pagtaengan ken iti Simbaan

Joseph Smith—Pakasaritaan 1:27–33

Adda trabaho nga ipaaramid ti Dios kaniak.

Maysa a banag ti mamati nga adda trabaho ti Dios a paaramidna ken ni Joseph Smith—mabalintayo a taliawen ti biagna ken silalawag a kitaen no ania ti naileppasna. Ngem napanunotmo kadin nga adda trabaho met ti Dios para kenka? Bayat ti panangbasam iti Joseph Smith—Pakasaritaan 1:27–33, panunotem no ania dayta a paaramidna. Kasano a makatulong daytoy iti agtultuloy a Pannakaisubli ti ebanghelio ti Mangisalakan?

Insuro ni Elder Gary E. Stevenson: “Bayat ti yaasidegtayo ken Cristo ken itutulong ti dadduma a mangaramid met iti kasta, makiramantayo ti aramid ti Dios a pannakaisalakan ken pannakaitan-ok, a mangipamaysa kadagiti nadiosan a naidutok a pagrebbengan. … Simple, makaparegta, makatignay, ken maaramid dagitoy a pagrebbengan. Adtoy dagitoy:

• Panagbiag iti ebanghelio ni Jesucristo

• Panangaywan kadagiti agkasapulan

• Panangawis iti amin nga umawat iti ebanghelio

• Panamagkaykaysa kadagiti pamilia para iti kinaagnanayon” (“Simply Beautiful—Beautifully Simple,” Liahona, Nob. 2021, 47).

Utobem dagiti padas a napasaramon iti pannakiraman iti tunggal maysa kadagitoy a nadiosan a naidutok a pagrebbengan. Ania ti sumaruno a paaramid kenka ti Mangisalakan? Adda panid ti Topics and Questions para iti tunggal maysa kadagitoy a pagrebbengan (kitaen iti “Our Role in God’s Work of Salvation and Exaltation,” Gospel Library). Mabalinmo a sukisoken dagitoy a panid tapno matulongannaka a mangsungbat iti daytoy a saludsod.

Mabalin a mariknam no dadduma a kasla saannaka nga usaren ti Apo gapu kadagiti biddut nga inaramidmo. Ania ti masursuroyo manipud iti padas ni Joseph Smith iti Joseph Smith—Pakasaritaan 1:28–29? Kasano ti pannakaammom iti “pagsaadam iti [Dios]”?

Agdamag kadagiti saludsod a mangyallukoy iti napateg a panaglilinnawag. Dagiti saludsod a nasursurok ngem maysa ti umno a sungbatna ket mangawis kadagiti agad-adal a sumungbat maibatay kadagiti bukodda a kapanunotan, rikna, ken padas. Dagiti saludsod iti daytoy a balabala ket pagarigan daytoy.

Kitaen met iti “Youth Responsibility in the Work of Salvation” (video), ChurchofJesusChrist.org; “The Work of Salvation and Exaltation,” General Handbook, 1.2.

Youth Responsibility in the Work of Salvation

Elder Bednar wants the youth to recognize that recent adjustments to Young Women classes and Aaronic Priesthood quorums give them operational and executional responsibility in the work of salvation. When the youth are focused, miracles will come.

Joseph Smith—Pakasaritaan 1:34–47

Babaen ti panangisublina iti ebangheliona, tinungpal ti Mangisalakan dagiti nagkauna a padto.

Nagparang ni Moroni ken ni Joseph Smith, inadawna dagiti sumagmamano a padto iti Daan ken Baro a Tulag, a kas iti Isaias 11; Dagiti Aramid 3:22–23; ken Joel 2:28–32. Bayat ti panangbasam iti Joseph Smith—Pakasaritaan 1:34–47, panunotem no apay a nagbalin a napateg dagitoy a padto a maammuan ni Joseph. Apay a napategda a maammuam?

Mabalin pay a basaem no ania ti insuro ni Elder David A. Bednar maipapan iti umuna nga isasarungkar ni Moroni ken ni Joseph Smith iti “With the Power of God in Great Glory” (Liahona, Nob. 2021, 28).

Addaan iti Bileg ti Naindaklan a Dayag ti Dios

Isuro ni Elder Bedna a ti panangdayawtayo kadagiti katulagantayo ti mangtulong kadatayo nga umawat iti bileg ti kinadiosan iti biagtayo.

Kitaen met iti “An Angel from on High,” Hymns, no. 13.

Joseph Smith—Pakasaritaan 1:48–60

Isagananakto ti Dios nga agtrabaho iti pagarianna.

Agtawen laeng ni Joseph iti 17 idi damo a nakitana dagiti balitok a pinanid. Nupay kasta, saanda a naitalek iti panangaywanna agingga iti uppat a tawen kalpasanna. Basaem ti Joseph Smith—Pakasaritaan 1:48–60, a sapsapulem ti napasamak iti biag ni Joseph bayat dayta a panawen. Iti panagkunam, kasano ti panangisagana kenkuana dagitoy a pasamak para iti trabaho nga inyawag ti Dios nga aramidenna? Ania dagiti napadasam a nangisagana kenka nga agserbi iti Dios ken kadagiti dadduma? Ania ti mapaspasaram iti agdama a makatulong kenka nga agsagana para iti masanguanan a panagserbi?

Ti Turod ti Cumorah, ni Al Rounds

Doktrina ken Katulagan 2

Imbaon ti Apo ni Elias a mangisubli iti pusok kadagiti kapuonak.

Ania ti isuro kenka dagiti balikas a kas “mula,” “puspuso,” ken “isubli” iti daytoy a benneg maipapan iti mision ni Elias ken dagiti bendision dagiti insublina a tulbek? Kasano ti riknam a maisubli ti pusom kadagiti kapuonam? Panunotem dagiti wagas a mabalinmo a mapadasan dagiti kasta a rikna nga ad-adda a masansan. Ti panangsapul kadagiti kapuonam ken panangannong kadagiti ordinansa para kadakuada iti templo ket maysa a wagas (kitaen iti FamilySearch.org). Ania dagiti dadduma pay a mapanunotmo?

Kitaen met iti Doktrina ken Katulagan 110:13–16; Gerrit W. Gong, “Happy and Forever,” Liahona, Nob. 2022, 83–86.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Joseph Smith—Pakasaritaan 1:28–29

Makapagbabawiak ken mapakawannak.

• No dadduma mabalin a mariknatayo amin a “nagbasoltayo gapu iti kinalupoy ken dagiti pagkurangan[tayo],” kas iti inaramid ni Joseph Smith. Mabalinmo ken dagiti annakmo nga adalen ti Joseph Smith—Pakasaritaan 1:29 nga aggigidan, a sapsapulem ti inaramid ni Joseph idi nariknana ti kasta. Ania ti masursurotayo manipud iti pagwadanna a makatulongto kadatayo no agbidduttayo? Apay a napateg a maammuan nga inawagan ti Dios ni Joseph uray pay no adda pagkuranganna?

Joseph Smith—Pakasaritaan 1:27–54

Inawagan ti Nailangitan nga Ama ni Joseph Smith a mangtulong Kenkuana a mangaramid iti trabahona.

• Mabalin a magustuan dagiti annakmo nga agpammarang a ni Joseph Smith bayat ti panangisaritam iti pakaammuan dagiti isasarungkar ni Moroni iti Joseph Smith—Pakasaritaan 1:27–54 wenno “Kapitulo 3: Ni Anghel Moroni ken dagiti Pinanid a Balitok” (iti Doctrine and Covenants Stories, 13–17, wenno ti katupagna a video iti Gospel Library). Kas pagarigan, mabalinda nga idalikepkep dagiti takiagda a kasla agkarkararagda wenno agpammarangda a sumangsang-at iti Turod Cumorah, ken dadduma pay. Kalpasanna, mabalinmo a kiddawen kadakuada nga agsarita maipapan iti no ania ti inyawag ti Dios nga aramiden ni Joseph Smith ken no kasano a mabendisionantayo kas bungana. Kas pagarigan, kasano a nabendisionnantayo gapu ta impatarus ni Joseph Smith ti Libro ni Mormon? Kasano a nakatulong kadatayo ti aramidna nga umas-asidegtayo iti Nailangitan nga Ama ken ni Jesucristo?

Doktrina ken Katulagan 2

Kayat ti Nailangitan nga Ama a mailantip dagiti pamilia iti templo.

• Nalabit a magustuam ken dagiti annakmo a kumita iti sumagmamano a ladawan ti pamiliam, a mabalin a pakairamanan ti maysa a ladawan ti pamiliam iti templo (wenno kitaen iti Libro ti Arte ti Ebanghelio, no. 120). Kalpasanna mabalinyo a basaen ti Doktrina ken Katulagan 2 ken ibinglay iti tunggal maysa dagiti kapanunotanyo maipapan no apay nga addaantayo kadagiti templo ken no apay a kayat ti Nailangitan nga Ama nga agdedenna dagiti pamilia iti agnanayon. Aggigiddan a kantaen ti “Families Can Be Together Forever” (Children’s Songbook, 188). Ania ti kuna daytoy a kanta a maaramidtayo tapno makadennatayo dagiti pamiliatayo iti agnanayon?

Templo ti Palmyra New York

Doktrina ken Katulagan 2

Mangisangbay kaniak ti rag-o ti panagsursuro maipapan kadagiti kapuonak.

• Mabalin nga aggagar dagiti ubbing ken mariknada ti rag-o ti pakasaritaan ti pamilia. Tapno matulongam ida, mabalinmo nga ibinglay dagiti estoria wenno ladawan dagiti kapuonanyo. Isaritam kadagiti annakmo maipapan no ania ti kita ti biag dagiti kapuonanda idi ubbingda pay. Mabalin met a magustuan dagiti annakyo ti sumagmamano kadagiti aktibidad iti pakasaritaan ti pamilia iti FamilySearch.org/discovery.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Awaten ni Joseph dagiti Pinanid, ni Gary E. Smith