Enero 27–Pebrero 2: “Maituloy ti Aramidko”

Doktrina ken Katulagan 3–5

Kabayatan dagiti umuna a sumagmamano a tawenna kas propeta ti Apo, di pay ammo ni Joseph Smith ti amin a banag maipanggep iti “nakaskasdaaw nga aramid” a nakaawaganna nga aramiden. Ngem maysa a banag nga insuro kenkuana dagiti immuna a padasna ket ti panangitrabaho iti aramid ti Dios, a nasken a “naitalimudok ti imatangna iti gloria ti Dios” (Doktrina ken Katulagan 4:1, 5). Kas pagarigan, no imbalakad ti Apo kenkuana nga agaramid iti maysa a banag a saan a sigurado a tarigagayanna nga aramiden, kasapulan a surotenna ti balakad ti Apo. Ken nupay naaddaan isuna iti “adu a paltiing, ken … bileg nga agaramid iti adu a naindaklan nga aramid,” no nariknana a napatpateg ti tarigagayanna ngem iti pagayatan ti Dios, isu ket “nasken a matnag” (Doktrina ken Katulagan 3:4). Ngem nasursuro ni Joseph ti maysa a sabali a banag a napateg a kas met laeng iti panangitrabaho iti aramid ti Dios: “Manangngaasi ti Dios,” ket no sipupudno a nagbabawi ni Joseph, isu “pay laeng ti mapili” (bersikulo 10). Ti aramid ti Dios, kalpasan iti amin, maysa nga aramid ti panangsubbot. Ken dayta nga aramid ket “saan a mapaay” (bersikulo 1).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 3:1–16

Makapagtalekak iti Dios.

Iti nasapa a panagministro ni Joseph Smith, narigat a sapulen dagiti nasasayaat a gayyem—nangnangruna dagiti gagayyem a kas ken ni Martin Harris, maysa a madaydayaw, narang-ay a tao a nangaramid iti dakkel a panagsakripisio a mangsuporta ti trabaho ni Joseph. Isu nga idi kiniddaw ni Martin ti pammalubos a mangipakita iti umuna a 116 a panid ti manuskrito ti patarus ti Libro ni Mormon iti asawana, natural a kayat ni Joseph a padayawan ti kiddawna, uray no nangballaag ti Apo a maibusor iti daytoy. Pagdaksanna, napukaw dagiti pinanid bayat ti kaaddana iti ikut ni Martin, ket naulpit a dinusa ti Apo da Joseph ken Martin (kitaen iti Saints, 1:51–53).

Bayat ti panangbasam iti Doktrina ken Katulagan 3: 1–15, utobem no ania ti kayat ti Apo a masursurom manipud iti padasda. Kas pagarigan, ania ti masursurom maipanggep iti:

• Aramid ti Dios? (kitaen kadagiti bersikulo 1–3,16).

• Dagiti bunga ti panagbuteng iti tao imbes a panagtalek iti Dios? (kitaen kadagiti bersikulo 4–8)

• Dagiti bendision nga aggapu iti panagtalinaed a napudno? bersikulo 8).

• Ti wagas nga agpada nga inatur ken pinaregta ti Apo ni Joseph (kitaen kadagiti bersikulo 9–16).

Iti mensahena “Which Way Do You Face?,” mangted ni Elder Lynn G. Robbins iti adu a pagarigan ti nasantuan a kasuratan dagiti tao a nagbuteng iti Dios ken dagiti tao a simmuko iti pammilit manipud iti dadduma (Liahona, Nob. 2014, 9–11). Ibilangmo ti panangbasa kadagitoy a pagarigan kadagiti nasantuan a kasuratan nga ibasarna. Ania ti masursurom manipud kadagitoy a pakaammuan? Ania dagiti napadasamon a nagtalekka iti Apo idi naipasangoka iti pammilit nga agaramid iti sabali a banag? Ania dagiti bunga dagiti tignaymo?

Kitaen met iti Dale G. Renlund, “A Framework for Personal Revelation,” Liahona, Nob. 2022, 16–19; “The Contributions of Martin Harris,” iti Revelations in Context (2016), 1–9; Topics and Questions, “Seeking Truth and Avoiding Deception,” Gospel Library; “How Gentle God’s Commands,” Hymns, no. 125.

Doktrina ken Katulagan 4

Makapagserbiak iti Dios iti amin a puso, kabaelan, panunot, ken pigsak.

Tibenneg 4 ti masansan a mayaplikar kadagiti full-time a misionario. Nupay kasta, makaay-ayo a tandaanan a daytoy a paltiing ti immuna a naited ken ni Joseph Smith Sr., a saan a naawagan nga agmision ngem addaan pay laeng iti “tarigagay nga agserbi iti Dios” (bersikulo 3).

Maysa a wagas a panangbasa iti daytoy a benneg ket mangipapan iti daytoy kas maysa a panangiladawan iti trabaho iti maysa a tao nga agtarigagay a mangaramid iti trabaho ti Apo. Ania ti sapsapulen ti Apo? Ania dagiti pagsayaatan nga idiayana?

Ania ti masursurom maipapan iti panagserbi iti Apo manipud iti daytoy a paltiing?

Inawagan ni Presidente Russell M. Nelson ti pannakaummong ti Israel a “ti kaindaklan a karit, ti kaindaklan a panggep, ken ti kaindaklan nga aramid iti daga” (“Hope of Israel” [worldwide youth devotional, Hunio 3, 2018], Gospel Library). Ania ti masarakam iti bitlana a mangparegta kenka a makiraman iti daytoy a trabaho?

Tunggal maysa nga addaan tarigagay nga agserbi iti Dios ket naawagan iti trabaho.

Doktrina ken Katulagan 5

Babaen ti Espiritu Santo, makagun-odak iti saksi iti Libro ni Mormon.

Idi Marso 1829, nangidatag ti asawa ni Martin Harris, ni Lucy, iti korte a ni Joseph Smith ket al-allilawenna dagiti tao babaen ti panagpammarangna nga agipatpatarus kadagiti balitok a pinanid (kitaen iti Saints, 1:56–58). Iti kasta dimmawat ni Martin ken ni Joseph iti ad-adu pay a pakakitaan a pudno dagiti balitok a pinanid. TiDoktrina ken Katulagan 5 ket maysa a paltiing a kas sungbat ti kiddaw ni Martin. Ania ti masursurom manipud iti daytoy a benneg maipapan iti sumaganad:

• No ania ti kuna ti Apo a mapasamak no maiparang dagiti balitok a pinanid tapno makita ti lubong (kitaen iti Doktrina ken Katulagan 5:7). Apay iti panagkunam a kasta?

• Ti akem dagiti saksi iti aramid ti Apo (kitaen kadagiti bersikulo 11–15; kitaen met iti 2 Taga Corinto 13:1).

• Kasano a gun-odem ti pammaneknek iti Libro ni Mormon para iti bagim (kitaen kadagiti bersikulo 16, 24; kitaen met iti Moroni 10:3–5).

Doktrina ken Katulagan 5:1–10

Inted ni Jesucristo kadatayo ti balikasna babaen ken ni Joseph Smith.

Ania ti isuro kenka ti Doktrina ken Katulagan 5:1–10 maipapan iti napateg nga akem ni Joseph Smith iti aldawtayo—ken iti biagmo? (Kitaen met iti 2 Nephi 3:6–24.)

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 3:5–10; 5:21–22

Makapagpiliak iti umno no padasen dagiti dadduma a pagaramidendak iti biddut.

• Tapno mairugi ti panaglilinnawag maipapan iti panagsursuro nga agtalek iti Nailangitan nga Ama, mabalin a kayatmo nga irebyu ti estoria maipapan dagiti napukaw a panid ti manuskrito (kitaen iti Doktrina ken Katulagan, 18–21). Kalpasanna mabalinyo ti mangyakem kadagiti annakmo ti sumagmamano a situasion no masulisogda nga agaramid iti maysa a banag nga ammoda a saan nga umno. Ania dagiti balikas ken ragup ti balikas iti Doktrina ken Katulagan 3:5–8; 5:21–22 a makatulong kadakuada kabayatan dagitoy a situasion?

  Chapter 4: Martin Harris and the Lost Pages: 1827–1828

Doktrina ken Katulagan 4

Awisennak ti Apo a tumulong iti aramidna.

• Naglaon ti tunggal bersikulo iti Doktrina ken Katulagan 4 kadagiti napapateg a kinapudno a makatulong kadagiti annakmo a makasursuro maipapan iti panagserbi iti Dios. Adtoy ti sumagmamano a kapanunotan a tumulong kadakuada a mangtakuat kadagitoy a kinapudno:

  • Mabalin nga aggigiddan a basaenyo ti Doktrina ken Katulagan 4:1 ken ipakita dagiti ladawan a mangiladawan iti “nakaskasdaaw” nga aramid ti Dios iti ud-udina nga aldaw (kas kadagiti misionario, templo, ken ti Libro ni Mormon).

  • Tulongam dagiti annakmo nga agpanunot kadagiti tignay wenno agdrowing kadagiti ladawan a mangiladawan ti ragup ti balikas nga “agserbikayo kenkuana iti amin a puso, kabaelan, panunot ken pigsayo” (Doktrina ken Katulagan 4:2).

  • Mabalinyo nga aggigiddan a sapulen dagiti ramit a mausar nga agtrabaho iti maysa a talon. Kasano a makatulong kadatayo dagitoy a ramit? Awisem dagiti annakmo a mangsarak kadagiti banag iti Doktrina ken Katulagan 4:5–6 a kapada dagiti ramit iti panagaramid ti trabaho ti Dios.

  • Mabalin nga agsukisok dagiti in-inauna nga ubbing iti Doktrina ken Katulagan 4 iti bukodda ken mangaramid ti listaan dagiti banag a sursuruenda maipapan iti no ania ti kaipapanan ti agserbi iti Dios.

  • Mabalinyo ti aggigiddan nga agkansion iti maysa a kanta maipapan iti aramid ti misionario, kas iti “I Want to Be a Missionary Now” (Children’s Songbook, 168).

Makatulongak iti aramid ti Dios babaen ti panangserbi iti dadduma

Ibagay dagiti aktibidad tapno mairaman dagiti tao nga addaan iti pagkurangan. Dagiti babassit a panagibagay kadagiti aktibidad ket makasigurado nga adda gundaway ti tunggal maysa nga agsursuro. Kas pagarigan, no isingasing ti maysa nga aktibidad a mangipakita iti ladawan, mabalin nga agkansionkayo iti maysa a kanta a mangiraman kadagiti tao nga addaan iti pagkurangan iti panagkita.

Doktrina ken Katulagan 5:1–7, 11, 16, 23–24

Makabagbalinak a maysa a saksi a pudno ti Libro ni Mormon.

• Tapno maisuro dagiti annakmo maipapan kadagiti saksi, mabalinmo a kiddawen kadakuada a panunotenda nga imbaga kadakuada ti maysa a gayyemda a nakakitada iti maysa a pusa a magmagna iti akinsango a sakana. Mamatida kadi? Kasano ngay no kasta met ti imbaga ti sabali a gayyem? Isaritam no ania ti maysa a “saksi” ken no apay a napateg dagiti saksi. Kalpasanna, mabalinmo a tulongan dagiti annakmo a mangsapul iti Doktrina ken Katulagan 5:1–3, 7, 11 para kadagiti sungbat kadagiti saludsod a kas kadagitoy:

  • Ania ti kayat a maammuan ni Martin Harris?

  • Siasino ti mabalin a pangipakitaan ni Joseph Smith kadagiti balitok a pinanid?

  • Apay a ti pannakakita kadagiti pinanid ket nalabit saan a mangkombinsi iti maysa a tao a pudno ti Libro ni Mormon?

  • Ania ti maaramidtayo tapno agbalin a saksi iti Libro ni Mormon? (kitaen iti Doktrina ken Katulagan 5:16; Moroni 10:3–5).

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Nakaro a Dagensen dagiti 116 Panid, ni Kwani Povi Winder