Pebrero 3–9: “Daytoy ti Espiritu ti Paltiing”

Doktrina ken Katulagan 6–9

Iti panawen ti panagtitinnag (fall) ti 1828, maysa a naubing nga schoolteacher nga agnagan iti Oliver Cowdery ti nakaala iti trabaho a panangisuro iti Manchester, Nueva York, ket nakipagnaed iti pamilia da Lucy ken Joseph Smith Sr. Nadamag ni Oliver ti maipanggep iti anakda a ni Joseph ken dagiti nakaskasdaaw a padasna, ket ni Oliver, a nangibilang iti bagina nga agsapsapul iti kinapudno, nagtarigagay a mangammo iti ad-adu pay. Inladawan dagiti Smith ti isasarungkar dagiti anghel, ti maysa a kadaanan a kasuratan, ken ti sagut nga agipatarus babaen ti bileg ti Dios. Naallukoy ni Oliver. Mabalin kadi a pudno daytoy? Nangted da Lucy ken Joseph Sr. kenkuana iti balakad a mayaplikar iti asino man nga agsapsapul iti kinapudno: agkararag ken agsaludsod iti Apo.

Nagkararag ken nagsaludsod ni Oliver, ket sinungbatan ti Apo, a nagsasao maipapan iti kappia iti panunot[na]” (Doktrina ken Katulagan 6:23). Ti paltiing, natakuatan ni Oliver, ket saan laeng a para kadagiti propeta a kas ken ni Joseph Smith. Daytoy ket para iti siasino man nga agtarigagay iti daytoy ken sipapasnek nga agkalikagum a manggun-od iti daytoy. Adu pay ti masapul nga adalen ni Oliver, ngem umdas ti ammona tapno aramidenna ti sumaruno nga addangna. Ammona nga ar-aramiden ti Apo ti napateg a banag babaen ken ni Joseph Smith, ket tinarigagayan ni Oliver nga agbalin a paset iti daytoy.

Kitaen met iti Saints, 1:58–64; “Days of Harmony” (video), Gospel Library.

Days of Harmony

Witness Oliver Cowdery’s experience as Joseph Smith’s scribe during the translation of the Book of Mormon.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 6; 8–9

Kasaritanak ti Nailangitan nga Ama babaen ti Espiritu Santo.

Iti panagsusulbod ti 1829, nagboluntario ni Oliver Cowdery nga agbalin a parasurat ni Joseph Smith kabayatan ti panagipatarusna iti Libro ni Mormon. Pinaregta dayta a padas ti riknana, ket napanunotna no maawatna met ti paltiing ken ti sagut nga agipatarus. Nupay kasta, saan a nasayaat ti umuna a panangpadasna.

No napadasam a nagrigat nga umawat wenno makaawat iti paltiing, mabalin a mainaigmo ti padas ni Oliver—ken makasursuroka iti dayta. Bayat ti panangbasam iti Doktrina ken Katulagan 6, 8, ken 9, kitaem no ania ti insuro ti Apo maipanggep iti bukod a paltiing. Kas pagarigan:

• Ania ti isingasing ti Doktrina ken Katulagan 6:5–7; 8:1; 9:7–8 maipapan iti no ania ti kasapulan ti Apo kenka sakbay nga ipalgaknanto ti pagayatanna?

• Ania ti masursurom manipud iti Doktrina ken Katulagan 6:14–17, 22–24; 8:2–3; 9:7–9 maipapan kadagiti agduduma a wagas a mabalin nga umay ti paltiing? Kasano a mabigbigmo daytoy?

• Ania pay ti masursurom maipapan iti paltiing manipud kadagitoy a benneg?

Mabalin a dagiti padas ni Oliver ti mangtignay kenka nga “iturongmo ti panunotmo” kadagiti kanito a nariknam a makisarsarita kenka ti Apo (Doktrina ken Katulagan 6:22). Nairekordmo kadin dagiti kapanunotam wenno riknam maipapan kadagitoy a padas? No kasta, ibilangmo a basaen ti insuratmo. No saan, mangtedka iti sumagmamano a panawen tapno isuratmo no ania ti malagipmo. Ibilangmo no kasano nga agtultuloy a makagun-odka iti pigsa manipud kadagitoy a padas. Para iti sumagmamano a kapanunotan, kitaen iti mensahe ni Elder Neil L. Andersen “Spiritually Defining Memories” (Liahona, Mayo 2020, 18–22).

Sumagmamano a lider ti Simbaan ti nangibinglay kadagiti padasda iti paltiing iti “Hear Him” video collection. Kalpasan ti panangbuyam iti maysa wenno ad-adu pay kadagitoy a video, mabalin a mariknam ti inspirasion a mangirekord kadagiti bukodmo a padas, a mangibinglay no kasano a nakisao ti Apo kenka.

Kitaen met iti Topics and Questions, “Personal Revelation,” Gospel Library; “Oliver Cowdery’s Gift,” iti Revelations in Context, 15–19.

Doktrina ken Katulagan 6:18–21, 29–37

Kitaenyo ni Cristo iti tunggal panunot.

Ammo idi ti Apo a mapasaran ni Joseph Smith dagiti “narigat a kasasaad” kadagiti umay a tawen (Doktrina ken Katulagan 6:18). Ammona no ania met dagiti pannubok iti masakbayanyo. Ania ti masarakanyo iti balakadna kada Joseph ken Oliver iti Doktrina ken Katulagan 6:18–21, 29–37 a makatulong kadakayo nga agtalek Kenkuana?

Ania ti mariknayo a kayat a sawen ti “kumita ken ni [Cristo] iti tunggal panunot”? (bersikulo 36). Kasano a maaramidmo daytoy nga ad-adda nga agtultuloy—kabayatan dagiti nasayaat a panawen ken dagiti “narigat a kasasaad”? Ibilangyo daytoy a balakad manipud ken ni Presidente Russell M. Nelson: “Nainget iti isip ti panangikagumaan a kumita Kenkuana iti tunggal panunot. Ngem no aramidentayo, maawan dagiti panagduadua ken panagbutengtayo” (“Drawing the Power of Jesus Christ into Our Lives,” Liahona, 41).

Kitaen met iti Neil L. Andersen, “My Mind Caught Hold upon This Thought of Jesus Christ,” Liahona, Mayo 2023, 91–94.

Detalye ti Adtoy ti Imak, ni Jeffrey Ward

Doktrina ken Katulagan 6:29–37

“Dikayo agbuteng nga agaramid iti nasayaat.”

Apay a no dadduma “agbuteng[tayo] … nga agaramid iti nasayaat”? (bersikulo 33). Ania ti makitam iti Doktrina ken Katulagan 6:29–37 a mangted kenka iti tured nga agaramid iti nasayaat? Ibilangmo ti agkanta wenno dumngeg iti himno a mangparegta kenka a maaddaan iti tured ken Cristo, kas iti “Let Us All Press On” (Hymns, no. 243).

Doktrina ken Katulagan 6–7; 9:3, 7–14

“Kas iti panagtarigagayyo kaniak ti maaramidto.”

Kitaem no namin-ano a gundaway a nagparang ti balikas a kas “ti tarigagay” wenno “tarigagayan” iti benneg 6 ken 7. Ania ti masursurom manipud kadagitoy a benneg maipapan iti kinapateg nga inted ti Dios kadagiti tarigagaymo? Damagem ti bagim ti saludsod ti Apo iti Doktrina ken Katulagan 7:1: “Ania ti tarigagaymo?”

Maysa kadagiti nalinteg a tarigagay ni Oliver Cowdery—ti agipatarus a kas iti inaramid ni Joseph Smith—ket saan a naipatungpal. Bayat ti panangbasam iti Doktrina ken Katulagan 9:3, 7–14, ania dagiti pakaawisan ti imatang a maawatmo a makatulong kenka no dagiti nalinteg a tarigagaymo ket saan a maipatungpal itan?

Kitaen met iti Doktrina ken Katulagan 11:8; Dallin H. Oaks, “Desire,” Liahona,Mayo 2011, 42–45.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 6:5, 15–16, 22–23; 8:2; 9:7–9

Kasaritanak ti Nailangitan nga Ama babaen ti Espiritu Santo.

• Dagiti kinapudno a nasursuro ni Oliver Cowdery maipapan iti personal a paltiing ket makatulong kadagiti annakyo bayat ti panangpatanorda iti kabaelanda a mangbigbig iti Espiritu Santo. Mabalinmo nga usaren ti “Kapitulo 5: Da Joseph Smith ken Oliver Cowdery” (iti Doctrine and Covenants Stories, 22–25, wenno ti katupagna a video iti Gospel Library) tapno mangisuro kadakuada maipapan ken ni Oliver ken no ania ti nasursurona. Ibinglay iti tunggal maysa dagiti paboritoyo a paset ti estoria. No aramidenyo, yunay-unay dagiti banag nga insuro ti Apo ken ni Oliver maipapan iti no kasano a mangngeg ti timek ti Dios, ken basaen dagiti mainaig a bersikulo, kas iti Doktrina ken Katulagan 6:23 wenno 9:7–9.

  Chapter 5: Joseph Smith and Oliver Cowdery: February–April 1829

  

  Naammuan ni Oliver Cowdery ti maipapan iti paltiing bayat ti panangtulongna ken ni Joseph Smith a mangipatarus iti Libro ni Mormon.

• Mabalinmo met nga awisen dagiti ubbing a mangsagid kadagiti ulo ken barukongda bayat ti panangbasam kadagiti balikas a “panunot” ken “puso” iti Doktrina ken Katulagan 8:2. Isaritam kadagiti ubbing, manipud kadagiti padasmo, no ania ti kayariganna no makisao ti Espiritu Santo iti panunotmo ken pusom. Tulongam ida a mangbirok kadagiti sungbat iti saludsod a “Kasano a makisao ti Espiritu Santo kadatayo?” kadagitoy a bersikulo: Doktrina ken Katulagan 6:15–16, 22–23; 8:2; 9:7–9.

Agusar kadagiti estoria. Dagiti estoria ti mangtulong kadagiti ubbing mangipaawat kadagiti pagbatayan ti ebanghelio gapu ta ipakitada no kasano nga agbiag dagiti dadduma a tao kadagitoy a pagbatayan. Kabayatan ti panangisurom, mangsapul kadagiti wagas tapno mairaman dagiti estoria—manipud kadagiti nasantuan a kasuratan, manipud iti pakasaritaan ti Simbaan, wenno manipud iti bukodmo a biag—a mangiladawan kadagiti pagbatayan iti nasantuan a kasuratan.

Doktrina ken Katulagan 6:34

Gapu ken ni Jesucristo, mabalin a “diak agbuteng.”

• Imbaga ti Apo kada Joseph ken Oliver, “dikayo agbuteng, bassit a pangen” (Doktrina ken Katulagan 6:34). Mabalinmo nga awisen dagiti ubbing a mangulit iti ragup ti balikas iti sumagmamano a gundaway. Mabalin a magustuanda pay ti agpammarang a maysa a pangen dagiti mabutbuteng a karnero. Ania ngata ti mabalin a kabuteng ti karnero no dadduma? Kalpasanna mabalinyo ken dagiti annakyo a kitaen ti ladawan ti Mangisalakan kas maysa a pastor (adda maysa iti ungto daytoy a balabala) ket pagsaritaan no kasano a bantayannatayo a kas iti maysa a pastor a mangbantay kadagiti karnerona.

• Ibilang ti panagtokar wenno panagkansion iti maysa a kanta maipapan iti panagsapul iti tured ken Cristo, kas iti “Dare to Do RightChildren’s Songbook,158) wenno “Let Us All Press OnHymns, no. 243). Ania ti isuro ti kanta maipapan iti no kasano a tulongannatayo ti Mangisalakan a saan nga agbuteng?

Doktrina ken Katulagan 6:36

Mabalinko a kitaen ni Jesucristo iti tunggal panunot.

• Kalpasan ti panagbasayo nga aggigiddan iti Doktrina ken Katulagan 6:36, mabalinyo ken dagiti annakyo ti agaramid kadagiti drowing tapno matulongandakayo a manglaglagip a “kumita ken [ni Jesucristo] iti tunggal panunot.” Ibinglayyo iti tunggal maysa dagiti drowingyo, ken tulongan dagiti annakyo a mangpanunot kadagiti lugar a mabalinda nga ikabil dagitoy tapno masansan a makitada dagitoy.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ti Apo Isu ti Pastorko, ni Yongsung Kim