“Dagiti Timek ti Pannakaisubli: Dagiti Saksi ti Libro ni Mormon,” Umaykayo, Sumurot Kaniak—Para iti Pagtaengan ken Simbaan: Doktrina ken Katulagan 2025 (2025)
“Dagiti Saksi ti Libro ni Mormon,” Umaykayo, Sumurot Kaniak—Para iti pagtaengan ken Simbaan: 2025
Dagiti Timek ti Pannakaisubli
Dagiti Saksi ti Libro ni Mormon
Impakita ni anghel Moroni dagiti balitok a pinanid kada Joseph Smith, Oliver Cowdery, David Whitmer, ken Martin Harris iti kakaywan iti asideg ti pagtaengan dagiti Whitmer iti Fayette, Nueva York. Sarsarungkaran dagiti nagannak ni Joseph dagiti Whitmer iti dayta a panawen. Inladawan ni Lucy Mack Smith, ti ina ni Joseph ti epekto daytoy a namilagruan a padas kadagiti saksi:
“Nagbaetan idi ti oras nga alas tres ken alas kuatro. Da Mrs. Whitmer ken Mr. Smith ken siak ket agtugtugawkami iti maysa a siled a pagturogan. Nagtugawak iti abay ti katre. Idi simrek ni Joseph, nagtugaw iti sibayko a nabannog unay. ‘Ama! Ina!’ kinunana. ‘Saanyo nga ammo no kasano ti kinaragsakko. Impalubos ti Apo a maipakita dagiti pinanid iti tallo pay malaksid kaniak, a nakakita met iti anghel ket paneknekandanto ti kinapudno ti no ania ti insaok. Gapu ta ammoda para iti bagbagida a diak padasen nga allilawen dagiti tao. Ket mariknak a kasla nalag-ananak iti nakabutbuteng a dagensen, a kasta unay a dumani a diakon maibturan. Ngem ita addaandanto ti maysa a paset nga ibturanda, ket daytoy ti pagragsakan ti kararuak ta saanakon a maminpinsan nga agmaymaysa iti lubong.’ Kalpasanna dimteng ni Martin Harris. Isu ket kasla dumani narimbawan iti nalaus a rag-o. Kalpasanna pinaneknekanna no ania ti nakita ken nangngegna, a kas met iti inaramid dagiti dadduma, da Oliver ken David. Ti pammaneknekda ket agpada ti kaipapanan a kas iti linaon ti Libro ni Mormon. …
“Ni Martin Harris ti ad-adda a kasla binalkot a di mailadawan iti balikas dagiti riknana. Kinunana, ‘Nakitakon ita ti maysa nga anghel manipud iti Langit nga addaan iti maysa a sigurado a pammaneknek iti kinapudno iti amin a nangngegko a mainaig iti kasuratan, ket nakita dagiti matak isuna. Nakitak met dagiti pinanid ken iniggamak ida kadagiti imak ket mapaneknekak ti isu met laeng iti sibubukel a lubong. Ngem naawatko para iti bagik ti maysa a pammaneknek a saan a mayebkas dagiti balikas, nga awan ti dila a makailadawan, ket bendisionak ti Dios iti kinapudno ti kararuak ta bimmaba isuna tapno aramidennak, uray pay siak, a maysa a saksi ti kinaindaklan ti aramidna ken dagiti naisangrat a para kadagiti annak [ti] tao.’ Kimmadua da Oliver ken David kenkuana iti nadaeg a panagdaydayaw iti Dios para iti kinaimbag ken kinamanangngaasina. Nagawidkami [iti Palmyra, Nueva York,] iti sumaruno nga aldaw a naragsak, agragragsak iti bassit a bunggoy.”
Da Oliver Cowdery, David Whitmer, ken Martin Harris
Adda met idi ni Lucy Mack Smith idi nakasubli dagiti Walo a Saksi manipud iti padasda:
“Kalpasan a nagsubli dagitoy a saksi iti balay, nagparang manen ti anghel ken ni Joseph; iti dayta nga oras inyawat ni Joseph dagiti pinanid kadagiti imana. Nangangaykami ti miting iti dayta a rabii, a nangiburayan iti pammaneknek dagiti amin a saksi kadagiti kinapudno kas nadakamat iti ngato; ken amin dagiti pamiliami, uray pay ni Don Carlos [Smith], a 14 ti tawenna, ket nagpaneknek maipapan iti kinapudno ti dispensasion iti ud-udina nga aldaw—a naan-anayen ti pannakaitulodna.”
Ti kitikit da Joseph Smith ken dagiti Walo a Saksi
Malaksid kadagiti Tallo a Saksi ken Walo a Saksi, nabendisionan met ni Mary Whitmer, ti ina ni David Whitmer, nga agbalin a saksi kadagiti balitok a pinanid. Impakita ni anghel Moroni kenkuana kas maysa a panangbigbig kadagiti sakripisio nga impaayna kabayatan ti panagnaed da Joseph, Emma, ken Oliver iti pagtaenganna. “Napudno ken nagagetka unay kadagiti panagbannogmo,” kinuna ni Moroni kenkuana. “Umno, ngarud, nga umawatkayo iti saksi tapno mapapigsa ti pammatiyo.”