Replika ti orihinal a manuskrito ti Libro ni Mormon

Pebrero 10–16: “Tapno Agballigika”

Doktrina ken Katulagan 10–11

Bayat ti panagtultuloy ti patarus ti Libro ni Mormon, timmaud ti maysa a saludsod: Ania ti nasken nga aramiden da Joseph Smith ken Oliver Cowdery maipapan kadagidiay napukaw a panid ti patarus? Mabalin a napateg nga ipatarus manen dayta a paset, ngem nakita ti Apo ti maysa a banag a dida kabaelan: agpamplano dagiti kabusorda a mangbaliw kadagiti balikas kadagitoy a panid tapno makaipasdek iti panagduadua iti naparegta nga aramid ni Joseph. Adda plano ti Dios tapno maliklikan dayta a parikut ken pagtalinaeden nga agtultuloy a dumur-as ti aramid. Rinibu a tawen sakbayna, pinaregta ti Dios ni Nephi a mangisurat iti maikadua a kasuratan a nangsakup iti isu met laeng a panawen “iti nainsiriban a panggepna” (1 Nephi 9:5).

“Ti siribko,” kinuna ti Apo ken ni Joseph, “nabilbileg ngem iti panangballaibo ti sairo” (Doktrina ken Katulagan 10:43). Dayta ti makapanamnama a mensahe iti aldaw a kas iti aldawtayo, no agtultuloy ti panagkagumaan ti kabusor a mangpakapsut iti pammatitayo. Kas ken ni Joseph, makapagbalintayo a “napudno ken agtultuloy” iti aramid a nangawagan ti Apo kadatayo (bersikulo 3). Kalpasanna makitatayonto nga impaaynan ti maysa a wagas tapno, “saan nga agballigi ti ruangan ti impierno” a mangbusor kadatayo (bersikulo 69).

Kitaen met iti Saints,, 1:51–61.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 10:1–33

Ti Dios “dina ipalubos a maipatungpal ni Satanas ti dakes a panggepna.”

Gusgustuen ni Satanas a malipatantayo a sibibiag isuna—wenno ditayo man lang mabigbig dagiti pananggandatna a mangimpluensia kadatayo (kitaen iti 2 Nephi 28:22–23). Ngem ipatalged dagiti balikas ti Apo iti Doktrina ken Katulagan 10 a napaypaso ni Satanas—ken naregta a suppiatenna ti aramid ti Apo. Kadagiti bersikulo 1–33, ilasin no ania ti ammo ti Dios maipapan kadagiti panagkuman ni Satanas (kitaen met kadagiti bersikulo 62–63). Mabalinmo pay a kiddawen iti Apo a tulongannaka a makakita no kasano a mabalinnaka a sulisogen ni Satanas. Bayat ti panangbasam iti benneg 10, utobem no kasano a matulongannaka ti Mangisalakan a mangsupring kadagiti panagkagumaan ni Satanas.

Doktrina ken Katulagan 10:34–52

Ti Apo “nabilbileg ti sirib[na] ngem ti panangballaibo ti sairo.”

Saan nga ammo ni Nephi no apay a napaltiingan a mangaramid iti dua a set ti rekord dagiti taona. Ket saan nga ammo ni Mormon no apay a naparegta a mangiraman iti maikadua a set kadagiti balitok a pinanid. Ngem agpada a nagtalek dagiti propeta nga adda “nainsiriban a panggep” ti Dios (1 Nephi 9:5; Dagiti Balikas ni Mormon 1:7). Iti agdama ammotayo ti uray sangkabassit laeng a paset dayta a panggep: tapno masukatan dagiti 116 a napukaw a panid ti Libro ni Mormon. Ania ti panagkunam a kayat ti Apo a masursurom iti daytoy a lawas? Utobem dayta a saludsod bayat ti panangbasam iti Doktrina ken Katulagan 10:34–52. Mabalinmo pay nga ilista dagiti kinapudno a masursurom maipapan iti Apo manipud kadagitoy a bersikulo. Kasano a dagitoy a nalawag a pannakaammo ken pannakaawat ket mangapekto iti relasionmo Kenkuana? Ania ti makaawis imatangmo maipapan iti sirib ken pannakakita ti Apo iti panagsagana iti pannakapukaw ti 116 a panid?

Mabalin pay a mariknam a naparegtaka a mangsapul iti pakakitaan ti sirib ken pannakakitana iti masakbayan iti biagmo. Basaen dagiti pakaammuan iti mensahe ni Elder Ronald A. Rasband “By Divine Design”—mabalin a dagitoy ti mangisangbay kadagiti pagarigan iti panunotmo (Liahona, Nob. 2017, 55–57). Ibilangmo ti panangisurat kadagitoy apaman nga umayda kenka. Kasano a nagtrabahon ti Apo iti biagmo? Kas pagarigan, ania dagiti “naiparna” nga insaganana? Ania dagiti pundasion nga inkabilna para kadagiti bendisionmo? Kaano nga inturongnaka nga agserbi iti maysa a tao nga agkasapulan?

Kitaen met iti Taga Roma 8:28; Doktrina ken Katulagan 90:24; Topics and Questions, “Plan of Salvation,” Gospel Library.

Detalye manipud iti Ni Moroni a Mangyab-ababa kadagiti Pinanid, ni Tom Lovell

Doktrina ken Katulagan 11

“Agtalekka iti Espiritu [ti Apo].”

Ti in-inauna a kabsat ni Joseph a ni Hyrum ket magagaran a mangammo iti pagayatan ti Apo para kenkuana, isu a kiniddawna ken ni Joseph nga agsapul iti paltiing iti biangna. Naragsakan ti Propeta a nangaramid iti dayta, ngem uray maysa laeng a mensahe iti dayta a paltiing (Doktrina ken Katulagan 11) ket mabalin met a sapulen ni Hyrum ti paltiing para iti bagina. Ken iti kasta mabalin nga “amin nga addaan iti nasayaat a tarigagay, ken nangipakan iti kumpayda a pagani” (bersikulo 27). Bayat ti panagbasam iti benneg 11, ania ti mariknam nga isursuro kenka ti Apo maipapan iti personal a paltiing? Kasano a mainaig daytoy iti insurona ken ni Oliver Cowdery kadagiti benneg 6–9? Ania dagiti dadduma pay a mensahe nga adda iti Apo para kenka?

Kitaen met iti “Let the Holy Spirit Guide,” Hymns, no. 143.

Awisem dagiti agad-adal nga agsaludsod. Masansan a maiturong dagiti saludsod iti paltiing. No mangisursuroka iti pamiliam wenno klase ti Simbaan, paregtaem ida nga agsaludsod, ken tulongam ida a mangsapul kadagiti sungbat iti nasantuan a kasuratan. Kas pagarigan, no adda saludsodda maipapan iti personal a paltiing, aggigiddan a mangsapul kadagiti sungbat iti Doktrina ken Katulagan 11:12–14.

Doktrina ken Katulagan 11:15–26

Bayat ti panagkalikagumko a “magun-od ti balikas [ti Dios],” awatekto ti Espiritu ken bilegna.

Uray idi sakbay a naipatarus ti Libro ni Mormon, naggagar ni Hyrum Smith a tumulong iti aramid ti Pannakaisubli. Bayat ti panangbasam iti sungbat ti Apo iti tarigagayna, ibilangmo no ania ti kaipapanan kenka ti “manggun-od iti balikas [ti Dios]” (bersikulo 21). Kasano a makatulong kenka ti pananggun-od iti balikas ti Dios iti panagserbim iti Simbaan?

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 10:5

Kas iti kanayon nga ikarkararagko, umawatak iti pigsa manipud iti Dios.

• Tapno mayam-ammo daytoy a bersikulo kadagiti annakmo, mabalinmo a damagen kadakuada dagiti banag a “kanayon” nga ar-aramidenda. Ania dagiti banag a kuna ti Apo a nasken a kanayon nga aramidentayo iti Doktrina ken Katulagan 10:5? Apay a kayatna nga aramidentayo daytoy?

• Kasano a matulongam dagiti annakmo a manglagip a kanayon nga agkararag? Mabalin a makaurnongda iti sumagmamano a babassit, nalamuyot a bato ket pintaanda dagitoy “Doktrina ken Katulagan 10:5” wenno “Agkararag a Kanayon.” Mabalinda nga ikabil dagiti batoda iti nadumaduma a lugar a kayatda a mapalagipan nga agkararag, kas iti asideg ti pagiddaanda, agraman dagiti libroda iti eskuelaan, wenno kadagiti lugar a pangananda. Segun iti Doktrina ken Katulagan 10:5, kasano a bendisionannatayo ti Dios no agkararagtayo? Mabalin dagiti annakmo ti mangsapul kadagiti nayon a sungbat iti maysa a kanta kas iti “A Child’s Prayer” (Children’s Songbook, 13).

Doktrina ken Katulagan 11:12–13

Iturongnak ti Espiritu Santo nga agaramid iti nasayaat.

• Masursuro dagiti ubbing a mangilasin no makisasao ti Espiritu kadakuada. Tapno matulongam ida, mabalinmo nga ilemmeng ti bombilia wenno flashlight ken ladawan ti naragsak a rupa iti sadino man iti siled; ken kalpasanna kiddawem kadagiti annakmo a mangsapul kadagitoy a banag. Basaem ti Doktrina ken Katulagan 11:13, ket tulongam dagiti annakmo a mangilasin kadagiti balikas a mainaig kadagiti banag a nasarakanda. Ania ti isursuro dagitoy a balikas maipapan iti no kasano a tulongannatayo ti Espiritu Santo?

• Ti panangibinglay kadagiti bukodmo a naespirituan a padas ket makatulong kadagiti annakmo a mangbigbig iti impluensia ti Espiritu Santo iti biagda. Bayat ti panangibinglaymo, kiddawem kadakuada nga ibinglayda met dagiti padasda. Mabalinyo pay nga aggigiddan a basaen ti Doktrina ken Katulagan 11:12–13, a mangsapsapul no kasano a mabigbigtayo no iturturongnatayo ti Espiritu Santo. Paneknekam a kayat ti Dios a tarabayennatayo babaen ti Espiritu Santo.

Doktrina ken Katulagan 11:21, 26

Kasapulak a maammuan ti ebanghelio tapno matulongak dagiti dadduma a mabirukanda ti kinapudno.

• Kas met laeng ken ni Hyrum Smith, nalabit nga aduan iti gundaway dagiti annakmo a mangibinglay iti ebanghelio kadagiti dadduma. Basaenyo nga aggigiddan ti Doktrina ken Katulagan 11:21, 26 ket kiddawem kadagiti annakmo a mangsapul iti no ania ti imbaga ti Apo ken ni Hyrum a kasapulan nga aramidenna tapno maisurona ti ebanghelio. Ania ti kayat a sawen ti “magun-od” ti balikas ti Dios? Kasano a maaramidtayo daytoy? Kasanotayo a “salimetmetan” ti balikas ti Dios iti puspusotayo? Nalabit a mabalin nga akmen dagiti annakmo ti mangibinglay iti maysa a banag maipapan ken ni Jesucristo wenno ti Libro ni Mormon kadagiti dadduma.

Para iti ad-adu pay a kapanunotan, kitaen iti isyu ti magasin a Frienditi daytoy a bulan.

Da Joseph ken Hyrum Smith, ni Ken Corbett