“Dagiti Timek ti Pannakaisubli: Pannakaipatarus ti Libro ni Mormon,” Umaykayo, Sumurot Kaniak—Para iti Pagtaengan ken Simbaan: Doktrina ken Katulagan 2025 (2025)
Pannakaipatarus ti Libro ni Mormon,” Umaykayo, Sumurot Kaniak—Para iti Pagtaengan ken Simbaan: 2025
Dagiti Timek ti Pannakaisubli
Pannakaipatarus ti Libro ni Mormon
Idi Abril 1829, ti bulan idi naawat dagiti benneg 6–9 ti Doktrina ken Katulagan, ti kangrunaan a trabaho ni Joseph Smith ket ti pannakaipatarus ti Libro ni Mormon. Saantayo nga ammo dagiti adu a detalye maipanggep iti namilagruan a proseso ti panagipatarus, ngem ammotayo a ni Joseph Smith ket maysa a mammadto, a tinulongan dagiti ramit nga insagana ti Dios: dua a nalitnaw a bato a maawagan iti Urim ken Thummim ken sabali pay a bato a maawagan iti bato a pagipadto.
Idi iti saan a nabayag nakiddaw kenkuana a mangisalaysay no kasano a naipatarus daytoy a kasuratan, kinuna ni Joseph “a daytoy ket saan a naisangrat a mangisarita iti lubong dagiti amin a detalye.” Masansan a gagangay nga ibagana a naipatarus daytoy “babaen iti sagut ken bileg ti Dios.”
Dagiti sumaganad a palawag, manipud kadagiti saksi iti proseso ti pannakaipatarus, ket mangsuporta iti pammaneknek ni Joseph.
Pinatida a dayta a kahon, a kukua ni Hyrum Smith, ket naaramat a temporario a nakailemmengan dagiti balitok a pinanid.
Emma Smith
“Idi ipatpatarus ti asawak ti Libro ni Mormon, nagsuratak iti maysa a pasetna, bayat ti panangidiktana iti tunggal binatog, balikas iti kada balikas, ket idi madanonna dagiti umisu a nagan a dina maibalikas, wenno dagiti atitiddog a balikas, inispelingna dagitoy, ket bayat ti panangisursuratko ida, no adda biddutko iti ispeling, pagsardengennak no kua ket aturenna ti ispelingko numan imposible a makitana no kasano nga isursuratko dagitoy iti dayta nga oras. Uray ti balikas a Sara ket saanna a maibalikas iti damo, ngem nasken nga ispelingenna daytoy, ket ibalikasko no kua daytoy para kenkuana.”
“Masansan a maiparabaw dagiti pinanid iti lamisaan nga awan iti ania man a panggep a mangilemmeng, nabungon daytoy iti bassit a tela nga arpaw ti lamisaan, nga intedko kenkuana a pangikupinanna kadagitoy. Naminsan nga inapirasko dagiti pinanid, kabayatan ti pannakaiparabawda iti lamisaan, a sursurotek ti balabala ken sukogda. Kasla makulpida a kas iti nabengbeng a papel, ken agkalanggiking iti aweng ti metal no makuti dagiti igid babaen ti tangan ti ima, kas ar-aramiden ti maysa a tao no dadduma no manglukib nga usaren ti tanganna dagiti panid ti maysa a libro. …
“Ti pammatik ket nagtaud iti nadiosan a kinapudno ti Libro ni Mormon—awan ti uray kabassitan a panagduaduak iti daytoy. Mapnekak nga awan tao a makaidikta koma iti pannakaisurat dagiti manuskrito malaksid no isu ket naparegta; gapu ta, no agak-akemak a kas parasuratna, idikta koma ni [Joseph] kaniak iti inoras; ken no agsubli kalpasan dagiti pannangan, wenno dagiti pannakataktak, rugianna a dagus iti nagsardenganna, a saanna a kitkitaen ti manuskrito wenno ti ania man a paset daytoy a naibasa kenkuana. Daytoy ket gagangay a banag nga aramidenna. Nalabit a saan koma a mapasamak a ti maysa a tao a deadal ket makaaramid iti daytoy, ken, para iti maysa nga ignorante ken saan a nakaadal a kas kenkuana, gagangay nga imposible daytoy.”
Oliver Cowdery
“Insuratko babaen iti bukodko a pluma ti sibubukel a Libro ni Mormon (malaksid iti sumagmamano a panid) manipud iti bibig ti propeta, bayat ti panangipatarusna iti daytoy babaen ti sagut ken bileg ti Dios, babaen ti Urim ken Thummim, wenno, kas iti panangawagna iti libro, dagiti nasantuan nga agipatpatarus. Naimatangak kadagiti matak, ken natengngelko kadagiti imak, dagiti balitok a pinanid a nakaipatarusanna. Nakitak met dagiti agipatpatarus.”