Susquehanna River nga asideg ti Harmony, Pennsylvania

Pebrero 17–23: “Kadakayo Padak a Katulongan”

Doktrina ken Katulagan 12–17; Joseph Smith—Pakasaritaan 1:66–75

Kaaduanna a tattao iti intero a lubong ti nalabit a saan pay pulos nakangngeg iti Harmony, Pennsylvania. Ngem masansan a pilien ti Apo dagiti nanumo a lugar para kadagiti kapapatgan a paspasamak iti pagarianna. Idi Mayo 15, 1829, iti kakaywan a lugar nga asideg ti Harmony, nagparang ni Juan a Mammuniag kada Joseph Smith ken Oliver Cowdery. Impatayna dagiti imana iti rabaw dagiti uloda ket intalekna ti Aaronic Priesthood kadakuada, nga inawaganna ida iti “padak a katulongan” (Doktrina ken Katulagan 13:1).

Ni Juan a Mammuniag ti mapagtalkan a katulongan ti Dios a nangbuniag iti Mangisalakan ken nangisagana iti dalan para iti yaayna (kitaen iti Mateo 3:1–6, 13–17). Kadagitoy dua nga agtutubo a lallaki nga agtawen iti duapulo, napakumbaba la ketdi, nalabit nakaro pay ketdi, ti pannakaawagda a pada nga adipen ni Juan. Iti dayta a panawen, saan unay nga am-ammo da Joseph ken Oliver, aglalo iti Harmony. Ngem ti panagserbi iti aramid ti Dios ket kanayon a maipanggep iti no kasano ti panagserbitayo, a saan a maipanggep iti no asino dagiti makakita. Nupay kasta a bassit wenno di makita ti tulong wenno kontribusionmo no dadduma, maysaka met a pada a katulongan iti “naindaklan nga aramid” ti Apo (Doktrina ken Katulagan 14:1).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 12; 14

Mabalinko ti makiraman iti “naindaklan ken nakaskasdaaw nga aramid” ti Dios.

Agpada a kayat nga ammuen da Joseph Knight ken David Whitmer no kasano a makatulongda iti aramid ti Apo. Bayat ti panangbasam iti sungbat ti Apo kadakuada (Doktrina ken Katulagan 12; 14), panunotem no ania ti kaipapanan kenka “a yeg ken ipasdek ti pagsayaatan ti Zion” (12:6; kitaen met iti 14:6). Ania dagiti pagbatayan ken kababalin a kas ken Cristo a masarakam kadagitoy a benneg a makatulong kenka a mangaramid iti daytoy?

Kitaen met iti “The Knight and Whitmer Families,” Revelations in Context, 20–24.

Doktrina ken Katulagan 13

Imbaon ni Jesucristo ni Juan a Mammuniag a mangisubli iti Aaronic Priesthood.

Inawagan ni Juan a Mammuniag da Joseph Smith ken Oliver Cowdery a “padana a kaqtulonganna.” Ania iti panagkunam a kayat a sawen ti agbalin a maysa a katulongan ni Juan a Mammuniag? (Kitaen iti Mateo 3:13–17; Lucas 1:13–17; 3:2–20).

Bayat ti panangbasam iti kinuna ni Juan a Mammuniag maipapan iti Aaronic Priesthood iti benneg 13, utobem no kasano a makatulong dagiti tulbek daytoy a priesthood a mangipatungpal iti mision ni Juan a mangisagana iti dalan ti Apo. Kas pagarigan:

• Ania ti “panagpapaay dagiti anghel”? (Kitaen iti 2 Nephi 32:2–3; Moroni 7:29–32; Pangiwanwan iti Nasantuan a Kasuratan, “Anghel, Dagiti,” Gospel Library).

• Ania ti “ebanghelio ti panagbabawi”? (kitaen iti Doktrina ken Katulagan 84:26–27; Dale G. Renlund, “The Priesthood and the Savior’s Atoning Power,” Liahona, Nob. 2017, 64–67).

Kasano a makatulong dagiti ordinansa ti Aaronic Priesthood (kas iti panagbuniag ken sakramento) a mangisagana iti dalan para kenka tapno umawat iti Mangisalakan iti biagmo?

Ania dagiti tulbek ti priesthood?

Nangidiaya ni Elder Dale G. Renlund ken ti asawana, ni Ruth, iti panangilawlawag maipapan kadagiti tulbek ti priesthood.

“Ti termino a dagiti tulbek iti priesthood ket maaramat iti dua a naiduma a wagas. Maibasar ti umuna iti maitudo a karbengan wenno pribilehio a maited iti amin nga umawat iti Aaronic wenno Melchizedek Priesthood. … Kas pagarigan, umawat dagiti Aaronic Priesthood holder kadagiti tulbek ti panagserserbi dagiti anghel ken dagiti tulbek ti panangisagana iti ebanghelio ti panagbabawi ken ti panagbuniag babaen ti pannakairarem para kadagiti pannakaugas dagiti basol (kitaen iti Doktrina Ken Katulagan 13:1; 84:26–27). Umawat dagiti Melchizedek Priesthood holder iti tulbek dagiti kinadatdatlag ti pagarian, ti tulbek ti pannakaammo ti Dios, dagiti tulbek ti amin a naespirituan a bendision ti Simbaan (kitaen iti Doktrina Ken Katulagan 84:19; 107:18). …

“Ti maikadua a wagas a pakaaramatan iti termino a dagiti tulbek iti priesthood ket maibasar iti panangidaulo. Umawat dagiti lider iti priesthood kadagiti mainayon a tulbek iti priesthood, ti karbengan a mangidaulo iti mabuangay a dibision ti Simbaan wenno korum. Maipanggep iti daytoy, dagiti tulbek iti priesthood ket ti turay ken bileg a mangiturong, mangidaulo, ken mangituray iti Simbaan” (The Melchizedek Priesthood: Understanding the Doctrine, Living the Principles [2018], 26).

Buniagan ni Joseph Smith ni Oliver Cowdery, ni Del Parson

Joseph Smith—Pakasaritaan 1:66–75

Mangted dagiti ordinansa kaniak iti dalan a manggun-od iti bileg ti Dios.

Napanunotmo kadin no kasano koma ti makikadua kada Joseph Smith ken Oliver Cowdery para kadagiti kangrunaan a pasamak ti Pannakaisubli? Bayat ti panangbasam iti Joseph Smith—Pakasaritaan 1:66–75, agraman ti note iti gibus ti bersikulo 71, mabalin a maawatam ti uray sumagmamano laeng iti no ania ti nariknada. Ania ti makaawis iti riknam maipapan kadagiti balikasda? Kitaen, nangnangruna, dagiti bendision nga inawatda gapu ta inawatda ti priesthood ken nabuniaganda. Ania dagiti bendision nga inted ti Mangisalakan kenka babaen dagiti ordinansa ti priesthood?

Tapno maammuan ti ad-adu pay, ibilang ti panagaramid iti table nga addaan kadagiti paulo Dagiti Ordinansa ken Dagiti Bendision. Kalpasanna mabalinyo a sukisoken dagiti nasantuan a kasuratan kas kadagitoy a mangilista kadagiti ordinansa ken dagiti bendision a sumamgbay manipud kadagitoy: Juan 14:26; Dagiti Aramid 2:38; Doktrina ken Katulagan 84:19–22; 131:1–4; Joseph Smith—Pakasaritaan 1:73–74. Ania dagiti dadduma pay a bendision a mainayonmo iti listaan? Kasano nga inyeg dagiti ordinansa nga inawatmo ti bileg ti Mangisalakan iti biagmo?

Kitaen iti David A. Bednar, “With the Power of God in Great Glory,” Liahona, Nob. 2021, 28–30; Saints, 1:65–68; “God of Power, God of Right,” Hymns, no. 20; Topics and Questions, “Covenants and Ordinances,” Gospel Library.

Doktrina ken Katulagan 15–16

Ti panangyeg kadagiti kararua ken ni Cristo ket maysa a naindaklan ti pategna.

Napanunotmo kadin, kas iti inaramid da John ken Peter Whitmer, no ania ti “kapatgan” iti biagmo? Doktrina ken Katulagan 15:4; 16:4). Bayat ti panangbasam iti Doktrina ken Katulagan 15–16, utobem no apay a naindaklan ti pateg ti panangyeg kadagiti kararua ken Cristo. Ania ti ar-aramidem tapno “mayeg dagiti kararua” ken Cristo?

Kitaen met iti Saints, 1:68–71.

Doktrina ken Katulagan 17

Aramaten ti Apo dagiti saksi a mangipasdek iti balikasna.

Ania ti maysa a saksi? Apay nga aramaten ti Apo dagiti saksi iti aramidna? (kitaen iti 2 Taga Corinto13:1). Utobem dagitoy a saludsod bayat ti panangbasam kadagiti balikas ti Dios iti Tallo a Saksi iti Doktrina ken Katulagan 17. (Kitaen met iti “Ti Pammaneknek dagiti Tallo a Saksi” iti Libro ni Mormon.) Kasano a makatulong dagiti saksi a maiyeg “dagiti nalinteg a panggep”? (bersikulo 4).

Ania ti kabaelam a paneknekan?

Kitaen met iti Saints, 1:73–75; “A Day for the Eternities” (video), Gospel Library.

A Day for the Eternities

This film features the experiences of David Whitmer as Joseph Smith and Oliver Cowdery stay with his family in Fayette, New York, to finish the translation of the Book of Mormon.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 13; Joseph Smith—Pakasaritaan 1:68–74

Insubli ni Juan a Mammuniag ti Aaronic Priesthood.

• Ti aramid ti arte iti daytoy a balabala ket makatulong kadagiti annakyo a mangiladawan iti panunot ti pannakaisubli ti Aaronic Priesthood (kitaen met iti “Chapter 6: Joseph and Oliver Are Given the Priesthood,” iti Doctrine and Covenants Stories, 26–27, wenno ti katupagna a video iti Gospel Library). Maay-ayoda ngata nga agdrowing iti maysa a ladawan ti pasamak a maibasar ti no ania ti nabasayo iti Joseph Smith—Pakasaritaan 1:68–74?

  Chapter 6: Joseph and Oliver Are Given the Priesthood: May 1829

• Mabalinyo pay nga ipakita ti ladawan ni Juan a Mammuniag bayat ti aggigiddan a panagbasayo iti Mateo 3:13–17; Joseph Smith—Pakasaritaan 1:68–70. Apay a napateg nga imbaon ti Apo ni Juan a Mammuniag a mangted ken ni Joseph Smith iti turay ti priesthood a mangbuniag?

Panangisagana kadagiti annakyo para iti tungpal biag iti dana ti katulagan ti Dios. Para iti ad-adu pay a kapanunotan a tumulong kadagiti annakyo a makasursuro maipapan iti bileg, turay, ken dagiti tulbek ti priesthood, kitaen iti appendix A wenno appendix B.

Ladawan ni Jesus a mabumbuniagan, ni Dan Burr

Doktrina ken Katulagan 13

Bendisionannak ti Nailangitan nga Ama babaen ti Aaronic Priesthood.

• Tapno maparegta ti panaglilinnawag maipapan kadagiti tulbek a nadakamat iti Doktrina ken Katulagan 13, mabalinmo ken dagiti annakmo a kumita iti maysa a set ti tulbek ken pagsasaritaan no ania ti ipalubos dagiti tulbek nga aramidentayo. Mabalin a matulongam ida a mangbirok iti balikas a dagiti tulbek iti benneg 13. Ania dagiti dadduma pay a balikas wenno ragup ti balikas iti Doktrina ken Katulagan 13 a mangiladawan kadagiti bendision ti Aaronic Priesthood? Mabalin pay a mailasin dagiti annakmo dagiti wagas a pangbendisionan kadatayo ti Nailangitan nga Ama babaen ti priesthood iti video a “Blessings of the Priesthood” (Gospel Library).

Blessings of the Priesthood

The priesthood is the power of God, which is given to man to act in His name.

Doktrina ken Katulagan 15:4–6; 16:4–6

Ti panangtulong kadagiti dadduma nga umasideg ken Jesucristo ket “kapatgan.”

• Agpada da John ken Peter Whitmer a nagtarigagay a nangammo no ania “ti kapatgan” iti biagda (kitaen iti Doktrina ken Katulagan 15:4; 16:4). Mabalin a pagsasaritaanyo kadagiti annakmo maipapan kadagiti banag a napateg kadakayo. Bayat ti panangbasam iti Doktrina ken Katulagan 15:6 wenno 16:6, ket kiddawem kadagiti annakmo nga ingatoda dagiti imada no mangngeganda no ania ti kinuna ti Apo a “kapatgan.”

• Ania ti kayat a sawen ti “mangyeg kadagiti kararua ken [ni Jesucristo]”? Tulongam dagiti ubbing a mangilista kadagiti kapanunotan, kas iti panagbalin a gayyem iti dadduma, panangibinglay kadagiti nasantuan a kasuratan iti maysa a gayyem, wenno panangikararagan iti maysa a tao nga agkasapulan. Mabalin a sapulen dagiti annakmo dagiti ladawan dagitoy a banag kadagiti magasin ti Simbaan wenno iti Libro ti Arte ti Ebanghelio. Wenno mabalinda nga agdrowing kadagiti bukodda a ladawan. Awisem ida a pumili iti maysa a banag manipud iti listaanda nga aramidendanto. Mabalinyo met nga aggigiidan a mangkanta iti maikapat a bersikulo ti “I Feel My Savior’s Love” (Children’s Songbook, 74–75).

Doktrina ken Katulagan 17

Makapagbalinak a maysa a saksi ti Libro ni Mormon.

• Ti“Chapter 7: Witnesses See the Gold Plates” (iti Doctrine and Covenants Stories, 31–33, wenno ti katupagna a video iti Gospel Library) ket makatulong kadagiti annakmo a mangammo maipapan iti Tallo a Saksi. Kalpasan ti panangbasa iti Doktrina ken Katulagan 17:5–6, ibagam kadagiti annakmo no kasano nga ammom a pudno ti Libro ni Mormon. Kasano a makapagbalintayo a saksi ti Libro ni Mormon?

  Chapter 7: Witnesses See the Gold Plates: 1829–1830

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Kadakayo Padak a Katulongan, ni Linda Curley Christensen