Pebrero 24–Marso 2: “Napateg dagiti Kararua”

Doktrina ken Katulagan 18

Adu ti nadumaduma a wagas a panangpadas a rukoden ti pateg ti maysa a tao. Mabalin amin nga apektuan ti talento, edukasion, kinabaknang, ken pisikal a langa no kasano ti panangtingitingtayo iti tunggal maysa—ken iti bagitayo. Ngem iti imatang ti Dios, ti pategtayo ket nasimsimple nga amang a banag, ken nadakamat a silalawag iti Doktrina ken Katulagan 18: “Laglagipenyo a napateg dagiti kararua iti imatang ti Dios” (bersikulo 10). Ilawlawag unay daytoy simple a kinapudno no ania ti aramiden ti Dios ken no apay nga aramidenna daytoy. Apay a binilinna da Joseph Smith ken Oliver Cowdery a mangipasdek iti Simbaan ni Jesucristo iti aldawtayo? (kitaen kadagiti bersikulo 1–5). Gapu ta naindaklan ti pateg dagiti kararua. Apay a “bilinenna nga agbabawi ti amin a tao iti sadino man” ken ibaonna dagiti Apostol a mangikasaba iti panagbabawi? (bersikulo 9). Gapu ta naindaklan ti pateg dagiti kararua. Ken apay a nagsagaba ni Jesucristo iti “patay iti lasag” ken “ti saem ti amin a tao”? (bersikulo 11). Gapu ta naindaklan ti pateg dagiti kararua. No uray maysa kadagitoy a kararua pilienna nga awaten ti sagut ti Mangisalakan, agrag-o Isuna, ta “nalaus ti rag-ona iti kararua nga agbabawi” (bersikulo 13).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 18:1–5

“Bangonen ti simbaanko.”

Iti benneg 18, nangted ti Apo ken ni Oliver Cowdery kadagiti pammilin a tumulong a mangikabil iti pundasion ti Simbaan ni Jesucristo. Ania ti madlawmo maipapan iti balakad nga intedna—nangnangruna kadagiti bersikulo 1–5? Mabalinmo nga ibilang no kasano a mayaplikar kenka daytoy met laeng a balakad no “bangonem” ti pammatim ken ni Cristo. Kas pagarigan:

• Ania ti “tinarigagayam a maammuam” iti Apo? (bersikulo 1).

• Ania ti kayat a sawen kenka ti “agpannurayka kadagiti banag a naisurat”? (bersikulo 3). Kasano a ti Espiritu “naipakitana kenka” a pudno dagitoy a banag? (bersikulo 2; kitaen met iti Doktrina ken Katulagan 6:22–24).

• Kasano a bangonem iti biagmo iti “pamuon ti ebanghelio [ti Mangisalakan] ken ti [batona]”? (verse 5).

Agdamag kadagiti saludsod. Ti Doktrina ken Katulagan ket pakakitaan a dagiti saludsod ti mangiturong iti paltiing. Bayat ti panagadalmo kadagiti nasantuan a kasuratan, isuratmo dagiti saludsod nga adda kenka. Kalpasanna agutob ken agkararag nga agbirok kadagiti sungbat.

Doktrina ken Katulagan 18:10–13

“Napateg dagiti kararua iti imatang ti Dios.”

Kasano nga ikeddengtayo ti pateg ti maysa a banag? Kas pagarigan, apay a nanginngina ti maysa a banag iti maysa a merkado ngem iti sabali? Bayat ti panangbasam iti benneg 18 itoy a lawas, nangnangruna kadagiti bersikulo 10–13, mabalin a pagdumaem no kasano a masansan nga ikeddeng dagiti tao ti pateg iti no ania ti mamagbalin iti kararua a napateg iti imatang ti Dios. Ibilangmo ti panangsukat iti naganmo iti lugar dagiti balikas a “kararua,” “dagiti kararua,” ken “amin a tattao.” Kasano a makatulong dagitoy a bersikulo iti maysa a tao nga agduadua iti pategna?

Adtoy ti sumagmamano a dadduma pay a paset a mangisuro maipapan iti pateg ti kararua: Lucas 15:1–10; Juan 3:16–17; 2 Nephi 26:24–28; Moises 1:39. Maibatay kadagitoy a binatog, kasano ti pananggupgopmo iti wagas a panagrikna ti Dios maipapan kenka? Mabalinmo pay a sukisoken ti mensahe ni Presidente Dieter F. Uchtdorf’ “You Matter to Him” (Liahona, Nob. 2011, 19–22) a mangsapul kadagiti balikas ken ragup ti balikas a makatulong kenka a mangammo maipapan iti pategmo iti Dios.

Kasano nga ipakita kenka ti Dios a dakkel ti pategmo Kenkuana? Kasano nga apektuan daytoy ti wagas a panagriknam maipapan iti bagim ken iti dadduma?

Kitaen met iti Joy D. Jones, “Value beyond Measure,” Liahona, Nob. 2017, 13–15; Topics and Questions, “Children of God,” Gospel Library.

Doktrina ken Katulagan 18:11–16

Agragsak ti Apo no agbabawi-ak.

Paliiwen no kasano a kasansan a mausar dagiti balikas nga agbabawi ken panagbabawi iti intero a Doktrina ken Katulagan 18. Utobem no ania ti masursurom manipud kadagitoy a balikas tunggal mausarda. Ibilang nangnangruna kadagiti bersikulo 11–16. Kasano nga aringan dagitoy a bersikulo ti no kasano ti mariknam maipapan iti panagbabawi—ti bukodmo a panagbabawi ken ti pagrebbengan a mangawis kadagiti dadduma a tao nga agbabawi ken dumur-as? Adtoy ti maysa a wagas tapno mairekord ti masursurom: ilistam ti sumagmamano a wagas a panangileppasmo iti binatog a “Ti panagbabawi ket .”

Kitaen iti Alma 36:18–21; Pangiwanwan iti Nasantuan a Kasuratan, “Panagbabawi,” Gospel Library; Dale G. Renlund, “Repentance: A Joyful Choice,” Liahona, Nob. 2016, 121–24.

Detalye manipud iti Ti Nayaw-awan nga Anak, ni Clark Kelley Price

Doktrina ken Katulagan 18:14–16

Umay ti rag-o manipud iti panangtulong iti dadduma nga umasideg ken ni Cristo.

Bayat ti panangbasam kadagiti bersikulo 14–16, utobem no ania ti kaipapanan ti “mangyararaw iti panangbabawi”—ken apay a mangyeg daytoy iti kasta a rag-o. Ania dagiti sumagmamano a wagas a nasarakam a tumulong kadagiti dadduma nga umasideg iti Mangisalakan ken umawat iti pammakawan? Kasano nga inaramid dagiti dadduma a tao dayta para kenka?

Kitaen met iti Craig C. Christensen, “There Can Be Nothing So Exquisite and Sweet as Was My Joy,” Liahona, Mayo 2023, 45–47.

Doktrina ken Katulagan 18:34–36

Mangngegko ti timek ti Apo kadagiti nasantuan a kasuratan.

No adda maysa a tao nga agdamag kenka no ania ti kapada ti timek ti Apo, ania koma ti kunam? Panunotem maipapan iti daytoy a saludsod bayat ti panangbasam iti Doktrina ken Katulagan 18:34–36. Ania ti nasursurom maipapan iti timek ti Apo manipud ti panagbasbasam iti Doktrina ken Katulagan? Ania ti mabalinmo nga aramiden tapno mangngegam a nalawlawag ti timekna?

Kitaen met iti: “As I Search the Holy Scriptures,” Hymns, no. 277.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 18:10–13

Napateg iti Dios ti tunggal maysa kadatayo.

• Bayat ti panagbasayo ken dagiti annakyo iti Doktrina ken Katulagan 18:10–13, ibilang ti panangsukat iti nagan ti tunggal maysa imbes a dagiti balikas a “kararua,” “dagiti kararua,” ken “amin a tattao.” Kalpasanna mabalinmo nga isarita no kasano a tulongannatayo dagitoy a bersikulo a makaawat no kasano ti rikna ti Nailangitan nga Ama maipapan iti tunggal maysa kadatayo.

• Mabalinmo pay a damagen kadagiti annakmo maipapan kadagiti banag nga ibilang dagiti tao a napateg. Wenno mabalinmo nga ipakita kadagiti ubbing ti maysa a banag a napateg kenka. Kasano ti panangtratotayo kadagiti banag a napateg kadatayo? Kalpasanna, pagsisinnublatem ida a kumita iti sarming. No aramidenda, ibagam iti tunggal ubing nga anak ti Dios ida ken dakkel ti pategda. Kasano a maipakitatayo kadagiti dadduma a “napateg dagiti kararua[da]” iti imatangtayo?

• Tapno mayunay-unay a dakkel ti pateg iti Nailangitan nga Ama ti amin a tao, mabalin a kitaen dagiti annakmo ti ladawan iti ungto daytoy a balabala bayat ti panagbasam iti Doktrina ken Katulagan 18:10–13. Ti aggigiddan a panangkansion iti maysa a kanta kas iti “Every Star Is Different” (Children’s Songbook, 142–43) ket makatulong a mangpatibker iti daytoy a punto.

Detalye manipud iti Pateg ti Maysa a Kararua, ni Liz Lemon Swindle

Doktrina ken Katulagan 18:13–16

Mangyeg kaniak ti rag-o ti panangibinglay ti ebanghelio.

• Tapno maparegta dagiti annakmo a mangibinglay iti ebanghelio ni Jesucristo, makapagsasaritakayo iti tunggal maysa maipapan kadagiti padas no adda nasarakanyo a kayatyo nga ibinglay kadagiti gagayyem wenno pamiliayo. Apay a kayatmo nga ibinglay daytoy, ken ania ti nariknam idi imbinglaymo dayta? Kalpasanna mabalinmo a basaen ti Doktrina ken Katulagan 18:13, 16. Ania ti mangyeg iti Apo iti rag-o? Ania ti kunana a mangyegto kadatayo iti rag-o? Mabalinmo ken dagiti annakmo ti agsarita maipapan iti ania man a padas a napadasam a mangibinglay iti ragsak ti ebanghelio ti Mangisalakan.

• Maysa a kanta maipapan iti panangibinglay iti ebanghelio, kas iti “I Want to Be a Missionary Now” (Children’s Songbook, 168), ti makatulong kadagiti annakmo a mangpanunot kadagiti wagas a mabalin a pangibinglayanda iti ebanghelio.

Doktrina ken Katulagan 18:34–36

Mangngegko ti timek ti Apo kadagiti nasantuan a kasuratan.

• Mabalin a magustuan dagiti annakmo ti maysa nga ay-ayam a pangpadasanda nga ilasin ti timek dagiti nadumaduma a tao, kas kadagiti miembro ti pamilia, gagayyem, wenno lider ti Simbaan. Kasano a mailasintayo dagiti timek ti tunggal maysa? Kasano a mailasintayo ti timek ti Apo? Kalpasanna aggigiddan a basaen ti Doktrina ken Katulagan 18:34–36 a mangilawlawag iti daytoy a saludsod. Mabalinyo pay nga ibinglay iti tunggal maysa no kasano a nangngeganyo ti timek ti Apo kadagiti nasantuan a kasuratan.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Napateg iti Dios ti tunggal kararua.