Marso 10–16: “Ti Ilulutuad ti Simbaan ni Cristo”

Doktrina ken Katulagan 20–22

Nalpas itan ti aramid ti Mangisalakan a panangyeg iti Libro ni Mormon. Ngem karugrugi pay laeng ti aramidna a Pannakaisubli. Malaksid iti panangisubli iti doktrina ken turay ti priesthood, nalawag nga imbaga ti Apo babaen kadagiti immun-una a paltiing a kayatna met nga isubli ti maysa a pormal nga organisasion—ti Simbaanna (kitaen iti Doktrina ken Katulagan 10:53; 18:5). Idi Abril 6, 1830, nagdudupudop ti nasurok a 40 a mamatpati iti kayo a pagtaengan ti pamilia a Whitmer iti Fayette, Nueva York, tapno mangsaksi iti pannakabuangay ti Simbaan ni Jesucristo.

Sumagmamano a tao ti masdaaw no apay a kasapulan ti nabuangay a Simbaan. Mabalin a masarakan ti sungbat, uray iti kabassitan a paset, kadagiti paltiing a konektado iti dayta umuna a miting iti Simbaan idi 1830. Iladawanda dagiti bendision a saan koma a posible no ti pudno a Simbaan ni Jesucristo ket saan nga iti “umno a pannakaurnosna ken nabangon” iti ud-udina nga aldaw (Doktrina ken Katulagan 20:1).

Kitaen met iti Saints,, 1:84–86; “Build Up My Church,” Revelations in Context, 29–32.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 20–21

Insubli ni Jesucristo ti Simbaanna.

Apay a kasapulantayo ti naurnos a Simbaan? Nalabit ti kasayaatan a sungbat ti “Gapu ta inurnos ni Jesucristo ti maysa.” Bayat ti panangadalmo iti Doktrina ken Katulagan 20–21, mabalin a madlawmo dagiti panagpapada ti Simbaan nga impasdekna idi un-unana ken ti maysa nga insublina iti agdama. Usaren dagiti sumaganad a bersikulo tapno maammuan ti maipapan iti Simbaan ti Mangisalakan idi un-unana a panawen: Mateo 16:15–19; Juan 7:16–17; Taga Efeso 2:19–22; 3 Nephi 11:23–26; Moroni 4–5. Usaren dagitoy a bersikulo tapno masursuro maipapan iti naisubli a Simbaan: Doktrina ken Katulagan 20:17–25, 60, 72–79; 21:1–2. Mabalinmo nga isurat no ania ti masarakam iti table a kas iti daytoy:

	Doktrina	Dagiti Ordinansa	Turay ti priesthood	Dagiti propeta
Nagkauna a Simbaan ni Cristo	Doktrina	Dagiti Ordinansa	Turay ti priesthood	Dagiti propeta
Naisubli a Simbaan ni Cristo	Doktrina	Dagiti Ordinansa	Turay ti priesthood	Dagiti propeta

Ania ti masursuroyo manipud iti daytoy nga aktibidad maipapan iti no apay nga impasdek ni Jesucristo—ken insublina—ti Simbaanna?

Kitaen met iti Dallin H. Oaks, “The Need for a Church,” Liahona, Nob. 2021, 24–26.

Yawis ti Panagbibinninglay No awisem dagiti tao a mangibinglay iti nasursuroda a bukbukodda, mariknadanto a maparegtada a mangituloy iti bukodda a panagadal. Ania ti mabalinmo a yawis iti dadduma nga ibinglayda?

Doktrina ken Katulagan 20:37, 75–79; 22

Tulongannak dagiti sagrado nga ordinansa nga agbalin a kas iti Mangisalakan.

Idi nabukel ti Simbaan, insuro ti Apo dagiti Santona maipapan kadagiti sagrado nga ordinansa, agraman ti panagbuniag ken ti sakramento. Bayat ti panangbasam maipapan kadagitoy nga ordinansa, utobem no kasano a matulongandaka a makarikna a konektadoka iti Mangisalakan? Kas pagarigan, kasano a matulongandaka dagitoy nga ordinansa a mangpatalinaed iti “pangngeddeng[mo] nga agpaay ken ni [Jesucristo] agingga iti panungpalan”? (bersikulo 37). Mabalinmo pay a basaen dagiti kararag ti sakramento (dagiti bersikulo 77, 79) ket panunotem a mangmangngegam ida iti umuna a gundaway. Ania dagiti dadduma pay nalawag a pannakaammo ken pannakaawat a maawatmo?

Kitaen met iti D. Todd Christofferson, “Why the Covenant Path,” Liahona, Mayo 2021, 116–19.

Doktrina ken Katulagan 20:38–60

Ti serbisio iti priesthood ti mangbendision kadagiti miembro ti Simbaan ken dagiti pamiliada.

Napanunotmo kadin maipapan no apay a napateg iti Mangisalakan ti mangisubli iti priesthood iti Simbaanna? Ti panangbasa no ania ti kiddawenna kadagiti priesthood holder nga aramidenda iti Doktrina ken Katulagan 20:38–60 ket mabalin a mangted kenka iti sumagmamano a pannakaammo ken pannakaawat. Kasano a binendisionannaka ti Mangisalakan ken ti pamiliam babaen ti aramid a nailadawan kadagitoy a bersikulo?

Malaksid kadagiti naordenan iti priesthood, aramaten met dagiti babbai a na-set apart nga agserbi iti Simbaan ti turay ti Dios bayat ti pannakiramanda iti aramidna. Tapno masursuro no kasano, kitaen iti mensahe ni Dallin H. Oaks “The Keys and Authority of the Priesthood” (Liahona, Mayo 2014, 49–52).

Kitaen met iti Topics and Questions, “Joseph Smith’s Teachings about Priesthood, Temple, and Women,” Gospel Library.

Doktrina ken Katulagan 21

Ti panagtulnog iti balikas ti Dios babaen kadagiti propetana ket mangtedto kaniak iti nadiosan a salaknib.

TiDoktrina ken Katulagan 21:4–9 ket naglaon kadagiti awis a mangsurot iti propeta ti Apo ken nabileg a kari para kadagiti tao nga agaramid. Makatulong kenka dagiti sumaganad a kapanunotan a mangutob kadagitoy a bersikulo:

• Ania dagiti balikas kadagiti bersikulo 4–5 a mangiladawam no ania ti kayat ti Mangisalakan nga aramidem kadagiti balikas ti sibibiag a propetana? Apay a mariknam a kasapulan ti “anus ken pammati” a mangaramid iti daytoy?

• Utobem dagiti ladawan nga inusar ti Mangisalakan iti bersikulo 6 a mangiladawan kadagiti bendision ti panangsurot iti propetana. Ania iti panagkunam ti kayat a sawen dagiti “ruangan ti impierno”? Kasano a “paksiaten ti Apo dagiti bileg ti kasipngetan” para kenka? Ania ti kaipapanan ti “agkintayeg dagiti langit a maipaay iti pagimbagam”?

• Ania ti idawdawat ti Apo nga aramidem babaen ti agdama a presidente ti Simbaan? Kasano nga impatungpal ti Apo dagiti karina bayat ti panangsurotmo iti balakadna?

Ilistam dagiti nayon a nalawag a pannakaammo ken pannakaawat a magun-odmo manipud kadagiti sumaganad a benneg ti mensahe ni Elder Neil L. Andersen “The Prophet of God” (Liahona, Mayo 2018, 24–27):

• Apay a Surotentayo ti Propeta:

• Maysa nga Agbambantay iti Torre:

• Saanka a Masdaaw:

Kitaen met iti “Watchman on the Tower” (video), ChurchofJesusChrist.org; Topics and Questions, “Prophets,” Gospel Library; “We Listen to a Prophet’s Voice,” Hymns, no. 22.

Watchman on the Tower

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 20–21

Naisublin ti Simbaan ni Jesucristo.

• Ibilang ti panangusar iti paulo ti benneg para iti Doktrina ken Katulagan 21, kapitulo 9 ti Dagiti Estoria iti Doktrina ken Katulagan, wenno ti video “Organization of the Church” (ChurchofJesusChrist.org) tapno matulongan dagiti annakyo a makaawat no ania ti napasamak iti aldaw a nabuangay ti Simbaan.

  The Church of Jesus Christ Is Organized: A joyful Church meeting

• Nalabit a maidilig dagiti annakyo dagiti ladawan ni Jesucristo, maysa nga agserserbi, maysa a panagbuniag, ken ti sakramento kadagiti bersikulo iti benneg 20 (kitaen kadagiti bersikulo 21–23, 47, 72–74, 75–79). Usaren dagitoy a ladawan ken bersikulo tapno pagsasaritaan dagiti bendision nga adda kadatayo gapu ta insubli ni Jesucristo ti Simbaanna.

Doktrina ken Katulagan 20:37, 41, 71–74

No mabuniagan ken makumpirmaannak, agkariak a sumurot ken ni Jesucristo.

• Mabalin a magustuan dagiti annakmo ti kumita iti maysa a ladawan ti maysa nga ubing a mabumbuniagan ken makumkumpirmaan. Mabalinda nga ilawlawag no kasano a maidilig daytoy kadagiti pangiturong iti Doktrina ken Katulagan 20:41, 71–74. Ania ti masursurotayo manipud iti Doktrina ken Katulagan 20:37 maipapan kadagiti tao nga agtarigagay a mabuniagan? Mabalinyo pay a kantaen ti “When I Am Baptized” (Children’s Songbook, 103) wenno buyaen ti “The Baptism of Jesus” (Gospel Library).

  The Baptism of Jesus

  

• No nabuniagan ken nakumpirmaanen dagiti annakmo, saludsodem kadakuada maipapan iti padasda. Adda kadi ladawanda a mabalinda nga ibinglay? Kasaritam ida maipapan no ania ti ar-aramidenda a mangsurot ken ni Jesucristo ken no kasano a bembendisionanna ida.

Doktrina ken Katulagan 20:75–79

Mabalinko nga awaten ti nagan ni Jesus ket kanayon a laglagipek Isuna.

• Mabalin a sapulen dagiti annakmo ti balikas a “siaayat” iti agpada a Doktrina ken Katulagan 20:37 (maipapan iti panagbuniag) ken bersikulo 77 (ti kararag ti sakramento). Ania ti kayat ni Jesucristo a siaayat nga aramidentayo? Mabalin a kitaen dagiti annakmo ti maysa a banag nga adda naganna iti daytoy (kas iti maysa a nagan ti produkto wenno maysa a bukod a nagan). Ania ti ibaga kadatayo ti nagan maipapan iti banag? Ania ti kayat a sawen ti awaten ti nagan ni Cristo kadatayo?

• Aggigiddan a basaenyo ti Doktrina ken Katulagan 20:77 ket kiddawem kadagiti annakmo a mangilasin kadagiti kari nga aramidentayo kas paset ti sakramento. Mabalin a makapagsisinnublatda a mangyakem iti maysa a banag a maaramidda tapno “kanayon a laglagipenda” ti Mangisalakan ken pugtuanda no ania dagiti tignay ti tunggal maysa. Segun iti bersikulo 77, kasano a mabendisionantayo no kanayon a laglagipentayo ti Mangisalakan?

Doktrina ken Katulagan 21:4–6

Bendisionannak ni Jesus bayat ti panangsurotko iti propetana.

• Kalpasan a natakuatan dagiti awis ken kari iti Doktrina ken Katulagan 21:4–6, mabalin a kitaen dagiti annakmo ti ladawan ti agdama a propeta ket ibinglayda ti maysa a banag a nasursuro wenno nangngeganda kenkuana. Ibinglay iti tunggal maysa dagiti wagas a binendisionannakayo ni Jesucristo gapu iti panangsurotyo iti propetana

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ordenan ni Oliver Cowdery ni Joseph Smith, ni Walter Rane