Detalye manipud iti Dana iti Getsemani, ni Steve McGinty

Marso 3–9: “Agadalkayo Kaniak”

Doktrina ken Katulagan 19

Sumagmamano a tawen sakbay a natagikua da Martin ken Lucy Harris ti maysa kadagiti kasasayaatan a talon iti Palmyra, Nueva York Ngem idi 1829 nagbalin a nalawag a maipablaakto laeng ti Libro ni Mormon no maisalda ni Martin ti talonna tapno mabayadan ti agimalmaldit. Adda pammaneknek ni Martin iti Libro ni Mormon, ngem awan ken ni Lucy. No matuloy ti panangisalda ni Martin ket saan a malako a nasayaat ti Libro ni Mormon, mapukawna ti talonna, ket agpeggad ti kallaysana ket madadael ti reputasionna iti komunidad. Nupay naiduma ti kasasaadtayo iti kasasaad ni Martin, iti maysa a panawen wenno sabali ket maipasangotayo amin kadagiti narigat a saludsod a kas kadagidiay nakaipasanguanna: Ania ti pateg kaniak ti ebanghelio ni Jesucristo? Ania ti mabalinko nga isakripisio tapno makatulongak iti pannakabangon ti pagarian ti Dios? Inkeddeng ni Martin Harris iti kamaudiananna nga isaldana ti talonna tapno maimaldit ti umuna a 5,000 a kopia ti Libro ni Mormon. Ngem uray daytoy a sakripisio—ken ania man a sakripisio a mabalin nga aramidentayo—ket bassit no idilig iti sakripisio ni Jesucristo, “ti kaindaklan iti amin” (Doktrina ken Katulagan 19:18), a nagdara iti tunggal teterreman tapno maisalakan dagiti agbabbabawi.

Para iti ad-adu pay nga impormasion maipapan iti pannakaipablaak ti Libro ni Mormon, kitaen iti Saints, 1:76–84.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 19:1–12

“Siak, a Dios, awan ti pagpatinggaak.”

Inlawlawag ni Joseph Smith a ti paltiing iti benneg 19 ket “bilin ti Dios … ken ni Martin Harris nga intedna isu nga Agnanayon” (paulo ti benneg). Sapulen dagiti lugar kadagiti bersikulo 1–12 a mangyunay-unay ti Apo iti agnanayon a kinataona. Apay iti panagkunam a nasken a maammuan ni Martin Harris daytoy maipapan iti Apo? Apay a nasken a maammuam daytoy?

Apay iti panagkunam a maawagan ni Jesucristo iti “ti punganay ken panungpalan”? (bersikulo 1).

Doktrina ken Katulagan 19:15–20

Nagsagaba ni Jesucristo tapno makapagbabawi ket makaasidegak Kenkuana.

Iladawan ti Baro a Tulag ti panagsagsagaba ti Mangisalakan iti Getsemani manipud iti pannirigan dagiti tao a nakaimatang iti daytoy. Iti Doktrina ken Katulagan 19:15–20, imbaga ni Jesucristo ti maipapan iti panagsagsagabana manipud iti bukodna a pannirigan. Bayat ti panagbasam itoy sagrado a personal a pakaammuan, sapulem no kasano nga inladawan ti Mangisalakan ti panagsagabana. Ibilangmo no ania ti isuro kenka ti tunggal balikas wenno ragup ti balikas. Apay nga immannugot ti Mangisalakan nga agsagaba? Matakuatam ti ad-adu pay iti iti Juan 15:13; Mosiah 3:7; Alma 7:11–12; Doktrina ken Katulagan 18:10–13.

Dagiti panangriknam bayat ti panagadalmo iti panagsagaba ti Mangisalakan ket mabalin a mangpataud kadagiti saludsod a kas kadagitoy: Apay a nasken nga agsagaba ti Mangisalakan gapu kadagiti basolko? Apay a kasapulak ti agbabawi tapno umawat kadagiti naan-anay a bendision ti sakripisiona? Mabalin a makasarakka kadagiti nalawag a pannakaammo ken pannakaawat maipapan kadagitoy a saludsod ken dadduma pay iti mensahe ni Elder Ulisses Soares “Jesus Christ: The Caregiver of Our Soul” (Liahona, Mayo 2021, 82–84). Bayat ti panagadalmo, ania dagiti impresion a mabalin a sumangbay iti panunotmo? Ibilang ti panangisurat iti marikriknam maipapan ken ni Jesucristo ken ti sakripisiona para kenka.

Kas paset ti panagadal ken panagdaydayawmo, mabalinmo ti agsapul iti himno a mabalinmo a denggen wenno kantaen a mangipeksa iti panagyamanmo iti Mangisalakan gapu iti panagsagabana iti biangmo. “I Stand All Amazed” (Hymns, no. 193) ti maysa a napintas a pagwadan.

Ania ti mariknam a paaramid kenka ti Nailangitan nga Ama ken ni Jesucristo kas bunga ti narikna ken inadalmo?

Kitaen met iti “Jesus Christ will help you,” For the Strength of Youth: A Guide for Making Choices (2022), 6–9; Topics and Questions, “Atonement of Jesus Christ,” “Repentance,” Gospel Library; D. Todd Christofferson, “The Divine Gift of Repentance,” Liahona, Nob. 2011, 38–41; “Jesus Suffers in Gethsemane” (video), Gospel Library.

The Savior Suffers in Gethsemane

Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

Doktrina ken Katulagan 19:23

Sumangbay ti kappia manipud iti panagsursuro ken ni Jesucristo ken panangsurot Kenkuana.

Ibilangmo ti awis ti Mangisalakan: “Agsursurokayo kaniak.” Ania ti masursurom maipapan ken ni Jesucristo iti Doktrina ken Katulagan 19? Isuratmo dagiti kapanunotam, ken utobem no kasano a tulongannaka dagitoy a kinapudno maipapan iti Mangisalakan a mangsapul iti talna. Ania ti kayat a sawen kenka ti “magnakayo iti kinapakumbaba ti Espiritu[na]”?

Kitaen met iti Henry B. Eyring, “Finding Personal Peace,” Liahona, Mayo 2023, 29–31; “Peace in Christ” (video), Gospel Library.

Peace in Christ

Doktrina ken Katulagan 19:26–41

Dakdakkel dagiti bendision ti Dios ngem dagiti kinabaknang ti daga.

Saan unay a malako idi ti Libro ni Mormon idiay Palmyra. Kas bungana, nagtungpal ni Martin Harris a nasken a mangilako iti dakkel a paset ti talonna tapno pangbayad iti utang iti agimalmaldit (kitaen iti “The Contributions of Martin Harris,” iti Revelations in Context, 7–8). Utobem ti sakripisio ni Matin—ken dagiti bendision a naawatmo gapu iti dayta—bayat ti panangbasam iti Doktrina ken Katulagan 19:26–41. Mabalinmo pay a panunoten maipapan iti no ania ti kiniddaw kenka ti Apo nga isakripisiom. Ania ti masarakam kadagitoy a bersikulo a mangparegta kenka a mangaramid kadagitoy a sakripisio nga addaan iti “rag-o” ken “ragsak”? (kitaen met kadagiti bersikulo 15–20).

Detalye manipud iti Talon ni Martin Harris, ni Al Rounds

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 19:16–19

Nagsagaba ni Jesucristo gapu kaniak.

• Matulongam dagiti annakmo a makarikna iti panagraem ken panagyaman iti Mangisalakan babaen ti aggigiddan a panangbasa iti Doktrina ken Katulagan 19:16–19 wenno “Kapitulo 51: Agsagaba ni Jesus iti Minuyongan ti Getsemani,” iti Dagiti Estoria iti Baro a Tulag, 129–32, wenno ti katupagna a video iti Gospel Library. Ibilangmo ti panagsardeng tapno masiguradom a maawatan dagiti annakmo ken paipeksam kadakuada ti riknada. Kas pagarigan, iti bersikulo 16, ania “dagitoy a banag” a sinagaba ni Jesus? (kitaen iti Mosiah 3:7; Alma 7:11–12). Ania ti masursurotayo manipud iti panangiladawanna iti panagsagabana? Kasano a maipakitatayo ti panagyamantayo iti inaramidna para kadatayo?

Chapter 51: Jesus Suffers in the Garden of Gethsemane

Tulongam dagiti ubbing nga agsursuro manipud kadagiti nasantuan a kasuratan. Marigatan dagiti sumagmamano nga ubbing nga agbasa kadagiti nasantuan a kasuratan. Mabalin a makatulong kadakuada ti panagpokus iti maysa a bersikulo wenno ragup ti balikas.

• Mabalinmo ken dagiti annakmo a mangkita iti Hymns wenno ti Children’s Songbook kadagiti kanta a mangtulong kadakuada a mangipeksa kadagiti riknada maipapan ken ni Jesucristo (kitaen ti topic indexes kadagitoy a libro).

Doktrina ken Katulagan 19:18–19, 24

Nagtulnog ni Jesucristo iti Nailangitan nga Ama, uray pay a narigat daytoy.

• Narigat unay ti panagsagaba gapu kadagiti basoltayo, ngem situtulok ni Jesucristo a mangaramid iti daytoy tapno agtulnog iti Amana ken tapno maipakita ti panagayatna Kenkuana ken kadatayo. Mabalinyo nga aggigiddan a kumita iti ladawan ni Jesucristo nga agsagsagaba idiay Getsemani (kas kadagiti adda iti daytoy a balabala) ket kiddawem kadagiti annakmo nga ibagada kenka no ania ti ammoda maipapan iti mapaspasamak iti ladawan. Mabalin nga aggigiddan a basaenyo ti Doktrina ken Katulagan 19:18–19, 24 a mangyunay-unay a ti panagsagaba gapu kadagiti basoltayo ket ti karirigatan a banag nga inaramid ti asino man, ngem gapu ta inayat ni Jesus ti Amana ken datayo, tinungpalna ti pagayatan ti Dios (kitaen met iti Mosiah 3:7). Ania dagiti narigat a banag nga idawat ti Dios nga aramidentayo? Kasano a masarakantayo ti tured nga agtungpal Kenkuana?

Doktrina ken Katulagan 19:23

Agadalkayo kaniak, ken denggenyo dagiti balikasko.”

• Mabalinmo a tulongam dagiti annakmo a mangpanunot kadagiti simple a tignay a maigiddan kadagiti ragup ti balikas iti Doktrina ken Katulagan 19:23. Basaem ti bersikulo iti sumagmamano a daras idinto nga aramiden dagiti ubbing dagiti tignay. Ania dagiti wagas a masursurotayo ni Cristo ken mangngegantayo dagiti balikasna.

Doktrina ken Katulagan 19:38

Dakdakkel dagiti bendision ti Dios ngem dagiti kinabaknang ti daga.

• Sika ken dagiti annakmo makapagsisinnublat iti panangiggem iti maysa a kopia ti Libro ni Mormon ken panangibinglay no ania ti ipategmo maipapan iti daytoy. Isaritam biit ti maipapan kadagiti sakripisio ni Martin Harris tapno maimaldit ti Libro ni Mormon (kitaen iti Dagiti Estoria iti Doktrina ken Katulagan, 33). Ania ti kinuna ti Apo ken ni Martin iti Doktrina ken Katulagan 19:38 a mabalin a nakatulong kenkuana nga agbalin a napudno ken natulnog? Tulongam dagiti ubbing a mangpanunot iti maysa a banag a mabalinda nga isakripisio tapno agtungpal iti Dios wenno tumulong iti aramidna.

  Chapter 7: Witnesses See the Gold Plates: 1829–1830

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ni Cristo nga Agkarkararag iti Minuyongan ti Getsemani, ni Hermann Clementz