6–12 enero: “Chex’ab’inq, ex tenamit”

Tzolʼlebʼ ut Sumwank 1

Sa’ li po noviembre re 1831, ka’ajwi’ jun chihab’ rik’in meer chaq lix k’ojob’ankil wi’chik lix Iglees li Jesukristo. Us ta yoo chi k’iik, a’an jun ch’ina ch’uut chi aj paab’anel li wankeb’ sa’ jun raqal chi ch’och’ b’ar wi’ moko ninqeb’ ta li tenamit, ut b’eresinb’ileb’ xb’aan jun li profeet aj wiib’ xkak’aal chihab’. A’b’an li Dios kixnaw naq eb’ laj paab’anel a’in a’aneb’ lix moos ut laj k’amol re li resilal, ut a’an kiraj naq te’puktesimanq chiru li ruchich’och’ li k’utb’esinb’il na’leb’ li xk’eehom reheb’.

Tzol’leb’ ut Sumwank tasal 1 a’an xtikib’ankileb’ li k’utb’esinb’il na’leb’ kixk’e li Qaawa’. Naxk’ut chi saqen ru naq, us ta lix k’ihaleb’ li komon sa’ li Iglees yal b’ab’ay, maak’a’ k’a’ru yal b’ab’ay sa’ li na’leb’ li kiraj li Dios naq eb’ laj santil paab’anel te’xwotz. A’an jun “yaab’ kuxej re tije’k” choq’ reheb’ “li wankeb’ sa’ li ruchich’och’,” ut naxk’ut chiruheb’ naq te’xjal xk’a’uxl ut te’xk’ojob’ lix sumwank li Dios “li junelik nakana” (eb’ li raqal 4, 8, 22). Eb’ li moos neke’k’amok re li na’leb’ a’in a’aneb’ “li q’uneb’ xmetz’ew ut li moko nim ta xna’leb’eb’.” A’b’an eb’ li moos tuulaneb’ a’aneb’ li naxb’oqeb’ li Dios—chalen chaq ut anajwan ajwi’—re risinkil lix Iglees “sa’ aak’ab’ ut sa’ chaq li q’ojyin” (eb’ li raqal 23, 30).

Li na’leb’ re tzolok sa’ li ochoch ut sa’ li iglees

Tzolʼlebʼ ut Sumwank 1

“Chex’ab’inq, ex tenamit.”

Jun aatin re tikib’ank na’aatinak chirix li k’a’ru wan sa’ jun li hu. Naxye resileb’ lix jolomil na’leb’ ut li rajom li hu ut naxtenq’aheb’ li ani te’iloq ru chixkawresinkil rib’ chirilb’al ru. Naq nakawil li tasal 1—li “raatin li Qaawa’ re xtikib’ankil” li Tzol’leb’ ut Sumwank (raqal 6)—sik’eb’ li jolomil na’leb’ ut eb’ li ajom ke’k’ehe’ xb’aan li Qaawa’ chirixeb’ lix k’utb’esinb’il na’leb’. K’a’ru nakatzol li naru nakatxtenq’a sa’ xtzolb’al li Tzol’leb’ ut Sumwank chiru li chihab’ a’in? Qayehaq, maare taak’oxla k’a’ru naraj naxye “rab’inkil lix yaab’ xkux li Qaawa’” sa’eb’ li k’utb’esinb’il na’leb’ a’in (raqal 14) malaj k’a’ru naraj naxye “xtz’ilb’aleb’ rix li taqlahom a’in” (raqal 37).

Chi’ilmanq ajwi’ Xtikib’ankil li Tzol’leb’ ut Sumwank.

Tzolʼlebʼ ut Sumwank 1:4–6, 23–24, 37–39

Li Qaawa’ na’aatinak rik’in xtz’uumaleb’ re lix moos, ut eb’ ajwi’ li profeet sa’ roso’jikeb’ li kutan a’in.

Li tasal 1 natikla ut naraqe’ rik’in lix yehom li Dios naq a’an na’aatinak rik’in xtz’uumaleb’ re lix moos sik’b’ileb’ ru (che’ilmanq li raqal 4–6, 23–24, 38). Tz’iib’a li nakatzol sa’ li k’utb’esinb’il na’leb’ ain chirix:

• Li Qaawa’ ut lix yaab’ xkux.

• K’a’ut naq aajeleb’ ru li profeet sa’eb’ li qakutankil.

K’a’ru eek’asinb’ilat chixb’aanunkil xb’aan li k’a’ru xataw?

Jo’q’e aawab’ihom lix yaab’ xkux li Qaawa’ sa’ xyaab’ xkuxeb’ lix moos? (chi’ilmanq li raqal 38).

Naru ajwi’ nakak’oxla naq chanchan naq jun reheb’ laa wamiiw li maak’a’ naxnaw chirixeb’ li yo’yookil profeet yoo chirilb’al li tasal 1 aawik’in. K’a’ raj ru li na’leb’ tixpatz’ laa wamiiw? B’ar wan reheb’ li raqal nawulak raj chawu xwotzb’al rik’in laa wamiw re xtenq’ankil k’a’ru nakaweek’a chirix naq wankeb’ li profeet sa’ li qakutankil?

Maare nakawaj xnawb’al naq sa’ li hoonal naq jun ch’uuteb’ li xb’eenil ke’xch’utub’ rib’ sa’ 1831 re aatinak chirix xpuktesinkil li k’utb’esinb’il na’leb’ kixk’ul laj Jose Smith, junjunqeb’ li ink’a’ ke’raj naq taa’uxmanq. Ke’xutaanak xb’aan lix majelal laj Jose re tz’iib’ak, ut ke’xk’oxla naq li xpuktesinkil li k’utb’esinb’il na’leb’ tixk’am chaq xkomon xch’a’ajkilaleb’ laj santil paab’anel (chi’ilmanq Santos, 1:143–146). Wi katwan raj chi tz’aqonk sa’ li ch’utam a’in, k’a’ raj ru kaye chirix li na’leb’ a’in? K’a’ru li na’leb’ nakataw sa’ li tasal 1 li maare katxtenq’a raj? (che’ilmanq, jo’ eetalil, li raqal 6, 24, 38).

Naru nakawoksi junaq li b’ich jo’ “Xyaabʼ xkux jun li profeet abʼi” (Eb’ li B’ich, 11) naq nakattzolok ut nakatloq’onin. Sik’eb’ ch’ol aatin sa’ li b’ich li neke’xk’ut ajwi’ li na’leb’ wankeb’ sa’ li tasal 1.

Chi’ilmanq ajwi’ Temas y preguntas, “Profetas,” Biblioteca del Evangelio.

Li Qaawa’ nokoraatina rik’ineb’ xtz’uumal reheb’ lix moos, eb’ li profeet.

Tzolʼlebʼ ut Sumwank 1:12–30, 34–36

Li k’ojob’ank wi’chik nikinixtenq’a chixnumsinkileb’ lix ch’a’ajkilaleb’ li roso’jikeb’ li kutan.

Sa’ Tzol’leb’ ut Sumwank tasal 1, li Qaawa’ naxch’olob’ k’a’ut naq kixk’ojob’ wi’chik lix evangelio. Il jarub’ xyaalal a’an naru nakataw naq yooqat chirilb’aleb’ li raqal 12–23. Jo’ chanru nakawil, chan ru naq yookeb’ chi uxmank li rajom li Qaawa’ sa’ li k’ojob’ank wi’chik?

Li Qaawa’ naxnaw naq sa’eb’ li qakutankil te’wanq xninqal ru ch’a’ajkilal (chi’ilmanq li raqal 17). K’a’ru nakataw sa’eb’ li raqal 17–30, 34–36 li nakatxtenq’a chixtawb’al tuqtuukilal ut xkawil aach’ool chixnumsinkileb’ li ch’a’ajkilal a’in?

Chi’ilmanq ajwi’ Russell M. Nelson, “Xk’ulb’al li k’a’ru chalel rik’in paab’aal,” Jolomil ch’utub’aj-ib’ re octubre 2020.

Tzolʼlebʼ ut Sumwank 1:19–28

Li Qaawa’ naroksiheb’ “li q’uneb’ xmetz’ew ut li moko nim ta xna’leb’eb’” re xk’eeb’al chi uxmank lix k’anjel.

Naq taawil Tzol’leb’ ut Sumwank 1:19–28, naru nakatz’il rix k’a’ru naraj naxye wank choq’ xmoos li Qaawa’. Chan ru naraj li Qaawa’ naq te’wanq lix moos? K’a’ru yoo chixk’eeb’al chi uxmank li Qaawa’ rik’ineb’ xtenq’ lix moos? Chan ru naq yookeb’ chi tz’aqlok ru li profeetil aatin wankeb’ sa’ li raqal a’in sa’ chixjunil li ruchich’och’ ut sa’ laa yu’am?

Sik’ li Jesukristo. Li rajomeb’ li loq’laj hu a’an xch’olob’ankil xyaalal li Jesukristo ut lix evangelio. Naq yookat chirilb’al ru Tzol’leb’ ut Sumwank 1, k’oxla xjuch’b’al malaj reetalinkileb’ li raqal li nakate’xtzol chirix li Jesukristo.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol‘leb‘ ut Sumwank 1:4, 37–39

Rik’in xtz’uumaleb’ re lix profeet, li Qaawa’ nikinixq’us chirixeb’ li musiq’ejil xiwxiw.

• Re xtikib’ankil aatinak chirixeb’ lix q’usum li Qaawa’, naru nakat-aatinak chirixeb’ li q’usum neke’qak’ul rik’ineb’ jalan chik kristiaan chirixeb’ li xiwxiw li ink’a’ neke’qil. Sa’ xyanqeb’ li eetalil naru neke’qataw jo’ naq maare yolyol ru li tz’ak, jun kaq-sut-iq’ yoo chi chalk, malaj jun b’eleb’aal ch’iich’ yoo chaq chi nach’ok. Laa’at ut eb’ laa kok’al naru nekerileb’ kok’ reetalileb’ li xiwxiw ut teejuntaq’eeta rik’ineb’ li q’usum naxk’e li Qaawa’ qe. Jo’ naxye sa’ Tzol’leb’ ut Sumwank 1:4, 37–39, chan ru nokoxq’us li Qaawa’? K’a’ru junjunqeb’ li na’leb’ toje’ xooxq’us wi’? Maare naru nakawil chi chapb’il xyaab’ malaj chi tz’iib’anb’il jun esil re li jolomil ch’utub’aj-ib’ re xtawb’al xkomon li “xyaab’ kuxej re tije’k” li k’eeb’il xb’aan li Dios.

• B’ichahomaq jun li b’ich na’aatinak chirixeb’ li profeet, jo’ xraqik li raqal sa’ “Jun li profeet” (B’ichleb’aal choq’ reheb’ li Kok’al, 58). Wotz lix nawom aach’ool chirix naq li profeet naxjultika li raatin li Dios.

Tzol’leb’ ut Sumwank 1:17

Li k’ojob’ank wi’chik nikinixtenq’a chixnumsinkileb’ lix ch’a’ajkilal li roso’jikeb’ li kutan a’in.

• Re aatinak chirix Tzol’leb’ ut Sumwank 1:17, laa’at ut eb’ laa kok’al naru nekek’oxla naq yookex chixkawresinkil eerib’ re xik chi b’eek. K’a’ raj ru teek’am? Wi teenaw raj naq yooq li hab’ malaj naq taapuk’e’q xyant lee b’eleb’aal ch’iich’, chan raj ru naq xnawb’al a’an texxtenq’a raj chixkawresinkil eerib’? Ilomaq li raqal 17, ut aatinanqex chirix k’a’ru kixnaw li Qaawa’ chirix li taak’ulmanq qik’in. Chan ru kixkawresi rib’ choq’ re a’an? (Wi na’ajman ru, ch’olob’ naq jun “ch’a’ajkilal” a’an jun nimla rahilal malaj toch’e’k.) Chan ru nokohe’xtenq’a lix taqlahom li Dios chixnumsinkileb’ li ch’a’ajkilal sa’eb’ li qakutan?

Tzolʼlebʼ ut Sumwank 1:17, 29

Li Qaawa’ kixb’oq laj Jose Smith re naq taawanq choq’ profeet.

• Re tzolok chirix lix k’anjel laj Jose Smith sa’ lix k’ojob’ankil wi’chik lix evangelio li Jesukristo, laa’at ut eb’ laa kok’al naru nekeril jun xjalam-uuch li Kolonel ut jun xjalam-uuch laj Jose Smith (che’ilmanq li jalam-uuch sa’ li tusleb’ aatin a’in) ut tex’aatinaq chirix k’a’ru kixk’e li Kolonel qe rik’in xtenq’ laj Jose Smith. Eb’ laa kok’al naru neke’xsik’ eetalil sa’ Tzol’leb’ ut Sumwank 1:17, 29. Wotz rik’ineb’ laa kok’al chan ru nakanaw naq li Dios “kixb’oq chaq lix moos aj Jose Smith, alalb’ej, ut kiraatina chalen chaq sa’ choxa” (raqal 17).

© 1998 David Lindsley

Tzol’leb’ ut Sumwank 1:30

Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an lix “yaalil ut yo’yookil iglees” li Qaawa’.

• K’a’ru naraj naxye xyeeb’al naq “yaal ut yo’yo” li Iglees? Re naq eb’ laa kok’al te’k’oxlaq chirix li patz’om a’in, naru nakak’ut chiruheb’ k’a’aq re ru wankeb’ xyu’am ut ajwi’ li maak’a’eb’ xyu’am—jo’ jun li pim yo’yo ut jun li pim chaqijenaq. Chan ru naqanaw naq jun k’a’aq re ru yo’yo? Chirix a’an naru nakawil Tzol’leb’ ut Sumwank 1:30 ut tat-aatinaq chirix k’a’ru naraj naxye naq li Iglees “yaal ut yo’yo.”

Re xtawb’al xkomon chik li na’leb’, chi’ilmanq li hu Amigos re li po a’in.

Chixk’atq ch’anch’ookil ha’, xb’aan laj Simon Dewey