Jalam-uuch re A’an kinixb’oq rik’in ink’ab’a’, xb’aan laj Michael Malm

20–26 enero: “Lix ch’ooleb’ li alal k’ajolb’ej te’sutq’iiq rik’ineb’ lix yuwa’”

Tzol’leb’ ut Sumwank 2; Jose Smith—Resilal 1:27–65

Ak numenaq chik oxib’ chihab’ naq li Dios Yuwa’b’ej ut li Jesukristo, li Ralal, ke’xk’ut rib’ chiru laj Jose Smith sa’ li k’iche’, a’ut laj Jose maajun chik k’utb’esinb’il na’leb’ kixk’ul chalen chaq a’an. Ki’ok chixpatz’b’al rib’ ma ch’a’aj wan li Qaawa’ rik’in a’an. Jo’ chiqajunilo, wan li ink’a’ us xb’aanuhom chaq, ut kireek’a naq jitb’il xb’aan a’an. A’ut toj wan jun k’anjel kiraj li Dios naq tixb’aanu. Ut li k’anjel li kib’oqe’ wi’ laj Jose a’an laq’lo rik’in li naxpatz’ li Dios qe chiqajunil. Laj Jose taarisi raj chaq lix Hu laj Mormon chi kutankil; b’oqb’ilo chixwotzb’al li resilal. Laj Jose tixk’ul raj lix laawil li tijonelil re xsutq’isinkil xch’ooleb’ li alalb’ej rik’ineb’ lix yuwa’; anajwan naru neke’qak’ul li k’ojob’anb’il k’anjel choq’ reheb’ li qaxe’ qatoon sa’ li santil ochoch. Laj Jose ki’aatinaak chirixeb’ li profeetil aatin li taatz’aqob’resimanq raj ru chi seeb’; b’oqb’ilo chi tenq’ank re naq te’tz’aqob’resimanq ruheb’ li profeetil aatin a’an. Naq nokotz’aqon sa’ xk’anjel li Dios, ak re naq wanq li ch’a’ajkilal ut li rahob’tesink naru naqak’ul, jo’ chanru kixk’ul li Profeet. A’b’anan, naru ajwi’ taawanq qapaab’aal naq li Qaawa’ tooxk’e jo’ k’anjeleb’aal sa’ ruq’, jo’ chanru naq kixb’aanu choq’ re laj Jose.

Chi’ilmanq ajwi’ Santos, 1:20–53.

Li na’leb’ re tzolok sa’ li ochoch ut sa’ li iglees

Jose Smith—Resilal 1:27–33

Wan jun li k’anjel naraj li Dios naq tinb’aanu.

Naru naqak’oxla naq kiwan jun k’anjel kiraj li Dios naq tixb’aanu laj Jose Smith—naru noko’ilok toj sa’ xtiklajik lix yu’am ut naru naqil chi saqen li k’a’ru kixb’aanu. A’b’an ma aak’oxlahom jun sutaq naq wan jun xk’anjel li Dios choq’ aawe ajwi’ laa’at? Naq taawil Jose Smith—Resilal 1:27–33, k’oxla k’a’ ta raj wi’ ru li k’anjel a’an. Chan ru naq natenq’an a’an sa’ lix k’ojob’ankil wi’chik lix evangelio li Kolonel?

Li Elder Gary E. Stevenson kixk’ut: “Naq nokochal rik’in li Kristo ut naqatenq’aheb’ li qas qiitz’in chi chalk ajwi’, nokotz’aqon sa’ lix k’anjel li Dios re li kolb’a-ib’ ut li taqenaqil loq’al, li jayalinb’il sa’ li qateneb’ankil li xaqab’anb’il sa’ choxa. … Moko ch’a’aj ta li teneb’anb’il k’anjel a’in, a’an b’an nokoxmusiq’a ut nokoxwaklesi, ut naru taqab’aanu. A’in li naxye:

• Xyu’aminkil lix evangelio li Jesukristo

• Rilb’aleb’ li neke’raj xtenq’ankil

• Xb’oqb’al chixjunileb’ chixk’ulb’al li evangelio

• Xk’amb’aleb’ li junkab’al sa’ junajil sa’ li junelik q’e kutan” (“Chʼina-us—Moko chʼaʼaj ta,” Jolomil ch’utub’aj-ib’ re octubre 2021).

K’oxlan chirixeb’ laa numsihom naq nakattz’aqon sa’eb’ li junjunq chi choxahil teneb’ahom a’in. K’a’ru naraj li Qaawa’ naq taab’aanu anajwan? Wan jun perel Temas y preguntas xk’ab’a’ b’ar wi’ neke’tawman chixjunileb’ li teneb’ahom a’an (chi’ilmanq “Nuestra función en la obra de salvación y exaltación de Dios,” Biblioteca del Evangelio). Naru nakawileb’ li perel a’in re xtenq’ankil aawib’ chixsumenkil li patz’om a’in.

Maare wan naq taaweek’a naq li Qaawa’ ink’a’ naru nakatroksi sa’ xk’ab’a’ li sachk aak’ulum chaq. K’a’ru nakatzol rik’in lix numsihom laj Jose Smith sa’ Jose Smith—Resilal 1:28–29? Chan ru naru nakanaw “chan ru naq wankat chiru [li Dios]”?

Oksiheb’ li patz’om neke’k’amok chi aatinak. Eb’ li patz’om naab’al xsumenkil neke’raj naxb’oqeb’ li komon chi sumenk jo’ chanru neke’xk’oxla, neke’reek’a, ut li neke’xnumsi a’an. Eb’ li patz’om sa’ li tusleb’ aatin a’aneb’ reetalil a’in.

Chi’ilmanq ajwi’ “Li k’anjel re li kolb’a-ib’ ut li taqenaqil loq’al,” Jolomil K’anjenel Hu, 1.2.

Youth Responsibility in the Work of Salvation

Elder Bednar wants the youth to recognize that recent adjustments to Young Women classes and Aaronic Priesthood quorums give them operational and executional responsibility in the work of salvation. When the youth are focused, miracles will come.

Jose Smith—Resilal 1:34–47

Naq kixk’ojob’ wi’chik lix evangelio, li Kolonel kixtz’aqob’resi ruheb’ li najteril profeetil aatin.

Naq laj Moroni kixk’ut rib’ chiru laj Jose kixjultika junjunqeb’ li profeetil aatin re li Najter ut li Ak’ Chaq’rab’, jo’ Isaias 11; Hechos 3:22–23; ut Joel 2:28–32. Naq taawil Jose Smith—Resilal 1:34–47, k’oxla k’a’ut naq aajel ru naq laj Jose tento kixnaweb’ li profeetil aatin a’in? K’a’ut naq aajel ru naq taanaweb’ ru laa’at?

Naru ajwi’ nakawil li k’a’ru kixk’ut li Elder David A. Bednar chirix li xb’een sut naq kixk’ut rib’ laj Moroni chiru laj Jose Smith sa’ “Rik’in lix wankil li Dios sa’ nimla loq’alil” (Jolomil ch’utub’aj-ib’ re octubre 2021).

Rik’in lix wankil li Dios sa’ nimla loq’alil

Li Elder Bednar naxk’ut naq roxloq’inkil li qasumwank nokoxtenq’a chixk’ulb’al lix wankilal li choxahilal sa’ li qayu’am.

Chi’ilmanq ajwi’ “Jun anjel taqlanbʼil,” Eb’ li B’ich, 8.

Jose Smith—Resilal 1:48–60

Li Dios tinixkawresi re tink’anjelaq sa’ li rawa’b’ejihom.

Laj Jose yal 17 chihab’ wan chaq re naq kiril li perel ch’iich’ oor xb’een sut. A’b’anan, ink’a’ kik’eeman re toj kaahib’ chihab’ chik chirix a’an. Il Jose Smith—Resilal 1:48–60, ut sik’ k’a’ru kik’ulman sa’ xyu’am laj Jose chiru li hoonal a’an. Chan ru naq li k’a’ru kik’ulman kixkawresi a’an re xb’aanunkil li k’anjel kib’oqe’ xb’aan li Dios chixb’aanunkil? K’a’ru aanumsihom wanjenaqeb’ li nakate’xkawresi re k’anjelak chiru li Dios ut chiruheb’ laa was aawiitz’in? K’a’ru yookat chixnumsinkil anajwan li naru nakatxtenq’a chixkawresinkil aawib’ re k’anjelak moqon?

Tzuul Kumorah, xb’aan laj Al Rounds

Tzolʼlebʼ ut Sumwank 2

Li Qaawa’ kixtaqla chaq laj Elias re xsutq’isinkil inch’ool rik’ineb’ lin xe’toonil.

K’a’ru neke’xk’ut chawu li aatin jo’ “taaraw,” “ch’ooleb’,” ut “sutq’isink” sa’ li tasal a’in chirix lix k’anjel laj Elias ut chirixeb’ li osob’tesink reheb’ lix laawil li tijonelil li kixk’ojob’ wi’chik? Chan ru aaweek’ahom naq sutq’isinb’il aach’ool rik’ineb’ laa xe’toonil? K’oxla chan ru naru taak’uleb’ li eek’ahom a’an chi kok’ aj xsa’. Xsik’b’al resileb’ laa xe’ aatoon ut xb’aanunkileb’ li k’ojob’anb’il k’anjel choq’ reheb’ a’an sa’ li santil ochoch a’an jun li k’anjel (chi’ilmanq FamilySearch.org). Ma wan xkomoneb’ chik li naru nakak’oxla?

Chi’ilmanq ajwi’ Tzol’leb’ ut Sumwank 110:13–16; Gerrit W. Gong, “Wank rik’in sahil ch’oolejil ut chi junelik,” Jolomil ch’utub’aj-ib’ re octubre 2022.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Jose Smith—Resilal 1:28–29

Naru ninjal ink’a’uxl ut taakuye’q lin maak.

• Chiqajunilo wan naq naqeek’a naq “wan tojb’a-maak sa’ qab’een xb’aan lix q’unal qametz’ew ut li qamajelal,” jo’ kireek’a laj Jose Smith. Laa’at ut eb’ laa kok’al naru neketzol Jose Smith—Resilal 1:29 sa’ komonil, ut teesik’ k’a’ru kixb’aanu laj Jose naq kireek’a a’an. K’a’ru naru naqatzol rik’in lix b’aanuhom li tooxtenq’a naq nawan qamajelal? K’a’ut naq aajel ru xnawb’al naq laj Jose kib’oqe’ xb’aan li Dios us ta moko tz’aqal ta re ru?

Jose Smith—Resilal 1:27–54

Li qaChoxahil Yuwa’ kixb’oq laj Jose Smith re naq tixtenq’a chixb’aanunkil lix k’anjel.

• Laa kok’al naru nawulak chiruheb’ xk’oxlankil naq a’aneb’ laj Jose Smith naq yooqat chixseraq’inkil reheb’ resil li rula’anihom laj Moroni li wan sa’ Jose Smith—Resilal 1:27–54 malaj li “Ch’ol 3: Li anjel Moroni ut eb’ li perel ch’iich’ oor” (sa’ Eb’ li Esilal sa’ li Tzol’leb’ ut Sumwank, 13–17, malaj li video sa’ Biblioteca del Evangelio). Qayehaq, naru neke’xq’alu lix teleb’ chanchan ta wi’ naq yookeb’ chi tijok malaj te’xb’aanu rib’ naq yookeb’ chi taqe’k sa’ li Tzuul Kumorah. Chirix a’an naru nakapatz’ reheb’ naq te’aatinaq chirix k’a’ut naq li Dios kixb’oq laj Jose Smith ut chan ru naq noko’osob’tesiik xb’aan a’an. Qayehaq, chan ru naq noko’osob’tesiik xb’aan naq laj Jose Smith kixjaltesi ru lix Hu laj Mormon? Chan ru naq lix k’anjel nokoxtenq’a chi nach’ok rik’in li qaChoxahil Yuwa’ ut li Jesukristo?

Tzolʼlebʼ ut Sumwank 2

Li qaChoxahil Yuwa’ naraj naq eb’ li junkab’al te’tz’ape’q sa’ junajil sa’ li santil ochoch.

• Laa’at ut eb’ laa kok’al maare taawulaq cheru rilb’aleb’ junjunq xjalam-uuch lee junkab’al, maare jun xjalam-uuch laa junkab’al sa’ li santil ochoch (malaj chi’ilmanq Hu reheb’ li Jalam-uuch re li Evangelio, 120). Chirix a’an naru nekeril Tzol’leb’ ut Sumwank 2 ut teewotz cherib’il eerib’ lee k’a’uxl chirix k’a’ut naq wankeb’ li santil ochoch ut k’a’ut naq li qaChoxahil Yuwa’ naraj naq eb’ li junkab’al te’wanq chi ch’utch’u chi junelik. Naru nekeb’icha sa’ komonil “Taaruuq toowanq aran saʼ choxa” (B’ichleb’aal choq’ reheb’ li Kok’al, 98). K’a’ru naxye li b’ich a’in li naru naqab’aanu re toowanq rik’in li qajunkab’al chi junelik?

Santil ochoch re Palmyra Nueva York

Tzolʼlebʼ ut Sumwank 2

Li tzolok chirixeb’ lin xe’ intoon naru naxk’e xsahil inch’ool.

• Eb’ li kok’al naru neke’saho’ xch’ool chirix li resilal li junkab’al. Re xtenq’ankileb’, naru nakawotz resilaleb’ ut xjalam-uucheb’ laa xe’ aatoon. Aatinan rik’ineb’ laa kok’al chirix chan chaq ru xyu’ameb’ laa xe’ aatoon naq toj kok’aleb’ chaq. Eb’ laa kok’al naru neke’saho’ xch’ool chixb’aanunkileb’ junjunq reheb’ li kok’al k’anjel chirix resilal li junkab’al sa’ FamilySearch.org/discovery.

Re xtawb’al xkomon chik li na’leb’, chi’ilmanq li hu Amigos re li po a’in.

Laj Jose naxk’uleb’ li perel ch’iich, xb’aan laj Gary E. Smith