Loq’laj K’iche’, xb’aan laj Greg K. Olsen

13–19 enero: “Kiwil jun xaqal li saqen”

Jose Smith—Resilal 1:1–26

Naru nayeeman naq li Tzol’leb’ ut Sumwank a’an jun hu wan wi’ xsumenkileb’ li tij: naab’al reheb’ li santil k’utb’esinb’il na’leb’ wankeb’ sa’ li hu a’in ke’chal jo’ xsumenkileb’ li patz’om. Li patz’om li kitikla wi’ chixjunil—li kik’amok chaq reheb’ chixjunil li k’utb’esinb’il na’leb’ sa’ roso’jikeb’ li kutan a’in—a’an xpatz’om jun ch’ina al aj 14 chihab’. Jun “li pleet re aatin ut choqink chirix li k’a’ru k’oxlanb’il” (Jose Smith—Resilal 1:10) kixkanab’ laj Jose Smith chi sachso xna’leb’ chirix li paab’aal ut lix wanjik rik’in li Dios. Maare taanaw chan ru na’eek’aman a’an. Naab’aleb’ li na’leb’ ut li ka’pak’alink neke’qataw sa’eb’ li kutan a’in. Naq taqaj rilb’aleb’ li na’leb’ a’in ut xtawb’al li yaal, naru naqab’aanu li k’a’ru kixb’aanu laj Jose. Naru toopatz’oq, taqatzoleb’ li loq’laj hu, took’oxlaq, ut chirix a’an naru toopatz’oq re li Dios. Jo’ xsumenkil lix tij laj Jose, jun xaqal li saqen kikub’e chaq sa’ choxa. Li Dios Yuwa’b’ej ut li Jesukristo ke’xk’utb’esi rib’ ut ke’xsume lix patz’om. Lix ch’olob’ahom laj Jose chirix li sachb’a-ch’oolejil hoonal a’an naxye chi kaw naq yalaq ani “li moko tz’aqal ta xna’leb’ taaruuq chi tz’aamank re li Dios, ut chi k’uluk” (Jose Smith—Resilal 1:26). Chiqajunilo naru taqak’ul, maare ink’a’ rik’in choxahil k’utb’esinb’il matk’, a’ut rik’in jun ilom saqen ru, li kutanob’resinb’il xb’aan li choxahil saqen.

Li na’leb’ re tzolok sa’ li ochoch ut sa’ li iglees

Jose Smith—Resilal 1:5–26

Laj Jose Smith a’an li Profeet re lix k’ojlajik wi’chik li evangelio.

Li rajb’al li resilal laj Jose Smith a’an re “taqak’ul li yaalil na’leb’” xb’aan naq chi kok’ aj xsa’ tik’ti’ li yeeb’il chirix laj Jose Smith (Jose Smith—Resilal 1:1). Naq nakawil Jose Smith—Resilal 1:1–26, k’a’ru naxkawob’resi lix nawom aach’ool chirix lix choxahil b’oqb’al?

Chi’ilmanq ajwi’ Santos, 1:3–19.

Jose Smith—Resilal 1:5–25

Chan ru naru nink’ul xsumenkileb’ lin tij?

Ma wan junaq sut naq “moko tz’aqal ta aana’leb’” malaj sachso aana’leb’ chirix li tento taab’aanu? (Jose Smith—Resilal 1:13). Li k’a’ru kixnumsi laj Jose Smith sa’ 1820 naru nak’anjelak jo’ jun eetalil choq’ aawe re taak’ul li k’utb’esinb’il na’leb’. Qayehaq, naq nakawil Jose Smith—Resilal 1:5–25, sik’eb’ na’leb’ li nakaweek’a naq nak’anjelak aawiik’in. K’a’ru nakatzol chirix:

• Chan ru naq kixkawresi rib’ laj Jose re xk’ulb’al jun loq’laj numsihom rik’in li tijok? (che’ilmanq li raqal 8, 11, 14–15).

• Lix k’anjel lix tzolb’aleb’ li loq’laj hu re xsik’b’al li k’utb’esinb’il na’leb’? (che’ilmanq li raqal 11–12).

• K’a’ru naru nakab’aanu naq nakataw li ka’pak’aliik? (che’ilmanq li raqal 15–16, 21–26).

• Xk’ulub’ankil ut wank jo’ chanru li sumehom nakak’ul? (che’ilmanq li raqal 18–25).

Kanab’eb’ chi wotzok. Xtzolb’aleb’ li loq’laj hu nakawresin re xk’ulb’aleb’ li na’leb’ rik’in li Santil Musiq’ej. Xwotzb’aleb’ li na’leb’ a’an naru naxb’oq li Santil Musiq’ej chixch’olob’ankil xyaalal li na’leb’ chiruheb’ laa was aawiitz’in, jo’ ajwi’ chiru li ani nawotzok.

K’a’ chik ru li na’leb’ naru nakataw’ sa’ li raatin li Awa’b’ej Henry B. Eyring, “La Primera Visión: Un modelo para recibir revelación personal”? (Liahona, febrero 2020, 12–17).

Naru ajwi’ nakasik’eb’ xkomon chik li eetalil sa’eb’ li loq’laj hu b’ar wi’ eb’ li kristiaan neke’aatinak rik’in li Dios. Eb’ li jalam-uuch sa’ Hu reheb’ li Jalam-uuch re li Evangelio malaj xkomoneb’ chik li hu re Kim, Taaqehin naru nakate’xtenq’a. Yal xsumenkileb’ li patz’om li xe’k’utman rub’elaj rik’in li junjunq chi eetalil taataw. K’a’ru aanumsihom naq nakak’ul xsumenkil laa tij? K’a’ru naru nakab’aanu re xtenq’ankileb’ laa was aawiitz’in re naq chaab’il ajwi’ li te’xnumsi?

Chi’ilmanq ajwi’ Russell M. Nelson, “Chawab’i a’an,” Jolomil ch’utub’aj-ib’ re abril 2020; Temas y preguntas, “Revelación personal,” Biblioteca del Evangelio.

Jose Smith—Resilal 1: 15–20

Laj Jose Smith kiril li Dios Yuwa’b’ej ut li Jesukristo, li Ralal.

Laj Jose Smith kixpaab’ naq li Dios tixsume lix tij, a’b’an maamin taaruuq chixnawb’al chan ru naq taajale’q lix yu’am—jo’ ajwi’ li ruchich’och’—xb’aan lix sumenkil. Naq nakawil resil li kixk’ul laj Jose, k’oxla chan ru naq li Xb’een K’utb’esink xjal laa yu’am laa’at.

Qayehaq, li Xb’een K’utb’esink kixk’utb’esiheb’ li yaal chirix li Dios Yuwa’b’ej ut li Jesukristo, li Ralal, naq a’aneb’ junjunq chi junxaqalil ut ink’a’ jo’ neke’xk’oxla naab’aleb’ li kristiaan sa’ xkutankil laj Jose. Naq taawil Jose Smith—Resilal 1:15–20, naru taatz’iib’a chan raj ru taatz’aqob’resi ru jun ch’ol aatin jo’ a’in: “Xb’aan naq kik’ulman li Xb’een K’utb’esink, ninnaw naq …”

K’a’ru nakaweek’a naq nakatk’oxlak chirix lix numsihom laj Jose ut chixjunil li kichal chirix a’an?

Chi’ilmanq ajwi’ “Pide a Dios: La Primera Visión de José Smith” (video), Biblioteca del Evangelio; “Xbʼeen xtij laj Jose Smith,” Eb’ li B’ich, 15.

Patz’ re li Dios: Li Xb’een K’utb’esink re laj Jose Smith

Jun video choq’ re li Museo de Historia de la Iglesia chirix li Xb’een K’utb’esink re laj Jose Smith, wan wi’ li na’leb’ isinb’il sa’ li junjunq esil kixye laj Jose Smith.

Jalam-uuch re Wi junaq eere namajelo’ xna’leb’ chiru, xb’aan laj Walter Rane

Jose Smith—Resilal 1:15–20

K’a’ut naq jalan jalanqeb’ li resilal li Xb’een K’utb’esink?

Chiru lix yu’am, numenaq kaahib’ sut naq laj Jose Smith kixtz’iib’a resil li kixk’ul sa’ li loq’laj k’iche’, ut kok’ aj sa’ kiroksi jun aj tz’iib’anel. Jo’kan ajwi’, wankeb’ jalan chik li kristiaan li ke’rab’i laj Jose chi aatinak chirix li kiril ut ke’xtz’iib’a resil. Us ta wankeb’ kok’ xjalanileb’ li esil a’in, a’ yaal li ani kitz’iib’an re, ki’ab’in re, ut b’ar ke’wan chaq, toj neke’xk’am rib’ li esil. Ut sa’ li junjunq chi esil wan k’a’aq re ru li nokoxtenq’a chixtawb’al ru chi us wi’chik li kixk’ul laj Jose Smith, jo’ chanru naq li kaahib’ chi evangelio sa’ li Ak’ Chaq’rab’ nokohe’xtenq’a chixtawb’al ru chi us lix k’anjel li Kolonel.

Chi’ilmanq ajwi’ Temas y preguntas, “Relatos de la Primera Visión,” Biblioteca del Evangelio.

Jose Smith—Resilal 1:21–26

Naru ninkana chi tiik inpaab’aal chirix li k’a’ru ninnaw, us ta nintz’eqtaanaak xb’aan jalaneb’ chik li kristiaan.

Chirix lix Xb’een K’utb’esink, laj Jose Smith kiraj xwotzb’al lix numsihom rik’ineb’ li kristiaan. Kisach xch’ool naq naab’al li ka’pak’alink kixtaw. Naq nakawil li esil kixtz’iib’a, k’a’ru nakatxmusiq’a chi kanaak chi tiik aapaab’aal chirix lix nawom aach’ool? K’a’ruheb’ chik li esil—sa’eb’ li loq’laj hu, chirixeb’ laa xe’ aatoon, malaj chirixeb’ li kristiaan nakanaweb’ ru—li neke’xk’e xkawil aach’ool chi kanaak chi tiik aapaab’aal chirix li musiq’ejil na’leb’ xak’ul?

Chi’ilmanq ajwi’ Gary E. Stevenson, “Xch’olaninkil ut xwotzb’al lix nawom aach’ool,” Jolomil ch’utub’aj-ib’ re octubre 2022.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Jose Smith—Resilal 1:3–14

Laj Jose Smith kikawresiik re taawanq jo’ jun xprofeet li Dios.

• Li tzolok chirix lix saajilal laj Jose Smith naru naxtenq’aheb’ laa kok’al chixjuntaq’eetankileb’ rib’ rik’in a’an naq yooqeb’ chi tzolok chirix li k’a’ru kixnumsi. Naru neke’xchap junaq xjalam-uuch laj Jose Smith ut te’xwotz k’a’ru neke’xnaw chirix a’an. Wi na’ajman ru, naru nakawotz xkomon li esil chirix a’an li naru nakataw sa’ Jose Smith—Resilal 1:3–14 (chi’ilmanq ajwi’ “Ch’ol 1: Laj Jose Smith ut lix junkab’al,” sa’ Eb’ li Esilal sa’ li Tzol’leb’ ut Sumwank, 6–8, malaj li video sa’ li Biblioteca del Evangelio). K’a’ru kixnumsi laj Jose li kitenq’an re chi wulak jo’ profeet? K’a’ raj ru aj-e naq yoo chiqakawresinkil li Dios?

  Chapter 1: Joseph Smith and His Family: 1805–1820

Jalam-uuch re Li Xb’een K’utb’esink chiru laj Jose Smith, xb’aan laj Greg Olsen

Jose Smith—Resilal 1:10–13

Li Dios naru naxsumeheb’ lin patz’om rik’ineb’ li loq’laj hu.

• Naru nakak’ut chiruheb’ laa kok’al k’iila paay chi hu, jo’eb’ ajwi’ li loq’laj hu. Tenq’aheb’ chixk’oxlankileb’ li patz’om naru neke’xsume li hu a’in. Chirix a’an naru nekeril Jose Smith—Resilal 1:10–11 re xsik’b’aleb’ lix patz’om laj Jose Smith ut lix sumenkileb’ kixtaw sa’eb’ li loq’laj hu.

• Eb’ laa kok’al maare te’xtaw aatin sa’ li raqal 12 li neke’xch’olob’ chan ru naq kitoch’e’ xch’ool laj Jose xb’aan Santiago 1:5. Chirix a’an naru nekewotz eenumsihom cherib’il eerib’ b’ar wi’ jun raqal sa’ li loq’laj hu kixtoch’ eech’ool chi nim. Naru ajwi’ nekeb’icha jun li b’ich na’aatinak chirix rilb’al li loq’laj hu, jo’ “Tintzol, tink’oxla, tintijoq” (B’ichleb’aal choq’ reheb’ li Kok’al, 66). K’a’ru naxk’ut li b’ich chirix k’a’ut naq neke’qil li loq’laj hu?

Jose Smith—Resilal 1:10–17

Lin Choxahil Yuwa’ narab’iheb’ ut naxsumeheb’ lin tij.

• Re xtikib’ankil aatinak chirix chan ru noko’aatinak rik’in li qaChoxahil Yuwa’, maare laa’at ut eb’ laa kok’al naru nekexpatz’ok, maare rik’in jun ch’ina esil, jun b’oqok sa’ b’oqleb’ ch’iich’, malaj junaq hu tz’iib’anb’il chi uq’ej. Chan ru nokopatz’ok chiru li qaChoxahil Yuwa’? Chan ru naqak’ut chiru naq naqara ut naqoxloq’i sa’eb’ li qatij? Ilomaq Jose Smith—Resilal 1:16–19 ut aatinanqex chirix chan ru naq li qaChoxahil Yuwa’ kixsume lix tij laj Jose Smith. Chirix a’an, laa’at ut eb’ laa kok’al naru nekewotz eenumsihom chirix jun hoonal b’ar wi’ kepatz’ eetenq’ re li Dios ut kek’ul eesumenkil.

Jose Smith—Resilal 1:17–19

Laj Jose Smith kiril li qaChoxahil Yuwa’ ut li Jesukristo

• Eb’ li kok’al toj kok’eb’ naru neke’saho’ xch’ool wi neke’tz’aqon chi xaqxo ut chi ye’yookeb’ li ruq’ jo’ jun li che’ sa’ li loq’laj k’iche’ naq yooqat chiraatinankileb’ chirix li Xb’een K’utb’esink. Patz’ reheb’ li kok’al naq te’reek’asi rib’ chanchan ta wi’ naq yookeb’ chi eek’asiik xb’aan li iq’ naq yooqat chi aatinak chirix naq kitijok laj Jose. Chirix a’an patz’ reheb’ naq te’kanaaq chi ch’anch’o sa’ li hoonal naq taaye reheb’ naq li qaChoxahil Yuwa’ ut li Jesus ke’xk’utb’esi rib’ chiru laj Jose.

• Eb’ li kok’al ak ninqeb’ naru neke’saho’ xch’ool chiroksinkil jun malaj wiib’ oxib’ chi jalam-uuch li wankeb’ sa’ li tusleb’ aatin a’in re te’xye aawe k’a’ru neke’xnaw chirix li Xb’een K’utb’esink. Waklesi xch’ooleb’ chirilb’al Jose Smith—Resilal 1:14–17 ut chixwotzb’al lix k’a’uxleb’ ut reek’ahomeb’ chirix li k’a’ru kixnumsi laj Jose (chi’ilmanq ajwi’ “Ch’ol 2: Li Xb’een K’utb’esink re laj Jose Smith,” sa’ Eb’ li Esilal sa’ li Tzol’leb’ ut Sumwank, 9–12, malaj li video sa’ li Biblioteca del Evangelio).

  Chapter 2: Joseph Smith’s First Vision: 1820

Re xtawb’al xkomon chik li na’leb’, chi’ilmanq li hu Amigos re li po a’in.

K’ojob’anb’il yaal, xb’aan laj Leon Parson