Firikgong 13–19: “Ka bona Mosepuri wa Lesedi’: Joseph Smith—Ditso 1:1–26,” Tlayang, Ntshalang Morago—Ya Lelwapa le Kereke: Dithuto le Dikgolagano 2025 (2025)
Joseph Smith—Ditso 1:1–26,” Tlayang, Ntshalang Morago—Ya Legae le Kereke: 2025
Sekgwa se se Boitshepo, ka Greg Olsen
Firikgong 13–19: “Ka bona Mosepuri wa Lesedi”
Joseph Smith—Ditso 1: 1– 26
O ka nna wa re Dithuto le Dikgolagano ke lokwalo lwa dikarabo tsa dithapelo: ditshenolo tse dintsi tse di boitshepo mo lokwalong lena di tlile mo karobong ya dipotso. Potso e e neng ya simolola tsotlhe—e e neng ya tsosa kgoromeletso ya tshenolo ya malatsi a bofelo—e ne ya botswa ke mosimane wa dingwaga di le 14. “Ntwa ya mafoko le pharologano ya megopolo” (Joseph Smith—Ditso 1:10) e ne ya tlogela Joseph Smith a tsietsega ka ga tumelo le kamano ya gagwe le Modimo. Gongwe o ka tsamaisana le seo. Re bona megopolo e mentsi e e ganetsanang le mantswe a tlhotlheletso mo motlheng wa rona. Fa re batla go tlhatlhoba melaetsa ena mme ra bona boammaaruri, re ka dira se Joseph a neng a se dira. Re ka botsa dipotso, ra ithutuntsha dikwalo tse di boitshepo, ra tlhatlhanya, mme kwa bofelong ra botsa Modimo. Mo karabong ya ga Joseph Smith, mosepuri wa lesedi o ne wa fologa go tswa legodimong. Modimo Rara le Jeso Keresete ba ne ba bonala mme ba araba dipotso tsa gagwe. Bopaki jwa ga Joseph jwa maitemogelo ao a a gakgamatsang a bolela ka bopelokgale gore mongwe le mongwe “yo o [tlhokang] botlhale o ka botsa Modimo, mme a amogela” (Joseph Smith—Ditso 1:26). Rotlhe re ka amogela, fa e se ponatshegelo ya selegodimo, bonyenyane jwa ponatshegelo e e tlhaloganyegang, e e sedifaditsweng ke lesedi la selegodimo.
Megopolo ya go Ithuta kwa Gae le kwa Kerekeng
Joseph Smith ke moperofeti wa Tsosoloso.
Boikaelelo jwa ditso tsa ga Joseph Smith e ne e le go re baya “go rua boammaaruri” gonne boammaaruri ka ga Joseph gantsi bo ne bo fetolwa (Joseph Smith—Ditso 1:1 Fa o bala Joseph Smith—History 1:1–26, ke eng se se thatafatsang bopaki jwa gago ka pitso ya gagwe ya selegodimo?
Bona le gone Saints, 1:3–19.
Ke ka amogela jang dikarabo tsa dithapelo tsa me?
A o kile ka gope wa “tlhoka botlhale” kgotsa wa ikutlwa o tsietsega ka ga tshwetso e o ne o tlhoka go e dira? (Joseph Smith—Ditso 1:13). Maitemogelo a Joseph Smith a nnileng le one ka 1820 a ka dira jaaka sekao se se molemo sa tshenolo ya gago ka sebele. Sekai, fa o batla Joseph Smith—Ditso 1:5–25, batla maitemogelo a o ka tsamaisanang le one. O ithuta eng ka:
-
Joseph o ne a ipaakanyetsa maitemogelo a a boitshepo a thapelo jang? (Bona ditemana 8, 11, 14–15).
-
Tiro ya go ithutuntsha dikwalo mo go batleng tshenolo? (bona ditemana 11–12).
-
Se o ka se dira fa o lebagane le kganetso? (bona ditemana 15–16, 21–26).
-
Go amogela le go tsaya kgato mo dikarabong tse o di amogelang? (bona verses 18–25).
Laletsa go abelana. Go hokutsa dikwalo go laletsa ditlhotlheletso go tswa mo Moweng o o Boitshepo. Go abelana ditlhotlheletso tse go ka laletsa Mowa o o Boitshepo go paka mo go ba bangwe, le motho yo o abelanang.
Ke ditshedimosetso tlaleletso dife tse dingwe tse o ka di bonang mo mokwalaneng wa ga Poresidente Henry B. Eyring “The First Vision: A Pattern for Personal Revelation”? (Liahona, Tlhakole. 2020, 12–17).
O ka batla le gone dikai tse dingwe mo dikwalong tsa batho ba buisana le Modimo. Ditshwantsho mo Gospel Art Book kgotsa dibuka tse dingwe tsa Tlayang, Ntshalang Morago di ka go neela megopolo. Leka go araba dipotso tse di nankotsweng pele ka sekai sengwe le sengwe o se bonang. Ke maitemogelo afe a o nnileng le one fa o amogela dikarabo tsa thapelo? O ka dira eng go thusa ba bangwe go nna le maitemogelo a a molemo le bone?
Bona le gone Russell M. Nelson, “Hear Him,” Liahona, Motsheganong 2020, 88–92; Ditlhogo le Dipotso, “Tshenolo ya Motho,” Motlobo wa Efangele.
Joseph Smith o bone Modimo Rara le Morwa wa Gagwe, Jeso Keresete.
Joseph Smith o ne a tshephile gore Modimo o tlaa araba thapelo ya gagwe, mme o ne a sa solofela ka fa karabo eo e neng e tlaa fetola botshelo jwa gagwe—le lefatshe. Jaaka o bala ka maitemogelo a ga Joseph, tlhatlhanya ka fa maduo a Ponatshegelo ya Ntlha e fetotseng botshelo jwa gago.
Sekai, Ponatshegelo ya Ntlha e senotse boammaaruri jo bo mmalwa ka Modimo Rara le Morwa wa Gagwe, Jeso Keresete, jo bo neng bo farologanye le seo se batho ba bantsi ka motlha wa ga Joseph ba neng ba se dumela. Jaaka o bala Joseph Smith—Ditso 1:15–20, akanyetsa go kwala ka ditsela tse di farologanyeng go wetsa polelo e tshwanang le ena: “Gonne Ponatshegelo ya Ntlha e diragetse, ke itse gore …”
O nna le maikutlo a fe jaaka o tlhatlhanya ka maitemogelo a ga Joseph le sengwe le sengwe se se neng sa tswa mo go one?
Bona le gone “Kopang Modimo: Ponatshegelo ya Ntlha ya ga Joseph Smith” (setshwantsho sa motsikinyego), Motlobo wa Efangele; “Thapelo ya Ntlha ya ga Joseph Smith,” Difela, no. 26.
Ask of God: Joseph Smith's First Vision
Short film produced for the Church History Museum depicting Joseph Smith's First Vision, including details drawn from each of Joseph Smith's accounts.
Ntlha go tswa mo If Any of You Lack Wisdom, ka Walter Rane
Ke eng go na le dipego tse di farologanyeng tsa Ponatshegelo ya Ntlha?
Ka nako ya botshelo jwa gagwe, Joseph Smith o ne a kwala maitemogelo a gagwe mo Sekgweng se se Boitshepo ka bobotlana jwa makgetho a mane, gantsi a dirisa mokwadi. Mo tlaleletsong, dipolelo tse di mmalwa di kwadilwe ke batho ba bangwe ba ba utlwileng Joseph a bua ka ga ponatshegelo ya gagwe. Le ntswa dipego tsena di farologana mo dintlheng tse dingwe, di ikaegile ka mokwadi, moreetsi, le maemo, go seng jalo di a tshwana. Mme pego e nngwe le e nngwe e oketsa dintlha tse di re thusang botoka go tlhaloganya maitemogelo a ga Joseph Smith, fela jaaka e nngwe le e nngwe ya diefangele tse nne tsa kgolagano e ntsha di re thusa botoka go tlhaloganya tirelo ya Mmoloki.
Bona le gone Ditlhogo le Dipotso,“First Vision Accounts,” Motlobo wa Efangele.
Nka nna boammaaruri mo go se ke se itseng, le fa ba bangwe ba nkgana.
Morago ga Ponatshegelo ya Ntlha e e sa tlwaelesegang, Joseph Smith ka tlholego o ne a batla go abelana maitemogelo a gagwe le ba bangwe. Kganetso e a neng a lebagana le yone e ne ya mo gakgamatsa. Fa o bala polelo ya gagwe, ke eng se se go tlhotlheletsang gore o nne o le boammaaruri mo bopaking jwa gago? Ke dikai dife tse dingwe—go tswa mo dikwalong, mogologolwane, kgotsa batho ba o ba itseng—tse di go neelang kgothatso go nna o le boammaaruri mo maitemogelong a semowa a o nnileng le one?
Bona le gone Gary E. Stevenson, “Nourishing and Bearing Your Testimony,” Liahona, Ngwanatsele 2022, 111–14.
Ka ga megopolo e mentsi, bona dikgatiso tsa kgwedi e tsa Liahona le Go Nonofo ya Banana dimakasine.
Megopolo ya go Ruta Bana
Joseph Smith o ne a baakanyeditswe go nna moperofeti wa Modimo.
-
Go ithuta ka bonana jwa ga Joseph Smith go ka thusa bana ba gago go tsamaisana le ene fa ba ntse ba ithuta go tswa mo maitemogelong a gagwe. Gongwe ba ka tshwara setshwantsho sa ga Joseph Smith mme ba abelana se ba se itseng ka ene. Fa go tlhokega, o ka oketsa dintlha tsa nnete tse dingwe ka ga ene go tswa mo Joseph Smith—Ditso 1:3–14 (bona le gone “Chapter 1: Joseph Smith and His Family,” mo Dipolelong tsa Dithuto le Dikgolagano, 6–8, kgotsa setshwantsho sa motsikinyego se se tsamaelanang le tsone mo Motlobong wa Efangele). Ke eng se Joseph a se itemogetseng se se neng sa mo thusa go mmaakanyetsa gore a nne moperofeti? Ke eng se Modimo a ka tswang a re baakanyetsa go se dira?
1:59Chapter 1: Joseph Smith and His Family: 1805–1820
Ntlha go tswa mo Ponatshegelong ya Ntlha ya ga Joseph Smith, ka Greg Olsen
Modimo o ka araba dipotso tsa me ka dikwalo.
-
Akanyetsa go bontsha bana ba gago dibuka tse di farologanyeng go akaretsa le dikwalo . Ba thuse go akanya ka dipotso tse dibuka tsena di ka di arabang. Ke gone le ka balang mmogo Joseph Smith—Ditso 1:10–11 go bona gore ke dipotso dife tseo Joseph Smith a neng a na le tsone le gore ke dikarabo dife tse a di fitlhetseng mo dikwalong.
-
Bana ba gago ba ka tswa ba kgona go bona mafoko mo temana 12 a a tlhalosang ka fa go bala Jakobe 1:5 go neng ga ama Joseph teng. Ke gone lo ka abelelana maitemogelo a mo go one temana ya lokwalo e nnileng le tlhotlheletso e e maatla mo go lona. Le gone lo ka opela mmogo pina ka go bala dikwalo tse di boitshepo, jaaka “Search, Ponder, and Pray” (Children’s Songbook, 109). Pina e ruta eng ka ga gore ke ka ntlha ya eng re bala dikwalo?
Rara wa Legodimo o a utlwa ebile o araba dithapelo tsa me.
-
Go simolola puisano ya ka fa re buisanang le Rara wa Legodimo ka teng, gongwe wena le bana ba gago le ka botsana dipotso lo dirisa mekgwa e e farologanyeng ya puisano, jaaka molaetsa wa mokwalo wa selefouno, go letsa founo, kgotsa molaetsa o o kwadilweng ka seatla. Re botsa Rara wa Legodimo dipotso jang? Re Mo supegetsa jang gore re a mo rata ebile re a Mo tlotla mo dithapelong tsa rona? Balang mmogo Joseph Smith—Ditso 1:16–19 mme le buisane ka fa Rara wa Legodimo a arabileng thapelo ya ga Joseph Smith ka teng. Wena le bana ba gago ke gone le ka abelelana maitemogelo fa le ne le kopa thuso mo Modimong mme la amogela karabo.
Joseph Smith o bone Rara wa Legodimo le Morwa wa Gagwe, Jeso Keresete.
-
Bana ba bannyennyane ba ka itumelela go ema ba otlolotse diatla ba itira ekete ke ditlhare mo sekgweng se se Boitshepho fa o ntse o ba bolelela ka Ponatshegelo ya Ntlha. Kopa bana go tshikinyega jaaka ekete ba fokwa ke phefo fa o ntse o bua ka Joseph a rapela. Ke gone ba kope go ema fela mme ba didimale fa o ba bolelela gore Rara wa Legodimo le Jeso ba ne ba iponatsa kwa go Joseph.
-
Bana ba bagolwane ba ka itumelela go dirisa setshwantsho se le se nngwe kgotsa go feta mo tshobokong ena go go bolelela se ba se itseng ka Ponatshegelo ya Ntlha. Ba kgothaletse go bua ka Joseph Smith—Ditso 1:14–17 le go abelana dikakanyo tsa bone le maikutlo a bone ka maitemogelo a ga Joseph (bona le gone “Kgaolo 2: Ponatshegelo ya Ntlha ya ga Joseph Smith,” mo Dipolelong tsa Dithuto le Dikgolagano, 9–12, kgotsa setshwantsho sa motsikenyego se se tsamaelanang le tsone mo Motlobong wa Efangele).
2:19Chapter 2: Joseph Smith’s First Vision: 1820
Ka ga megopolo e mentsi, bona kgatiso ya kgwedi e ya Friend makasine.
Boammaaruri jo bo Tsosolisitsweng, ka Leon Parson