“Ainikien ko an Jepļaaktok eo: Baam̧le eo an Josep Smith,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Baam̧le eo an Josep Smith,” Itok, Ļoor Eō—N̄an M̧weeo im Kabun̄ in: 2025
Ainikien ko an Jepļaaktok eo
Baam̧le eo an Josep Smith
Mour an baam̧le ko ad relukkuun jelōt kōj kajjojo, im ejjeļo̧k oktak jān Josep Smith. Tōmak im katak ko an ro jinen im jemān rekar katok ine in tōmak ko me ekar kōm̧m̧an bwe Jepļaaktok eo en bōk jikin. Jōnaļ eo an Josep ej jeje naan in: “Naan ko im kajin [rej] jab bwe n̄an kam̧m̧olool Anij ilo an kar letok n̄an eō ro jinō im jema reutiej.”
Naan eo tok juon jān jinen, Lucy Mack Smith; būratōr eo an William Smith; im Rikanaan eo make ekar letok n̄an kōj jidikin im̧we in Kabun̄-jar ilo m̧weeo imōn Smith.
Baam̧le eo an Josep Smith, jān Dan Baxter
Lucy Mack Smith
“[Ilo iturinļo̧k 1802 eo], Ikar jino nan̄inmej. … Ikar ba n̄an n̄a make, Ijjab pojak n̄an mej bwe ijjab jeļā wāween ko an Kraist, im āinwōt ilo aō kalimjōke āinwōt ekar wōr juon marok im ajimakeke ikōtaaō make im Kraist me ikar jab kajjieon̄ kijone. …
“Ikar reilo̧k n̄an Irooj im kar akweļap im jabaneejej ippān irooj bwe en dāpij mour eo aō bwe in maron̄ karrūtoļo̧k ajri ro nejū im kaenōm̧m̧an būruōn ļeo pāleō; kōn menin ij babu aolepān bon̄ōn eo. … Ikar kallim̧ūr ippān Anij [bwe] eļan̄n̄e enaaj kōtļo̧k eō bwe in mour inaaj kate eō bwe in pukōt kabun̄ eo me enaaj kamaron̄ eō bwe en jim̧we aō jerbal n̄an e, men̄e ekar pād ilo Baibōļ ak jabdewōt ijoko epād ie, men̄e ekar bōke jān lan̄ kōn jar im tōmak. Ilo jem̧ļo̧kin, juon ainikien ekar kōnono n̄an eō im ba, ‘Kappukōt im kwonaaj lo, kōlaļlaļ im enaaj pelļo̧k n̄an eok. Kōtļo̧k bwe buruōm en aenōm̧m̧an. Kwoj tōmak ilo Anij; tōmak barāinwōt ilo n̄a.’ …
“Jān iien eo m̧aantak ikar bōk kajoor ejjeļo̧k jem̧ļo̧kin. Ikar kōnono jidik kōn kabun̄ men̄e ekar kobrak aolepān kōļmenļo̧kjeņ eo aō, im ikar ļōmņak bwe inaaj kōm̧m̧ane aolep men ko retiljek ālkin wōt aō kar kappukōt jet iaan armej ro retiljek ro rekar jeļā wāween ko an Anij n̄an katakin eō men ko an Lan̄.”
William Smith
“Jinō, eo ekar lukkuun wūjlepļo̧k an ilo kabun̄ im eļap an itok limo ilo mour an ajri ro nejin, jimor kiiō im ālkin mour in, ekar kōm̧m̧ani aolep men ko emaron̄e kōn iakwe an juon mama, n̄an kōm̧m̧an bwe jen bōk koņaad ilo kappukōt n̄an lo̧mo̧o̧ren jetōb ko ad, ak (āinwōt an kar naan eo) ‘n̄an kappukōt kabun̄ eo.’ Ekar kipel er n̄an pād ilo iien jar ko im eiten aolepān baam̧le eo rekar itok limoer ilo menin, im ro rej kappukōt m̧ool eo.”
“Aolep iien jej kōm̧m̧an jar an baam̧le jān iien eo imaron̄ kemeemej. Em̧m̧an aō kemeemej jema ke ekkā an likūt mej eo an ilo bōjo̧ in jiln̄ūj eo an, … im n̄e kōm ļaddik ro kōm ej lo an jibwe tok mej eo an, kōm jeļā ke ekar juon kōkaļļe n̄an kōpopo n̄an jar, im n̄e jejjab jeļā jinem̧ ej ikkūr “William’ ak jabdewōt iaam, ‘kōppopo n̄an jar.’ Ālkin jar eo ekar wōr juon al kōm kijon̄ al.”
Josep Sr. im Lucy Smith rekar katakin baam̧le eo aer n̄an ekkatak jeje ko rekwojarjar.
Josep Smith
“Ij ba kiiō, bwe [jema] ejjan̄in kar kōm̧m̧ane juon jerbal enana me emaron̄ kar jab jouj, ilo mour eo an, ilo jeļā e aō. Ikar iakwe jema im an emeemļo̧kjeņ, im emeemļo̧kjeņ in jerbal ko an rem̧m̧an, rej pād ilo kōļmenļo̧kjeņ e aō; im elōn̄ naan in jouj ko an im katakin an juon baba n̄an eō, rej jeje ilo buruō. Rekwojarjar n̄an eō, rej ļōmņak ko me ij kaorōki ilo bwebwenatoon mour eo an, me rej pād ilo kōļmenļo̧kjeņ eo aō im pād wōt ie, jān etale eo aō make jān ke ikar ļotak. … Jinō ekar juon eo ettā, im em̧m̧an tata ilubwiljin aolep kōrā ro.”