Bukwin Wōjke Ko Rekwojarjar, jān Greg Olsen

Jānwōde 13–19: “Iaar Lo Juon Jurōn Meram”

Josep Smith—Bwebwenato 1:1–26

Kwomaron̄ ba bwe Katak in Bujen Ko ej juon bok in uwaak in jar: elōn̄ iaan revelesōn ko rekwojarjar ilo bok in raar itok ilo uwaak in kajjitōk ko. Kajjitōk eo bwe en jino aolep men otemjeļo̧k—juon iien eo ekar jino lutōktok revelesōn ilo raan ko āliktata—kar kajjitōk jān juon ļaddik 14 iiō dettan. Juon “tariņae in naan ko im lim̧otak in ļōmņak kein” (Josep Smith—Bwebwenato 1:10) kar kōm̧m̧an bwe Josep Smith en kar tarpok kōn kabun̄ im kadkad eo an ippān Anij. Bōlen kwomaron̄ en̄jake ejja in wōt. Jej lo elōn̄ ļōmņak ko reidaptōk im ainikien kareel ko ilo tōre in ad. N̄e jej kōņaan etali ennaan kein n̄an pukot m̧ool eo, jemaron̄ kōm̧m̧ane ta eo Josep ekar kōm̧m̧ane. Jemaron̄ kajjitōk kajjitōk ko, ekkatak jeje ko rekwojarjar, kejekļo̧kjeņ, im eļaptata kajjitōk ippān Anij. N̄a uwaake jar eo an Josep, juon jurōn meram ekar wanlaļtak jān lan̄. Anij Jemen im Jisōs Kraist raar waļokļo̧k im kar uwaaki kajjitōk ko an. Naan in kam̧ool eo an Josep kōn en̄jaake in ekabwilōn̄lōn̄ ekar lukkuun alikkar ilo an ba bwe jabdewōt armej “eo ejjeļo̧k an mālōtlōt emaron̄ kajjitōk jān Anij, im bōke” (Josep Smith—Bwebwenato 1:26). Jemaron̄ aolep bōke, eļan̄n̄e ejjab juon visōn jān lan̄, juon visōn eo ealikkar, romaak jān meram in lan̄.

Ļōmnak ko n̄an Ekkatak ilo M̧weeo im ilo Kabun̄ in

Josep Smith—Bwebwenato 1:5–26

Josep Smith ej Rikanaan eo an Jepļaaktok in.

Jibadbad in bwebwenato eo an Josep Smith ekar n̄an likūt kōj “ilo aer bōki m̧ool ko” kōnke m̧ool eo kōn Josep ekkā an jab jim̧we (Josep Smith—Bwebwenato 1:1). Ilo am̧ riiti Josep Smith—Bwebwenato 1:1–26, ta eo ej kōkajoorļo̧k naan in kam̧ool eo an kōn kūr eo an ekwojarjar?

Bar lale Armej ro Rekwojarjar, 1:3–19.

Josep Smith—Bwebwenato 1:5–25

Ekōjkan aō maron̄ bōk uwaak n̄an jar ko aō?

Em̧ōj ke an kar “ejjeļo̧k am̧ mālōtlōt” ak en̄jaake tarpok kōn juon kāālet eo kwaar aikuj kōm̧m̧ane? (Josep Smith—Bwebwenato 1:13). En̄jake eo ekar pād ippān Josep Smith ilo 1820 eo emaron̄ in jerbal āinwōt juon jon̄ak n̄an revelesōn eo am̧ make. N̄an waanjon̄ak, ilo am̧ lin̄ūri Josep Smith—Bwebwenato 1:5–25, pukōt en̄jake ko kwomaron̄ keidi kaki. Ta eo kwoj katak kake:

• Ekōjkan an Josep kar pojak n̄an juon en̄jake ekwojarjar ilo jar? (lale eoon 8, 11, 14–15).

• Jerbal eo an ekkatak jeje ko rekwojarjarj ilo kappok revelesōn? (lale eoon 11–12.

• Ta eo kwoj kōm̧m̧ane n̄e kwoj ioon jum̧ae? (lale eoon 15–16, 21–26).

• Bōke im jerbali uwaak ko kwoj būki? (lale eoon 18–25).

Kajjitōk n̄an kwaļo̧k. Lin̄ūri jeje ko rekwojarjar ej karuwaineneitok im̧we ko jān Jetōb Kwojarjar. Kwaļo̧k im̧we kein emaron̄ karuwaineneik tok Jetōb Kwojarjar n̄an kwaļo̧k kam̧ool n̄an ro jet, barāinwōt n̄an kajjojo armej ro rej kwaļo̧ke.

Ta kōļmenļo̧kjeņ ko jet kwomaron̄ būki jān bwebwenato eo an Būreejtōn Henry B. Eyring “The First Vision: A Pattern for Personal Revelation”? (Liahona, Feb. 2020, 12–17).

Kwomaron̄ barāinwōt kappukōt waanjon̄ak ko jet ilo jeje ko rekwojarjar kōn armej ro rej kōnono ippān Anij. Pija ko ilo Bok In Gospel Pija ak Itok, Ļoor Eō bok ko jet maron̄ lewaj ļōmņak ko. Kajjieon̄ uwaaki kajjitōk ko kar kōllaajraki im̧aanļo̧k n̄an kajjojo waanjon̄ak kwoj loe. Ta en̄jake ko ekar wōr ippam̧ n̄an bōk uwaak ko an jar? Ta eo kwomaron̄ kōm̧m̧ane n̄an jipan̄ ro jet bōk ejja en̄jake ko rem̧m̧an?

Bar lale Russell M. Nelson, “Ron̄jake E,” Liaona, Māe 2020, 88–92; Topics and Questions, “Personal Revelation [Revelesōn An Juon Make],” Gospel Library eo.

Josep Smith—Bwebwenato 1:15–20

Josep Smith ekar lo Anij Jemed im Nejin, Jisōs Kraist.

Josep Smith ekar lōke bwe Anij enaaj kar uwaake jar eo an, ak ekar jab kōtmene ekōjkan an uwaak eo naaj kar ukōt mour eo an—im laļ in. Ilo ami riiti en̄jake eo an Josep, kejekļo̧kjeņ ekōjkan an Visōn Eo M̧oktata kar ukōt mour eo am̧.

N̄an waanjon̄ak, Visōn Eo M̧oktata ekar kwaļo̧k jejjo m̧ool ko kōn Anij Jemen im Nejin, Jisōs Kraist, bwe raar oktak jān ta eo elōn̄ armej ro ilo tōre eo an Josep raar tōmak. Ilo ami riiti Josep Smith—Bwebwenato 1:15–20, ļōmņak in je wāween ko rooktak jān doon n̄an kadedeļo̧k juon ennaan āinwōt in: “Kōn wōt Visōn Eo M̧oktata ekar waļo̧k, Ijeļā bwe …”

Ta en̄jake ko ewōr ippam̧ ilo am̧ kejekļo̧kjeņ kōn en̄jake eo an Josep im aolep men me raar waļo̧k kōn e?

Bar lale “Ask of God: Joseph Smith’s First Vision” (video), Gospel Library; “Joseph Smith’s First Prayer [Jar eo M̧oktata an Josep Smith],” Hymns, nō. 26.

Kajjitōk ippān Anij: Visōn eo M̧oktata an Josep Smith

Pija eo ekadu kar kōm̧m̧ane n̄an Church History Museum ej kwaļo̧ke pija in Visōn eo M̧oktata an Josep Smith, ekoba meļeļe ko kar letok jān kajjojo bwebwenato ko an Josep Smith.

Meļeļe ko jān Eļan̄n̄e Jabdewōt Iaami Aikuj Māletlet, jān Walter Rane

Josep Smith—Bwebwenato 1:15–20

Etke elōn̄ bwebwenato ko rokotaktak kōn Visōn Eo M̧oktata?

Ilo mour eo an, Josep Smith ekar je en̄jaake eo an ilo Būkwin Wōjke Ekwojarjar emān katten, ekkā an kōjerbal juon rijeje. Ilo kakobaba, jejjo bwebwenato ko me kar je jān armej ro jet me raar ron̄ an Josep kōnono kōn visōn eo an. Men̄e bwebwenato kein rekar oktak ilo jet meļeļe, pedped wōt ioon rijeje eo, riron̄jake, im jikin eo, rej jokkuun wōt juon. Im kajjojo bwebwenato ekoba meļeļe ko me ej jipan̄ kōj meļeļe ļo̧k kōn en̄jake eo an Josep Smith, āinwōt an kajjojo Gospel ko emen an Kallim̧ur Ekāāl jipan̄ kōj em̧m̧anļo̧k ad meļeļe jerbal in karejar eo an Rilo̧mo̧o̧r.

Bar lale opics and Questions, “First Vision Accounts [Bwebwenato eo an Visōn Eo M̧oktata],” Gospel Library eo.

Josep Smith—Bwebwenato 1:21–26

Imaron̄ dāpdep wōt ilo m̧ool in me ijeļā kake, men̄e ro jet rej jum̧ae eō.

Ālkin Visōn Eo M̧oktata an ekabwilōn̄lōn̄, Josep Smith ekar kōņaan kwaļo̧k en̄jake eo an n̄an ro jet. Jum̧ae eo ekar jelm̧ae ekar kailbōk e. Ilo am̧ riiti bwebwenato eo an, ta eo ej im̧we eok n̄an dāpdep wōt ilo m̧ool n̄an naan in kam̧ool eo am̧? Ta waanjon̄ak ko jet—jān jeje ko rekwojarjar, juon rūtto, ak armej ro kwojeļā kajjier—lewaj n̄an eok peran n̄an m̧ool wōt n̄an en̄jake in jetōb ko ekar wōr am̧?

Bar lale Gary E. Stevenson, “Najdik im Kwaļo̧k Naan in Kam̧ool eo Am̧,” Liaona, Nob. 2022, 111–14.

Kōn ļōmņak ko reļļapļo̧k, lale ennaan eo an allōn̄ in an Liaona eo im N̄an Kōkajoorļo̧k Jodikdik ro māākjiin ko.

Ļōmņak ko n̄an Katakin Ajri ro

Josep Smith—Bwebwenato 1:3–14

Josep Smith eaar pojak bwe en juon rikanaan an Anij.

• Katak kōn jodikdik eo an Josep Smith emaron̄ jipan̄ ajri ro nejūm̧ ekkejel n̄an e ilo aer katak kōnn en̄jake ko an. Bōlen remaron̄ jibwe juon pija in Josep Smith im kwaļo̧k ta eo rejeļā kōn e. Eļan̄n̄e emenin aikuj, kwomaron̄ kobaik jet m̧ool ko kōn e jān Josep Smith—Bwebwenato 1:3–14 (bar lale “Jepta 1: Josep Smith im Baam̧le eo An,” ilo Bwebwenato ko an Katak im Bujen Ko, 6–8, ak pija in alooj eo an ilo Gospel Library eo). Ta en̄jake eo an Josep me ekar jipan̄ kōpooj e n̄an erom juon rikanaan? Ta eo Anij emaron̄ kōpooj kōj n̄an kōm̧m̧ane?

  Chapter 1: Joseph Smith and His Family: 1805–1820

Meļeļe ko jān Visōn Eo M̧oktata an Josep Smith, jān Greg Olsen

Josep Smith—Bwebwenato 1:10–13

Anij emaron̄ uwaaki kajjitōk ko aō ilo jeje ko rekwojarjar.

• Ļōmņak in kwaļo̧k n̄an ajri ro nejūm̧ bok ko rooktak jān doon, ekoba jeje ko rekwojarjar. Jipan̄ er ļōmņak kōn kajjitōk ko bok kein remaron̄ uwaak. Innām kom̧ maron̄ riit ippān doon Josep Smith—Bwebwenato 1:10–11 n̄an lale ta eo kajjitōk ko Josep Smith ekar wōr ippān im ta uwaak ko ekar loi ilo jeje ko rekwojarjar

• Ajri ro nejūm̧ remaron̄ in lo naan ko ilo eoon 12 me rej kōmeļeļeik ekōjkan riiti Jemes 1:5 kar jelet Josep. Innām kwomaron̄ kwaļo̧k en̄jake ko ippān doon me juon eoon in jeje ko rekwojarjar ekar wōr juon kareel ekajoor ioom̧. Kwomaron̄ barāinwōt al ippān doon juon al kōn riiti jeje ko rekwojarjar, eo āinwōt “Search, Ponder, and Pray” (Children’s Songbook,109). Ta eo al eo ej katakin kōn etke jej riiti jeje ko rekwojarjar?

Josep Smith—Bwebwenato 1:10–17

Jemedwōj Ilan̄ ej ron̄jake im uwaake jar ko ad.

• N̄an jino juon iien ekōnono kōn ekōjkan ad kōnono ippān Jemedwōj Ilan̄, bōlen kwe im ajri ro nejūm̧ maron̄ kajjitōk ippān doon kajjitōk ko kōjerbal kilen kōnono ko rooktak jān doon, āinwōt juon text message, kūrļo̧k ilo talboon, ak je juon leta. Ekōjkan ad kajjitōk kajjitōk ko n̄an Jemedwōj Ilan̄? Ekōjkan ad kwaļo̧k n̄an E bwe jej iakwe im kautiej E ilo jar ko ad? Riiti ippān doon Josep Smith—Bwebwenato 1:16–19 im ekōnono kōn ekōjkan an Jemedwōj Ilan̄ kar uwake jar eo an Josep Smith. Innām kwe im ajri ro nejūm̧ maron̄ kwaļo̧k en̄jake ko n̄e kwoj kajjitōk ippān Anij kōn jipan̄ im kar bōk uwaak eo.

Josep Smith—Bwebwenato 1:17–19

Josep Smith eaar lo Jemedwōj Ilan̄ im Nejin, Jisōs Kraist.

• Ajri ro reddik remaron̄ m̧ōņōņō in jutak im erļo̧ke peier etan ke rej wōjke ko ilo Bukwin Wōjke ko ilo am̧ jiron̄ er kōn Visōn Eo M̧oktata. Kajjitōk ippān ajri ro n̄an ellāle etan ke rej peļļo̧k kōn kōto ilo am̧ kōnono kōn jar eo an Josep. Innām kajjitōk ippāer n̄an ikōn̄ n̄e kwoj jiron̄ er ilo an waļo̧kļo̧k Jemedwōj Ilan̄ im Jisōs n̄an Josep.

• Ajri ro rūrūttoļo̧k remaron̄ m̧ōņōņō in kōjerbal juon ak elōn̄ļo̧k pija ko ilo unin tōl in n̄an jiron̄ eok ta eo rejeļā kōn Visōn Eo M̧oktata. Kōketak er n̄an lale Josep Smith—Bwebwenato 1:14–17 im n̄an kwaļo̧k ļōmņak ko aer im en̄jake ko kōn en̄jake eo an Josep (bar lale “Jepta 2: Visōn Eo M̧oktata an Josep Smith,” ilo Bwebwenato ko an Katak im Bujen Ko, 9–12, ak pija in alooj eo an ilo Gospel Library eo).

  Chapter 2: Joseph Smith’s First Vision: 1820

N̄an meļeļe ko rellapļo̧k, lale ennaan eo an allōn̄ in an Jera māākjin eo.

Emool Ejepļaaktok, jān Leon Parson