Tijem̧ba 30–Jānwōde 5: “Jepļaaktok eo kar Kallim̧ur kake Ej Wōnm̧aanļo̧k Wōt”

Jepļaaktok eo an Tarlep in Gospel eo an Jisōs Kraist

Ekōjkan am̧ kememe 200 iiō in kar iien eo ekar ukōt laļin? En̄in ej kajjitōk eo me Būreejtōnji eo Kein Kajuon im Doulul eo Jon̄oulruo Rijilōk ro raar kejekļo̧kjeņ kake ke Eprōl 2020 ekar epaaktok, kakōļļeik 200 iiō ko jān Visōn eo M̧oktata an Josep Smith. “Jekar ļōmņak eļan̄n̄e juon kein kakeememej ej aikuj kōm̧m̧an,” Būreejtōn Russell M. Nelson ekar ba. “Ak ke kōm kar ļōmņake bwebwenato in me ej make wōt im eļap an kōm̧m̧an oktak ilo aolep laļ kōn Visōn eo M̧oktata, jekar en̄jake im̧we n̄an ejaake juon kakeememej ejjab kōn ak dōkā ak naan … , ejjab n̄an kōm̧m̧an annan̄ in jeje ioon ‘tebōļ dekā’ ak ilo buruemi ‘tebōļ kanniōk ko’ [2 Korint 3:3]” (“Ron̄jake E,” Liaona, Māe 2020, 90).

Naan in kakeememej ko raar ejaki ej taitōļ “Jepļaaktok eo an Tarlep in Gospel eo an Jisōs Kraist: Juon Naan in Kean̄ n̄an Laļ in Kōn Rūbukwi Iiō in Jepļaaktok eo.” Ejjab baj juon wōt kakōļļe n̄an Visōn eo M̧oktata ak barāinwōt n̄an aolep men Jisōs Kraist ekar kōm̧m̧ani—im ej kōm̧m̧ani wōt—jān tōre eo. Jepļaaktok eo an gospel eo An ekar ijjino ke juon armej ekar oktakļo̧k n̄an Anij im kar ron̄ Ainikien. Ej wōnm̧aanļo̧k wōt ilo ejja wāween eo wōt: juon bōro, juon en̄jake ekwojarjar ilo juon tōre—ekoba ko am̧.

Ļōmņak ko n̄an Ekkatak ilo M̧weeo im Kabun̄ in

“Anij ej iakwe ajri ro Nejin ilo aolepān laļ in.”

Ilo ļōmņak eo am̧, etke juon naan in kean̄ kōn Jepļaaktok eo ej jino kōn juon ennaan kōn iakwe an Anij? Ilo am̧ ekkatak kōn naan in kean̄ eo, kappukōt men ko rej kwaļo̧k iakwe eo an Anij n̄an “ajri ro Nejin ilo aolepān laļ in.” Ekōjkan an Jepļaaktok eo an gospel eo kar jipan̄ eok en̄jake iakwe eo An?

Bar lale Gerrit W. Gong, “Aolep Laļ ko, Bwij ko, im Lo ko,” Liaona, Nob. 2020, 38–41.

Jepļaaktok eo ekar ijjino kōn juon uwaak n̄an juon kajjitōk.

Emaron̄ in ba bwe Rilo̧mo̧o̧r eo ekar jino Jepļaaktok eo an gospel eo An kōn uwaake juon kajjitōk. Ta ennaan eo kwoj en̄jake bwe Naan in Kean̄ kōn Jeptļaaktok eo ewōr an n̄an juon armej kōn kajjitōk ko kōn Anij, gospel eo, ak “lo̧mo̧o̧r n̄an jetōb eo an”? Kwomaron̄ barāinwōt ekkatak Josep Smith—Bwebwenato 1:5–20 n̄an lo ta eo kwomaron̄ ekkatak jān Josep Smith n̄an pukōt uwaak ko n̄an kajjitōk ko an gospel in.

Bar lale Unin Kōnono ko im Kajjitōk ko, “Kappukōt Uwaak ko,” Gospel Library eo.

Kōmeļeļe ko Kōņaan ko an Būruwō, jān Walter Rane

Jisōs Kraist ekar kōjepļaaktok Kabun̄ eo An.

Ta eo kwojeļā kōn “Kabun̄ eo an Kraist ilo Kallim̧ur Ekāāl,” eo Rilo̧mo̧o̧r ekar kōjepļaaktok kōn Josep Smith? Ļōmņak in ekkatak eoon kein im kōllaajrak jet iaan paotok ko an Kabun̄ eo An:

• Matu 16:15–19

• Mark 16:15–18

• Luk 6:12–13

• Jerbal 4:34–35

• 1 Korint 15:29

• Epesōs 4:11–15

Eo tok juon, kwomaron̄ kajetjet eoon ko itulōn̄ ippān ko itulaļ, eo ej kōmeļeļeik ekōjkan an Jisōs Kraist kar kōjepļaaktok paotok ko an Kabun̄ eo An kōn Josep Smith

• Katak im Bujen Ko 18:37–38; 107:23–24

• Katak im Bujen Ko 51:3; 70:14

• Katak im Bujen Ko 84:64–72

• Katak im Bujen Ko 110:11–16

• Katak im Bujen Ko 124:31, 36

• Laajrak in Tōmak Ko 1:6

Etke kwoj kam̧m̧oolol kōn Jepļaaktok eo an gospel eo an Jisōs Kraist?

Elder Jeffrey R. Holland im lio pāleen raar kajjieon̄ in pijaikļo̧k ekōjkan aer naaj kar en̄jake mour m̧okta jān an Kabun̄ kar jepļaaktok. “Ta eo jen kar kōņaan?” raar kajjitōk ippāer make. Riit kōn en̄jake ko aer ilo “Juon Kōjatdikdik Emeram” (Liaona, Māe 2020, 81–82). Ekōjkan an Jepļaaktok eo kar jipan̄ kakūrm̧ool kōjatdikdik in jetōb ko am̧?

Bar lale Topics and Questions, “Bun̄ Jān Tōmak im Jepļaaktok eo an Gospel eo,” Gospel Library eo.

“Jepļaaktok eo kar kallim̧ur kake ej wōnm̧aanļo̧k wōt.”

Kwonan̄in ke kar ļōmņak kōn kwe make āinwōt m̧ōttan Jepļaaktok eo an gospel in? Ļōmņak kōn naan kein jān Būreejtōn Dieter F. Uchtdorf: “Jet iien jej ļōmņak kōn Jepļaaktok eo an gospel eo āinwōt juon men me ededeļo̧k, epād itulikiid kadede. … Ilo m̧ool, Jepļaaktok eo ej juon jebal ej wōnm̧aanļo̧k wōt; jej mour ilowaan kiiō” (“Kwoj Ke Bōk Koņaam̧ ilo Jerbal eo an Jepļaaktok eo?,” Liaona, Māe 2014, 59).

Ilo am̧ m̧aanjabpopo n̄an ekkatak ekōjkan an gospel eo kar jepļaaktok ilo 1800 ko, kwomaron̄ jino ļōmņak ekōjkan an jepļaakwaj ilo mour eo am̧. Riiti Naan in kean̄ an jepļaaktok eo kōn kajjitōk ko āinwōt kein ilo ļōmņak: Ekōjkan aō itok n̄an jeļā bwe menin ej m̧ool? Ekōjkan aō bōk koņaō ilo Jepļaaktok eo rainin?

“Lan̄ ko rebar peļļo̧k.”

Ta meļeļe in naan eo “Lan̄ ko rej bar juon alen peļļok” n̄an kwe? Ta m̧ool eo kwoj loe—ilo Naan in kean̄ an jepļaaktok eo, ilo Kabun̄ in rainin, ilo jeje ko rekwojarjar, im ilo mour eo am̧—bwe lan̄ ko ilo m̧ool repeļļo̧k?

Kwomaron̄ barāinwōt kobaik “The Morning Breaks” (Hymns, nō. 1) ejja m̧ōttan ekkatak eo am̧. Ta eo kwoj loe ilo al in me ej kobaikwaj n̄an meļeļe eo am̧ kōn naan eo “lan̄ ko repeļļo̧k”?

Bar lale Quentin L. Cook, “Kōjeraam̧m̧an eo itok jān an Revelesōn Wōnm̧aanļo̧k Wōt n̄an Rikanaan ro im Revelesōn ko ad Make n̄an Tōl Mour ko Ad,” Liaona, Māe 2020, 96–100.

Katak ippān doon. Būreejtōn Nelson ekar karuwaineneik kōj n̄an “ekkatak [Naan in kean̄ an jepļaaktok eo] ippād make im ippān baam̧le ko [ad] im ro m̧ōttad” (“Ron̄jake E,” 92). Ļōmņak ekōjkan am̧ maron̄ kobaik ro jet ilo am̧ ekkatak.

N̄an elōn̄ļo̧k ļōmņak ko, lale ennaan eo an allōn̄ in ilo Liaona eo im N̄an Kōkajoorļo̧k Jodikdik ro māākjiin ko.

Ļōmņak ko n̄an Katakin Ajri ro

“Kōmij kean̄.”

• Ilo am̧ riiti m̧ōttan ko an Naan in kean̄ Kōn jepļaaktok Eo eo ippān ajri ro nejūm̧ (ak alooje pija in alooj eo an Būreejtōn Nelson riiti), jipan̄ er lo jāntōj ko me rej ijjino kōn naan ko āinwōt “kōmij kean̄,” “kōmij kwaļo̧k,” ak “kōmij kam̧ool.” Ta m̧ool ko rikanaan ro ad im rijilōk ro ad rej kwaļo̧k? Bōlen kwe im ajri ro nejūm maron̄ kwaļo̧k naan in kam̧ool ko ami make kōn jet iaan m̧ool kein.

  The Restoration of the Fulness of the Gospel of Jesus Christ

  President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.

“Josep Smith … ekar wōr an kajjitōk.”

• Emaron̄ in kaitoktok limo n̄an ajri ro nejūm̧ n̄an etale jet iaan kajjitōk ko Josep Smith ekar wōr ippān me ekar tōlļo̧k n̄an Jepļaaktok eo an gospel eo an Rilo̧mo̧o̧r. Jipan̄ er lo jet iaan waanjon̄ak ko ilo Josep Smith—Bwebwenato 1: 10, 29, 68. Ekōjkan ad jeraam̧m̧an rainin kōnke Anij ekar uwaaki kajjitōk ko an Josep Smith?

• Kwomaron̄ barāinwōt leļo̧k n̄an ajri ro nejūm̧ juon iien n̄an kōnono kōn kajjitōk ko ewōr ippāer. Ta eo jej katak jān Josep Smith wāween pukot uwaak ko? (lale Josep Smith—Bwebwenato 1:8–17; bar lale eoon 3 im 4 in “This Is My Beloved Son,” Children’s Songbook, 76).

“Ribōkto bōktak enaan eo ekar itok n̄an katakin Josep.”

• Wōn ro raar “ribōkto bōktak ennaan [me] raar itok n̄an katakin Josep”? Ajri ro nejūm̧ remaron̄ em̧ōņōņō ilo kappukōt pija ko pijaier ilo Bok In Gospel Pija (lale nō. ko. 91, 93, 94, 95). Ekōjkan an kajjojo ribōkto bōktak ennaan rein jipan̄ “bar-kajutak Kabun̄ eo an Jisōs Kraist”? Eoon ko kar elmakoti ilo peij in m̧akūtkūt eo an wiik in emaron̄ jipan̄ ajri ro nejūm̧ uwaake kajjitōk in.

Jisōs Kraist ekar kōjpeļaaktok Kabun̄ eo An.

• Ekōjkan am̧ maron̄ jipan̄ ajri ro nejūm̧ meļeļe ta meļeļe in an Kabun̄ eo an Rilo̧mo̧o̧r kar jepļaaktok? Bōlen remaron̄ kalōk juon tawōr kōn būļak ko ak kab ko im “bar kōro̧o̧ltok,” ak bar kalōk e. Ak, eļan̄n̄e ajri ro nejūm̧ rekar tōn bar bōk jikin juon men kōnke ekar jako ak jorrāān, kwomaron̄ keidi en̄jake jab in ilo an Rilo̧mo̧o̧r eo kōjepļaaktok Kabun̄ eo An. Jipan̄ er kappukōt men ko rejenolo̧k kar kōnono kaki ilo Naan in kean̄ kōn jepļaaktok eo me Rilo̧mo̧o̧r ekar kōjepļaaktok.

“Lan̄ ko rebar peļļok.”

• N̄an kōmeļeļeik ta meļeļe in naan eo “lan̄ ko rej bar juon alen peļļok,” bōlen kwomaron̄ kwaļo̧k juon ennaan n̄an ajri ro nejūm̧, m̧okta itulikin juon kōjām ekilōk innām ilo kōjām eo epeļļo̧k. Kōm̧m̧an bwe ren bōk kūņaer kwaļo̧k bar juon ennaan. Ta ennaan ko Jisōs Kraist ewōr ippān n̄an kōj? Ta en̄jake ko raar jipan̄ kōj jeļā bwe lan̄ ko rej peļļo̧k n̄an kōj?

N̄an ļōmņak ko reļļapļo̧k, lale ennaan eo an allōn̄ in an Jera māākjin eo.