Najdik im Kwaļo̧k Naan in Kam̧ool eo Am̧
Ij karuwainene eok n̄an pukōt iien ko rem̧m̧an n̄an kwaļo̧k naan in kam̧ool eo am̧ ilo naan im ilo jerbal.
Kadkad In
Iien ko raorōk ilo mour emakijkij aer itok im jab kōtmene, jekdo̧o̧n n̄e kwoj dik wōt. Kōtļo̧k bwe in kwaļo̧k juon bwebwenato kōn juon rijikuuļ in high school, kar kaālet n̄an ilo̧k itulikin state eo an n̄an juon iien katak kilen tōl an rijikuuļ, āinwōt kar ba ilo naan ko an make.
“Iien eo aō ekar itok ilo lain eo, im eo me āinwōt register clerk ekar kajjitōk eta. Liin ekar lale laajrak eo an im ba, ‘Ekwe kwoj likao eo jān Utah.’
“‘Kwon ba n̄a wōt juon ke?’ Iaar kajjitōk.
“‘Aaet, kwoj make wōt.’ Liin ekar letok name tag eo aō kōn ‘Utah’ kar je iutlaļ in eta. Ke ikar kōļaak, ikar en̄jake āinwōt em̧ōj kar kakōļļeik n̄a.
“Ikar kukļo̧k n̄an lowaan elevator eo an hotel eo ippān bar ļalem rijkuuļ in high school kōn name tag ko aer āinwōt eo aō. ‘A, kwoj jān Utah. Kwoj juon Mormon?’ juon rijikuuļ ekar kajjitōk.
“Ikar en̄jake ebōd ijo ipād ie ippān aolep rijikuuļ ritōl rein jān aolepān aelōn̄ eo. ‘Aaet,’ Ikar pere ilo aō kwaļo̧k.
“‘Kwoj ro me rej tōmak ilo Josep Smith, eo ekar ba ekar lo enjeļ ro. Kwojjab lukkuun tōmak menin, kwoj ke?’
“Ikar jab jeļā ta eo n̄an ba. Rijikuuļ ro ilo elevator ro raar aolep jino kalimjōk n̄a. Ij kab jikrōkļo̧k, im aolep rekar kadede ļōmņak ikar oktak. Ikar jino kajekdoon jidik innām kar ba, ‘Ijeļā bwe Josep Smith ekar juon rikanaan an Anij.’
“Ia in men in ekar itok jāne?’ Ikar ļōmņak. Ikar jab jeļā ewōr ilo n̄a. Ak naan ko kar en̄jaki rem̧ool.
“‘Aaet, kar jiron̄ eō bwe eļap ami bōk ami iien ilo kabun̄ n̄e,’ ekar ba.
“Kōn menin, ekar wōr juon ikōn̄ eo ejjab em̧m̧an ke kōjām in elevator ekar peļļo̧k. Ke kōm kar ain luggage ko am, laddik in ekar etetalļo̧k ilo hall eo ilo an ettōn̄.
“Innām, juon ainikien itulikū ekar kajjitōk ippa, ‘A, Mormon ro ewōr jet kain aer bar Baibōļ?’
“Ekwe inak. Jab mōk ba bar iien. Ikar oktaklikļo̧k n̄an lo bar juon rijikuuļ eo ekar pād ilo elevator eo ippa, Christopher.
“‘Ej ņa etan Bok in Mormon,’ Ikar ba, ilo aō kōņaan joļo̧k unin kōnono eo. Ikar bōk pāāk ko aō im jino etetal laļļo̧k ilo hall eo.
“‘Ej ke bok eo Josep Smith ekar ukōte?’ ekar kajjitōk.
“‘Aaet, en̄n̄e,’ ikar uwaak. Ikar etetal laļļo̧k wōt, kōjatdikdik n̄an jab kōm̧m̧an kajookok.
“‘Ekwe, kwojeļā ke ekōjkan aō maron̄ bōk juon?’
“Juon eoon ikar ekkatak ilo jemenere em̧ōkaj an jiktok ippa. “Ijjab jook kōn gospel eo an Jisōs Kraist.’1 Ilo an men in deļo̧n̄e ļōmņak eo aō, ikar en̄jake jook kōn ao kar āliklik.
“Ilo aolepān wiik eo eoon jab in ekar jab jako jān n̄a. Ikar uwaake lōn̄ in kajjitōk ko kōn Kabun̄ in jon̄an wōt aō maron̄, im ikar kōm̧m̧an elōn̄ m̧ōtta.
“Ikar jeļā bwe ikar kauteij kabun̄ eo aō.
“Ikar leļo̧k n̄an Christopher juon Bok in Mormon. Ekar tokālik jeje n̄an n̄a, ba n̄a iō bwe ekar karuwainene mijenede ro n̄an mweo im̧ōn.
“Ikar ekkatak bwe in jab āliklik n̄an kwaļo̧k naan in kam̧ool eo aō.”2
Ij ketak kōn peran eo an Kevin ilo kwaļo̧k naan in kam̧ool eo an. Ej peran eo āliji raan otemjej jān membōr ro retiljek an Kabun̄ in aolepān laļ in. Ilo aō kwaļo̧k ļōmņak ko aō, ij kajjitōk ippāmi n̄an kejekļo̧kjeņ kōn kajjitōk kein:
-
Ijeļā ke im meļeļe ta in naan in kam̧ool?
-
Ijeļā ke ekōjkan kwaļo̧k naan in kam̧ool eo aō?
-
Ta menin kabbōjrak ko ilo kwaļo̧k naan in kam̧ool eo aō?
-
Ekōjkan aō dāpij naan in kam̧ool eo aō?
Ijeļā ke im Imeļeļe ke Ta in Naan in Kam̧ool?
Naan in kam̧ool eo am̧ ej juon m̧weiūm̧ ekanooj aorōk, emakijkij an koba ippān en̄jake in jetōb ko rem̧wilaļ. En̄jake kein ekkā aer ekōnono ilo meļak im kōmeļeļeik āinwōt juon “ainikien emera, edik.”3 Ej tōmak ak jeļā eo am̧ kōn m̧ool eo kar lewaj āinwōt juon kam̧ool ilo jetōb kōn kareel eo an Jetōb Kwojarjar. Bōk kam̧ool in enaaj ukōt ta eo kwoj ba im ekōjkan am̧ m̧akūtkūt. Men ko aorōk an naan in kam̧ool eo am̧, kapene jān Jetōb Kwojarjar, ekoba:
-
Anij ej Jemedwōj Ilan̄, kwoj ajri eo Nejin. Ej iakwe eok.
-
Jisōs Kraist emour. E ej Nejin Anij emour im am̧ Rilo̧mo̧o̧r im Ripinmuur.
-
Josep Smith ej juon rikanaan an Anij kar kūri n̄an kōjepļaaktok Kabun̄ eo an Jisōs Kraist.
-
Kabun̄ eo an Jisōs Kraist im Armej ro Rekwojarjar ilo Raan Ko Āliktata ej Kabun̄ eo kar kōjepļaaktok an Anij ioon laļ.
-
Kabun̄ eo kar kōjepļaaktok an Jisōs Kraist ej tōl jān juon rikanaan emour rainin.
Ijeļā ke Ekōjkan Kwaļo̧k Naan in Kam̧ool eo Aō?
Kwoj kwaļo̧k naan in kamool eo am̧ n̄e kwoj kwaļo̧k en̄jake in jetōb ko ippān ro jet. Āinwōt juon membōr in Kabun̄ in, ewōr am̧ iien ko rem̧m̧an n̄an kwaļo̧k naan in kam̧ool eo am̧ ilo kōnono ilo kweilo̧k ko an Kabun̄ in jeļā kaki ak jaab, juon illo̧k juon bwebwenato ko ippān baam̧le, ro m̧ōttam̧, im ro jet.
Bar juon wāween n̄an kwaļo̧k naan in kam̧ool eo am ej ilo m̧wil ko rekwojarjar. Naan in kam̧ool eo an ilo Jisōs Kraist ejjab ta eo kwoj ba wōt—ej kwaļo̧k wōn kwe.
Kajjojo iien kwoj kwaļo̧k naan in kam̧ool eo am̧ ak kwaļo̧k kōn jerbal ko am̧ am̧ kallim̧ur n̄an ļoor Jisōs Kraist, kwoj karuwaineneik ro jet n̄an “itok n̄an Kraist.”4
Membōr ro an Kabun̄ in rej jutak āinwōt rikam̧ool ro an Anij ilo aolep iien, ilo aolep men, im ilo aolep jikin ko.5 Iien ko rem̧m̧an n̄an kōm̧m̧an menin ilo intōrnet ej n̄an kōjerbal jekjek ko am̧ make reim̧we ak kwaļo̧k jekjek ko rem̧man kar kōpoji jān ro jet ejjeļo̧k jem̧ļo̧kier. Jej kam̧ool n̄e jej iakwe, kwaļo̧k, im karuwainene ilo barāinwōt online. Tweet ko am, message ko am, im post ko am enaaj bōk juon uteij, un eo ekwojarjar n̄e kwoj barāinwōt kōjerbal social media n̄an kwaļo̧k ewi wāween an Jisōs Kraist kōkam̧anm̧an mour eo am.
Ta Kabbōjrak ko ilo Kwaļo̧k Naan in Kam̧ool eo Aō?
Kabbōjrak ko n̄an kwaļo̧k naan in kam̧ool eo am̧ emaron̄ koba jab jeļā kōn ta eo n̄an ba. Matthew Cowley, juon Rijilōk ilo jem̧aan, ekar kwaļo̧k en̄jake in ke ekar em̧m̧akūt ilo juon ļalem-iiō mijen ke ekar 17 an iiō n̄an New Zealand:
“Ijjamin naaj meļo̧kļo̧k jar ko an eo jema raan eo me ikar em̧m̧akūt. Ijjan̄in kar ron̄ juon kōjeram̧m̧an eļap an aibojooj ilo aolepān mour e aō. Innām naan ko an āliktata n̄an eō ilo jikin kōttar tūrāin eo, ‘Nejū, kwonaaj ilo̧k ilo mijen ņe; kwonaaj ekkatak; kwonaaj kajjieon̄ kōppopo n̄an kwaļo̧k naan; im jet iien n̄e rej kūr n̄an eok, kwonaaj ļōmņak kwar lukkuun pojak, bōtaab n̄e kwoj jutak, kwonaaj lukkuun jaje ta eo kwon ba.’ Ikar bar en̄jake menin juon kōttan.
“Ikar ba, ‘Ta eo kwoj kōm̧m̧ane n̄e kwojaje ta eo kwon ba?’
“Ekar ba, ‘Kwon jutak ijo im kōn aolepān en̄jake an jetōb eo am̧, kwaļo̧k kam̧ool eo am̧ bwe Josep Smith ekar juon rikanaan an Anij emour, im ļōmņak ko am̧ renaaj kobrak ļōmņak eo am̧ im naan ko n̄an lo̧n̄iūm̧ … n̄an būruōn aolep ro rej ron̄jake.’ Im kōn menin ļōmņak eo aō, eļap wōt an kar jej kobban ilo … mijen eo aō … ekar letok n̄an n̄a iien eo em̧m̧an n̄an kwaļo̧k naan in kam̧ool eo aō n̄an iien eo eļap tata ilo bwebwenato an laļ in jān kar debwāāl eo an M̧aajta eo. Kajjieon̄ juon iien, likao im jiron̄ ro. Eļan̄n̄e ejjeļo̧k men en kwoj bar ba, kam̧ool bwe Josep Smith ekar juon rikanaan an Anij, im aolepān bwebwenato eo an Kabun̄ in enaaj obrak waj n̄an ļōmņak eo am̧.”6
Ejja āinwōt, Būreejtōn Dallin H. Oaks ekar kwaļo̧k, “Jet naan in kam̧ool rej em̧m̧anļo̧k būki ilo jutak im kōm̧m̧ane juon men jān bukwelōlō im jar kaki.”7 Jetōb eo ej kwaļo̧k kam̧ool n̄an rikōnono eo im eo ej ron̄jake barāinwōt.
Bar juon kabbōjrak, āinwōt an bwebwenato eo an Kevin kōmejajik, ej mijak. Āinwōt an Paul kar jeje n̄an Timote:
“Bwe Anij ear jab letok n̄an kōj jetōb in lōln̄o̧n̄; a jetōb in kajoor im yokwe. …
“Kwōn jab jook kōn kōnnaan an ad Irooj.”8
En̄jake ko an mijak rejjab itok jān Irooj ak ekkā an itok jān rikapo eo. Tōmak, āinwōt kar Kevin, enaaj kōtļo̧k am̧ anjo̧ ioon en̄jake kein im anemkwoj in kwaļo̧k ta eo ej ilo būruōm̧.
Ekōjkan Aō Dāpij Naan in Kam̧ool eo Aō?
Ij tōmak juon naan in kam̧ool ej juon m̧ōtta aorōk ilo kōj, kōn menin, n̄an dāpiji im kōļapļo̧k kaddōkļo̧k, Alma ekar katakin bwe jej aikuj ņa kōņin naan in kam̧ool eo ad kōn eļap kōjparok.9 Ilo ad kōm̧man āindein, “enaaj le okran, im eddek, im le leen.”10 An jako menin, “ej m̧ōņakņakļo̧k.”11
Kajjojo membōr in Būreejtōnji eo Kein Kajuon emōj aer letok n̄an kōj tōl n̄an ewi wāween ad kōjparok naan in kam̧ool eo ad.
Būreejtōn Henry B. Eyring ekar katakin kōj bwe “lin̄uri naan eo an ANij, jar ilo bōro em̧ool, im pokake kien ko an Irooj ej iakuj jokin wōt juon im waanmaanļo̧k n̄an an naan in kam̧ool eo am̧ eddōk im emourur.”12
Būreejtōn Dallin H. Oaks ekar kakeememej kōj n̄an bar bōk naan in kam̧ol ko ad, “ajiļo̧k aolep kwojkwoj ko am ilo raan eo ekwōjarjar Aō.(see K&B 59:9) n̄an pād ilo kallim̧ur eo ‘bwe Jetōb eo An en maron̄ pād [ippāer] iien otemjej.’ (K&B 20:77).”13
Im Būreejtōn Russell M. Nelson ekar ba ejjab kar to:
“Najdiki [naan in kam̧ool] eo am. …
“… Najdik eok make ilo naan an rikanaan ro etto im raan kein. Kajjitōk ippān Irooj n̄an katakin eok ekōjkan an em̧m̧anļo̧k am̧ ron̄jake E. Joļo̧k eļapļo̧k iien ilo tampeļ im ilo jerbal in menmenbwij an baam̧le.
“… Kōm̧m̧an bwe naan in kam̧ool eo am̧ en aorōk tata.”14
Jem̧ļo̧k in
Ro jeiū im jatū rejitōn bōro, ij kallim̧ur bwe ilo ami meļeļe eļapļo̧k ta in naan in kam̧ool, im ilo am̧ kwaļo̧ke, kwonaaj anjo̧ ioon kabbōjrak ko an jab jeļā im mijak, kōmaron̄e eok n̄an najrik im dāpij m̧weiuk in aorōk tata, naan in kam̧ool eo am̧.
Jej jeraam̧m̧an n̄an wōr waanjon̄ak ko rellōn̄ an rikanaan ro etto im raan kein me raar peran ilo kwaļo̧k naan in kam̧ool ko aer.
Ālkin mej eo an Kraist, Piter ekar jutak im kam̧ool:
“Em̧m̧an kom̧win otemjej jeļā, … bwe ilo etan Jisōs Kraist Ri Nazeret, eo ko̧m ar debwāāl e, eo Anij ear kajerkakpeje jān ro re mej … armej in ej jutak im mour im̧aan mejemi. …
“Bwe ejjeļo̧k bar juon āt ium̧win lan̄ im letok n̄an armej bwe jen mour ilo E.”10
Amulek, ālkin kwaļo̧k eo an Alma kōn tōmak, kar kwaļo̧k ilo kajoor: “Inaaj kam̧ool n̄an kom̧ jān n̄a make bwe men kein rem̧ool. Lo, ij ba n̄an kom̧, bwe ijeļā bwe Kraist enaaj itok ilubwilijin ro nejin armej, … im bwe enaaj pinmuur kōn jero̧wiwi ko an laļ; bwe Irooj Anij eaar kōnono men in.”16
Josep Smith im Sidney Rigdon, ke kar kam̧oole juon visōn aiboojoj an jerkakpeje Rilo̧mo̧o̧r, kar kam̧ool:
“Im kiiō, ālikin elōn̄ naan in kam̧ool ko me kar letok kōn e, en̄in ej naan in kam̧ool eo, āliktata in aolep, eo me kōmij lewōj kōn e: Bwe emour!
“Bwe kōn ar lo e, em̧ool ituanbwijmaron̄ in Anij; im kōm ar ron̄ ainikien eo ej kam̧ool bwe e ej eo Nejin Emake Keotak in Jemān.”17
Ro jeiū im jatū, ij kajjitōk ippāmi n̄an pukōt iien ko rem̧m̧an n̄an kwaļo̧k naan in kam̧ool eo am̧ ilo naan im ilo jerbal. Juon iien em̧m̧an ekar itok n̄an n̄a kiiō epaak, ilo jem̧ļo̧kin juon kweilo̧k ippān mayor eo an juon jikin kweilo̧k ilo South America, ilo champer eo an ippān juon membōr in cabinet eo an. Ke kōm kar kōjem̧ļo̧ke kōn en̄jake ko relukkuun okmeņeņ, ijaad kar ļōmņak ij ke aikuj kar kwaļo̧k naan in kam̧ool eo aō. Ļoor en̄jake eo, ikar kwaļo̧k juon naan in kam̧ool bwe Jisōs Kraist ej Nejin Anij emour im Rilo̧mo̧o̧r im Ripinmuur an laļ. Aolep men raar oktak ilo iien eo. Jetōb eo ilo ruum̧ eo kar jab kariabe. Jekar loe bwe aolep ro ilo ruum̧ eo rekar en̄jake. “Rikaeņōm̧m̧an eo … ej kam̧ool kōn Jemān im kōn Nejin.”18 Ij lukkuun kam̧m̧oolol bwe ikar bōk peran eo n̄an kwaļo̧k naan in kam̧ool eo aō.
N̄e juon iien āinwōt in ej itok, bōke im kautieje. Kwonaaj en̄jake okmāņāņ an Rikaenōm̧m̧an eo ilowaam̧ n̄e kwonaaj kōm̧mane.
Ij lewaj aō naan in kam̧ool im rikam̧ool n̄an kwe—Anij ej Jemedwōj Ilan̄, Jisōs Kraist ej mour, im bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata ium̧win tōl eo an rikanaan eo ejitōnbōro, Būreejtōn Russell M. Nelson. Ilo etan Jisōs Kraist, amen.