Jolet in Naan in Rōjan̄
Ij rōjan̄ kom̧ n̄an kajjieon̄ wōt n̄an karbōb n̄an jepļaakļo̧k n̄an ippān Jemedwōj Ilan̄ im Jisōs Kraist.
Ro jeiū im jatū rejitōnbōro, ij m̧ōņōņō in pād ippāmi ilo kweilo̧k in eļap an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Jaar en̄jake ami tōmak im ami iakwe ijoko kom̧ij pād ie. Jaar m̧wieur kōn katak ko reim̧we, naan in kam̧ool ko rekajoor, im al ko rem̧m̧an.
Ij rōjan̄ kom̧ n̄an kajjieon̄ wōt n̄an karbōb n̄an jepļaakļo̧k n̄an ippān Jemedwōj Ilan̄ im Jisōs Kraist. Ijo kwoj pād ie ilo iaļan bujen in, kwonaaj ioon apan̄ ko ko an mour in im jum̧ae ko an Setan.
Jinō ekar ba n̄an n̄a ke iaar ellotaani men ko reppen, “O, ale, ebaj pen wōt. Ej aikuj bwe en kar pen. Mour in ej juon teej.”
Ej kijon̄ ba, kōn ettōn̄ dikdik, kōnke ejeļā ruo men ko. Jekdoon apan̄ rot, men eo eaorōk ej jepļaak im mour ippān Jemedwōj Ilan̄. Im ekar jeļā bwe emaron̄ kōm̧m̧ane ilo tōmak ilo Rilo̧mo̧o̧r.
Ekar en̄jake ke E epaake e. Ilo raan ko ejeļā ke ej pojak in mej, eaar ba n̄an n̄a kōn Rilo̧mo̧o̧r ke ej babu ilo peet eo an. Ebar wōr juon kōjem n̄an ruum̧ eo juon epaake peet eo an. Ej ettōn̄dikdik im reilo̧k n̄an kōjem eo ke ej kōnono tok ilo mera im ba epojak in loe E. Ij keememej wōt ilo reilo̧k n̄an kōjem eo im antooneļo̧k ruum eo itulik.
Epād kiiō ilo laļ en an jetōb. Eaar maron̄ mije wōt kōttōpar eo an ekar kōņaan jekdo̧o̧n aolep iiō ko in an mour kōn apān ilo ānbwin im ioon melijon̄ ko.
Naan in rōjan̄ in ekar likūti ippamim ej waļo̧k ilo Moronai 7, ijo Mormon ej kapilōk ļeo nejin Moronai im armej ro an. Ej juon bwebwenato in rōjan̄ n̄an ro ineen jen jinō n̄an baam̧le eo an. Mormon eaar leļo̧k naan in rōjan̄ n̄an aolep ro rej kāālet n̄an karbōb ilo aolepen mālijjon̄ ko aer ilo mour, n̄an mour indeeo.
Mormon eaar jinoe eoon ko jinoin ilo Moronai 7 kōn juon naan in kam̧ool kōn Jisōs Kraist, an enjeļ raņ, im kōn Jetōbin Kraist, eo ej kōm̧m̧an bwe jen jeļā em̧m̧an jān nana im maron̄ kālet jim̧we eo.
Eaar likūt Jisōs Kraist m̧oktata, kōm̧m̧ani aolep men kar tōpari n̄an letok naan in rōjan̄ n̄an ro rej ioon apan̄ ilo iaļ eo ļo̧k n̄an kapijuknen eo aer ilan̄:
“Bwe ejjeļo̧k armej enaaj mour, ekkar n̄an naan ko an Kraist, ijello̧kun n̄e renaaj tōmak ilo Etan; kōn menin, eļan̄n̄e men kein raar bōjrak, innām tōmak eaar bōjrak barāinwōt; im enana tam̧m̧win armej, bwe er rej āinwōt n̄e eaar ejjeļo̧k pinmuur eaar kōm̧m̧an.
“A lo, ro jeiū im jatū rejitōnbōro, ij lo waļo̧kin men kein rem̧m̧anļo̧k jān kom̧, bwe ij kōjjem̧ļo̧k bwe ewōr ami tōmak ilo Kraist kōnke ami ettā; bwe eļan̄n̄e kom̧ ar jab tōmak ilo E innām kom̧ij jab ekkar n̄an bōnbōn ilubwiljin armej in kabun̄ eo An.”1
Mormon ekar lo ettā āinwōt menin kam̧ool kōn peran kōn aer tōmak. Eaar lo bwe raar pedped wōt ioon Rilo̧mo̧o̧r. Eaar rōjan̄ er kōn jeļā bwe eaar jen tōmak. Mormon eaar etal wōt im leļo̧k naan in rōjan̄ n̄an jipan̄ er lo bwe aer tōmak im ettā enaaj kalōk aer jeļā im bwe aer lōke enaaj anjo̧ jen apan̄ ko aer:
“Im bar juon alen, ro jeiū im jatū rejitōnbōro, ikōņaan kōnono n̄an kom̧ kōn kōjatdikdik. Ekōjkan ami naaj tōpar tōmak, ijello̧kun n̄e naaj ejjeļo̧k ami kōjatdikdik?
“Im ta eo kom̧ naaj kōjatdikdik kake? Lo ij ba n̄an kom̧ bwe kom̧ naaj kōjatdikdik kōn pinmuur eo an Kraist im kajoor in An jerkakpeje, n̄an naaj jerkak n̄an mour indeeo, im men in kōnke ami tōmak ilo E ekkar n̄an kallim̧ur eo.
“Kōn menin, eļan̄n̄e armej ewōr an tōmak eaikuj wōr an kōjatdikdik; bwe n̄e ejjeļo̧k tōmak e jamin wōr jabdewōt kōjatdikdik.
“Im bar juon alen, lo ij ba n̄an kom̧ bwe e ej jab maron̄ wōr an tōmak im kōjatdikdik, ijello̧kun n̄e enaaj ineem̧m̧an, im ettā būruōn.”2
Innām Mormon ekar rōjan̄ er kōn kam̧ool bwe rej pojak in bōk menin letok enaaj kobrak būruweer kōn iakwe eo erreo an Kraist. Eaar kōmeļeļeiki n̄an er oktak ko n̄an tōmak ilo Jisōs Kraist, jouj, ettā bōro, Jetōb Kwojarjar, im kōjatdikdik eo epen n̄an bōk wōnāān eo an mour indeeo. Eaar rōjan̄ er ilo wāween in:
“Bwe ejjeļo̧k bōk e im̧aan Anij, ijello̧kun riineem̧m̧an im ettā ilo bōro; im eļan̄n̄e armej eo ej ineem̧m̧an im ettā ilo bōro, im kwaļo̧k būruōn jān kajoor eo an Jetōb Kwōjarjar bwe Jisōs ej Kraist eo, eaikuj wōr an iakwe-em̧ool; bwe eļan̄n̄e ejjeļo̧k an iakwe-em̧ool e ejjeļo̧k tokjān; kōn menin eaikuj wōr an iakwe-em̧ool.”3
N̄an reilikļo̧k, ij kiiō lo oktakin bwe menin letok eo an iakwe—iakwe eo erreo an Kraist—eaar kōkajoor, eaar tōl, eaar jipan̄, im eaar ukōt jinō ilo apan̄ ko an ilo mour in.
“Im iakwe-em̧ool ej meanwōd im e jouj, im ej jab juunm̧aade, ej jab kappukot men ko an, ej jab illulu, ej jab ļōmņak nana, im jab lan̄lōn̄ ilo nana ak lan̄lōn̄ ilo m̧ool eo, ej kijenmej ilo men otemjej, ej tōmak ilo men otemjej, ej kōjatdikdik ilo men otemjej, ej niknik ilo men otemjej.
“Kōn menin, ro jeiū im jatū re jitōnbōro, eļan̄n̄e ejjeļo̧k ami iakwe-em̧ool, kom̧jekdo̧o̧n. Kōn menin, kom̧in eddāp n̄an iakwe-em̧ool, eo ej ļaptata jān men otemjej, bwe men otemjej renaaj jem̧ļo̧k—
“A iakwe-em̧ool ej iakwe eo erreo an Kraist, im e kijejeto indeeo, im jabdewōt eo lo e ippān ilo raan eo āliktata, enaaj em̧m̧an ippān.
“Kōn menin, ro jeiū im jatū rejitōnbōro, kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist; bwe kom̧in maron̄ erom m̧aan ro nejin Anij; bwe n̄e Enaaj waļo̧k jenaaj āinwōt E, bwe jenaaj lo E ilo lukkuun nememen; bwe jen maron̄ bōk kōjatdikdik in; bwe jān maron̄ karreo em̧ool āinwōt E erreo.”4
Ij kam̧m̧oolol kōn naan in rōjan̄ eo an Mormon kōn waanjon̄ak im katakin. Iaar barāinwōt jeraam̧m̧an kōn naan ko an jinō. Rikanaan ro jān Adam n̄an rainin, jen katak im waanjon̄ak, raar kōkajoor eō.
Kōn kile n̄an ro ijeļā kajjier im baam̧le ko aer, ejjab bwe in kwaļo̧k apan̄ ko aer ak kōnono kōn menin letok ko aer ilo lo̧bwilej. Ak ta eo iaar loe eaar kōkajoor eō im kar ukōt eō n̄an em̧m̧anļo̧k.
Kōn jenoļo̧k eo an make, inaaj kobaik jidik naan in rōjan̄ jen kōrā eo ippa. Inaaj mejmejkaruo. Ej juon armej eo ejenoļo̧k eo ejjab kappukot bun̄bun̄.
Kom̧ro eaar m̧are ium̧win 60 iiō ko. Ej kōn wōt en̄jake eo kiiō imeļeļe meļeļein naan kein rekwojarjar: tōmak, kōjatdikdik, ettā, niknik, jab kappukot n̄an kōj make, m̧ōņōņō ilo m̧ool, jab ļōmņak nana, im ilōn̄in men otemej, iakwe.5 Pedped ioon en̄jake eo, imaron̄ kwaļo̧k naan in kam̧ool eo ke aolep armej remaron̄ būki naan kein ilo mour ko aer kajjojo raan ilo aer dipuk apan̄ ko an mour in.
Milien iaami rej ron̄jake rejeļā kain armej rein. Elōn̄ iaam rej kain armej rein. Kōj kajjojo jeaikuji kain waanjon̄ak in rōjan̄ im iakwe n̄an ro m̧ōttad.
Kwoj jijōt iturin jabdewōt āinwōt rikarejar m̧aan im kōrā, kwoj pinej jenkwan Irooj. Ļōmņak kōn ta eo En kar kōm̧m̧ane ak ba. Enaaj kar kūr er n̄an itok n̄an Ippān. Enaaj kar rōjan̄ er. Enaaj kar kakeemeemj im nōbar jinoin oktak ko renaaj aikuj n̄an kōm̧m̧an. Im Enaaj kar waanjon̄ak eo em̧m̧an n̄an er n̄an ļoore.
Ejjeļo̧k juon emaron̄ kajju kōm̧m̧ane, ak jen ron̄jake kweilo̧k in, kwomaron̄ jeļā ke kopād ilo iaļ in. Rilo̧mo̧o̧r ejeļā apan̄ ko am̧ ilo lukkun tipdikin. E ejeļā aorōk eo am̧ eļap n̄an kajoorļo̧k ilo tōmak, kōjatdikdik, im iakwe em̧ool.
Kien ko im bujen ko Ej liwaj n̄an eok rejjab mālijjon̄ ko n̄an peek eok. Rej menin letok ko n̄an kotak eok m̧aanļo̧k n̄an bōk aolep menin letok ko an Anij im jepļaakļo̧k n̄an jikum̧i ippān Jemedwōj Ilan̄ im Irooj, ro rej iakwe eok.
Jisōs Kraist ekar kōļļāik wōņāān jerawiwi ko ad. Jemaron̄ bōk kōjeraam̧m̧an eo an mour indeeo n̄e enaaj wōr ad tōmak ilo E n̄an ukweļo̧k im erom̧ juon ajri, erreo im pojak n̄an bōk menin letok ko reļļapļo̧k an Anij.
Ij jar bwe kwonaaj bōk kūr eo An im bwe kwonaaj leļo̧k n̄an ro jet nejin Jemedwōj Ilan̄.
Ij jar kōn mijinede ro ad ipeļaakin laļin. Kōm̧m̧an bwe ren im̧we n̄an rōjan̄ aolep armej n̄an ikdeleel n̄an tōmak bwe kūr in ej jān Jisōs Kraist n̄an ro Rikarejeran ro rekar bōk Etan ioer.
Ij kam̧ool bwe Ej mour im Ej tōl Kabun̄ in. Ij juon An rikam̧ool. Būreejtōn Russell M. Nelson ej rikanaan eo emour an Anij ioon mejen laļin. Ijeļā bwe menin em̧ool. Ilo āt eo ekwojarjar etan Jisōs Kraist, amen.