Pedped in Katak Indeeo kōn Iakwe

Jān Elder Hugo Montoya

Jān Jiljilimjuonn̄oul eo

Iakwe eo an Jemedwōj Ilan̄ ñan kajjojo ro Nejin em̧ool. E ej pojak n̄an kōj kajjojo.

Pedped in katak indeeo kōn iakwe ej waļo̧k ilo ad mour kake kien eo eļap kein karuo: kwōn yokwe Irooj aṃ Anij kōn aolepen būruoṃ, im kōn aolepen aṃ, im kōn aolepen aṃ kajoor, im kōn aṃ ḷōmṇak otemjej; im yokwe ri turuṃ āinwōt kwe.¹

Ij keememej winter eo aō jinoin tata ilo Utah—ekar sno aolep jikin. Kōnke ij itok jān Sonoran Desert, raan ko aō jinointata raar lukkuun kam̧ōņōņō, bōtaab jet raan tokālik iaar kile ke iaar aikuj ruj in jibbon̄tata n̄an joļo̧k sno jān nabōj m̧weo im̧ō.

Juon jibbon̄, ilo juon iien ekar sno, iaar menokadu, jabōļiļo̧k sno ko, im iaar lo eo rituru eaar kōpellok kōraaj eo an ilo jait eo juon ilo iaļ eo. Erūtto jen ña, im ikar ļōmņak bwe n̄e en kar mōkaj an mōj aō jerbal, inej kar jipañ e. Im iaar lamōj ļo̧k, ikar kajjitōk ippān, “Bratōr, kwoj ke aikuj jipañ?”

Eaar ettōñdikdik im ba, “Komol, Elder Montoya.” Innām eaar kadiwōjtok juon kein karreo sno jen kōraaj eo, eaar kejo injin eo, im jet minit jen iien eo ekar joļo̧ki aolep sno ko jen ijo m̧aan in m̧weo m̧ōn Innām eaar jōrjōr tok kōn kein jerbal eo an im kajjitōk, “Elder, kwoj aikuj ke jipañ?”

Ikar ettōn̄dikdik im ba, “Aaet, kom̧m̧ol.”

Kōmij m̧ōņōņō in jipan̄ doon kōnke kōmij iakwe doon, im aikuj ko an ļeo jeiū rej erom̧ aikuj ko aō, im aō aikuj ren an. Jekdo̧o̧n kajin ta kajin eo an ak ia eo ej itok jān e, kōmij iakwe doon bwe kōmij jeimjen jeimjati, juon wōt Jemed.

Ke raar kōjeļā kōn jerbal in karejar n̄an ro jet, Būreejtōn Russell M. Nelson ekar ba, “Jenaaj kōjerbale juon wāween ekāālļo̧k, kepaakļo̧k eo ekwojarjarļo̧k n̄an kea im jerbal in karejar n̄an ro jet.”² N̄an n̄a, kwojarjarļo̧k meļeļein eļapļo̧k kōn juon make, em̧wūlaļļo̧k, erom̧ āinwōt wāween ko an Rilo̧mo̧o̧r: “Kom̧ij yokwe doon,”³ juon ilo̧k juon.

Ejjab bwe ñan kōm̧m̧an bwe jen jab lōkatiptip n̄an ro jet; ejjab bwe ñan kile aikuj ko an ro jet im etal wōt jeni. Jej aikuj kawōrtokjen iien kein jemaron̄ jipan̄ ro ritūrir, men̄e ej kab tin juon kōttan im ede eo iien ad ioon lio ak leo ilo mour in.

Etke iakwe Anij ej kien eo eļap im m̧oktata?

Ij ļōmņak ej kōn ta meļeļein n̄an kōj. Jej ro Nejin, Ej jeļā kōn aikuj ko ad, jej kōjatdikdik ilo E, im Ej iakwe im kōjparok kōj. Anemkwoj ej m̧ōttan karōk eo An; kōn menin, jenaaj baj wōt kōm̧m̧an bōd.

Ej kōtļo̧k bwe jen ioon menin mālijon̄ im kapo. Ak men̄e jej kōm̧m̧an bōd ak po ilo kapo, karōk eo ekar letok juon Rilo̧mo̧o̧r bwe jen maron̄ bōk lo̧mo̧o̧r im jepļaakļo̧k n̄an im̧aan mejān Anij.

Apan̄ ko ilo mour ko ad emaroñ kōm̧m̧an bwe jen pere kūrm̧ool eo an kallim̧ur ko ad me kar kōm̧m̧ani n̄an kōj. Jouj im lōke Jemed. Aolep iien Ej kōjparok kallim̧ur ko An, im jemaron̄ jeļā ta eo Ekōņaan katakin kōj.

Men̄e jej kōm̧m̧ane ta eo ejim̧we, men ko rej waļo̧k ilo mour ko ad remaroñ oktak jen em̧m̧an ñan nana, jen m̧ōņōņō ñan būromōj. Anij ej uwaaki jar ko ad ekkar n̄an tiriamo im iakwe eo An ekwojarjar, im ilo iien eo An make.

Bāt eo me Elijah eaar daak dān jen e ñan ñe ejjeļo̧k kobban.⁴
Lippon eo an Nipai kōm̧m̧an jān steel eaar bwiļo̧k.⁵
Juon ļaddik edik raar jum̧ae im joļo̧k jān jikuuļ.
Raar kōttar iumwin juōn iien aetok ñan juōn ajri me eaar mej jet wōt raan ālkin an ļotak.

Jekjek ko roktak.

Jet iien jekjek ko rej oktak jān em̧m̧an im jim̧we ñan nana im jab jim̧we, jemaroñ mōnōnō wōt kōnke mōnōnō ejjab pedped ioon men kein rej waļo̧k ak ej pedped ioon am̧ bōki men kein rej waļo̧k. Būreejtōn Nelson ekar ba, “Jemaron̄ en̄jake m̧ōņōņō jekdo̧o̧n ta eo ej waļo̧k ak ejjab waļo̧k ilo mour ko ad.”⁶

Jemaroñ okjak likļo̧k im jijjet im kōttar an make oktak jekjek ko aer, ak jemaron̄ kappukot im bōktok jekjek ko rekāāl.

Elijah eaar etal laļļo̧k ñan Zarepath, ijo juon kōrā me emej ļeo pāleen ekar leļo̧k kijen m̧ōn̄ā im nimen.⁷
Nipai ekar kōm̧m̧ane juon libbon aļaļ im ekkar etal in kakūdudu.⁸
Ļaddik jidikdik in eaar jijjet im roñjake im je ta ko ej roñjake ilo turin wintō eo, im rainin ej juon rūkaki in elementary school.
Ripālele rein raar ejaake juon tōmak eo eļap ilo Rilo̧mo̧o̧r Jisōs Kraist im lōke karōk in lo̧mo̧o̧r eo. Iakwe eo aer ñan ajri in me eaar to aer kōttar e eaar lukkuun etal im ļapļo̧k jān aer burom̧ōj.

Ñe ij ron̄ kajjitōk kein, “Jemedwōj Ilan̄, kwoj ke lukkuun pād ijo? Im kwoj ke [aolep] ron̄jake im uwaak jar ko an ajri ro?,”⁹ Ikōņaan uwaak: “Eto an pād ijeņ, Epād, im Enaaj aolep iien pād ijeņ n̄an kwe im n̄a. Ña m̧aan eo Nejin, E ej Jema, im ij ekkatak bwe in erom̧ juon baba, em̧m̧an āinwōt E.”

Kōrā eo ippa im ña kom̧ro ej kijon̄ kate kom̧ro n̄an pojak n̄an ajri nejūm̧ro, ilo ium̧win aolep me ko rej waļo̧k, im ilo aolep wāween ko. Kajjojo ajri roktak jān doon, aorōkier ippān Anij eļap, im jeko̧o̧n ta apān̄ ko, jerawiwi ko, im m̧ōjņo ko rej jelm̧aeiki, Anij ej iakwe er, im āindein bar kōj.

Ke iaar bōk kūr in āinwōt juon Ritōl Eutiej, ilo kar raan eo āliktata in am em̧akūt ļo̧k n̄an Salt Lake, aolep ajri ro nejū im baam̧le ko aer raar kobatok ilo m̧weo m̧ōm̧ro n̄an juon nokon in jota an baam̧le, ijo jekar kwaļo̧k ad iakwe im kam̧m̧oolol. Ālkin katak eo, iaar leļo̧k n̄an er kajjojo kōjeram̧m̧an eo an priesthood n̄an kajjojo iaan ajri ro nejim. Aolep raar dān in kōmjaļaaļ. Ālkin kōjeram̧m̧an eo, ļaddik eo nejū erūttotata ekar kwaļo̧k naan in kam̧m̧oolol ilo etan aolep kōn iakwe eļap me kōm kar kwaļo̧k n̄an er jān raan eo rekar ļotak m̧aan tak n̄an kiiō.

Kōjeram̧m̧ane ajri ro nejimi, men̄e rej 5 ak 50 aer iiō. Pād ippāer; pojak n̄an er. Men̄e menin ej letok kjuon iien em̧m̧an kar ejaake jān juon karōk ekwojarjar, kōn menin jej aikuj jab meļo̧kļo̧k in jeere iien ko rekam̧ōņōņō ippān ajri ro nejid.

Iakwe eo an Jemedwōj Ilan̄ ñan kajjojo ro Nejin em̧ool. E ej pojak n̄an kōj kajjojo. Ijjab jeļā elmen An kōm̧m̧ane, ak E ej kōm̧m̧ane. E im m̧aanje eo Nejin rej juon wōt ilo aer kōm̧m̧ane jerbal in im aiboojoj eo an Jemed “n̄an kakūrm̧ool jab wabanban im mour indeeo an armej.”¹⁰ Raar jilkintok n̄an kōj jetōb kwojarjar n̄an tōl kōj, kakkōl kōj, im kaeņōm̧m̧an kōj n̄e jej aikuji.

Ekar katakin Eo Nejin Ejitōnbōro n̄an ejaake laļ aiboojoj in. Ekar katakin Adam im Iv im ekar leļo̧k n̄an er anemkwoj in kālet eo aer. Eto an jilkintok ribōktok ennaan ium̧win iiō im iiō bwe jen maron̄ en̄jake iakwe eo An im kien ko An.

E eaar pād ilo Bukwin Wōjke Ekwojarjar uwaake kajjitōk eo em̧ool an Josep im kūri kōn etan. Ekar ba: “En̄in ej Nejū Jitōnbōro. Kwōn Ron̄jake E!”¹¹

Ij tōmak bwe iakwe eo an Anij n̄an kōj me elukkuun ļap eaar waļo̧k ilo Getsemane, ijo eo Nejin Anij eo ej mour eaar jar, “O Jema, eḷaññe e maroñe en ilọk kab in jān Eō; a en jab ankil Aō, a ankil Aṃ.”¹²

Iaar kile bwe jidikin jeļā eo aō me imaron̄ meļeļe kake kōn Pinmuur eo an Jisōs Kraist ej kōļapļo̧k aō iakwe n̄an Jemed im Eo Nejin, kadikļo̧k ikdeleel eo aō n̄an kōm̧m̧an jerawiwi im n̄an jab pokake, im kōļapļo̧k ikdeleel eo aō n̄an em̧m̧anļo̧k im kōm̧man em̧m̧an.

Jisōs eaar etetal laļļo̧k ilo an ejjeļo̧k mijak im pere n̄an Getsemane, lōke Eo Jemān, jeļā bwe E ej aikuj juuri kein joniōk wain make iaan. E eaar anjo̧ ioon aolep metak ko im mennin kajōjō ko. Raar Na ruwōn, ekajet e, im kaeñtaan e. Ilo iien An būromōj im eñtaan ioon dōbwāāl eo, Jisōs eaar mije wōt aikuj ko An jinen im rijilōk ro An rejitōnbōro. Eaar leļo̧k mour eo An make.

Ilo raan eo kein kajilu Eaar jerkakpeje. Eaar ejjeļo̧k kobban lōp eo; Ej jutak tu anbwijmaroñ in Jemen. Rej kōjatdikdik bwe jenaaj kālet n̄an kōjparok bujen ko ad im jepļaak n̄an Im̧aan Mejāer. Laļ in ejjab laļ eo ad āliktata in; ejjab ijo jikid in ilo kapijuknen in ad ioon laļ in, ak jej jet armej in indeeo ak jej mour kōn mour an jidik wōt iien.

Jisōs ej riKraist eo, eo Nejin Anij emour. E ej mour, im kōnke E ej mour, aolep ajri ro nejin Anij renaaj mour indeeo. Kamm̧olol kōn en̄taan in pinmuur eo An, kōj aolep jemaron̄ mour ippān doon Ipper. Ilo etan Jisōs Kraist, Amen.