Jipan̄ Rijeram̧ōl im Rien̄taan
Kabun̄ eo an Jisōs Kraist ej wujlepļo̧k n̄an jerbal n̄anro rej pād ilo aikuj, im ej barāinwōt wujlepļo̧k n̄an wōdde jeppelippān ro jet ilo kijejeto in.
Bratōr im sister, rikanaan eo ad ejitōnbōro Būreejtōn Russell M. Nelson enaaj kōnono n̄an kōj tokālik ilo m̧wen̄an in. Ekar kajjitōk ippa bwe in rikōnono eo jinointata.
Unin kōnono eo aō rainin ejelet ta eo Kabun̄ eo an Jisōs Kraist im Armej ro Rekwojarjar ilo Raan Ko Āliktata im membōr ro an rej leļo̧k im kōm̧m̧an n̄an rijeram̧ōl im rien̄taan. Inaaj barāinwōt kōnono kōn ejja kain leļo̧k in wōt jān armej ro jet rem̧m̧an. Leļo̧k n̄an ro rej pād ilo aikuj ej juon pedped in katak ilo aolep kabun̄ ko rej kabun̄ n̄an Anij eo an Ebream im ro jet barāinwōt.
Jejjo allōn̄ remootļo̧k, Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kab jinointata in an riboot kōn jon̄an jerbal in humanitarian ilo aolepān laļ in.1 Jon̄an jāān eo jekar kōjerbale ilo 2021 n̄an ro riaikuj ilo 188 laļ ko ipeļaakin laļ in aolepen ej $906 milien—enan̄i juon pilien taļa. Ilo kakobaba, membōr ro ad raar bōk koņaer elōn̄ļo̧k jān 6 milien awa in jerbal ko ilo ejja kōttōpar in wōt.
Nōm̧ba kein rej, ilo m̧ool, juon riboot eo ejjab dedeļo̧k kōn ad leļo̧k im jipan̄. Rejjab kobaitok jerbal in jipan̄ ko an juon make an membōr ro ad kajjojo ilo aer jerbal in karejar n̄an doon ilo kūr ko im jerbal in jipan̄ ko rej make leļo̧k jān membōr n̄an membōr. Ilo 2021 riboot eo ad ejjab kwaļo̧k kōn ta eo membōr ro ad rej kōm̧m̧ane kajjojo ilo doulul in charity ko rellōn̄ me rejjab ekkeijel ippān Kabun̄ in ad. Ij ijjino kōn men kein.
Ilo 1831 eo, edikļo̧k jān ruo iiō ālkin an kar Kabun̄ eo me em̧ōj an jepļaak kar ejaak, Irooj ekar leļo̧k revelesōn in n̄an tōl membōr ro ie im, ij tōmak, aolep ajri ro Nejin aolepān laļ in:
“Bwe lo, ejjab ekkar bwe In aikuj jiron̄ kom̧ ilo men otemjeļo̧k; bwe eo kipel e ilo men otemjeļo̧k, ejja in wōt ej karejeran. …
“Em̧ool Ij ba, armej reaikuj kanooj m̧ōņōņō in poub kōn tokjān, im kōm̧m̧an elōn̄ men ko kōn wōt anemkwōj in kāālet eo aer, im kwaļo̧k eļap em̧m̧an;
“Bwe kajoor eo epād ilo er, eo kōn e rej ripinej jenkwaer make. Im toun wōt an armej kōm̧m̧an em̧m̧an rej jamin ilo jabdewōt wāween m̧wijkōk jān wōņāer.”2
Ilo elōn̄ļo̧k jān 38 iiō ko āinwōt juon Rijilōk im eļapļo̧k jān 30 iiō ko ilo jikin jerbal eo aō, ikar lo elōn̄ kijejeto ko rejouj jān kain doulul ko im armej ro revelesōn in ej kōmeļeļeik āinwōt “poub kōn tokjān” im “kwaļo̧k [e] eļap em̧m̧an.” Elōn̄ waanjon̄ak ko jab maron̄ bwini kōn kain jerbal in jipan̄ n̄an armej ilo aolepān laļ in, ilōn̄ļo̧k tōrerein laļ ko ad make im reļļapļo̧k jān jeļā eo ad. Kōļmenļo̧kjeņ kōn menin, ij ļōmņak kōn rikanaan-kiin̄ Benjamin ilo Bok in Mormon, eo ekar kwaļo̧k naan ekoba m̧ool in indeeo in: “Bwe eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij.”3
Eļap wōt jerbal in jipan̄ an welfare im humanitarian n̄an armej ro m̧ōttad kar katakin im kōjerbal jān Kabun̄ eo an Jisōs Kraist im Armej ro Rekwojarjar ilo Raan Ko Āliktata im jān kōj āinwōt membōr ro an. N̄an waanjon̄ak, jej jitlo̧k ilo jinoin kajjojo allōn̄ im jipan̄ leļo̧k jān jon̄an dettan m̧ōn̄ā ko jab kan̄i n̄an jipan̄ ro rej aikuj ilo jarlepju ko ad make. Kabun̄ in ej barāinwōt kōm̧m̧ani jerbal in leļo̧k jipan̄ ko reļļap an humanitarian im jerbal in jipan̄ ko jet ilo aolepān laļ in.
Kōjekdo̧o̧ņ aolep men ko me Kabun̄ in ad ej kajju kōm̧m̧ani, eiten aolep jerbal in jipan̄ an humanitarian n̄an ajri ro nejin Anij ilo aolepān laļ in ej kōm̧m̧an jān armej ro im doulul ko ejjeļo̧k aer me rejjab lukkuun ekkejel ippān Kabun̄ in. Āinwōt an juon iaan Rijilōk ro ad kar kwaļo̧k: “Anij ej kōjerbal elōn̄ļo̧k jān juon armej n̄an kadedeļo̧k jerbal eo an eļap im kabwilōn̄lōn̄. … Ekanooj in kilep, kanooj in pen, n̄an jabdewōt armej.”4 Āinwōt membōr ro an Kabun̄ eo em̧ōj an jepļaaktok, ej aikuj in ļapļo̧k ad mejān iruj im eļapļo̧k kam̧m̧oolol kōn jerbal in jipan̄ ko an ro jet.
Kabun̄ eo an Jisōs Kraist ej wujlepļo̧k n̄an jerbal n̄an ro rej pād ilo aikuj, im ej barāinwōt wujlepļo̧k n̄an wōdde jeppel ippān ro jet ilo kijejeto in. Jejjo iien remootļo̧k jaar kōm̧m̧ane juon menin leļok eļap n̄an United Nations Food Programme eo. Ilo elōn̄ iiō ko in jerbal in jipan̄ armej, ruo doulul ko rejeno̧ļo̧k āinwōt ro raorōk jej jerbal ipper: pūroojāāk ko ippān Red Cross im Red Crescent agency ko ilo elōn̄ laļ ko rekar leļo̧k n̄an ajri ro nejin Anij kein jipan̄ ko rekanooj aorōk ilo iien idin̄ ko im apan̄ ko. Ilo ejja wāween in wōt, ewōr ad rekoot ko raitok kōn jipan̄ ko jej kōm̧m̧ani ippān Catholic Relief Services ko. Doulul kein raar katakin kōj eļap wōt kōn jipan̄ armej ro ilo aolepān laļ in.
Ekar bar wōr ad tōprak ko rem̧m̧an ilo ad wodde jeppel ippān doulul ko jet, ekoba Muslim Aid, Water for People, im IsraAID, n̄an kōllaajrak jet iaer. Ilo an kajjojo doulul ko an humanitarian wōr aer make eria ko retijem̧ļo̧k ie, jej kwaļo̧k juon wōt kōttōpar kōn kōmerāikļo̧k en̄taan ko ibwilijin ajri ro nejin Anij. Aolepān menin ej m̧ōttan jerbal eo an Anij n̄an ajri ro Nejin.
Ilo revelesōn eo raan kein ej katakin bwe ad Rilo̧mo̧o̧r, Jisōs Kraist, ej “meram eo em̧ool eo ej kōmeram aolep armej ro rej itok ilo laļ in.”5 Kōn menin, aolep ajri ro nejin Anij rej ellowetak n̄an jerbal n̄an E im n̄an doon n̄an jon̄an jeļā im maron̄ eo aer em̧m̧antata.
Bok in Mormon ej katakin bwe “jabdewōt men ej karuwainene im karreel n̄an kōm̧m̧an em̧m̧an, im n̄an iakwe Anij, im n̄an jerbal n̄an E, ej kōketak in Anij.”6
Wōnm̧aanļo̧k wōt:
“Bwe lo, Jetōb in Kraist em̧ōj leļo̧k e n̄an aolep armej, bwe en maron̄ jeļā em̧m̧an jān nana; kōn menin, ij kwaļo̧k wāween eo n̄an ekajet; bwe men otemjeļo̧k ej karuwainene n̄an kōm̧m̧an em̧m̧an, im n̄an karreel n̄an tōmak ilo Kraist, kar jilkinļo̧k e jān kajoor eo im mennin leļo̧k eo an Kraist. …
“Im kiiō, ro jeiū im jatū, … kōnke ij lo bwe kom̧ jeļā meram eo kom̧ij maron̄ ekajet jān e, meram eo ej meram an Kraist.”7
Erkein jet waanjon̄ak ko kōn an ajri ro nejin Anij jipan̄ ajri ro jet nejin Anij ilo men ko rej aikuji āinwōt m̧ōn̄ā, kein taktō, im katakin:
Jon̄oul iiō remootļo̧k, Kandharis ro, Sikh ļeo pālele im lio pālele ilo United Arab Emirates, erro make raar jino juon kijejeto ekabwilōn̄lōn̄ n̄an naajdik ro rekwōle. Kōn Guru Nanak Darbar Sikh tampeļ eo, rej kiiō leļo̧k elōn̄ļo̧k jān 30,000 vegetarian m̧ōn̄ā ko aolep jem̧ļo̧kin wiik n̄an jabdewōt eo ej deļo̧n̄e kōjām ko an, jekdo̧o̧n kabun̄ ak kūl rōt. Dr. Kandhari ej kōmeļeļeik, “Kōmij tōmak bwe aolep rej juon wōt; jej ajri ro nejin Anij, im jej pād ijin n̄an jerbal n̄an armej.”8
Jerbal eo n̄an taktō im kōm̧m̧an n̄i n̄an ro me rej aikuj ej bar juon waanjon̄ak. Ilo Chicago, ikar ioon juon Syrian-American taktō in nan̄inmej, Dr. Zaher Sahloul. Ej juon iaan ro raar jino MedGlobal, eo ej karōk bwe medical professional ro ren kōjerbal iien ko aer make, kapeel ko, jeļāļo̧kjeņ, im kapeel in tōl n̄an jipan̄ ro jet ilo idin̄ ko, eo āinwōt pata eo ilo Syria, ijo Dr. Sahloul ej likūt mour eo an ilo kauwōtata n̄an leļo̧k jipan̄ in taktō n̄an armej ro. MedGlobal im doulul ko reier wōt (ekoba elōn̄ Latter-day Saint professional ro) rej kwalo̧k bwe Anij ej kōmakūtkūti ritijem̧ļo̧k ro an tōmak n̄an bōkļo̧k aikuj ko n̄an kōmeraik ro rijeram̧ōl.9
Elōn̄ ajri ro nejin Anij rejjab ļōmņak kōn er make rej bōk koņaer ilo kijejeto ko in katakin, aolepān laļ in barāinwōt. Juon waanjon̄ak em̧m̧an, kōm jeļā kake jān kijejeto ko an humnaitarian, ej m̧akūtkūt an juon em̧m̧an jeļā kake Mr. Gabriel, eo ekar juon riatajinemjen jān elōn̄ jekjek ko ilo jejjo iien ko. Jejjo iien ko remootļo̧k ekar kwaļo̧k bwe buki taujin ajri riatajinemjen iilo East Africa raar aikuj jipan̄ n̄an dāpij kōjatdikdik ko aer im kemourur ļōmņak ko aer. Ekar karōk rūkaki ro jet ilo jikin eo ewōr riatajinemjen ie n̄an ta eo raar ņan etan “tree schools,” ijo rijikuuļ ro rej kuk ippān doon n̄an katak ko ium̧win aelellōr in juon wōjke. Ekar jab kōttar ro jet n̄an ejaake ak tōl bōtaab e make ekar tōl kijejeto ko me raar leļo̧k iien ko rem̧m̧an an katakin n̄an taujin rijikuuļ ro ilo iiō ko reppen ilo aer jojoļāār.
Aaet, waanjon̄ak kein jilu rejjab meļeļein bwe aolep men kar ba ak kōm̧m̧ani jān doulul ko ak kajjojo armej rej kōm̧m̧ani men ko rem̧m̧an ak ilo m̧ool rejjab. Waanjon̄ak kein rejjab kwaļo̧k bwe Anij ej im̧we elōn̄ doulul ko im kajjojo armej n̄an kōm̧m̧an eļap em̧m̧an. Ej barāinwōt kwaļo̧k bwe elōn̄ļo̧k kōj me em̧ōj an jepļaaktok aikuj in kile em̧m̧an eo kōm̧m̧ane jān ro jet im rejtake ilo an wōr ad iien im jipan̄ ko n̄an kōm̧m̧ane.
Erkein jet waanjon̄ak ko an jerbal in jipan̄ eo Kabun̄ in ej rejtake im eo membōr ro im armej ro jet rem̧m̧an im doulul ko rej barāinwōt rejtake kōn iien ko im jāān ko an kajjojo armej rej leļo̧k jān er make:
Ij ijjino kōn anemkwoj in kabun̄. Ilo rejtake menin jej kōm̧m̧ani itok limo ko ad make bōtaab barāinwōt itok limo ko an kabun̄ ko jet. Āinwōt an Būreejtōn eo ad jinoin tata, Josep Smith, kar katakin, “Kōmij kwaļo̧k bwe ewōr am jim̧we in kabun̄-jar n̄an Anij Ekajoor Bōtata ekkar n̄an bōklōkōt ko an koļmānļo̧kijeņ ko am make, im kōtļo̧k aolep armej ejja jim̧we in wōt, er ren kabun̄-jar ilo wāween eo, jikin eo, ak ta eo rej kāālete.”10
Waanjon̄ak ko jet an humanitarian an Kabun̄ in me em̧ōj an jepļaaktok im kein jipan̄ ko jet me rej barāinwōt itok jān membōr ro ad rej jikuuļ ko ad rebun̄bun̄, college ko, im university ko im jipan̄ ko ad jab jeļā kaki rej kiiō waļo̧k ke reļļap n̄an kōmeraiki ro rej en̄taan jān kakkure ko im ejjeļo̧k jikier kōn jorrāān in mejatoto āinwōt aire in mejatoto im m̧akūtkūt in laļ ko.
M̧akūtkūt in jipan̄ ko an membōr ro ad rej rejtak jān kein jipan̄ ko aer make im kijejeto ko jet rekanooj in ellōn̄ n̄an kōllaajraki, ak baj kwaļo̧ki wōt jet enaaj elmakote lōn̄ in kain im aorōkier: tariņaeik an armej le laļ im kalijōkļo̧k ko jet; ekkatak kōn ekōjkan bōbrae im kemour nan̄inmej ko; jipan̄ ro ewōr utam̧we ilo ānbwin; rejtake doulul ko an al; im kōkōm̧anm̧anļo̧k peļaak eo erreo im ānbwin n̄an aolep.
Aolep kijejeto ko an humanitarian an Kabun̄ eo an Jisōs Kraist im Armej ro Rekwojarjar ilo Raan Ko Āliktata rej pukōt n̄an ļoor waanjon̄ak eo an juon armej ejim̧we kar kōmeļeļeik ilo Bok in Mormon: “Im āindein, ilo wāween kein aer m̧weie raar jab jilkinļo̧k jabdewōt eo eaar keelwaan, ak ro raar kwōle, ak ro raar maro, ak ro raar nan̄inmej, … im raar … meanwōd n̄an aolep, rūtto im dik jim̧or, riatajinemjen im rianemkwōj jim̧or, m̧aan im kōrā jim̧or, men̄e ilikin kabun̄ eo ak ilowaan kabun̄ eo.”11
Ij kam̧ool kōn Jisōs Kraist, eo meram im Jetōb eo an ej tōl aolep ajri ro nejin Anij ilo jipan̄ rijeram̧ōl im rien̄taan ipelaakin laļin. Ilo etan Jisōs Kraist, amen.