Kepaakļo̧k Rilo̧mo̧o̧r
Kappukōt n̄an jeļā im iakwe Rilo̧mo̧o̧r, jej kōjeņo̧ļo̧k kōj jān laļin ilo bujen ko ippān Anij, ilo m̧wil, oktak, im jenolo̧k, ilo ad jab kōjenolo̧k kōj make jen ro jet ro eoktak tōmak ko aer.
Ro jeiū im jatū rejitōnbōro, ilo jotenin ij kōnono n̄an ro rettā im retiljek rikaļoor ro an Jisōs Kraist. Ilo aō loe em̧m̧an eo ilo mour ko ami im ami tōmak ad Rilo̧mo̧o̧r ijin ilo aelōn̄ in im ilo aolepen laļ ko ipeļaakin laļin, eļapļo̧k aō iakwe kom̧.
Tūrinļo̧k jem̧ļo̧kin jerbal in karejar eo An, rikaļoor ro an Jisōs rekar kajjitōk Ippān n̄an kwaļo̧k n̄an er “kakōḷḷan [Itok eo an Kein Karuo] im jeṃḷọkin laḷ.”1
Jisōs ekar ba n̄an er men ko renaaj waļo̧k m̧okta jān jepļaaktok eo An im kar kajem̧ļo̧k ilo an ba, “n̄e kom̧ij lo men kein otemjej, [konaaj] jeļā bwe [iien] ej e paak.”2
Ilo kweilo̧k eo eļap m̧oktaļo̧k, ikar lukkuun ron̄jake naan ko an Būreejtōn Henry B. Eyring: “Kajjojo iaad,” ekar ba, “jabdewōt jikin jej pād ie, jej jeļā bwe jej mour ilo an ļapļo̧k kauwōtata ilo raan kein āliktata. … Jabdewōt mej ko n̄an loe kōkaļļe ko an iien im lo̧jiln̄i n̄an ron̄ naan ko an rikanaan ro rejeļā bwe em̧ool men in.”3
Rilo̧moor ekar jiron̄ rikaloor ro An reperan: “A e m̧ōņōņō mejemi bwe rej lo: im lo̧jilņōmi bwe rej ron̄.”4 Kōm̧m̧an bwe kōjeram̧m̧an in en ad ilo ad ron̄jake epaakeļo̧k naan ko an Irooj jān rikanaan ro An im ro jet ilo kweilo̧k in.
Wit im Tāō
Irooj ekar kōmeļeļeik bwe ilo iien eo āliktata m̧okta jān An jepļaaktok, bwe “wit,” eo E ej kōmeļeļeik āinwōt “ro nejin aelōn̄ in lan̄,”5 naaj eddōk tūrin ippān “tāō ko,” ak ippān ro rejjab iakwe Anij im rejjab kōjparok kien ko An. Renaaj “jim̧or eddek”6 tūrin doon.
Menin enaaj laļ eo ad m̧ae iien Rilo̧mo̧o̧r enaaj jepļaaktok, ippān eļap em̧m̧an im eļap nana ilo kajjojo kona ko.7
Jet iien kwomaron̄ jab en̄jake ke kwo kajoor āinwōt keen juon wit. Kijenmej ippam̧ make! Irooj ekar ba bwe wit eo ekoba bōlōkin wit ko me rej eon̄ tok.8 Kōj jej aolep Armej ro An Rekwojarjar ilo Raan Ko Āliktata, im mekarta ejjab aolep in ta eo jekōņaan erom̧, jej m̧ool ilo ikideelel eo ad n̄an erom̧ rikaļoor ro An rem̧ool.
Kōkajoorļo̧k Tōmak eo Ad ilo Jisōs Kraist.
Jej kile bwe ilo an nana lapļo̧k ilo laļin, jetōb in mour, im jetob in mour eo an ro jej iakwe er, enaaj aikuj bwe en lapļo̧k ad kajiririki; kapen, im kōkajoor o̧kar in tōmak eo ad ilo Jisōs Kraist. Rijilōk Paul ekar ko̧o̧njeļ e kōj n̄an pād wōt,9 tōt im pen10 ilo iakwe eo ad n̄an Rilo̧mo̧o̧r im ad kōttōpar edim n̄an ļoor E. Rainin im raan ko im̧aan rej aikuj eļap ron̄jake im lukkuun lale ilo kijejeto, mejmejkaruo ņae etal jān iaļ eo, jab kea, im jab kōm̧anm̧an.11
Ak barāinwōt kōn eļapļo̧k kapo ko an laļ in ipeļaakid, jej jab aikuj mijak. Irooj ejjāmin etaļ jān armej in bujen ro An. Ewōr men eo enaaj bōk jikin kajoor in menin letok eo an jetōb im tōl ekwojarjar n̄an ro retiljek.12 Menin ej kobaik kōjeraam̧m̧an eo an kajoor eo an jetōb, bōtaab, ejjab itok iood wōt kōnke jej m̧ōttan epepen in. Ej itok ilo ad kōkajoor ad tōmak ilo Irooj Jisōs Kraist im kōjparok aolepen kien ko An, ilo ad itok n̄an jeļā kōn E im iakwe E. “Men in ej mour indeeo,” Jisōs ekar jar, “bwe ren jeļā kwe juon wōt Anij e m̧ool, im Jisōs Kraist, eo kwaar jilkintok.”13
Ilo ad aolep jeļā, tōmak ilo Jisōs Kraist im erom̧ rikaļoor em̧ool eļapļo̧k jān juōn kālet eo jej kōm̧m̧ane juōn kōttan—ej juōn em̧akūtkūt eļapļo̧k jān juōn kōttan. Ej juōn jerbal ekwojarjar im ej wōnm̧aanļo̧k wōt eo me ej eddōk im ļapļo̧k ilo aolep iien mour ko ad, wōnm̧aanļo̧k m̧ae iien eo jenaaj bukwelōlō ilo Neen.
Kōn wit in me ej eddōkļo̧k ilbwiljin tāō ko ilo laļ in, ewi wāween ad kam̧wūlaļļo̧k im kōkajoorļo̧k ad wūjlepļo̧k n̄an Rilo̧mo̧o̧r ilo raan ko im̧aan?
Erkein rej jilu ļōmņak ko:
Kōmaat Ad ilo Mour eo an Jisōs Kraist
Kein kajuōn, jemaron̄ bōk koņaad make eļapļo̧k n̄an mour eo an Jisōs, katakin ko An, uteij eo An, kajoor eo An, im en̄taan in pinmuur eo An. Rilo̧mo̧o̧r ekar ba, “Reitok n̄an Eō ilo ļōmņak otemjeļo̧k.”14 Rijilōk Jon ej kakeememej kōj, “Jej yokwe e, bwe Ear yokwe kōj m̧okta.”15 Ilo an em̧m̧anļo̧k ad en̄jake iakwe eo An, jej iakwe E eļapļo̧k wōt im, juon imminene, em̧m̧anļo̧k ad ļoor waanjon̄ak in iakwe im kea eo An n̄an ro rej pād ipeļaakid. Kōn aolep em̧akūtkūt ko rejim̧we n̄an E, jej lo E eļapļo̧k an alikkar.16 Jej m̧ōņōņō kake E, im jej kajjeon̄ ilo wāween ko ad reddik n̄an ļoore E.17
Kōm̧m̧ani Bujen Ko ippān Irooj
Kein karuo, ilo an em̧m̧anļo̧k ad jeļā im iakwe Rilo̧mo̧o̧r jej kōņaan eļapļo̧k n̄an kallim̧ur n̄an E ad m̧ool im lōke. Jej kōm̧m̧an bujen Ippān. Jej jino kallim̧ur ko ad ilo iien peptaij, im jej kapen kallim̧ur kein im ko jet ilo ad ukweļo̧k aolep raan, kajjitōk jeorļo̧k bōd, im kijooro n̄an kōņaan bōk kwojkwoj eo kajjojo wiik. Jej kallim̧ur n̄an “keememej E iien otemjej, im kōjparok kien ko An.”18
N̄e jej pojak, jej dāpij kain̄i ko im bujen ko an tampeļ. En̄jake im̧we eo an indeeo ilo iien ko rekwojarjar, iien ko relūr ilo m̧weo im̧ōn Irooj, jej m̧ōņōņō ilo kōm̧m̧ani bujen ko ippān Anij im kōkajoor uwaak ko ad n̄an kōjparoki.
Kōm̧m̧ani im kōjparok bujen ko rej kōtļo̧k iakwe eo an Rilo̧mo̧o̧r n̄an m̧wilaļļo̧k ilo būruer. Ilo Liaona eo an allōn̄ in, Būreejtōn Russell M. Nelson ekar ba: “[Ad] bujen (ko) enaaj tōlļo̧k kōj epaakeļo̧k im epaakeļo̧k wōt n̄an E. … Anij ejjāmin naaj kōjerwawaiki jemjerā eo An ippān ro me raar riab in jemjerā Ippān.”19 Im āinwōt an Būreejtōn Nelson aiboojoj an kar ba jibbon̄ in, “Kōn aje eo an kajjojo tampeļ kāāl, elōn̄ļo̧k kajoor in anij ej itok n̄an laļ in n̄an kōkajoorļo̧k kōj im n̄an kam̧ōjņo̧ikļo̧k kijejeto ko rekajoorļo̧k an rikapo eo.”20
Jej ke loe etke Irooj ej tōl rikanaan eo An n̄an bōktok m̧ōko m̧ōn Irooj epaake tok n̄an kōj im kōtļo̧k ad ikkutkut ad pād im̧weo Im̧ōn?
Ilo ad deļo̧n̄e m̧weo im̧ōn Irooj, jej anjo̧ jān aolep kapo ko an laļin rej koboob ipped ilo ad ekkatak un eo an ilo mour in im menin letok eo indeeo letok n̄an kōj ilo ad Rilo̧mo̧o̧r, Jisōs Kraist.
Onaake Menin Letok eo an Jetōb Kwojarjar
Āliktata, ļōmņak eo aō kein kajilu: ilo iien kappukot in ekwojarjar, jej kaorōk, kōjparok, jojomar, im onaake menin letok eo an Jetōb Kwojarjar. Jim̧or Būreejtōn M. Russell Ballard m̧okta im Elder Kevin W. Pearson jejjo iien remootļo̧k rekar kōnono kōn kanaan in kakkōl an Būreejtōn Nelson me inaaj bar āliji: “Enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”21 Ej juon menin letok jān Anij. Jej kajjeon̄ jon̄an ad maron̄ n̄an kōjparok en̄jake ko ad kajjojo raan bwe im̧we an Jetōb Kwojarjar en pād wōt ipped. Jej juōn meram n̄an laļ, im n̄e aikuji, jej kōņaan kālet bwe jen oktak jān ro jet. Būreejtōn Dallin H. Oaks ekar kajjitōk ippān rūm̧m̧an ded ro: “Kwoj ke kōņaan oktak? … [Eļaptata] an aorōk … rej jokāālet ko kwoj kōm̧m̧ani ilo mour eo am make. … Kwoj ke etal wōt ņae jum̧ae ko an laļin?”22
Kālet n̄an Oktak jān Laļ in
Ilo juōn social media post, ikar kajjitōk ippān rikaļoor ro m̧ōtta n̄an kwaļo̧k kālet ko rekar kōm̧m̧ani eo ekar menin aikuj n̄an er n̄an oktak jen laļin. Ikar bōk bukwi uwaak ko.23 Erkein jet iaer:
Amanda: N̄aij juōn nūrse ej jerbal ilo juōn jikin kalibuuj. Ij kajjeon̄ n̄an lale rikalibuuj rein āinwōt an Kraist naaj kar kōm̧m̧ane.
Rachel: Ij juōn rial ilo opera, im ekkā kijōr bōke ilo ejjeļo̧k kea bwe ij aikuj kōņak jabdewōt nuknuk rej letok, jekdoon karbōb ak jaab. [Kōnke em̧ōj aō bōk menin letok kwojarjar,] ikar ba n̄an [ro rej tōl] bwe nuknuk eo ej aikuj [karbōb]. Rekar jab m̧ōņōņō … ak kar kajjeon̄ n̄an kōm̧m̧an oktak ko. Ijjāmin ukōte aenōm̧m̧an eo ej itok jen jutak āinwōt rikam̧ool an Kraist ilo aolep iien.
Chriss: Ij juōn rikadōk (eo em̧ōj aō joļo̧k), erreo n̄an deļon̄e tampeļ, membōr in Kabun̄ in. N̄aij jab noje en̄jake ko aō kōn anūrlep im bōk juōn naan in kam̧ool kōn Pinmuur eo an [Jisōs Kraist].
Lauren: Ikar je juon tietta ippān rijikuul ro ilo kilaaj eo aō ilo high school. Rekar kōņaan bwe m̧wil eo aō en jab keroro, ak en kajju ebōkak kōn naan in kanijnij ko. Rekar boje n̄a, ak ikar jab kōņaan im ikar jutak pen.
Adam: Elōn̄ armej rejjab tōmak e n̄a n̄e ij ba ij kōjparok kien erro im kāālet n̄an bōbrae eō jān pija ko renana. Rejjab meļeļe kōn em̧m̧an eo an lan̄lōn̄ im aeņōm̧m̧an in ļōmņak me ej letok n̄an eō.
Ella: Jema ej membōr in jukjuk in ped eo an LGBTQ. Ij aolep iien kajjeon̄ n̄an kōjparok en̄jake ko an ro jet ilo aō jutak āinwōt rikam̧ool an Kraist im m̧ool n̄an ta eo ij tōmak.
Andrade: Ikar wōnm̧aanļo̧k n̄an etal im jar ke baam̧le eo aō ekar kālet n̄an jab bar etal.
Im āliktata, jān Sherry: Jekar pād ilo juōn iien eļap ilo m̧weo ekilep m̧ōn juon govenor. Rekar jino ajeej champagne n̄an leļo̧k juōn “kōjeraam̧m̧an.” Ikar kōņaan aibōj, men̄e rijerbal ro rekar ba enaaj menin jaje m̧anit. Kōm ekar kōjeraam̧m̧an rikien eo, im ikar kotak kap kilaaj in aiboj eo nimō lōn̄ļo̧k! Govenor eo ekar jab illu.
Būreejtōn Nelson ekar ba, “Aeet, kwo pād ilo laļ in, ak ewōr jon̄ak ko ippam̧ roktak jān laļ in n̄an jipan̄ eok kōjekdo̧o̧n libijinjin ko an laļ in.”24
Anastasia, juōn m̧am̧a eo em̧m̧an drettan ilo Ukraine, eo ekar pād ilo aujpitoļ ej kab m̧ōj an kieotak juon nin̄nin̄ ļaddik ilo aer kar jino baam̧ e ijo ilo Kyiv ilo Pāpode eo kiiō. Juōn nurse ekar kōpeļļo̧k kōjem eo an aujpitōļ im ba kōn juōn ainikien ekairir, “Bōke nin̄nin̄ eo nejūm̧, kūtimi kōn juon būļan̄kōj, im iwōj n̄an etōņaak ņe—kiiō!”
Tok ālik, Anastasia ekar kakkobaba:
“Ikar jab pijaiki ļo̧k an raan ko jinoin tata in juōn m̧am̧a en kar lukkuun pen, … ak ij pedped ilo … kōjeraam̧m̧an ko im kabwilōn̄lōn̄ ko ikar loi. …
“Kiiō, … emaron̄ pen n̄an jeorļo̧k bōd an ro rekar kōm̧m̧an eļap kakkure im joreen … , ak āinwōt juon rikaloor an Jisōs Kraist, ewōr aō tōmak ke inaaj maron̄ [jeorļo̧k bōd]. …
“Ijjab jeļā ta eo enaaj waļo̧k ilju im jekļaj … ak ijeļā bwe dāpij bujen ko ad enaaj kōtļo̧k bwe Jetōb en wōnm̧aanļo̧k n̄an pād ipped, … kōtļo̧k kōj n̄an en̄jake m̧ōņōņō im kōjatdikdik, … men̄e ilo iien ko reppen.”25
Kallim̧ur eo an Mour Indeeo im Aiboojoj eo an Selestial.
Ro jeiū im jatū, eļap aō jeram̧m̧an n̄an bōk eļap iakwe an Rilo̧mo̧o̧r ejitōnbōro, Jisōs Kraist. Ijeļā bwe E ej mour im ej tōl jerbal in An ekwojarjar. Ejjelok naan ko n̄an kōmeļeļeik aō kam̧m̧oolol n̄an E.s
Kōj jej aolep “ajri in bujen” errerakļo̧k ipeļaakin laļ in ilo laļ ko im manit ko ilo aolep kantinent, bōnbōn ippān milien armejj ro, ilo ad kōttar jepļaaktok eo eaibojooj an Irooj im Rilo̧mo̧o̧r. Romaak āinwōt meram eo n̄an ro ipeļaakid, kemourur ikideelel ko ad, ļōmņak ko ad, kālet ko ad, im m̧akūtkūt ko ad. Kappukōt kōn aolepen būruer n̄an jeļā im iakwe Rilo̧mo̧o̧r, jej kōjeņo̧ļo̧k kōj jān laļin ilo bujen ko ippān Anij, ilo m̧wil, oktak, im jenolo̧k ilo ad kauteij E im katak ko An ilo ad jab kōjenolo̧k kōj make jen ro jet ro eoktak tōmak ko aer.
Ej juon iaļ eaiboojoj n̄an erom̧ wit ilubwijin tāō ko, jet iien inepata kōn metak bar, ak aolep iien jej lūr kōn kajoor im lōke edim kōn tōmak eo ad. Ilo am̧ kōtļo̧k bwe iakwe eo am̧ n̄an Rilo̧mo̧o̧r im iakwe eo An en m̧wilaļļo̧k ilo būruom̧, ij kallim̧ur eok kōn eļapļo̧k peran, im aenōm̧m̧an, im lan̄lōn̄ ilo iooni apan̄ ko an mour eo am̧. Im Rilo̧mo̧o̧r ej kallim̧uri kōj: “[Inaaj] aikuj aiintok ippān doon armej ro Aō, ekkar n̄an būrabōļ in wiit im tāō ko, bwe wiit ko ren maron̄ koņ ilo jikin ko̧koņ ko n̄an bōk aer mour indeeo, im kūrawūn kōn aiboojoj in selestial.”26 Ilo etan Jisōs Kraist, amen.