Jon̄ak ko an Rikaļoor
Ekkatak kōn Kraist im wāween eo An rej tōl kōj n̄an jeļā im n̄an iakwe E.
Jon̄ak an Tōmak
Kiiō jibbon̄ ajri ro ruo nejim im ajri ro jilu jibum ilo North America im emaron̄ jimettan in laļ in, raar lo meram in an aļ tak ekabwilōn̄lōn̄ ilo turear. Ajri ro jilu nejim jet im ajri ro jiljijlimjuon jibum ilo Africa, im jimettan in turājet in laļ in, raar lo marok jidik kōn jidik itok ioeer ke aļ eo ekar jakoļo̧k ikapin lan̄ iturilik.
Laajrak in iien in ejjab oktak an jerkan raan im bon̄ ej juon kakeememej raan otemjej kōn m̧ool ko me rej kakien mour ko ad me rejjab maron̄ oktak. N̄e jej kautiej im kōjejjet wōt ta eo jej kōm̧m̧an ippān m̧ool ko an indeeo, jej en̄jake aenōm̧m̧an im inem̧m̧an itulowa. N̄e jejjab, jejjab aeņōm̧m̧an, im men ko rejjab jerbal ilo ad kōtmene.
Raan im bon̄ ej juon waanjon̄ak in jon̄ak ko me Anij ekar litok n̄an aolep ro me raar mour ioon laļ in, kōn men ko kōkm̧anm̧ani ilo lukkun jekjekier. Ej juon m̧ool eweepān kōn ejaak in armej me jejjab maron̄ pepe kake ekkar n̄an ikdeelel ko ad make im joor jān e. Ij keememej kōn menin aolep iien ij iuwe ilo baļuun jān Africa n̄an itok n̄an kweilo̧k eo eļap, bar kajim̧we awa eo aō likļo̧k kōn 10 awa ilo juon raan.
Jabdewōt iien jej kea n̄an kile, jej lo bwe Jemedwōj Ilan̄ ekar letok n̄an kōj ebwe rikam̧ool ro kōn m̧ool eo n̄an kakien mour ko ad bwe jen jeļā E im bōk kōjeraam̧m̧an ko in aenōm̧m̧an im lan̄lōn̄.
Kōn Rikanaan Josep Smith, Jetōb eo an Irooj ej kean̄: “Im bar juon alen, I naaj lewōj n̄an kom̧ juon jon̄ok ilo aolep men kein, bwe kom̧in maron̄ jab po ilo m̧oņ; bwe Setan eajeeded ilo āne eo, im ej ilo̧k im m̧oņe laļ ko.”1
Korihor antai-Kraist eo ekar deļo̧n̄ ilo kain m̧oņ in, jab tōmak ke ewōr Anij im itok eo an Kraist. Kōn Rikanaan Alma ekar kwaļo̧k an kam̧ool, “Men otemjeļo̧k rej kam̧ool ewōr juon Anij; aaet, em̧ool laļ in, im aolep men otemjeļo̧k ioon mejān, aaet, im an m̧akūtkūt, aaet, im barāinwōt aolep planet rej em̧m̧akūt ilo iaļ ko karōki rej kam̧ool bwe ewōr juon Rikōm̧anm̧an Ekajoor Bōtata.”2
Ke Korihor ekar akweļap n̄an leļo̧k juon kakōļļe m̧okta jān an maron̄ tōmak, Alma ekar kōm̧m̧an bwe en im̧ōke im jab kōnono. Kar ettā kōn en̄taan in an, Korihor ekar kwaļo̧k kōn an kar po ilo m̧oņe ko an devil.
Jejjab aikuj in po ilo m̧oņ. Kabwilōn̄lōn̄ eo an menin kōm̧anm̧an ko rejjab bōjrak an waļo̧k im̧aad. Im ad kalimjōk im kejekļo̧kjeņ ioon mennin bwilōn̄ ko an lan̄ ko kar kwaļo̧k kōn bōjin iju ko im galaxy ko rej im̧we jetōb eo an bōro ko rej tōmak n̄an kean̄, “Aō Anij, … Eļap Am̧ Em̧m̧an!”3
Aaet, Anij Jemedwōj Ilan̄ ej mour, im E ej kwaļo̧k E make n̄an kōj aolep iien ilo elōn̄ wāween ko.
Jon̄ak in Ettā
Ak n̄an kile, tōmak, im wōnm̧aanļo̧k wōt ilo Anij, būruōd ej aikuj in m̧ōņōņō in bōk Jetōb in m̧ool. Alma ekar katakin bwe tōmak ej itok im̧aan ettā.4 Mormon ekar kakkobaba bwe epen n̄an jabdewōt eo me ejjab “ineem̧m̧an im ettā ilo bōro” n̄an wōr tōmak im kōjatdikdik im n̄an bōk Jetōb eo an Anij.5 Kiin̄ Benjamin ekar kean̄ bwe jabdewōt eo me ej kaorōk aiboojoj eo an laļ in ej “rikōjdat n̄an Anij.”6
Ilo ad ajeļo̧k kōj n̄an peptaij n̄an kakūrm̧ool aolep jim̧we em̧ool jekdo̧o̧n E ekar jim̧we im kwojarjar, Jisōs Kraist ekar kwaļo̧k bwe ettā im̧aan Anij ej juon pedped in m̧wil an rikaļoor ro An.7
Aolep rikaļoor ro rekāāl emenin aikuj n̄an mour ettā im̧aan mejān Anij kōn kain̄i eo an peptaij. Bwe em̧ool, “aolep ro rej kōttāik er im̧aan Anij, im kōņaan peptaij, im wōnm̧aantak kōn bōro ko rerup im jetōb ko rettā … naaj bōk er ilo kabun̄ eo An jān peptaij.”8
Ettā ej kōm̧m̧an bwe būruōn juon armej en kōņaan ukweļo̧k im pokake. Innām Jetōb eo an Anij ej maron̄ bōktok m̧ool eo n̄an bōro eo, im enaaj bōke im kaorōke.9
Ej kōn an ejjeļo̧k ettā me ej kōm̧m̧an an ļapļo̧k an kūrm̧ool kanaan eo an Rijilōk Paul ilo raan kein āliktata:
“Bwe armej ro renaaj yokwe er make, im renaaj ri arōk m̧weiuk, ri juwaļōn̄ļōn̄, ri kajjirere, im ro rej kipiliia n̄an jemeir im jineir, im ro rej jab kam̧moolol, im ri nana,
“Im ro re jab yokwe ro nukier, im ro re lāj, im ro rej kōnnaan naan in riab, ro re jab kōmmaanwa, rawiia, ro rej dike em̧m̧an”10,
Kūr eo an Rilo̧mo̧o̧r n̄an katak Ippān ej juon kūr n̄an oktakļo̧k jān kapo ko an wuj waan ko an laļ in im n̄an erom̧ āinwōt E ej—ineem̧m̧an im ettā bōro, ettā. Innām jemaron̄ bōk iood An ine im lo bwe epidodo—bwe rikaļoor ejjab juon eddo ak juon lan̄lōn̄, āinwōt an Būreejtōn Russell M. Nelson kanooj kar wājepedik im mālij an kar katakin kōj.
Jon̄ak eo an Iakwe
Ekaktak kōn Kraist im wāween eo An rej tōl kōj n̄an jeļā im n̄an iakwe E.
Ekar kwaļo̧ke kōn waanjon̄ak bwe kōn juon m̧wil ettā ej ilo m̧ool pidodo n̄an jeļā im n̄an iakwe Anij Jemed kōn aolepād ad im n̄an iakwe ro jet āinwōt ad iakwe kōj make, jab idādiki. Jerbal in karejar eo An ioon laļ in, eo me Ej likūt jim̧or Anilaan im Āinbwinin ioon lokatok eo, ekar juon jon̄ak n̄an kajjitōk eo an pedped in katak kein eo me lo ilo gospel eo An. Pedped in katak ko jim̧or rej n̄an iakwe Anij im ro jet im rej kōn ekōjkan ad ekkejel n̄an doon, ejjab n̄an pukōt kabun̄ būruōn juon make ak aiboojoj.
Men eo ekabwilōn̄lōn̄ kake ej bwe n̄e jej pedpede kijejeto ko ad ilo iakwe Anij im ro jet, jej maron̄ lo aorōk eo ekwojarjar ad make āinwōt ļaddik ro im leddik ro nejin Anij, kōn aenōm̧m̧an eo edipio im lan̄lōn̄ eo me en̄jake in ej bōktok.
Jej erom̧ juon wōt ippān Anij im ippān doon kōn iakwe im jerbal in jipan̄. Innām jemaron̄ bōk kam̧ool eo an Jetōb Kwojarjar kōn m̧ool eo erreo, leen eo me Liai ej kōnono kake āinwōt “kanooj tōn̄al, ilōn̄in aolep ko [eaar] edjon̄i m̧okta.”11
Kūraun eo me Kraist ekar bōke ilo An kar leļo̧k im kōm̧m̧ani aolep men kōn maron̄ eo An n̄an kōm̧m̧ane jon̄ak in An iakwe Jemān im iakwe kōj ej n̄an bōk aolep kajoor, em̧ool aolep ko an Jemān, eo ej mour āinwōt Anij ilo ijo eutiejtata.12
Iien eo em̧m̧an ad n̄an kōjparok ilo jetōb ko ad juon iakwe indeeo an Anij im an ro rūturid ej ijjino ilo m̧weo kōn imminene ko rekwojarjar ilo ad ekkejel ippān Jemed raan otemjej ilo jar ko ad kajjojo im an baam̧le ilo etan Nejin Jitōnbōro Emake Wōt, ekkatak ippān doon kōn Er ilo ad ekkatak jeje ko rekwojarjar ippād make ak ippān baam̧le, kautiej raan in Jabōt ippān doon, im bōk juon peba in mālim an tampeļ ekāāl, kōmakijkij kōjerbale jon̄an wōt eo jemaron̄.
Ilo ad kajjojo eddōkļo̧k ilo jeļā eo ad im iakwe eo an Jemen im Nejin, jej eddōkļo̧k ilo kam̧m̧oolol im iakwe doon. Maron̄ eo ad n̄an iakwe im jerbal n̄an ro jet ijjeļo̧kin ro ilo m̧weo ej juon ļapļo̧k eļap.
Ta eo jej kōm̧m̧ane m̧weo ej juon m̧ōņakjen em̧ool kōn rikaļoor eniknik im elem̧ōņōņō. Kōjeraam̧man ko rem̧m̧an tata an gospel eo em̧ōj an jepļaaktok me lio pāleeō, Gladys, im n̄a kar m̧ōņōņō kake ilo m̧weo im̧ōm kar itok jān ekkatak n̄an jeļā im n̄an kautiej Anij ilo m̧weo im n̄an kwaļo̧k An iakwe ippān ro ineem.
Jon̄ak eo an Jerbal in Jipan̄
Iakwe Anij im jerbal in jipan̄ n̄an doon rej katakin ilo m̧weo im jerbal in jipan̄ n̄an ro jet itulikin m̧weo ilo iien ej eddōkļo̧k n̄an erom̧ m̧wil an iakwe em̧ool.
Menin ej kwaļo̧k ippān jon̄ak eo an jerbal in jipan̄ ekwojarjar ilo aelōn̄ in kiin̄ eo an Anij me ej kwaļo̧k im̧aad jān rikanaan ro im rijilōk ro remour an Irooj. Jej erom̧ juon wōt ippāer.
Innām jej maron̄ reilo̧k, kōn er, n̄an Irooj “ilo ļōmņak otemjeļo̧k,” bwe jenaaj “jab pere” im “jab mijak.”13
Āinwōt rikanaan ro im rijilōk ro remour an Irooj, jemaron̄ wōnm̧aanļo̧k wōt kōn “aolepān am̧ … obrak kōn iakwe-em̧ool n̄an armej otemjeļo̧k, im n̄an nukwin eo an tōmak, [kōn] erreo en kainōknōk ļōmņak ko [ad] ilo ejjeļo̧k m̧wijkōk; … [im ad] peran enaaj kanooj [in] kajoor ilo im̧aan mejān Anij; [innām ad] peran enaaj kanooj kajoor ilo im̧aan mejān Anij; im katak in priesthood eo … enaaj wōt-dikdiki am āinwōt m̧ōļawi jān lan̄.”
Kōn rikanaan ro im rijilōk ro remour an Irooj, jemaron̄ barāinwōt koba ilo juon doulul in tōmak kar kōkajoorļo̧k jān jerbal in jipan̄ ekwojarjar eo me “Jetōb Kwōjarjar [ej m̧ōttad] iien otemjeļo̧k, [jokoņad] [ej] juon jokoņan wānōk im m̧ool; ej jab ukoktak; mo̧jen eo [ad] [ej] juon mo̧jen ejjeļo̧k jem̧ļo̧kin, im kōn ejjeļo̧k wāween kipel ko [ej] to̧o̧rwaj n̄an [kōj] indeeo im indeeo.”14 Kōn menin ej kallim̧ur eo an karōk eo an Jemed. Ilo etan Jisōs Kraist, amen.