Ta In M̧ool?
Anij ej unjen m̧ool ko otemjej. Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kaorōk aolep m̧ool ko me Anij ej letok n̄an ajri ro Nejin.
Ro jeiū im jatū jitōnbōro, kom̧m̧oolol n̄an aolep kōn m̧wen̄an in eim̧we! Jān kar kweilo̧k eo ad Eprōļ eo ļo̧k, jekar kam̧oole elōn̄ m̧akūtkūt ko, rooktak jān doon jān men ko rōkabūrom̧ōjm̧ōj n̄an ko rekam̧ōņōņō.
Jej lo̧udin̄din̄ kōn riboot eo kōn kweilo̧k ko reļļap an jodikdik ro kar kōm̧m̧an ilo aolepān laļ in.1 Ilo kweilo̧k kein, jodikdik ro nejid rem̧m̧an rej ekkatak bwe jekdo̧o̧ņ ta ej waļo̧k ilo mour ko aer, kajoor eo aer eļaptata ej itok jān Irooj.2
Jej lan̄lōn̄ bwe elōn̄ļo̧k tampeļ ko rej ekkal ilo aolepān laļ in. Kōn aje eo an kajjojo tampeļ kāāl, elōn̄ļo̧k kajoor in anij ej itok n̄an laļ in n̄an kōkajoorļo̧k kōj im n̄an kam̧ōjņo̧ikļo̧k kijejeto ko rekajoorļo̧k an rikapo eo.
Kakkure (abuse) ej juon kakōļļe in kareel eo an rikapo eo. Ej juon jerawiwi elukkuun nana.3 Āinwōt Būreejtōn an Kabun̄ in, ij kean̄ kōn katak ko an Irooj Jisōs Kraist kōn unin kōnono in. In lukkuun in kalikkar: jabdewōt kain kakkure (abuse) n̄an kōrā ro, ajri ro, ak jabdewōt ej juon kajōjō n̄an Irooj. E ej liājļōļ im ij liājļōļ n̄e rej kakkure jabdewōt armej. E ej būrom̧ōj, im jej aolep būrom̧ōj kōn kajjojo armej ro raar rijorrāān jān kakkure (abuse) ilo jabdewōt wāween. Ro me rej kōm̧m̧an jerbal kein renana rejjab bōk wōt eddo kōn kakien ko an armej ak renaaj bar jelm̧ae illu eo eļap an Anij Ekajoor.
Ium̧win jon̄oul iiō kiiō, Kabun̄ in ekar kōm̧m̧an bun̄tōn ko reļļap n̄an kōjparok—eļap tata—ajri ro jān kakkure (abuse). Elōn̄ kein jipan̄ ko ilo website eo an Kabun̄ in. Ij kajjitōk ippāmi n̄an ekkatak kaki.4 Unin tōl kein rej kōm̧m̧ani n̄an kōjparok ro ejjeļo̧k ruwer. Ij libūjerjer kajjojo iaad n̄an ekkōl kōn jabdewōt eo me emaron̄ in pād ilo kauwōtata jān kakkure (abuse) im n̄an m̧ōkaj in bōbrae er. Rilo̧mo̧o̧r ejjamin naaj kōtļo̧k kakkure (abuse), im āinwōt rikaļoor ro An, jejjab bar maron̄.
Rikapo eo ebar wōr an kōtōbalbal rekabūrom̧ōjm̧ōj. Ibwilijier rej kijejeto ko an n̄an katinaad ikōtaan ta in m̧ool im ta eo ejjab m̧ool. Kōn lōn̄ in meļeļe ko rej pojak n̄an ad būki, ekaitoktok limo, ekōm̧m̧an an ļapļo̧k an pen n̄an jeļā ta in m̧ool.
Idajon̄jon̄ in ekakeememej eō kōn juon en̄jake Sister Nelson im n̄a kar bōk ke kōm kar loļo̧k juon riutiej ilo juon laļ ijo ebwe an iiet armej ro raar ron̄ kōn Jisōs Kraist. Ļein m̧ōttam erūtto ejjab to ekar bwe an nan̄inmej. Ekar jiron̄ kōm bwe ilo raan ko rellōn̄ ioon jikin an kiki, ekkā an kalimjōk jiļiin̄ eo im kajjitōk “Ta in m̧ool?”
Elōn̄ ioon laļ in rainin “rej dāpiji er jān m̧ool eo kōnke rej jab jeļā ia eo ren pukōte ie.”5 Jet rej kōņaan bwe jen tōmak bwe m̧ool eo ej pedped ioon armej eo—bwe kajjojo armej rej aikuj kāālet kōn e make ta in m̧ool. Kain tōmak rōt in ej atooneļo̧k n̄an ro me ebōd aer ļōmņak ilo aer likūt bwe eban wōr ruōn ippān Anij.
Ro jeiū im jatū jitōnbōro, Anij ej unjen aolep m̧ool otemjej. Kabun̄ eo an Jisōs Kraist im Armej ro Rekwojarjar ilo Raan Ko Āliktata rej kaorōk aolep m̧ool me Anij ej litok n̄an ajri ro Nejin, men̄e ekkatak ilo juon scientific laboratory ak kar būki kajju kōn revelesōn jān E.
Jān jikin kōnono in rainin im ilju, kom̧ naaj wōnm̧aanļo̧k n̄an ron̄jake m̧ool. Jouj im je kein kakeememej ko kōn ļōmņak ko me rōļujur eok im ko me rej itok n̄an ļōmņak eo am̧ im pād ilo būruōm̧. Jar ilo kajjitōk ippān Irooj n̄an kapene ta eo kwar ron̄ em̧ool.
Ij iakwe kom̧, ro jeiū im jatū jitōnbōro. Ij jar bwe kweilo̧k in enaaj lewaj m̧ōn̄ā in jetōb eo kom̧wij pukōte. Ilo āt eo ekwojarjar etan Jisōs Kraist, amen.