Mōņōņō eo Indeeo

Jān Elder Gerrit W. Gong

Jān Doulul eo an Jon̄oulruo Rijilōk ro

Lan̄lōn̄ em̧ool im ejjeļo̧k jem̧ļo̧kin im mour indeeo ippān ro jej iakwe er rej lukkun bōjān ko raorōk ilo karōk in m̧ōņōņō eo an Anij.

Ro m̧ōtta, būratōr ro im sister ro rejitōnbōro, kwoj ke keememej am̧ kar tōmak, ak kōņaan tōmak, ilo m̧ōņōņō ejjeļo̧k jem̧ļo̧kin?

Innām men ko ilo mour in rej bōk jikier. Jej “rūttoļo̧k.” Jemjerā ko rej penļo̧k. Laļ in ekauwaron̄ron̄, etilieon̄eon̄, ekipel, kōn ankiliriab im tōl pilo. Ak, ilo“ikdeelel ko rekajoor ad,”¹ jej tōmak, ak jej kōņaan tōmak, juon jikin, juon jekjek, m̧ōņōņō eo aitok kitien rem̧oo im remaron̄ bōk jikier.

“M̧ōņōņō eo indeeo” ejjab juon men jej pijaikļo̧k ilo inon̄ ko. Lan̄lōn̄ em̧ool im ejjeļo̧k jem̧ļo̧kin im mour indeeo ippān ro jej iakwe er rej lukkun bōjān ko raorōk ilo karōk in m̧ōņōņō eo an Anij. Iaļ eo An em̧m̧an kar kōpooje emaron̄ kōm̧m̧an bwe iaļ eo ad indeeo en lem̧ōņōņō im en n̄an indeeo.

Eļap ijo jen m̧ōņōņō kake im eļap ijo me jej kam̧m̧oolol kake. Ijoke, ejjeļo̧k iaad eweeppān, im ejjeļo̧k baam̧le eweeppān. Kadkad ko ad ekoba iakwe, ikitōltōl, im bōnjād bōtaab emakijkij an barāinwōt idaaptōk, kōmmetak, jet iien kanooj metak.

“Bwe āinwōt ilo Adam ro otemjej rej mej, āindein barāinwōt ilo Kraist ro otemjej re naaj mour.”² Mour ilo Jisōs Kraist ekitbuuj mour jab wabanban—An menin letok kōn jerkakpeje eo an ānbwiniid. Ilo ad mour kōn tōmak im pokake, mour ilo Kraist emaron̄ barāinwōt kitbuuj lan̄lōn̄ eļap eo an mour indeeo ippān Anij im ro jej iakwe er.

Ilo juon wāween ekabwilōn̄lōn̄, rikanaan eo an Irooj ej kepaakļo̧k kōj n̄an ad Rilo̧mo̧o̧r, ekoba kōn kain̄i ko an tampeļ rekwojarjar im bujen ko repaakeļo̧k kōj ilo elōn̄ļo̧k jikin ko. Ewōr juon ad iien em̧m̧an im eļap im menin letok n̄an bōk jeļāļo̧kjeņ ekāāl ilo jetōb, iakwe, ukweļo̧k, im jeorļo̧k bōd n̄an doon im baam̧le ko ad, ilo iien in im indeeo.

Kōn mālim, ij kwaļo̧k ruo en̄jake ko rekwojarjar im rej kōn mour in jetōb jān ro m̧ōtta kōn an Jisōs Kraist kobaik baam̧le ko ilo An kōmour metak eo eto an pād ium̧win epepen.³ “Indeeo im ejjeļo̧k jem̧ļo̧kin,”⁴ “kajoorļo̧k jān tomede ko an mej,”⁵ Pinmuur eo an Jisōs Kraist emaron̄ jipan̄ kōj bōktok aenōm̧m̧an kōn mour ko ad m̧okta im kōjatdikdik n̄an ilju im jekļaj eo ad.

Ke raar kobatok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, eo m̧ōtta im ļeo pāleen raar lan̄lōn̄ ilo aer ekkatak bwe jemjerā ko an baam̧le rejjab aikuj “m̧ae iien juon iaad enaaj mej.” Ilo m̧weo im̧ōn Irooj, baam̧le ko remaron̄ koba indeeo (liāp).

Bōtaab eo m̧ōtta ekar jab kōņaan liāp n̄an eo jemen. “Ekar jab ļeo pālele em̧m̧an n̄an jinō. E ekar jab juon baba eo em̧m̧an n̄an ajri ro nejin,” liin ekar ba. “Jema ej aikuj in naaj kōttar. Ebar ejjeļo̧k aō ikdeelel n̄an kōm̧m̧ane jerbal in tampeļ eo an im liāp ippān n̄an indeeo.”

Ium̧win juon iiō, liin ekar jitlo̧k, jar, kōnono eļap ippān Irooj kōn jemen. Āliktata, liin ekar pojak. Jerbal in tampeļ eo an jemen ekar dedeļo̧k. Tokālik, liin ekar ba, “Ke ikar kiki jema ekar waļo̧ktok n̄an n̄a ilo juon ettōņak, ej ekkōņak nuknuk mouj. E ekar oktak. Ekar ba, ‘Reitok n̄an n̄a. Ilukkuun erreo. Kom̧m̧ool kōn am̧ kar kōm̧m̧ane jerbal eo n̄an n̄a ilo tampeļ.’” Jemen ekar kakobaba, “Jerkak im bar ro̧o̧l n̄an tampeļ, būratōr eo am̧ ej kōttar n̄an peptaij.”

Eo m̧ōtta ej ba, “Rūtto ro aō im ro me raar mej rej kijooror ilo kōttar kōn jerbal eo aer n̄an aer dedeļo̧k.”

“N̄an n̄a,” liin ej ba, “tampeļ eo ej juon jikin kōmour, ekkatak, im kile Pinmuur eo an Jisōs Kraist.”

En̄jake eo kein karuo. Bar juon m̧ōtta ekar kappukot ilo tiljek menmenbwij eo an baam̧le eo an. Ekar kōņaan kile eo jim̧m̧an-jemān.

Ilo juon jibbon̄ tata, eo m̧ōtta ekar ba ekar en̄jake an juon armej pād ilo jetōb ilo ruum̧ eo an. Em̧m̧aan eo ekar kōņaan bwe en loe im jeļā kajjien ilo baam̧le eo an. Em̧m̧aan eo ekar en̄jake buromōj kōn juon bōd me ekar kiiō ukweļo̧k jāne. Em̧m̧aan eo ekar jipan̄ eo m̧ōtta kile bwe eo m̧ōtta ekar ejjeļo̧k an DNA koneekjen ippān armej eo, eo me eo m̧ōtta ekar ļōmņak ekar jim̧m̧an-jemān. “Ilo bar juon wāween ba,” eo m̧ōtta ekar ba, Ikar lo etan jim̧m̧an-jema im kar ekkatak ke ekar jab armej eo me rekoot ko an baam̧le eo am ekar ba ke ej jim̧m̧an-jema.”

Jemjerā ko an baam̧le eo an rekar alikkar, eo m̧ōtta ekar ba, “Ikar en̄jake anemkwoj, ilo aenōm̧m̧an. Elukkuun in aorōk n̄an jeļā wōn ro aō baam̧le.” Eo m̧ōtta ej m̧weiur, “Juon ra ebilo̧k ejjab meļeļein wōjke eo enana. Ad bōk menin jeraam̧m̧an ko ad ilo laļ in ejjab kanooj aorōk jān eddōkļo̧k eo jej bōke n̄e jej etal jān mour in.”

Jeje ko Rekwojarjar im en̄jake ko rekwojarjar kōn kōmour im aeņōm̧m̧an an kajjojo armej, ekoba ro rej mour ilo laļ eo an jetōb, rej kōmejajaik ļalem pedped in katak ko.

Juon: Dilep eo an karōk in pinmuur eo im m̧ōņōņō eo an Anij, Jisōs Kraist, kōn Pinmuur eo An, ej kallim̧ur n̄an kobaik jetōb im ānbwin eo ad, “jamin bar ajej, bwe ren maron̄ bōk juon dipio in m̧ōņōņō.”⁶

Ruo: Pinmuur eo—juon wōt ilo Kraist—ej itok ilo ad kōjerbal tōmak im jebar leen ko n̄an ukweļo̧k.⁷ Āinwōt ilo mour wabanban, barāinwōt ilo mour jab wabanban. Kain̄i ko an tampeļ rejjab kōn er make ej ukōt kōj ak ro ilo laļ eo an jetōb. Bōtaab kain̄i kein rekwojarjar rej kōmaron̄ bujen kōkwojarjar ko ippān Irooj, ko me remaron̄ bōktok inem̧m̧an Ippān im ippān doon.

Lan̄lōn̄ eo ad ej erom̧ dipio ilo ad en̄jake jouj an Jisōs Kraist im jeorļo̧k bōd n̄an kōj. Im ilo ad leļo̧k mennin bwilōn̄ kōn jouj eo An im jeorļo̧k bōd n̄an doon, tūriam̧o kake eo jej bōke im tūriam̧o kake eo jej leļo̧k emaron̄ jipan̄ kōm̧man bwe kalijōkļo̧k ko an mour ren jim̧we.⁸

Jilu: Anij eweppān an jeļā kajjied. “Anij e jab likūt bwe ren kajjirere kake,”⁹ ak jab maron̄ m̧oņe E. Kōn tūriam̧o im kajim̧we eweppān, E ej jepooļ rittā im riukweļo̧k ilo pein kōjparok eo An.

Ilo Kirtland Tampeļ, Rikanaan Josep Smith ekar lo ilo visōn ļeo jein Alvin kar lo̧mo̧o̧ren ilo aelōn̄ in kiin̄ an selestial. Rikanaan Josep Smith ekar ļo̧kjen an, kōnke Alvin ekar mej m̧okta jān an bōk kain̄i in lo̧mo̧o̧r eo an peptaij.¹⁰ Ekaeņōm̧m̧an ilo an Irooj kar kōmeļeļeik etke: Irooj “enaaj ekajet [kōj] ekkar n̄an jerbal ko [ad], ekkar n̄an ikdeelel ko an [buruōd].”¹¹ Jetōb ko ad rej kwaļo̧k rekoot eo an jerbal ko im ikdeelel ko ad.

Kōn kam̧m̧oolol, jej jeļā ro remour im “ro remej im rej ukeļo̧k renaaj bōk lo̧mo̧o̧r, kōn pokake n̄an kain̄i ko an m̧weo im̧ōn Anij”¹² im Pinmuur eo an Kraist. Ilo laļ eo an jetōb, em̧ool jekdo̧o̧n ro ilo jerawiwi im bōd ewōr aer iien em̧m̧an n̄an ukweļo̧k.¹³

Ilo wāween eo juon, ro me rej kōņaan kāālet nana, ro rej kōņaan aipedped n̄an ukwelo̧k, ak ro me ilo jabdewōt karōk ak jeļā wāween rupe kien ko ļōmņak rej pepe n̄an juon ukweļo̧k epidodo naaj ekajet jān Anij im kōn juon “ememej emeram kōn aolep [aer] bōd.”¹⁴ Jejjab maron̄ jerawiwi ilo ad jeļā kake ilo Jādede, innām kōtmene an kajju jeorļo̧k bōd kōn bōk kwojkwoj eo ilo Jabōt. N̄an mijenede ro ak ro jet me rej ba ļoor Jetōb eo ej meļeļein jab pokake jon̄ak ko an mijen ak kien ko, jouj keememej bwe pokake jon̄ak ko an mijen im kien ko rej karuwaineneiktok Jetōb eo. En ejjeļo̧k juon iaad en aikuj karum̧wijļo̧k ukweļo̧k. Kōjeraam̧m̧an ko an ukweļo̧k rej ijjino ilo ad jino ukweļo̧k.

Emen: Irooj ej letok n̄an kōj iien em̧m̧an im ekwojarjar n̄an erom̧ āinwōt E ilo ad leļo̧k kain̄i in lo̧mo̧o̧r ko an tampeļ ilo etan ro jet im rej aikuji bōtaab rejjab maron̄ kōm̧m̧ani kōn er make. Jedipioļo̧k im weppānļo̧k¹⁵ ilo ad erom̧ “ro ri lo̧mo̧o̧r … ilo toļ Zaion.”¹⁶ Ilo ad jerbal n̄an ro jet, Jetōb in Kallim̧ur eo Ekwojarjar emaron̄ kōmālim kain̄i eo im kōkwojarjar jim̧or rileļo̧k eo im ribōk eo. Jim̧or rileļo̧k im ribōk kain̄i eo remaron̄ kōm̧m̧an im kam̧wilaļļo̧k bujen ko me rej ukōt kōj, im bōk kōjeraam̧m̧an ko kar kallim̧uri Ebream, Aisek, im Jekab.

Āliktata, ļalem: Āinwōt Katak eo Jisōs Kraist¹⁷ ej katakin, jen jeorļo̧k an ro jet bōd ilo wāween eo jej kōņaan bwe ren jeorļo̧k ad bōd ej kajjitōk ippād kajjojo n̄an leļo̧k n̄an ro jet ta eo kōj make jej aikuji im kōņaan.

Jet iien ad kōņaan n̄an jeorļo̧k an bar juon bōd ej kōmaron̄ er im kōj n̄an tōmak jemaron̄ ukweļo̧k im jeorļo̧k bōd. Jet iien juon kōņaan n̄an ukweļo̧k im juon maron̄ n̄an jeorļo̧k bōd ej itok ilo iien ko rooktak. Ad Rilo̧mo̧o̧r ej ad Rijojomar ippān Anij, bōtaab E ej barāinwōt jipan̄ boktok kōj n̄an kōj make im n̄an doon ilo ad itok n̄an E. Eļap tata n̄e kōmetak im metak rej m̧wilaļ, m̧adm̧ōdi jemjera ko ad im kōmour bōro ko buruōd reppen, bōlen epen n̄an kōj n̄e jej make kōm̧m̧ane. Bōtaab lan̄ emaron̄ letok n̄an kōj kajoor im māletlet eo eļap jān eo ad make n̄an jeļā n̄aat eo n̄an dāpiji im wāween kōtļo̧k.

Edikļo̧k ad en̄jake ajimakeke n̄e jej kile bwe jejjab make iaad. Ad Rilo̧mo̧o̧r iien otemjej ej meļeļe.¹⁸ Kōn jipan̄ an ad Rilo̧mo̧o̧r, jemaron̄ leļo̧k uteij bōro eo ad, metak ko ad, jerawiwi ko ad n̄an Anij. Ijoke jemaron̄ en̄jake ilo ad jinoe, jej bōk kōmour ilo ad lōke E n̄an kōmour jemjerā ko ad.

Irooj, eo eweppān an lo im meļeļe, ej jeorļo̧k bōd an eo Enaaj; kōj (ad jab weppān) aikuj in jeorļo̧k bōd an aolep. Ilo ad itok n̄an ad Rilo̧mo̧o̧r, edikļo̧k ad mije kōj make. Edikļo̧k ad ekajet im ļapļo̧k ad jeorļo̧k bōd. Lōke ilo tōllo̧ke, tūriam̧okake, im jouj eo An¹⁹ emaron̄ kanemkwoj kōj jān akweel, illu, kakkure, jojoļāār, kalijōkļo̧k, im apan̄ ko ilo ānbwin im ļōmņak me jet iien rej itok ippān juon ānbwin kanniōk ilo juon laļ wabanban. M̧ōņōņō eo indeeo ejjab meļeļein bwe aolep jemjerā renaaj m̧ōņōņō indeeo. Bōtaab ilo juon taujin iiō ko n̄e Setan ej lokjak²⁰ emaron̄ letok n̄an kōj iien eo aikuji im wāween ko rekabwilōn̄lōn̄ n̄an iakwe, meļeļe, im ņa mejļan men ko ilo ad m̧aanjabpopo n̄an mour indeeo.

Jenaaj lo iiaio eo an lan̄ ilo kōj kajjojo.²¹ Jerbal im aiboojoj eo an Anij ekitbuuj kakūrm̧ool m̧ōņōņō eo indeeo.²² Mour indeeo im mour āinwōt Anij ijo ijo eutiejtata rej n̄an jeļā Anij im Jisōs Kraist, kōn kajoor in anij, jemaron̄ pād ilo ejja jikin eo wōt Rej pād ie.²³

Ro jeiū im jatū jitōnbōro, Anij ej Jemedwōj Ilan̄ im Nejin Ejitōnbōro rej mour. Rej letok aenōm̧m̧an, lan̄lōn̄, im kōmour n̄an aolep bwij im lo n̄an kōj kajjojo. Rikanaan eo an Irooj ej tōl iaļ eo. Revelesōn ilo raan ko āliktata ej wōnm̧aanļo̧k wōt. Kōm̧m̧an bwe jen epaakeļo̧k ad Rilo̧mo̧o̧r ilo im̧weo Im̧ōn ekwojarjar, im kōm̧m̧an bwe En kepaakeļo̧k kōj n̄an Anij im n̄an doon ilo ad kakuk buruōd ippān doon ilo meanwōd eo āinwōt an Kraist, m̧ool, im tūriam̧o kake eo ilo aolep epepen ko ad—ilo iien in im indeeo, m̧ōņōņō eo indeeo. Ilo Jisōs Kraist, emaron̄e; ilo Jisōs Kraist, ej m̧ool. Ij kam̧ool, ilo āt eo Etan ekwojarjar, em̧ool Jisōs Kraist, amen.

Kakeememej ko

1. William Butler Yeats, “The Lake Isle of Innisfree,” in The Norton Anthology of English Literature, 5th ed. (1986), 1936.

2. 1 Korint 15:22.

3. Ekanooj lōn̄ en̄jake ko rekwojarjar an kōjatdikdik im kallim̧ur ko n̄an oktak, ilo ad im ro jej iakwe er itok n̄an Jisōs Kraist kōn kain̄i ko im bujen ko an tampeļ ilo rejet ko jim̧or an rōn̄ōļ eo.

4. Alma 34:10.

5. Katak im Bujen Ko 121:44.

6. Katak im Bujen Ko 138:17.

7. Lale Matu 3:8 (ak Ukook eo an Josep Smith, Matu 3:35 [ilo Bible appendix]); Luk 3:8; Alma 5:15; 12:15; 13:11–13; 34:30–33; Moronai 6:1–4; 7:25; 8:25.

8. Lale Alma 42:13–15; bar lale Robert Frost, “A Masque of Mercy,” Complete Poems of Robert Frost, ed. by Edward Connery Lathem (1969), 521, where Frost writes, “Nothing can make injustice just but mercy.”

9. Galetia 6:7.

10. Lale Katak im Bujen Ko 137:1–6.

11. Katak im Bujen Ko 137:9; bar lale eoon 7–8, 10 Ilo m̧ool, “aolep ro rekar mej kōn ejjeļo̧k jeļāļo̧kjeņ kōn gospel in, ro renaaj kar bōk e eļan̄n̄e naaj kar kōtļo̧k er n̄an pād wōt, renaaj rijolōte aelōn̄ selestial eo an Anij.” Eļapļo̧k, Irooj ej wōnm̧aanļo̧k wōt, “Aolep ro renaaj mej jān iien in m̧aanļo̧k kōn ejjeļo̧k jeļā kake e, ro renaaj kar bōk e kōn aolepān burueer, renaaj rijolōte aelōn̄ in kiin̄ en.”

12. Katak im Bujen Ko 138:58.

13. Lale Katak im Bujen Ko 138:32.

14. Alma 11:43.

15. Lale Katak im Bujen Ko 128:15 im footnote eo b ilo Matu 5:48, eo ej kwaļo̧k ukok in Greek n̄an perfect āinwōt “dedeļo̧k, m̧ōj, lukkuun eddōk.”

16. Obedaia 1:21.

17. Lale Matu 7:12.

18. “Armej raar kōjekdo̧o̧n im joļo̧k; [kar] E, e juon armej in būromōj” (Aiseia 53:3), bōtaab barāinwōt juon Armej eo ekar aintok ajri ro reddik im jan̄ kōn juon lan̄lōn̄ eo ekar obrak (lale 3 Nipai 17:20–24).

19. Lale 2 Nipai 2:8.

20. Lale Katak im Bujen Ko 43:30–31. 1 Nipai 22:26 rej kakeememej kōj bwe kajoor eo an Setan naaj wōr jon̄an ilo Meļļenium “kōn wānōk an armej ro an [Irooj].”

21. Lale Katak im Bujen Ko 130:2.

22. Lale Moses 1:39.

23. Lale Katak im Bujen Ko 132:23–24; lale barāinwōt Katak im Bujen Ko 29:29, eo ej ba, “Bwe ijo Ij pād ie rej jab maron̄ itok n̄an e, bwe er ejjeļo̧k aer kajoor.”