Wānōk eo an Naan eo

Jān Elder Mark D. Eddy

Jān Jiljilimjuonn̄oul eo

Ewōr kajoor ilo naan ko an rikanaan ro etto im raan kein ilo jetjet inkōnke naan ko aer rej naan ko an Irooj.

Ilo Bok in Mormon, jej riit kōn juon kālet eļap an aorōk kar kōm̧m̧ane jān rikanaan Alma ilo juon eoon eaorōk ilo jeje ko rekwojarjar. M̧okta jān lali naan kein jeļā kaki, jouj im ļōmņak ippa kōn jekjek ko reppen me kāālet in ekar kōm̧m̧an.

Juon kumi in armej rejenolo̧k, ān̄inn̄in er make riZoram ro, kar kōjenolo̧k er make jān Rinipai ro¹ im rekar kuk ippān doon ilo jem̧ļo̧kin tōrerein ko an āne eo itūrin riLeman ro.² RiNipai ro ej kab kar m̧ōj aer anjo̧ ioon Rileman ro ilo juon pata eo ejjan̄in kar kōm̧m̧an m̧okta ijo ekar mej jonōul taujin armej ro,³ im rekar “kanooj ekkōl bwe riZoram renaaj deļo̧n̄ ilo juon jem̧jerā ippān riLeman, im bwe enaaj unin jako eļap n̄an riNipai ro.”⁴ Ilōn̄inļo̧k inepata ko kōn pata, Alma ekar jeļā bwe riZoram ro, ro “raar ron̄ naan in Anij kwaļo̧ke n̄an er,”⁵ rekar oktak im kabun̄ n̄an ekjab im “kaankeke iaļ ko an Irooj.”⁶ Aolepen men kein rekar kaddoiki Alma im ekar “unin būrom̧ōj eļap.”⁷

Ekar lo e make ilo jekjek kein reppen im kapan̄pan̄, Alma ekar kejokļo̧kijeņ kōn ta eo ej aikuj kar kōm̧m̧ane. Ilo kāālet eo an jej riiti naan ko me kar kōjparoki n̄an im̧we im katakin kōj ilo ad tōlļon̄i jekjek ko reppen im kapan̄pan̄ ko ilo raan kein.⁸

“Im kiiō, kōnke kwaļo̧k kōn naan eo eaar ļap an̄in n̄an tōl armej ro n̄an kōm̧m̧ane men eo ejim̧we—aaet, eaar ļapļo̧k kajoor in an jelōt ļōmņak ko an armej ro jān jāje eo, ak jabdewōt men, eo eaar waļo̧k n̄an ir—kōn menin Alma eaar ļōmņak eaar emennin aikuj bwe ren kajjion̄ jelōt wānōk eo an naan in Anij.”⁹

Ilubwilijin elōn̄ uwaak ko rekkar, tōmak eo an Alma ekar tōl er n̄an pedped ioon kajoor eo an naan eo. Ejjab jide bwe jet iaan naan in kwaļo̧k ko rekajoortata loi ilo jabdewōt jikin ilo jeje ko rekwojarjar rekar m̧ōkaj in kwaļo̧ki ālkin wōt kāālet eo. Ilo jebta 32 im 33 in Alma jej riiti katak eo an ekajoor kōn tōmak ilo Irooj Jisōs Kraist, im ilo jebta 34, jej lo katak ko raorōk an Amulek kōn Pinmuur eo an Jisōs Kraist.

Kōmeļeļe ko kōn Wānōk eo an Naan eo

Em̧ool, ilo aolepen jeje ko rekwojarjar jej riit kōn kōjeram̧m̧an ko rekabwilōn̄lōn̄ rekar lutōk leplep ioon ro raar kāālet n̄an kajjieon̄e wānōk eo an naan in Anij ilo mour ko aer.¹⁰ Ij kajjitōk ippāmi n̄an kejokļo̧kijeņ ippa kōn jilu waanjon̄ak ko ilo ad ukōt jibadbad eo ad n̄an Bok in Mormon—juon bok me Būreejtōn Russell. M. Nelson ekar kōmeļeļeiki āinwōt “ad tōl n̄an maron̄ mour ilo raan ko āliktata.”¹¹

Juon, kakeememej armej ro an kōn wāween an Irooj kar lo̧mo̧o̧ren ro jemeer, Alma ekar katakin: “Lo Eaar ukōt burueer; aaet, Eaar karuj er jān kiki leplep eo, im raar rujļo̧k n̄an Anij. Lo, raar pād ibuļōn marok jilōn̄lōn̄; mekarta jetōb ko aer raar romaak jān meram in naan eo ej n̄an indeeo.”¹² Bōlen kwoj en̄jake āinwōt n̄e kwoj ped ibuļōn marok jilōn̄lōn̄. Am̧ ej ke lukkuun kōņaan juon meram? Eļan̄n̄e aaet, juoj im kajjieon̄e wānōk eo an naan in Anij.

Ruo, ļōmņak kōn oktak tok eo an RiLeman ro n̄an Irooj, eo ekar kam̧oole ke ekar juon mijenede, Amōn ekar ba, “Lo, ewi jon̄an to̧ujin iaan ro jeid im jatid Eaar kōtļo̧k jān metak ko an hell; im rej itok n̄an al iakwe epinmuur, im men in kōnke kajoor in naan eo Aneo ej ilo kōj.¹³ Ro jeiū im jatū, ekanooj lōn̄ ibwilijiid ro me rej jan̄ uwaad kōn juon eo jej iakwe n̄an bōktok n̄an al iakwe epinmuur. Ilo aolep kijejeto ko ad, jen kemeemej n̄an kajjieon̄e wānōk eo an naan in Anij, eo ej pād ilo kōj.

Jilu, ilo bok in Hilamōn jej riit, “Aaet, jej lo bwe jabdewōt eo e kōņaan maron̄ jirok ioon naan eo an Anij, eo em̧ōkaj im kajoor, eo enaaj ajeje ijeņ im ijeņ aolep m̧oņ im aujiid im kōttōbalbal ko an devil, im tōl armej [im kōrā] in Kraist in juon iaļ erānin̄ im aidik ioonļo̧k ro̧n̄ in būrom̧ōj … im tōprakļo̧k jetōb ko aer … ilo anbwijmaron̄ in Anij ilo aelōn̄ in lan̄.”¹⁴ Kwoj ke pukōt n̄an kōm̧ōkaj am̧ eļļā jān aolep m̧ōņ im aujiid im kōttōbalbal ko an devil me rekanooj ejepelōklōk ilo māletlet an armej ilo tōre kein ad? Kwoj ikdeelel ke n̄an anemkwōj jān ejouj in tarpok ko kar ejaak jān eļap meļeļe ko n̄an an ļapļo̧k am̧ mije wōt iaļan bujen eo? Kajjieon̄e wānōk eo an naan in Anij.

Āinwōt juon eo ekar oktak kōn kajoor eo an naan eo, n̄a make ij kam̧ool kōn m̧ool in aiboojoj eo me rikanaan eo ad ejitōnbōro ekar katakin, Būreejtōn Russell M.Nelson: “N̄an n̄a, kajoor eo an Bok in Mormon ej kein kam̧ool eo eļap tata ilo oktak eo ekajoor me ej itok n̄an mour ko an ro me rej riiti ‘kōn bōro em̧ool, kōn juon lukkuun kōttōpar, wōr tōmak ilo Kraist.’ Elōn̄ rioktaktok ro raar joļo̧k eļap wōt ijo rekar kanooj kaorōke juon iien n̄an maron̄ ļoor katak ko an bok in. … Enaaj erom̧ kein jerbal eo am̧ ewejepedik tata ilo bōktok jetōb ko n̄an Jisōs RiKraist eo.”¹⁵

Unjen Wānōk

Ilo men kein im kōmeļeļe ko jet, jej kam̧ool kōn wānōk eo an naan in Anij ilo mour ko an ajri ro Nejin. Jemaron̄ kajjitōk, ta unjen eo an wānōk in ak kajoor in?

Ilo ad ļōmņak kōn kajjitōk in, eaorōk n̄an keememej bwe jantōj eo “naan eo,” āinwōt kar kōjerbale ilo jeje ko rekwojarjar, ewōr diktata ruo meļeļe in. Elder David A. Bednar ekar katakin bwe “juon iaan et ko etan Jisōs ej ‘Naan Eo’” im bwe “katak ko an Rilo̧mo̧o̧r eo, āinwōt kar je ilo Jeje ko Rekwojarjar, rej barāinwōt ‘naan eo.’”¹⁶

Rikanaan Nipai ekar kōmeļeļeik jemjerā eo ikōtaan meļeļe kein ruo ke ekar je: “Eo̧ron̄ naan kein im tōmak ilo Kraist; im eļan̄n̄e kom̧ij jab tōmak ilo naan kein tōmak ilo Kraist. Im eļan̄n̄e kom̧ naaj tōmak ilo Krasit kom̧ naaj tōmak ilo naan kein, bwe rej naan ko an Kraist, im Eaar litok n̄an eō.”¹⁷ Kōn menin jej ekkatak bwe ewōr kajoor ilo naan ko an rikanaan ro etto im raan kein ilo jetjet in kōnke naan ko aer rej naan ko an Irooj.¹⁸ Ro m̧ōtta jitōnbōro, bōk m̧ool in indeeo elukkuun aorōk n̄an ad mour wōt ilo jetōb ilo raan kein āliktata¹⁹ iien eo me, āinwōt kar kanaan kake, ewōr “juon n̄ūta kōn pilawā ak maro kōn dān, ak enaaj kōn ron̄jake naan ko an Jeova.”²⁰

Āliktata, wānōk eo an naan in Anij ej Irooj Jisōs Kraist.²¹ Ilo an ļapļo̧k ad meļeļe wānōk eo an naan eo, jemaron̄ kōm̧m̧ane juon jemjerā eaorōk im ej n̄an indeeo ikōtaan jerbal eo an rikanaan ro An im Ripinmuur eo Make. Iakwe eo ad n̄an E, ikdeelel eo ad n̄an epaakeļo̧k E im n̄an pād ilo iakwe eo An,²² naaj kōketak kōj n̄an kajjieon̄e wānōk eo an naan eo ilo mour ko ad—jim̧or wānōk eo me ej itok²³ im erreo eo me e lutōkļo̧k jān E ilo naan ko an “ro kāālet in Irooj.”²⁴ Jenaaj itok n̄an jeļā bwe, an ļap in an jipan̄ ej āinwōt kein jipan̄ ko jet ilo ad ekkatak kōn Rilo̧mo̧o̧r im naan ko an rikanaan ro An, ejjeļo̧k juon men enej bōk jikier. Jej aikuj kam̧wilaļ ad ļōmņak im kōmakijkiji,²⁵ kajju jān kein jipan̄ eo.²⁶

Ij kwaļo̧k aō iakwe kom̧ kajjojo, ro jeiū im jatū. Ilo iakwe in, ij akweļap ippāmi n̄an en̄jake wānōk eo an naan in Anij, eļap tata ilo Bok in Mormon, aolepān raan in ami mour. Ilo am̧ kōm̧m̧ane menin, kwonaaj en̄jake kallim̧ur in kanaan in jān Būreejtōn Russell M. Nelson: “Ij kallim̧ur bwe ilo ami lukkuun ekkatak Bok in Mormon aolep raan, kom̧ naaj kōm̧m̧ani kālet ko rem̧m̧an—aolep raan. Ij kallim̧ur bwe ilo am̧ kejo̧kļo̧kjeņ kōn ta eo kwoj ekkatak, wintō in lan̄ enaaj peļļo̧k, im kom̧ naaj bōk uwaak ko n̄an kajjitōk ko am̧ im tōl n̄an mour eo ami make. Ij kallim̧ur bwe ilo ami leļo̧k kom̧ make aolep raan n̄an Bok in Mormon eo, kom̧ maron̄ lo kōjparok ņae men ko renana an raan kein.”²⁷

Ij kam̧ool bwe Jemedwōj Ilan̄ em̧ōj an letok n̄an kōj naan eo kōnke E eweppān an iakwe kōj im ekōņaan bwe kajjojo iaad jen bar ro̧o̧l n̄an kapijuknen n̄an mour Ippān indeeo. Ij kam̧ool kōn “Naan eo … ear kanniōk,”²⁸ em̧ool Jisōs RiKraist eo, im kōn kajoor eo An n̄an kōjparok im lo̧mo̧o̧ren kōj. Ijeļā bwe An wānōk ej jiebtok kōn naan ko an rikanaan ro An, jim̧or etto im kiiō.

Ej jar eo an būruō bwe jen maron̄ bōk mālōtlōt im ettā n̄an jirok likatōtōt²⁹ n̄an naan eo an Anij im pād wōt ilo iaļan bujen eo me ej tōlļo̧k n̄an mour āinwōt Anij im mour indeeo.³⁰ Jen wōnm̧aanļo̧k wōt ilo ad en̄jake oktak eo ekajoor eo epojak n̄an kajjojo iaad kōn wānōk eo an Naan eo.³¹ Ilo etan Jisōs Kraist, amen.

Kakeememej ko

1. Lale Alma 30:59.

2. Lale Alma 31:3.

3. Lale Alma 28:2.

4. Alma 31:4. Jouj im kile bwe Alma im armej ro doon raar ioon m̧oktaļo̧k kain “jemjerā” rōt in ikōtaan RiAmlijai im RiLeman ro, eo kar tōlļo̧k n̄an būromōj eļap im jako (lale Alma 2:21–38; Alma 3:1–3).

5. Alma 31:8.

6. Alma 31:1.

7. Alma 31:2.

8. Lale Mormon 8:34–35.

9. Alma 31:5; eoon eo aorōk kar kobaiktok.

10. Lale, n̄an waanjon̄ak, 1 Nipai 15:24; Alma 32:41–43; 36:26; 37:8, 44–45.

11. Russell M. Nelson, “Jelm̧ae Ilju im Jekļaj eo kōn Tōmak,” Liaona, Nob. 2020, 75.

12. Alma 5:7; eoon eo eaorōk kar kobaiktok.

13. Alma 26:13; eoon eo eaorōk kar kobaiktok.

14. Hilamōn 3:29–30; eoon eo eaorōk kar kobaiktok.

15. Russell M. Nelson, “The Book of Mormon: A Miraculous Miracle” (kwaļo̧k ilo iien seminar eo an mijen būreejtōn ro rekāāl, Juun 23, 2016), kouti m̧ōttan Moronai 10:4

16. David A. Bednar, “A Kōm Ar Jab Eo̧ron̄ Er,” Liaona, Māe 2022, 16.

17. 2 Nipai 33:10; eoon eo aorōk kar kobaiktok.

18. Lale Katak im Bujen Ko 1:38.

19. Lale Katak im Bujen Ko 1:14–18.

20. Amos 8:11.

21. Lale Alma 34:6.

22. Lale Jon 15:10.

23. Lale Mark 5:25–34.

24. Moronai 7:13.

25. “There is a better way to prepare, because great faith has a short shelf life. We could decide to persist in studying the words of Christ in the scriptures and the teachings of living prophets. This is what I will do. I will go back to the Book of Mormon and drink deeply and often” (Henry B. Eyring, “Spiritual Preparedness: Start Early and Be Steady,” Liahona, Nov. 2005, 39).

26. “For me, the reading of the scriptures is not the pursuit of scholarship. Rather, it is a love affair with the word of the Lord and that of his prophets. …

    I do not concern myself much with reading long commentary volumes designed to enlarge at length upon that which is found in the scriptures. Rather, I prefer to dwell with the source, tasting of the unadulterated waters of the foundation of truth—the word of God as he gave it and as it has been recorded in the books we accept as scripture. … Through reading the scriptures, we can gain the assurance of the Spirit that that which we read has come of God for the enlightenment, blessing, and joy of his children” (Gordon B. Hinckley, “Feasting upon the Scriptures,” Tambuli, June 1986, 2, 4).

27. Lale Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?,” Liaona, Nob. 2017, 62–63.

28. Jon 1:14.

29. Lale 1 Nipai 8:30.

30. “Iaļan bujen in ej iaļ eo e wōt tōlļo̧k kōj n̄an aiboojoj eo ilōn̄tata im mour indeeo” (Russell M. Nelson, “Kajoor in Jetōb eo ej Im̧we Jerbal eo,” Liaona, Māe 2022, 98).

31. Lale Alma 5:11–13.