“Amazwi Okubuyiselwa: UkuHunyushwa kweNcwadi kaMormoni,” Wozani, Ngilandeleni—Incwadi Yezifundo Zasekhaya naseBandleni: IMfundiso neziVumelwano 2025 (2025)
“UkuHunyushwa kweNcwadi kaMormoni,” Wozani, Ngilandeleni—Incwadi Yezifundo ZaseKhaya naseBandleni: 2025
Amazwi Okubuyiselwa
UkuHunyushwa kweNcwadi kaMormoni
Ngo–Ephreli 1829, inyanga okwatholakala ngayo izigaba 6–9 zeMfundiso neziVumelwano, umsebenzi omkhulu kaJoseph Smith kwakuwukuhumusha iNcwadi kaMormoni. Asiyazi yonke imininingwane ngesimangaliso saleyonqubo, kodwa siyazi ukuthi uJoseph Smith wayengumboni, esizwa ngamathuluzi uNkulunkulu awalungiselele: amatshe amabili akhanyayo ayebizwa ngokuthi yi–Urimi neThumimi nelinye itshe okwakuthiwa yitshe lomboni.
Kamuva ngesikhathi ecelwa ukuthi achaze ukuthi lendaba yahunyushwa kanjani, uJoseph wathi “kwakungeyona inhloso ukutshela umhlaba konke ngayo.” Wayevame ukuthi yahunyushwa “ngesipho, nangamandla kaNkulunkulu.”
Lamazwi alandelayo, avela kulabo abangofakazi abazibonela ngamehlo abo konke okwakwenzeka ngesikhathi kuhunyushwa, ayabusekela ubufakazi bukaJoseph.
Kunenkolelo yokuthi lelibhokisi, okwakungela Hyrum Smith, lalisetshenziswa okwesikhashana ukuzifihla izingcwephe.
u-Emma Smith
“Ngenkathi umyeni wami ehumusha iNcwadi kaMormoni, ngayibhala ingxenye yayo, ngesikhathi enginika amazwi omusho ngamunye, igama negama, futhi kwakuthi uma efika emagameni abantu noma ezindawo ayengakwazi ukuwabiza, noma amagama amade wayewabizela, futhi ngesikhathi ngisawabhala kwakuthi uma ngenza iphutha ukuwabhala, wayengimisa alungise lelophutha nakuba wayengakwazi ukubona ukuthi ngiwabhala kanjani. Ngisho igama elithi Sara wayengakwazi ukulisho ekuqaleni, kwakufanele ukuthi alibize, mina ngimuphimisele lona.”
“Izingcwephe zazivamise ukuhlala etafuleni kungekho mizamo yokuzicashisa, zigoqwe ngendwangu yetafula encane yelineni engangimnike yona ukuba azigoqe ngayo. Ngake ngazithinta izingcwephe zisahleli kanjalo etafuleni, ngizwa isimo sazo. Zazizwakala sengathi zithambile njengephepha eliwugqinsi, futhi zazenza umsindo wensimbi uma zazicindezelwa emacaleni ngesithupha, njengoba kwesinye isikhathi uye ucindezele ngesithupha amakhasi encwadi eceleni. …
“Engikholwa yikho wukuthi iNcwadi kaMormoni ivela kuNkulunkulu—lokho angikungabazi nakancane. Nganelisekile ukuthi akekho umuntu owayengakwazi ukunika ngomlomo amagama abhalwa ngesandla ngaphandle uma ayeyalwa nguMoya; ngokuba ngesikhathi ngimbhalela, [uJoseph] wayenginika amagama ihora nehora; futhi kwakuthi uma sesibuyela emva kokudla, noma emva kokuphazamiseka, wayevele aqhubeke lapho ayegcine khona, ngaphandle kokubuka umbhalo noma afundelwe lapho kugcinwe khona. Lokhu kwakuyinto ayevame ukuyenza. Kwakungabazeka ukuthi indoda efundile yayingakwazi ukukwenza lokhu; futhi-ke kumuntu owayengafundile kangaka njengaye, lokhu kwakungenakwenzeka.”
u-Oliver Cowdery
“Ngayibhala ngelami ipeni yonke iNcwadi kaMormoni (ngaphandle kwamakhasi ambalwa) ngesikhathi ivela ezindebeni zomprofethi, ngesikhathi eyihumusha ngesipho nangamandla kaNkulunkulu, nge-Urimi neThumimi, noma, njengoba zibizwa encwadini, izihumushi ezingcwele. Ngazibona ngawami amehlo, futhi ngaziphatha ngezami izandla, izingcwephe zegolide lezi eyahunyushwa ivela kuzo. Ngazibona futhi nezihumushi.”