“ວັນທີ 10–16 ເດືອນກຸມພາ: ‘ເພື່ອເຈົ້າຈະອອກມາຢ່າງຜູ້ຊະນະ’: ຄຳສອນ ແລະ ພັນທະສັນຍາ 10–11,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 10–11,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ໃບຈຳລອງຕົ້ນສະບັບຂອງພຣະຄຳພີມໍມອນ
ວັນທີ 10–16 ເດືອນກຸມພາ: “ເພື່ອເຈົ້າຈະອອກມາຢ່າງຜູ້ຊະນະ”
ຄຳສອນ ແລະ ພັນທະສັນຍາ 10–11
ຂະນະທີ່ການແປພຣະຄຳພີມໍມອນດຳເນີນໄປໜ້າ, ກໍມີຄຳຖາມໜຶ່ງເກີດຂຶ້ນມາວ່າ: ໂຈເຊັບ ສະມິດ ແລະ ອໍລີເວີ ຄາວເດີຣີ ຄວນເຮັດຫຍັງກ່ຽວກັບພາກສ່ວນຂອງການແປທີ່ສູນເສຍໄປນັ້ນ? ສິ່ງທີ່ຖືກຕ້ອງອາດເປັນການກັບຄືນໄປແປພາກສ່ວນນັ້ນຄືນໃໝ່, ແຕ່ພຣະຜູ້ເປັນເຈົ້າໄດ້ເຫັນບາງສິ່ງທີ່ພວກເພິ່ນບໍ່ສາມາດເຫັນໄດ້: ສັດຕູຂອງພວກເພິ່ນໄດ້ວາງແຜນທີ່ຈະດັດແປງຖ້ອຍຄຳຢູ່ໃນພາກສ່ວນນັ້ນ ເພື່ອສ້າງຄວາມສົງໄສໃຫ້ແກ່ວຽກງານທີ່ໄດ້ຮັບການດົນໃຈຂອງໂຈເຊັບ. ພຣະເຈົ້າໄດ້ມີແຜນທີ່ຈະຫລີກລ້ຽງບັນຫານັ້ນ ແລະ ດຳເນີນວຽກງານນັ້ນໄປໜ້າ. ຫລາຍພັນປີກ່ອນໜ້ານັ້ນ, ພຣະເຈົ້າໄດ້ດົນໃຈນີໄຟໃຫ້ຂຽນບັນທຶກທີສອງທີ່ມີເລື່ອງລາວຂອງຍຸກດຽວກັນນັ້ນ “ດ້ວຍຈຸດປະສົງ ອັນສະຫລາດໃນພຣະອົງ” (1 ນີໄຟ 9:5).
“ຄວາມສະຫລຽວສະຫລາດຂອງເຮົາ,” ພຣະຜູ້ເປັນເຈົ້າກ່າວກັບໂຈເຊັບ, “ແມ່ນຍິ່ງໃຫຍ່ກວ່າເລ່ຫລ່ຽມຂອງມານ” (ຄຳສອນ ແລະ ພັນທະສັນຍາ 10:43). ນັ້ນຄືຂ່າວສານທີ່ໃຫ້ຄວາມໝັ້ນໃຈໃນວັນເວລາຂອງເຮົາ, ເມື່ອຜູ້ປໍລະປັກກຳລັງພະຍາຍາມຢ່າງໜັກເພື່ອເຮັດໃຫ້ສັດທາອ່ອນແອລົງ. ຄືກັນກັບໂຈເຊັບ, ເຮົາສາມາດເປັນຄົນ “ສື່ຊັດ ແລະ ສືບຕໍ່” ເຮັດວຽກງານຂອງພຣະເຈົ້າ ທີ່ໄດ້ເອີ້ນເຮົາໃຫ້ເຮັດ (ຂໍ້ທີ 3). ແລ້ວເຮົາຈະພົບເຫັນວ່າ ພຣະອົງໄດ້ຈັດຫາວິທີທາງໃຫ້ເຮົາແລ້ວ ເພື່ອວ່າ “ປະຕູນະລົກຈະເອົາຊະນະ [ເຮົາ] ບໍ່ໄດ້” (ຂໍ້ທີ 69).
ເບິ່ງ Saints,, 1:51–61.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 10:1–33
ພຣະເຈົ້າ “ຈະບໍ່ຍອມໃຫ້ຊາຕານສຳເລັດແບບແຜນທີ່ຊົ່ວຮ້າຍຂອງມັນ.”
ຊາຕານຢາກໃຫ້ເຮົາລືມວ່າມີມັນຢູ່—ຫລື ຢ່າງໜ້ອຍມັນຢາກໃຫ້ເຮົາບໍ່ຮູ້ວ່າ ມັນພະຍາຍາມທີ່ຈະມີອິດທິພົນເໜືອເຮົາ (ເບິ່ງ 2 ນີໄຟ 28:22–23). ແຕ່ພຣະຄຳຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 10 ຢືນຢັນວ່າ ຊາຕານມີຈິງ—ແລະ ມັນກໍຕໍ່ຕ້ານວຽກງານຂອງພຣະຜູ້ເປັນເຈົ້າຢ່າງບໍ່ຢູ່ບໍ່ເຊົາ. ຢູ່ໃນ ຂໍ້ທີ 1–33, ໃຫ້ລະບຸສິ່ງທີ່ພຣະເຈົ້າຮູ້ກ່ຽວກັບຄວາມພະຍາຍາມຂອງຊາຕານ (ເບິ່ງ ຂໍ້ທີ 62–63 ນຳອີກ). ທ່ານສາມາດທູນຂໍໃຫ້ພຣະຜູ້ເປັນເຈົ້າຊ່ວຍທ່ານໃຫ້ເຫັນວິທີທີ່ຊາຕານພະຍາຍາມລໍ້ລວງທ່ານ. ຂະນະທີ່ທ່ານອ່ານ ພາກທີ 10, ໃຫ້ໄຕ່ຕອງວິທີທີ່ພຣະຜູ້ຊ່ວຍໃຫ້ລອດສາມາດຊ່ວຍທ່ານຕໍ່ຕ້ານຄວາມພະຍາຍາມຂອງຊາຕານໄດ້ແນວໃດ.
ຄຳສອນ ແລະ ພັນທະສັນຍາ 10:34–52
“ຄວາມສະຫລຽວສະຫລາດຂອງ [ພຣະຜູ້ເປັນເຈົ້າ] ແມ່ນຍິ່ງໃຫຍ່ກວ່າເລ່ຫລ່ຽມຂອງມານ.”
ນີໄຟບໍ່ຮູ້ວ່າເປັນຫຍັງເພິ່ນຈຶ່ງຖືກດົນໃຈໃຫ້ເຮັດບັນທຶກສອງຊຸດກ່ຽວກັບຜູ້ຄົນຂອງເພິ່ນ. ແລະ ມໍມອນກໍບໍ່ຮູ້ວ່າເປັນຫຍັງເພິ່ນຈຶ່ງຖືກດົນໃຈໃຫ້ລວມຊຸດທີສອງເຂົ້າກັບແຜ່ນຈາລຶກຄຳ. ສາດສະດາທັງສອງໄດ້ໄວ້ວາງໃຈວ່າ ພຣະເຈົ້າມີ “ຈຸດປະສົງອັນສະຫລາດ” (1 ນີໄຟ 9:5; ຄຳຂອງມໍມອນ 1:7). ໃນທຸກວັນນີ້ ເຮົາຮູ້ຢ່າງໜ້ອຍສ່ວນໜຶ່ງຂອງຈຸດປະສົງນັ້ນ: ເພື່ອຈະເອົາມາແທນ 116 ໜ້າຂອງພຣະຄຳພີມໍມອນທີ່ສູນເສຍໄປ. ທ່ານຄິດວ່າພຣະຜູ້ເປັນເຈົ້າຕ້ອງການໃຫ້ທ່ານຮຽນຮູ້ຫຍັງແດ່ໃນອາທິດນີ້? ໃຫ້ໄຕ່ຕອງຄຳຖາມນັ້ນ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 10:34–52. ທ່ານອາດຂຽນຄວາມຈິງຕ່າງໆທີ່ທ່ານຮຽນຮູ້ກ່ຽວກັບພຣະຜູ້ເປັນເຈົ້າຈາກຂໍ້ເຫລົ່ານີ້ນຳອີກ. ມັນມີຜົນກະທົບຕໍ່ຄວາມສຳພັນຂອງທ່ານກັບພຣະອົງແນວໃດ? ແມ່ນຫຍັງທີ່ປະທັບໃຈທ່ານກ່ຽວກັບຄວາມສະຫລຽວສະຫລາດ ແລະ ການມອງເຫັນລ່ວງໜ້າຂອງພຣະຜູ້ເປັນເຈົ້າໃນການກຽມພ້ອມສຳລັບການສູນເສຍ 116 ໜ້າເຫລົ່ານັ້ນ?
ທ່ານອາດຮູ້ສຶກຖືກດົນໃຈໃຫ້ຊອກຫາຫລັກຖານເຖິງຄວາມສະຫລຽວສະຫລາດ ແລະ ການມອງເຫັນລ່ວງໜ້າຂອງພຣະອົງໃນຊີວິດຂອງທ່ານນຳອີກ. ອ່ານເລື່ອງລາວຢູ່ໃນຂ່າວສານຂອງແອວເດີ ຣອນໂນ ເອ ແຣັສ໌ແບນ “By Divine Design”—ມັນອາດນຳບາງຕົວຢ່າງມາສູ່ຄວາມຄິດຂອງທ່ານ (Liahona, Nov. 2017, 55–57). ໃຫ້ຄິດທີ່ຈະຂຽນມັນລົງໄວ້ເມື່ອຄວາມຄິດນັ້ນມາສູ່ທ່ານ. ພຣະຜູ້ເປັນເຈົ້າໄດ້ກະທຳວຽກງານແນວໃດ ໃນຊີວິດຂອງທ່ານ? ຍົກຕົວຢ່າງ, ພຣະອົງໄດ້ກຽມພ້ອມ “ຄວາມບັງເອີນ” ຫຍັງແດ່? ພຣະອົງໄດ້ຈັດວາງຮາກຖານຫຍັງໄວ້ແດ່ ເພື່ອເປັນພອນໃຫ້ແກ່ທ່ານ? ເມື່ອໃດແດ່ທີ່ພຣະອົງໄດ້ນຳພາທ່ານໃຫ້ໄປປະຕິບັດສາດສະໜາກິດຕໍ່ຄົນໃດຄົນໜຶ່ງທີ່ຂັດສົນ?
ເບິ່ງ ໂຣມ 8:28; ຄຳສອນ ແລະ ພັນທະສັນຍາ 90:24; Topics and Questions, “Plan of Salvation,” ຫ້ອງສະໝຸດພຣະກິດຕິຄຸນ ນຳອີກ.
ລາຍລະອຽດຈາກ Mormon Abridging the Plates [ມໍມອນກຳລັງຫຍໍ້ແຜ່ນຈາລຶກຄຳ], ໂດຍ ທອມ ໂລແວວ
“ໄວ້ວາງໃຈໃນພຣະວິນຍານ [ຂອງພຣະຜູ້ເປັນເຈົ້າ].”
ໄຮຣຳ ອ້າຍຂອງໂຈເຊັບກໍຕື່ນເຕັ້ນທີ່ຈະຮູ້ຈັກພຣະປະສົງຂອງພຣະຜູ້ເປັນເຈົ້າສຳລັບເພິ່ນ, ສະນັ້ນເພິ່ນຈຶ່ງໄດ້ຂໍໃຫ້ໂຈເຊັບສະແຫວງຫາການເປີດເຜີຍເພື່ອເພິ່ນ. ສາດສະດາກໍດີໃຈທີ່ຈະເຮັດດັ່ງນັ້ນ, ແຕ່ຢ່າງໜ້ອຍ ຂ່າວສານຢ່າງໜຶ່ງຢູ່ໃນການເປີດເຜີຍນັ້ນ (ຄຳສອນ ແລະ ພັນທະສັນຍາ 11) ແມ່ນວ່າ ໄຮຣຳຍັງສາມາດສະແຫວງຫາການເປີດເຜີຍສຳລັບຕົວເອງນຳອີກ. ແລະ “ທຸກຄົນທີ່ມີຄວາມປາດຖະໜາດີ, ແລະ ໄດ້ເດ່ກ່ຽວຂອງເຂົາອອກໄປ ເພື່ອຈະເກັບກ່ຽວ” ກໍສາມາດເຮັດເຊັ່ນນັ້ນຄືກັນ (ຂໍ້ທີ 27). ຂະນະທີ່ທ່ານອ່ານ ພາກທີ 11, ທ່ານຮູ້ສຶກວ່າພຣະຜູ້ເປັນເຈົ້າກຳລັງສິດສອນທ່ານຫຍັງແດ່ກ່ຽວກັບການເປີດເຜີຍສ່ວນຕົວ? ສິ່ງນີ້ກ່ຽວພັນກັບສິ່ງທີ່ພຣະອົງໄດ້ສິດສອນອໍລີເວີ ຄາວເດີຣີ ແນວໃດຢູ່ໃນ ພາກທີ 6–9? ມີຂ່າວສານຢ່າງອື່ນໃດແດ່ທີ່ພຣະອົງມີໃຫ້ສຳລັບທ່ານ?
ເບິ່ງເພງ “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30 ນຳອີກ.
ເຊື້ອເຊີນຜູ້ຮຽນໃຫ້ຖາມຄຳຖາມ. ສ່ວນຫລາຍແລ້ວ ຄຳຖາມຈະນຳໄປສູ່ການເປີດເຜີຍ. ຖ້າຫາກທ່ານສິດສອນຄອບຄົວຂອງທ່ານ ຫລື ຫ້ອງຮຽນຢູ່ທີ່ໂບດ, ຊຸກຍູ້ໃຫ້ເຂົາເຈົ້າຖາມຄຳຖາມ, ແລະ ຊ່ວຍເຂົາເຈົ້າຊອກຫາຄຳຕອບຢູ່ໃນພຣະຄຳພີ. ຍົກຕົວຢ່າງ, ຖ້າຫາກເຂົາເຈົ້າມີຄຳຖາມກ່ຽວກັບການເປີດເຜີຍສ່ວນຕົວ, ໃຫ້ຊອກຫາຄຳຕອບນຳກັນຢູ່ໃນ ຄຳສອນ ແລະ ພັນທະສັນຍາ 11:12–14.
ຄຳສອນ ແລະ ພັນທະສັນຍາ 11:15–26
ຂະນະທີ່ເຮົາສະແຫວງ “ຫາ [ພຣະຄຳຂອງພຣະເຈົ້າ],” ເຮົາຈະໄດ້ຮັບພຣະວິນຍານ ແລະ ອຳນາດຂອງພຣະອົງ.
ແມ່ນແຕ່ກ່ອນພຣະຄຳພີມໍມອນຖືກແປຮຽບຮ້ອຍ, ໄຮຣຳ ສະມິດ ກໍຕື່ນເຕັ້ນທີ່ຈະຊ່ວຍເຫລືອໃນວຽກງານແຫ່ງການຟື້ນຟູ. ຂະນະທີ່ທ່ານອ່ານຄຳຕອບຂອງພຣະຜູ້ເປັນເຈົ້າຕໍ່ຄວາມປາດຖະໜາຂອງເພິ່ນ, ໃຫ້ພິຈາລະນາຄວາມໝາຍສຳລັບທ່ານ ທີ່ຈະສະແຫວງ “ຫາ [ພຣະຄຳຂອງພຣະເຈົ້າ]” (ຂໍ້ທີ 21). ການສະແຫວງຫາພຣະຄຳຂອງພຣະເຈົ້າຊ່ວຍທ່ານຮັບໃຊ້ພຣະອົງດ້ວຍອຳນາດແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເມື່ອເຮົາອະທິຖານສະເໝີ, ເຮົາຈະໄດ້ຮັບຄວາມເຂັ້ມແຂງຈາກພຣະເຈົ້າ.
-
ເພື່ອຈະແນະນຳຂໍ້ນີ້ຕໍ່ລູກໆຂອງທ່ານ, ທ່ານສາມາດຖາມພວກເຂົາກ່ຽວກັບສິ່ງທີ່ພວກເຂົາເຮັດ “ສະເໝີ.” ພຣະຜູ້ເປັນເຈົ້າກ່າວຫຍັງແດ່ວ່າເຮົາຄວນເຮັດສະເໝີໃນ ຄຳສອນ ແລະ ພັນທະສັນຍາ 10:5? ເປັນຫຍັງພຣະອົງຈຶ່ງຕ້ອງການໃຫ້ເຮົາເຮັດສິ່ງນີ້?
-
ທ່ານຈະສາມາດຊ່ວຍລູກໆຂອງທ່ານໃຫ້ຈື່ຈຳທີ່ຈະອະທິຖານສະເໝີໄດ້ແນວໃດ? ບາງທີພວກເຂົາສາມາດເກັບກ້ອນຫີນນ້ອຍກ້ຽງໆສອງສາມກ້ອນ ແລະ ທາສີ ຂຽນຄຳວ່າ “ຄຳສອນ ແລະ ພັນທະສັນຍາ 10:5” ຫລື “ອະທິຖານສະເໝີ” ໃສ່ໃນກ້ອນຫີນ. ພວກເຂົາສາມາດວາງກ້ອນຫີນຂອງພວກເຂົາໄວ້ໃນບ່ອນຕ່າງໆທີ່ພວກເຂົາຢາກໄດ້ຮັບການເຕືອນໃຈໃຫ້ອະທິຖານ, ດັ່ງເຊັ່ນໃກ້ຕຽງນອນຂອງພວກເຂົາ, ຢູ່ກັບປຶ້ມໂຮງຮຽນ, ຫລື ບ່ອນທີ່ພວກເຂົາກິນເຂົ້າ. ອີງຕາມ ຄຳສອນ ແລະ ພັນທະສັນຍາ 10:5, ພຣະເຈົ້າອວຍພອນເຮົາແນວໃດເມື່ອເຮົາອະທິຖານ? ລູກໆຂອງທ່ານກໍສາມາດຊອກຫາຄຳຕອບເພີ່ມເຕີມຢູ່ໃນເພງ ດັ່ງເຊັ່ນ “ອະທິຖານຄອບຄົວ” (ເພງສວດ ແລະ ເພງຂອງເດັກນ້ອຍ, 73).
ຄຳສອນ ແລະ ພັນທະສັນຍາ 11:12–13
ພຣະວິນຍານບໍລິສຸດນຳພາເຮົາໃຫ້ເຮັດຄວາມດີ.
-
ເດັກນ້ອຍສາມາດຮຽນຮູ້ທີ່ຈະຮັບຮູ້ໄດ້ ເມື່ອພຣະວິນຍານກຳລັງກ່າວກັບພວກເຂົາ. ເພື່ອຊ່ວຍພວກເຂົາ, ທ່ານສາມາດເຊື່ອງດອກໄຟ ຫລື ໄຟສາຍ ແລະ ຮູບຂອງໃບໜ້າທີ່ມີຄວາມສຸກໄວ້ບ່ອນໃດບ່ອນໜຶ່ງໃນຫ້ອງ; ແລ້ວຂໍໃຫ້ລູກໆຂອງທ່ານຊອກຫາສິ່ງເຫລົ່ານີ້. ອ່ານ ຄຳສອນ ແລະ ພັນທະສັນຍາ 11:13, ແລະ ຊ່ວຍລູກໆຂອງທ່ານໃຫ້ລະບຸຖ້ອຍຄຳທີ່ກ່ຽວພັນກັບສິ່ງຂອງທີ່ພວກເຂົາໄດ້ຊອກເຫັນ. ຖ້ອຍຄຳເຫລົ່ານີ້ສິດສອນຫຍັງແດ່ກ່ຽວກັບວິທີທີ່ພຣະວິນຍານບໍລິສຸດຊ່ວຍເຫລືອເຮົາ?
-
ການແບ່ງປັນປະສົບການທາງວິນຍານຂອງທ່ານເອງສາມາດຊ່ວຍລູກໆຂອງທ່ານໃຫ້ຮັບຮູ້ອິດທິພົນຂອງພຣະວິນຍານບໍລິສຸດໃນຊີວິດຂອງພວກເຂົາ. ຂະນະທີ່ທ່ານແບ່ງປັນ, ຂໍໃຫ້ພວກເຂົາແບ່ງປັນປະສົບການຂອງພວກເຂົາເຊັ່ນກັນ. ພວກທ່ານຍັງສາມາດອ່ານ ຄຳສອນ ແລະ ພັນທະສັນຍາ 11:12–13 ນຳກັນ, ເພື່ອຊອກຫາວິທີທີ່ເຮົາຈະສາມາດຮັບຮູ້ ເມື່ອພຣະວິນຍານບໍລິສຸດກຳລັງຊີ້ນຳທາງເຮົາຢູ່ແນວໃດ. ໃຫ້ເປັນພະຍານວ່າ ພຣະບິດາເທິງສະຫວັນຕ້ອງການທີ່ຈະຊີ້ນຳເຮົາຜ່ານທາງພຣະວິນຍານບໍລິສຸດ.
ຄຳສອນ ແລະ ພັນທະສັນຍາ 11:21, 26
ເຮົາຈຳເປັນຕ້ອງຮູ້ພຣະກິດຕິຄຸນ ເພື່ອວ່າເຮົາຈະສາມາດຊ່ວຍຄົນອື່ນໃຫ້ພົບເຫັນຄວາມຈິງ.
-
ຄືກັນກັບ ໄຮຣຳ ສະມິດ, ລູກໆຂອງທ່ານອາດຈະມີໂອກາດຢ່າງຫລວງຫລາຍທີ່ຈະແບ່ງປັນພຣະກິດຕິຄຸນກັບຄົນອື່ນ. ພວກທ່ານສາມາດອ່ານ ຄຳສອນ ແລະ ພັນທະສັນຍາ 11:21, 26 ນຳກັນ ແລະ ຂໍໃຫ້ລູກໆຂອງທ່ານຊອກຫາສິ່ງທີ່ພຣະຜູ້ເປັນເຈົ້າໄດ້ບອກໄຮຣຳ ວ່າເພິ່ນຕ້ອງເຮັດຫຍັງ ເພື່ອວ່າເພິ່ນຈະສາມາດສິດສອນພຣະກິດຕິຄຸນ. ການສະແຫວງ “ຫາ” ພຣະຄຳຂອງພຣະເຈົ້າ ໝາຍຄວາມວ່າແນວໃດ? ເຮົາຈະເຮັດສິ່ງນີ້ໄດ້ແນວໃດ? ເຮົາຈະ “ສະສົມ” ພຣະຄຳຂອງພຣະເຈົ້າໄວ້ໃນໃຈຂອງເຮົາແນວໃດ? ບາງທີລູກໆຂອງທ່ານສາມາດຫລິ້ນລະຄອນກ້ອມເລື່ອງການແບ່ງປັນບາງສິ່ງກ່ຽວກັບພຣະເຢຊູຄຣິດ ຫລື ພຣະຄຳພີມໍມອນກັບຄົນອື່ນ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Joseph and Hyrum Smith [ໂຈເຊັບ ແລະ ໄຮຣຳ ສະມິດ], ໂດຍ ເຄັນ ຄໍແບັດ