“ວັນທີ 27 ເດືອນມັງກອນ–ວັນທີ 2 ເດືອນກຸມພາ: ‘ວຽກງານຂອງເຮົາຈະດຳເນີນໄປໜ້າ’: ຄຳສອນ ແລະ ພັນທະສັນຍາ 3–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 3–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 27 ເດືອນມັງກອນ–ວັນທີ 2 ເດືອນກຸມພາ: “ວຽກງານຂອງເຮົາຈະດຳເນີນໄປໜ້າ”

ຄຳສອນ ແລະ ພັນທະສັນຍາ 3–5

ລະຫວ່າງສອງສາມປີທຳອິດຂອງເພິ່ນ ໃນຖານະສາດສະດາຂອງພຣະຜູ້ເປັນເຈົ້າ, ໂຈເຊັບ ສະມິດ ຍັງບໍ່ຮູ້ຈັກທຸກສິ່ງກ່ຽວກັບ “ວຽກງານອັນໜ້າອັດສະຈັນ” ທີ່ເພິ່ນໄດ້ຖືກເອີ້ນໃຫ້ເຮັດ. ແຕ່ສິ່ງໜຶ່ງທີ່ປະສົບການໃນຕອນຕົ້ນຂອງເພິ່ນໄດ້ສິດສອນເພິ່ນກໍຄື ເພື່ອທີ່ຈະເຮັດວຽກງານຂອງພຣະເຈົ້າ, ເພິ່ນຕ້ອງ “ເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ” (ຄຳສອນ ແລະ ພັນທະສັນຍາ 4:1, 5). ຍົກຕົວຢ່າງ, ຖ້າຫາກພຣະຜູ້ເປັນເຈົ້າໄດ້ແນະນຳເພິ່ນໃຫ້ເຮັດບາງສິ່ງທີ່ເພິ່ນບໍ່ແນ່ໃຈວ່າເພິ່ນຢາກເຮັດຫລືບໍ່, ເພິ່ນຈຳເປັນຕ້ອງເຮັດຕາມຄຳແນະນຳຂອງພຣະຜູ້ເປັນເຈົ້າ. ແລະ ເຖິງແມ່ນວ່າເພິ່ນໄດ້ຮັບ “ການເປີດເຜີຍຫລາຍຢ່າງ, ແລະ … ມີອຳນາດທີ່ຈະເຮັດວຽກງານອັນຍິ່ງໃຫຍ່ຫລາຍຢ່າງ,” ຖ້າຫາກເພິ່ນຮູ້ສຶກວ່າ ສິ່ງທີ່ເພິ່ນຕ້ອງການສຳຄັນກວ່າພຣະປະສົງຂອງພຣະເຈົ້າແລ້ວ, ເພິ່ນກໍ “ຈະຕົກໄປ” (ຄຳສອນ ແລະ ພັນທະສັນຍາ 3:4). ແຕ່ໂຈເຊັບໄດ້ຮຽນຮູ້ບາງສິ່ງອື່ນອີກທີ່ສຳຄັນເທົ່າກັບການເຮັດວຽກງານຂອງພຣະເຈົ້າ ນັ້ນຄື: “ພຣະເຈົ້າມີເມດຕາ,” ແລະ ຖ້າຫາກໂຈເຊັບໄດ້ກັບໃຈຢ່າງຈິງໃຈ, ເພິ່ນກໍຈະ “ຍັງຖືກເລືອກ” (ຂໍ້ທີ 10). ເຖິງແນວໃດ, ວຽກງານຂອງພຣະເຈົ້າກໍເປັນວຽກງານແຫ່ງການໄຖ່. ແລະ ວ່າວຽກງານນັ້ນ “ຈະລົ້ມເຫລວບໍ່ໄດ້” (ຂໍ້ທີ 1).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 3:1–16

ເຮົາສາມາດໄວ້ວາງໃຈພຣະເຈົ້າໄດ້.

ໃນຕອນຕົ້ນຂອງການປະຕິບັດສາດສະໜາກິດຂອງໂຈເຊັບ ສະມິດ, ໝູ່ເພື່ອນທີ່ດີແມ່ນຫາຍາກ—ໂດຍສະເພາະໝູ່ເພື່ອນເຊັ່ນມາຕິນ ແຮຣິສ, ຊາຍທີ່ເປັນທີ່ເຄົາລົບ ແລະ ຮັ່ງມີ ຜູ້ທີ່ໄດ້ເຮັດການເສຍສະລະອັນຍິ່ງໃຫຍ່ເພື່ອສະໜັບສະໜູນວຽກງານຂອງໂຈເຊັບ. ດັ່ງນັ້ນ ເມື່ອມາຕິນໄດ້ຂໍອະນຸຍາດເອົາ 116 ໜ້າທຳອິດຂອງຕົ້ນສະບັບບົດແປພຣະຄຳພີມໍມອນໄປໃຫ້ພັນລະຍາຂອງລາວເບິ່ງ, ໂຈເຊັບກໍຢາກເຮັດຕາມຄຳຂໍຂອງລາວໂດຍທຳມະຊາດ, ເຖິງແມ່ນວ່າ ພຣະຜູ້ເປັນເຈົ້າໄດ້ເຕືອນບໍ່ໃຫ້ເຮັດກໍຕາມ. ໜ້າໂສກເສົ້າທີ່ໜ້າເຫລົ່ານັ້ນໄດ້ສູນເສຍໄປ ຂະນະທີ່ຢູ່ໃນການຄອບຄອງຂອງມາຕິນ, ແລະ ໂຈເຊັບກັບມາຕິນໄດ້ຖືກພຣະຜູ້ເປັນເຈົ້າຕີສອນຢ່າງຮຸນແຮງ (ເບິ່ງ Saints, 1:51–53).

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 3:1–15, ໃຫ້ໄຕ່ຕອງວິທີສິ່ງທີ່ພຣະຜູ້ເປັນເຈົ້າຕ້ອງການໃຫ້ທ່ານຮຽນຮູ້ຈາກປະສົບການຂອງພວກເພິ່ນ. ຍົກຕົວຢ່າງ, ທ່ານຮຽນຮູ້ຫຍັງແດ່ກ່ຽວກັບ:

ວຽກງານຂອງພຣະເຈົ້າ? (ເບິ່ງ ຂໍ້ທີ 1–3, 16).
ຜົນທີ່ຕາມມາຂອງການຢ້ານມະນຸດແທນທີ່ຈະໄວ້ວາງໃຈພຣະເຈົ້າ? (ເບິ່ງ ຂໍ້ທີ 4–8).
ພອນທີ່ມາຈາກການດຳລົງຢູ່ໃນຄວາມຊື່ສັດ? (ເບິ່ງ ຂໍ້ທີ 8).
ວິທີທີ່ພຣະຜູ້ເປັນເຈົ້າທັງວ່າກ່າວ ແລະ ທັງໃຫ້ກຳລັງໃຈໂຈເຊັບ? (ເບິ່ງ ຂໍ້ທີ 9–16).

ໃນຂ່າວສານຂອງເພິ່ນ “Which Way Do You Face?,” ແອວເດີ ລິນ ຈີ ຣອບບິນສ໌ ຍົກຕົວຢ່າງຫລາຍໆຢ່າງໃນພຣະຄຳພີກ່ຽວກັບຄົນທີ່ຢຳເກງພຣະເຈົ້າ ແລະ ຄົນທີ່ຍອມຕໍ່ຄວາມກົດດັນຈາກຄົນອື່ນ (Liahona, Nov. 2014, 9–11). ໃຫ້ຄິດທີ່ຈະອ່ານຕົວຢ່າງເຫລົ່ານີ້ໃນຂໍ້ພຣະຄຳພີທີ່ເພິ່ນອ້າງອີງເຖິງ. ທ່ານຮຽນຮູ້ຫຍັງແດ່ຈາກເລື່ອງລາວເຫລົ່ານີ້? ທ່ານມີປະສົບການໃດແດ່ທີ່ທ່ານໄດ້ໄວ້ວາງໃຈພຣະຜູ້ເປັນເຈົ້າ ເມື່ອປະເຊີນກັບຄວາມກົດດັນໃຫ້ເຮັດບາງຢ່າງທີ່ແຕກຕ່າງ? ແມ່ນຫຍັງຄືຜົນຂອງການກະທຳຂອງທ່ານ?

ເບິ່ງ Dale G. Renlund, “A Framework for Personal Revelation,” Liahona, Nov. 2022, 16–19; “The Contributions of Martin Harris,” ໃນ Revelations in Context (2016), 1–9; Topics and Questions, “Seeking Truth and Avoiding Deception,” ຫ້ອງສະໝຸດພຣະກິດຕິຄຸນ; “How Gentle God’s Commands,” Hymns, no. 125 ນຳອີກ.

ຄຳສອນ ແລະ ພັນທະສັນຍາ 4

ເຮົາສາມາດຮັບໃຊ້ພຣະເຈົ້າດ້ວຍສຸດໃຈ, ພະລັງ, ຄວາມນຶກຄິດ, ແລະ ກຳລັງຂອງເຮົາ.

ພາກທີ 4 ມັກຈະຖືກນຳໃຊ້ກັບຜູ້ສອນສາດສະໜາເຕັມເວລາ. ເຖິງຢ່າງໃດກໍຕາມ, ມັນສຳຄັນທີ່ຈະສັງເກດເຫັນວ່າ ການເປີດເຜີຍນີ້ໄດ້ຖືກມອບໃຫ້ແກ່ໂຈເຊັບ ສະມິດ ຜູ້ພໍ່, ຜູ້ທີ່ບໍ່ໄດ້ຖືກເອີ້ນໃຫ້ໄປສອນສາດສະໜາ ແຕ່ກໍຍັງ “ມີຄວາມປາດຖະໜາທີ່ຈະຮັບໃຊ້ພຣະເຈົ້າ” ຢູ່ (ຂໍ້ທີ 3).

ວິທີໜຶ່ງໃນການອ່ານພາກນີ້ ແມ່ນການຈິນຕະນາການວ່າ ມັນເປັນລາຍລະອຽດວຽກງານສຳລັບບາງຄົນຜູ້ທີ່ຢາກເຮັດວຽກງານຂອງພຣະຜູ້ເປັນເຈົ້າ. ພຣະຜູ້ເປັນເຈົ້າກຳລັງຊອກຫາຫຍັງ? ພຣະອົງສະເໜີຜົນປະໂຫຍດຫຍັງແດ່?

ທ່ານຮຽນຮູ້ຫຍັງແດ່ກ່ຽວກັບການຮັບໃຊ້ພຣະຜູ້ເປັນເຈົ້າຈາກການເປີດເຜີຍນີ້?

ປະທານຣະໂຊ ເອັມ ແນວສັນ ໄດ້ເອີ້ນການເຕົ້າໂຮມອິດສະຣາເອນວ່າເປັນ “ການທ້າທາຍທີ່ ຍິ່ງໃຫຍ່ທີ່ສຸດ, ອຸດົມການທີ່ ຍິ່ງໃຫຍ່ທີ່ສຸດ, ແລະ ວຽກງານທີ່ ຍິ່ງໃຫຍ່ທີ່ສຸດ ເທິງແຜ່ນດິນໂລກ” (“Hope of Israel” [ກອງປະຊຸມໃຫ້ຄຳດົນໃຈຊາວໜຸ່ມທົ່ວໂລກ, ວັນທີ 3 ເດືອນມິຖຸນາ, 2018], ຫ້ອງສະໝຸດພຣະກິດຕິຄຸນ). ທ່ານພົບເຫັນຫຍັງແດ່ໃນຄຳປາໄສຂອງເພິ່ນ ທີ່ດົນໃຈທ່ານໃຫ້ມີສ່ວນຮ່ວມໃນວຽກງານນີ້?

ຜູ້ສອນສາດສະໜາກຳລັງເວົ້າລົມກັບແມ່ຍິງຄົນໜຶ່ງຂະນະທີ່ກຳລັງໃຫ້ການຮັບໃຊ້ — ທຸກຄົນທີ່ມີຄວາມປາດຖະໜາທີ່ຈະຮັບໃຊ້ພຣະເຈົ້າກໍຖືກເອີ້ນໃຫ້ມາຫາວຽກງານນັ້ນ.

ຄຳສອນ ແລະ ພັນທະສັນຍາ 5

ຜ່ານທາງພຣະວິນຍານບໍລິສຸດ, ເຮົາສາມາດເປັນພະຍານເຖິງພຣະຄຳພີມໍມອນໄດ້.

ໃນເດືອນມີນາ ປີ 1829, ພັນລະຍາຂອງມາຕິນ ແຮຣິສ, ລູສີ, ໄດ້ອຸທອນຂຶ້ນສານວ່າ ໂຈເຊັບ ສະມິດ ກຳລັງຫລອກລວງຜູ້ຄົນ ໂດຍການທຳທ່າແປແຜ່ນຈາລຶກຄຳ (ເບິ່ງ Saints, 1:56–58). ສະນັ້ນ ມາຕິນຈຶ່ງໄດ້ຂໍຫລັກຖານຈາກໂຈເຊັບຕື່ມ ເພື່ອຢືນຢັນວ່າແຜ່ນຈາລຶກຄຳມີຈິງ. ຄຳສອນ ແລະ ພັນທະສັນຍາ 5 ແມ່ນການເປີດເຜີຍຢ່າງໜຶ່ງ ໃນການຕອບສະໜອງຕໍ່ຄຳຂໍຮ້ອງຂອງມາຕິນ. ທ່ານຮຽນຮູ້ຫຍັງແດ່ຈາກພາກນີ້ກ່ຽວກັບສິ່ງດັ່ງຕໍ່ໄປນີ້:

ພຣະຜູ້ເປັນເຈົ້າໄດ້ກ່າວວ່າແມ່ນຫຍັງຈະເກີດຂຶ້ນ ຖ້າແຜ່ນຈາລຶກຄຳຖືກສະແດງໃຫ້ໂລກເຫັນ (ເບິ່ງ ຄຳສອນ ແລະ ພັນທະສັນຍາ 5:7). ທ່ານຄິດວ່າເປັນຫຍັງຈຶ່ງເປັນເຊັ່ນນັ້ນ?
ບົດບາດຂອງການເປັນພະຍານໃນວຽກງານຂອງພຣະຜູ້ເປັນເຈົ້າ (ເບິ່ງ ຂໍ້ທີ 11–15; ເບິ່ງ 2 ໂກຣິນໂທ 13:1 ນຳອີກ).
ວິທີທີ່ຈະຮັບປະຈັກພະຍານເຖິງພຣະຄຳພີມໍມອນສຳລັບຕົນເອງ (ເບິ່ງ ຂໍ້ທີ 16, 24; ເບິ່ງ ໂມໂຣໄນ 10:3–5 ນຳອີກ).

ຄຳສອນ ແລະ ພັນທະສັນຍາ 5:1–10

ພຣະເຢຊູຄຣິດໄດ້ປະທານພຣະຄຳຂອງພຣະອົງຜ່ານທາງໂຈເຊັບ ສະມິດ.

ຄຳສອນ ແລະ ພັນທະສັນຍາ 5:1–10 ສິດສອນທ່ານຫຍັງແດ່ ກ່ຽວກັບບົດບາດຂອງໂຈເຊັບ ສະມິດ ໃນວັນເວລາຂອງເຮົາ—ແລະ ໃນຊີວິດຂອງທ່ານ? (ເບິ່ງ 2 ນີໄຟ 3:6–24 ນຳອີກ.)

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 3:5–10; 5:21–22

ເຮົາສາມາດເລືອກສິ່ງທີ່ຖືກຕ້ອງ ເມື່ອຄົນອື່ນພະຍາຍາມທີ່ຈະເຮັດໃຫ້ເຮົາເຮັດໃນສິ່ງທີ່ຜິດ.

ເພື່ອທີ່ຈະເລີ່ມການສົນທະນາກ່ຽວກັບການຮຽນຮູ້ທີ່ຈະໄວ້ວາງໃຈພຣະບິດາເທິງສະຫວັນ, ທ່ານອາດຢາກທົບທວນເລື່ອງລາວຂອງໜ້າຕົ້ນສະບັບທີ່ເສຍໄປ (ເບິ່ງ ເລື່ອງຄຳສອນ ແລະ ພັນທະສັນຍາ, 18–21). ຈາກນັ້ນ ທ່ານສາມາດສະແດງບົດບາດກັບລູກໆຂອງທ່ານໃນສະຖານະການຕອນທີ່ພວກເຂົາອາດຖືກລໍ້ລວງໃຫ້ເຮັດບາງສິ່ງທີ່ພວກເຂົາຮູ້ວ່າບໍ່ຖືກຕ້ອງ. ຖ້ອຍຄຳ ແລະ ວະລີໃດແດ່ໃນ ຄຳສອນ ແລະ ພັນທະສັນຍາ 3:5–8; 5:21–22 ທີ່ສາມາດຊ່ວຍພວກເຂົາໃນລະຫວ່າງສະຖານະການເຫລົ່ານີ້?

2:53
Chapter 4: Martin Harris and the Lost Pages: 1827–1828

ຄຳສອນ ແລະ ພັນທະສັນຍາ 4

ພຣະຜູ້ເປັນເຈົ້າເຊື້ອເຊີນເຮົາໃຫ້ຊ່ວຍເຫລືອວຽກງານຂອງພຣະອົງ.

ແຕ່ລະຂໍ້ໃນ ຄຳສອນ ແລະ ພັນທະສັນຍາ 4 ບັນຈຸຄວາມຈິງທີ່ມີຄ່າຫລາຍຢ່າງ ທີ່ສາມາດຊ່ວຍລູກໆຂອງທ່ານໃຫ້ຮຽນຮູ້ກ່ຽວກັບການຮັບໃຊ້ພຣະເຈົ້າໄດ້. ຕໍ່ໄປນີ້ແມ່ນແນວຄິດຈຳນວນໜຶ່ງ ເພື່ອຊ່ວຍໃຫ້ພວກເຂົາຄົ້ນພົບຄວາມຈິງເຫລົ່ານີ້:
- ພວກທ່ານສາມາດອ່ານ ຄຳສອນ ແລະ ພັນທະສັນຍາ 4:1 ນຳກັນ ແລະ ສະແດງຮູບພາບທີ່ສະແດງໃຫ້ເຫັນເຖິງວຽກງານ “ອັນໜ້າອັດສະຈັນ” ຂອງພຣະເຈົ້າ (ເຊັ່ນ ຜູ້ສອນສາດສະໜາ, ພຣະວິຫານ, ແລະ ພຣະຄຳພີມໍມອນ).
- ລູກໆຂອງທ່ານສາມາດຄິດກ່ຽວກັບການກະທຳ ຫລື ຮູບແຕ້ມທີ່ສະແດງໃຫ້ເຫັນເຖິງວະລີທີ່ວ່າ “ຮັບໃຊ້ພຣະອົງດ້ວຍສຸດໃຈ, ພະລັງ, ຄວາມນຶກຄິດ, ແລະ ກຳລັງຂອງເຈົ້າ” (ຄຳສອນ ແລະ ພັນທະສັນຍາ 4:2).
- ພວກທ່ານສາມາດເບິ່ງເຄື່ອງມືທີ່ຖືກໃຊ້ເຮັດວຽກໃນທົ່ງນຳກັນ. ເຄື່ອງມືເຫລົ່ານີ້ຊ່ວຍເຮົາແນວໃດ? ແລ້ວລູກໆຂອງທ່ານສາມາດຊອກຫາສິ່ງເຫລົ່ານີ້ໃນ ຄຳສອນ ແລະ ພັນທະສັນຍາ 4:5–6 ທີ່ເປັນເໝືອນດັ່ງເຄື່ອງມືສຳລັບເຮັດວຽກຂອງພຣະເຈົ້າ.
- ລູກຜູ້ໃຫຍ່ສາມາດຄົ້ນຫາ ຄຳສອນ ແລະ ພັນທະສັນຍາ 4 ດ້ວຍຕົວພວກເຂົາເອງ ແລະ ເຮັດລາຍການຂອງສິ່ງທີ່ພວກເຂົາຮຽນຮູ້ກ່ຽວກັບວ່າ ການຮັບໃຊ້ພຣະເຈົ້າໝາຍຄວາມວ່າແນວໃດ.
- ພວກທ່ານສາມາດຮ້ອງເພງກ່ຽວກັບວຽກງານເຜີຍແຜ່ນຳກັນ, ເຊັ່ນ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50).

ເດັກຊາຍກຳລັງຊ່ວຍປູກຕົ້ນໄມ້ — ເຮົາສາມາດຊ່ວຍວຽກງານຂອງພຣະເຈົ້າໄດ້ ໂດຍການຮັບໃຊ້ຄົນອື່ນ.

ດັດແປງກິດຈະກຳເພື່ອຮອງຮັບຄົນພິການ. ການດັດແປງເລັກນ້ອຍຕໍ່ກິດຈະກຳ ສາມາດເຮັດໃຫ້ແນ່ໃຈວ່າ ທຸກຄົນມີໂອກາດໃນການຮຽນຮູ້. ຍົກຕົວຢ່າງ, ຖ້າຫາກກິດຈະກຳແນະນຳໃຫ້ສະແດງຮູບພາບ, ທ່ານສາມາດຮ້ອງເພງແທນ ເພື່ອລວມຄົນທີ່ມີບັນຫາເລື່ອງການເບິ່ງເຫັນເຂົ້ານຳ.

ຄຳສອນ ແລະ ພັນທະສັນຍາ 5:1–7, 11, 16, 23–24

ເຮົາສາມາດເປັນພະຍານວ່າ ພຣະຄຳພີມໍມອນເປັນຄວາມຈິງ.

ເພື່ອສິດສອນລູກໆຂອງທ່ານກ່ຽວກັບພະຍານ, ທ່ານສາມາດຂໍໃຫ້ພວກເຂົາຈິນຕະນາການວ່າ ໝູ່ຄົນໜຶ່ງບອກພວກເຂົາວ່າ ພວກເຂົາເຫັນແມວຍ່າງດ້ວຍຂາໜ້າຂອງມັນ. ພວກເຂົາຈະເຊື່ອບໍ່? ຖ້າຫາກໝູ່ອີກຄົນໜຶ່ງເວົ້າຢ່າງດຽວກັນເດ? ໃຫ້ເວົ້າກ່ຽວກັບວ່າ “ພະຍານ” ແມ່ນຫຍັງ ແລະ ເປັນຫຍັງພະຍານຈຶ່ງສຳຄັນ. ແລ້ວທ່ານສາມາດຊ່ວຍລູກໆຂອງທ່ານຄົ້ນຄວ້າ ຄຳສອນ ແລະ ພັນທະສັນຍາ 5:1–3, 7, 11 ເພື່ອຫາຄຳຕອບໃຫ້ກັບຄຳຖາມດັ່ງຕໍ່ໄປນີ້:
- ມາຕິນ ແຮຣິສ ຢາກຮູ້ກ່ຽວກັບຫຍັງ?
- ໂຈເຊັບ ສະມິດ ສາມາດເອົາແຜ່ນຈາລຶກຄຳໃຫ້ໃຜເບິ່ງໄດ້?
- ເປັນຫຍັງການເຫັນແຜ່ນຈາລຶກ ອາດບໍ່ໂນ້ມນ້າວບາງຄົນໃຫ້ເຊື່ອວ່າ ພຣະຄຳພີມໍມອນເປັນຄວາມຈິງ?
- ເຮົາສາມາດເຮັດແນວໃດ ເພື່ອທີ່ຈະເປັນພະຍານເຖິງພຣະຄຳພີມໍມອນໄດ້? (ເບິ່ງ ຄຳສອນ ແລະ ພັນທະສັນຍາ 5:16; ໂມໂຣໄນ 10:3–5).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບຂອງໂຈເຊັບ ສະມິດ ແລະ ພໍ່ແມ່ຂອງເພິ່ນເບິ່ງຄືກັງວົນຫລາຍ — Devastating Weight of 116 Pages [ຄວາມເສຍຫາຍຢ່າງໜັກຂອງ 116 ໜ້າ], ໂດຍ ຄະວານີ ໂພວີ ວິນເດີ