“ວັນທີ 3–9 ເດືອນກຸມພາ: ‘ນີ້ຄືວິນຍານແຫ່ງການເປີດເຜີຍ’: ຄຳສອນ ແລະ ພັນທະສັນຍາ 6–9,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 6–9,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 3–9 ເດືອນກຸມພາ: “ນີ້ຄືວິນຍານແຫ່ງການເປີດເຜີຍ”

ຄຳສອນ ແລະ ພັນທະສັນຍາ 6–9

ໃນລະດູໃບໄມ້ລົ່ນຂອງປີ 1828, ນາຍຄູໜຸ່ມຄົນໜຶ່ງຊື່ ອໍລີເວີ ຄາວເດີຣີ ໄດ້ຮັບເອົາໜ້າທີ່ເປັນນາຍຄູຢູ່ເມືອງແມນເຈດສະເຕີ, ລັດນິວຢອກ, ແລະ ໄດ້ພັກຢູ່ນຳຄອບຄົວຂອງລູສີ ແລະ ໂຈເຊັບ ສະມິດ ຜູ້ພໍ່. ອໍລີເວີໄດ້ຍິນກ່ຽວກັບໂຈເຊັບ ລູກຊາຍຂອງພວກເພິ່ນ ແລະ ປະສົບການທີ່ໜ້າອັດສະຈັນໃຈຂອງເພິ່ນ, ແລະ ອໍລີເວີ, ຜູ້ຊຶ່ງຖືວ່າຕົວເອງເປັນຄົນມັກສະແຫວງຫາຄວາມຈິງ, ຈຶ່ງຢາກຮູ້ຕື່ມອີກ. ຄອບຄົວສະມິດໄດ້ບັນຍາຍການມາຢ້ຽມຢາມຂອງທູດ, ບັນທຶກຂອງສະໄໝບູຮານ, ແລະ ຂອງປະທານທີ່ມອບໃຫ້ເພື່ອແປພາສາ ໂດຍອຳນາດຂອງພຣະເຈົ້າ. ອໍລີເວີມີຄວາມປະຫລາດໃຈຫລາຍ. ມັນເປັນຄວາມຈິງແທ້ບໍ? ລູສີ ແລະ ໂຈເຊັບ ຜູ້ພໍ່ ໄດ້ໃຫ້ຄຳແນະນຳແກ່ລາວ ຊຶ່ງກ່ຽວຂ້ອງກັບທຸກຄົນທີ່ສະແຫວງຫາຄວາມຈິງ: ໃຫ້ອະທິຖານ ແລະ ທູນຖາມພຣະຜູ້ເປັນເຈົ້າ.

ອໍລີເວີໄດ້ເຮັດ, ແລະ ພຣະຜູ້ເປັນເຈົ້າໄດ້ຕອບ, ໂດຍກ່າວ “ຄວາມສະຫງົບແກ່ຈິດໃຈ [ຂອງເພິ່ນ]” (ຄຳສອນ ແລະ ພັນທະສັນຍາ 6:23). ອໍລີເວີໄດ້ຄົ້ນພົບວ່າ ການເປີດເຜີຍບໍ່ແມ່ນສຳລັບພຽງແຕ່ສາດສະດາເຊັ່ນໂຈເຊັບ ສະມິດ ເທົ່ານັ້ນ. ມັນແມ່ນສຳລັບທຸກຄົນຜູ້ທີ່ຕ້ອງການມັນ ແລະ ສະແຫວງຫາມັນຢ່າງພາກພຽນ. ອໍລີເວີຍັງມີຫລາຍຢ່າງທີ່ຕ້ອງຮຽນຮູ້, ແຕ່ລາວກໍຮູ້ພຽງພໍທີ່ຈະເລີ່ມຕົ້ນບາດກ້າວທຳອິດ. ລາວຮູ້ວ່າພຣະຜູ້ເປັນເຈົ້າໄດ້ເຮັດບາງຢ່າງທີ່ສຳຄັນ ຜ່ານທາງໂຈເຊັບ ສະມິດ, ແລະ ອໍລີເວີຢາກມີສ່ວນຮ່ວມໃນນັ້ນ.

ເບິ່ງ Saints, 1:58–64; “Days of Harmony” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

Days of Harmony
Witness Oliver Cowdery’s experience as Joseph Smith’s scribe during the translation of the Book of Mormon.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 6; 8–9

ພຣະບິດາເທິງສະຫວັນກ່າວກັບເຮົາຜ່ານທາງພຣະວິນຍານບໍລິສຸດ.

ໃນລະດູໃບໄມ້ປົ່ງຂອງປີ 1829, ອໍລີເວີ ຄາວເດີຣີ ໄດ້ອາສາສະໝັກເປັນຜູ້ຂຽນໃຫ້ໂຈເຊັບ ສະມິດ ຂະນະທີ່ເພິ່ນສືບຕໍ່ແປພຣະຄຳພີມໍມອນຕໍ່ໄປ. ປະສົບການນັ້ນເຮັດໃຫ້ລາວຕື່ນເຕັ້ນຫລາຍ, ແລະ ລາວກໍຢາກຮູ້ວ່າ ລາວຈະໄດ້ຮັບການເປີດເຜີຍ ແລະ ໄດ້ຮັບຂອງປະທານໃຫ້ແປຫລືບໍ່. ເຖິງຢ່າງໃດກໍຕາມ, ໃນການລອງເຮັດຄັ້ງທຳອິດຂອງລາວ, ມັນບໍ່ໄດ້ເປັນໄປດ້ວຍດີເລີຍ.

ຖ້າຫາກທ່ານເຄີຍປະສົບບັນຫາໃນການໄດ້ຮັບຄວາມເຂົ້າໃຈການເປີດເຜີຍ, ບາງທີທ່ານອາດເຂົ້າໃຈເຖິງປະສົບການຂອງອໍລີເວີໄດ້—ແລະ ຮຽນຮູ້ຈາກສິ່ງນັ້ນ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 6, 8, ແລະ 9, ໃຫ້ສັງເກດເບິ່ງສິ່ງທີ່ພຣະຜູ້ເປັນເຈົ້າໄດ້ສິດສອນອໍລີເວີກ່ຽວກັບການເປີດເຜີຍສ່ວນຕົວ. ຍົກຕົວຢ່າງ:

ຄຳສອນ ແລະ ພັນທະສັນຍາ 6:5–7; 8:1; 9:7–8 ແນະນຳຫຍັງແດ່ກ່ຽວກັບສິ່ງທີ່ພຣະຜູ້ເປັນເຈົ້າຮຽກຮ້ອງຈາກທ່ານ ກ່ອນພຣະອົງຈະເປີດເຜີຍພຣະປະສົງຂອງພຣະອົງ?
ທ່ານຮຽນຮູ້ຫຍັງແດ່ຈາກ ຄຳສອນ ແລະ ພັນທະສັນຍາ 6:14–17, 22–24; 8:2–3; 9:7–9 ກ່ຽວກັບການເປີດເຜີຍທີ່ອາດມາເຖິງໃນວິທີທີ່ແຕກຕ່າງກັນ? ທ່ານຈະຮູ້ຈັກມັນໄດ້ແນວໃດ?
ມີສິ່ງອື່ນໃດອີກແດ່ທີ່ທ່ານໄດ້ຮຽນຮູ້ກ່ຽວກັບການເປີດເຜີຍຈາກພາກເຫລົ່ານີ້?

ປະສົບການຂອງອໍລີເວີອາດເຮັດໃຫ້ທ່ານ “ນຶກເຖິງ” ຊ່ວງເວລາທີ່ທ່ານຮູ້ສຶກວ່າພຣະຜູ້ເປັນເຈົ້າກຳລັງກ່າວກັບທ່ານ (ຄຳສອນ ແລະ ພັນທະສັນຍາ 6:22). ທ່ານເຄີຍບັນທຶກຄວາມຄິດ ຫລື ຄວາມຮູ້ສຶກຂອງທ່ານກ່ຽວກັບປະສົບການເຫລົ່ານີ້ຫລືບໍ່? ຖ້າເຄີຍ, ໃຫ້ພິຈາລະນາທີ່ຈະອ່ານສິ່ງທີ່ທ່ານໄດ້ຂຽນໄວ້. ຖ້າບໍ່ເຄີຍ, ໃຫ້ໃຊ້ເວລາຂຽນສິ່ງທີ່ທ່ານຈື່ໄດ້. ພິຈາລະນາວ່າທ່ານຈະສາມາດສືບຕໍ່ດຶງເອົາຄວາມເຂັ້ມແຂງຈາກປະສົບການເຫລົ່ານີ້ຕໍ່ໄປໄດ້ແນວໃດ. ສຳລັບບາງແນວຄິດ, ໃຫ້ເບິ່ງຂ່າວສານຂອງ Elder Neil L. Andersen “Spiritually Defining Memories” (Liahona, May 2020, 18–22).

ຜູ້ນຳຂອງສາດສະໜາຈັກຫລາຍທ່ານໄດ້ແບ່ງປັນປະສົບການກັບການເປີດເຜີຍຢູ່ໃນບ່ອນເກັບກຳວິດີໂອ “Hear Him”. ຫລັງຈາກໄດ້ເບິ່ງວິດີໂອເຫລົ່ານີ້ ໜຶ່ງເລື່ອງ ຫລື ຫລາຍກວ່ານັ້ນແລ້ວ, ທ່ານອາດຈະຮູ້ສຶກໄດ້ຮັບການດົນໃຈໃຫ້ບັນທຶກປະສົບການຂອງຕົນເອງ, ແບ່ງປັນວ່າພຣະຜູ້ເປັນເຈົ້າໄດ້ກ່າວກັບທ່ານແນວໃດ.

ເບິ່ງ Topics and Questions, “Personal Revelation,” ຫ້ອງສະໝຸດພຣະກິດຕິຄຸນ; “Oliver Cowdery’s Gift,” ໃນ Revelations in Context, 15–19 ນຳອີກ.

ຄຳສອນ ແລະ ພັນທະສັນຍາ 6:18–21, 29–37

ໃຫ້ຫວັງເພິ່ງພຣະຄຣິດໃນທຸກຄວາມຄິດ.

ພຣະຜູ້ເປັນເຈົ້າຮູ້ຈັກວ່າໂຈເຊັບ ສະມິດ ຈະປະສົບກັບ “ສະຖານະການຫຍຸ້ງຍາກ” ໃນປີທີ່ຈະມາເຖິງ (ຄຳສອນ ແລະ ພັນທະສັນຍາ 6:18). ພຣະອົງກໍຮູ້ຈັກເຖິງການທົດລອງໃນອະນາຄົດຂອງທ່ານເຊັ່ນກັນ. ທ່ານພົບເຫັນຫຍັງແດ່ໃນຄຳແນະນຳຂອງພຣະອົງຕໍ່ໂຈເຊັບ ແລະ ອໍລີເວີ ໃນ ຄຳສອນ ແລະ ພັນທະສັນຍາ 6:18–21, 29–37 ທີ່ຊ່ວຍທ່ານໃຫ້ໄວ້ວາງໃຈພຣະອົງ?

ທ່ານຮູ້ສຶກວ່າ ຄຳວ່າ “ຫວັງເພິ່ງ [ພຣະຄຣິດ] ໃນທຸກຄວາມຄິດ” ໝາຍຄວາມວ່າແນວໃດ? (ຂໍ້ທີ 36). ທ່ານຈະເຮັດເຊັ່ນນີ້ຢ່າງສະໝ່ຳສະເໝີຫລາຍຂຶ້ນໄດ້ແນວໃດ—ໃນຊ່ວງເວລາທີ່ດີ ແລະ “ສະຖານະການຫຍຸ້ງຍາກ”? ໃຫ້ພິຈາລະນາຄຳແນະນຳນີ້ຈາກປະທານຣະໂຊ ເອັມ ແນວສັນ: “ມັນຮຽກຮ້ອງຄວາມພະຍາຍາມທາງຈິດໃຈ ທີ່ຈະຫວັງເພິ່ງພຣະອົງ ໃນ ທຸກ ຄວາມຄິດ. ແຕ່ເມື່ອເຮົາເຮັດເຊັ່ນນັ້ນ, ຄວາມສົງໄສ ແລະ ຄວາມຢ້ານກົວຂອງເຮົາຈະຜ່າຍໜີໄປ” (“Drawing the Power of Jesus Christ into Our Lives,” Liahona, 41).

ເບິ່ງ Neil L. Andersen, “My Mind Caught Hold upon This Thought of Jesus Christ,” Liahona, May 2023, 91–94 ນຳອີກ.

ຮູບພາບພຣະຫັດຂອງພຣະຜູ້ຊ່ວຍໃຫ້ລອດ, ດ້ວຍຮອຍຕະປູໃນຝາພຣະຫັດຂອງພຣະອົງ — ລາຍລະອຽດຂອງ Behold My Hand [ຈົ່ງເບິ່ງມືຂອງເຮົາ], ໂດຍ ແຈັບຟະຣີ ຫວອດ

ຄຳສອນ ແລະ ພັນທະສັນຍາ 6:29–37

“ຢ່າຢ້ານກົວທີ່ຈະເຮັດຄວາມດີ.”

ເປັນຫຍັງບາງເທື່ອເຮົາຈຶ່ງ “ຢ້ານ … ທີ່ຈະເຮັດຄວາມດີ”? (ຂໍ້ທີ 33). ທ່ານພົບເຫັນຫຍັງແດ່ໃນ ຄຳສອນ ແລະ ພັນທະສັນຍາ 6:29–37 ທີ່ໃຫ້ຄວາມກ້າຫານແກ່ທ່ານ? ໃຫ້ພິຈາລະນາຮ້ອງເພງ ຫລື ຟັງເພງສວດທີ່ດົນໃຈທ່ານໃຫ້ມີຄວາມກ້າຫານໃນພຣະຄຣິດ, ເຊັ່ນ “ຂໍໃຫ້ເຮົາເດີນໄປ” (ເພງສວດ ແລະ ເພງຂອງເດັກນ້ອຍ, 10).

ຄຳສອນ ແລະ ພັນທະສັນຍາ 6–7; 9:3, 7–14

“ແມ່ນແຕ່ເຈົ້າປາດຖະໜາຈາກເຮົາສັນໃດ ມັນຈະເປັນໄປ.”

ໃຫ້ສັງເກດເບິ່ງວ່າ ມີຈັກເທື່ອທີ່ຄຳວ່າ “ປາດຖະໜາ” ປະກົດຢູ່ໃນ ພາກທີ 6 ແລະ 7. ທ່ານຮຽນຮູ້ຫຍັງແດ່ຈາກພາກເຫລົ່ານີ້ ວ່າພຣະເຈົ້າໃຫ້ຄວາມສຳຄັນກັບຄວາມປາດຖະໜາຂອງທ່ານແນວໃດ? ໃຫ້ຖາມຕົວເອງ ຄຳຖາມຂອງພຣະຜູ້ເປັນເຈົ້າ ໃນ ຄຳສອນ ແລະ ພັນທະສັນຍາ 7:1: “ເຈົ້າປາດຖະໜາສິ່ງໃດ?”

ຄວາມປາດຖະໜາທີ່ຊອບທຳຢ່າງໜຶ່ງຂອງອໍລີເວີ ຄາວເດີຣີ—ທີ່ຈະແປເໝືອນດັ່ງໂຈເຊັບ ສະມິດ—ບໍ່ໄດ້ປະສົບຄວາມສຳເລັດ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 9:3, 7–14, ທ່ານໄດ້ຮັບຄວາມປະທັບໃຈຫຍັງແດ່ ທີ່ອາດຊ່ວຍທ່ານໄດ້ ເມື່ອຄວາມປາດຖະໜາທີ່ຊອບທຳຂອງທ່ານ ບໍ່ປະສົບຄວາມສຳເລັດໃນເວລານີ້?

ເບິ່ງ ຄຳສອນ ແລະ ພັນທະສັນຍາ 11:8; Dallin H. Oaks, “Desire,” Liahona, May 2011, 42–45 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 6:5, 15–16, 22–23; 8:2; 9:7–9

ພຣະບິດາເທິງສະຫວັນກ່າວກັບເຮົາຜ່ານທາງພຣະວິນຍານບໍລິສຸດ.

ຄວາມຈິງທີ່ອໍລີເວີ ຄາວເດີຣີ ໄດ້ຮຽນຮູ້ກ່ຽວກັບການເປີດເຜີຍສ່ວນຕົວສາມາດຊ່ວຍລູກໆຂອງທ່ານໄດ້ ເມື່ອພວກເຂົາພັດທະນາຄວາມສາມາດໃນການຮັບຮູ້ພຣະວິນຍານບໍລິສຸດ. ທ່ານສາມາດໃຊ້ “ບົດທີ 5: ໂຈເຊັບ ສະມິດ ແລະ ອໍລີເວີ ຄາວເດີຣີ” (ໃນ ເລື່ອງຄຳສອນ ແລະ ພັນທະສັນຍາ, 22–25, ຫລື ວິດີໂອທີ່ກ່ຽວຂ້ອງໃນຫ້ອງສະໝຸດພຣະກິດຕິຄຸນ) ເພື່ອສິດສອນກ່ຽວກັບອໍລີເວີ ແລະ ສິ່ງທີ່ເພິ່ນໄດ້ຮຽນຮູ້. ແບ່ງປັນພາກສ່ວນໃນເລື່ອງລາວທີ່ທ່ານມັກຊອບນຳກັນ. ເມື່ອທ່ານເຮັດ, ໃຫ້ເນັ້ນສິ່ງທີ່ພຣະຜູ້ເປັນເຈົ້າໄດ້ສິດສອນອໍລີເວີກ່ຽວກັບວິທີໄດ້ຍິນສຸລະສຽງຂອງພຣະເຈົ້າ, ແລະ ອ່ານຂໍ້ພຣະຄຳພີທີ່ກ່ຽວຂ້ອງ, ເຊັ່ນ ຄຳສອນ ແລະ ພັນທະສັນຍາ 6:23 ຫລື 9:7–9.

2:49
Chapter 5: Joseph Smith and Oliver Cowdery: February–April 1829

ອໍລີເວີ ຄາວເດີຣີ ໄດ້ຮຽນຮູ້ກ່ຽວກັບການເປີດເຜີຍ ຂະນະທີ່ກຳລັງຊ່ວຍເຫລືອໂຈເຊັບ ສະມິດ ແປພຣະຄຳພີມໍມອນ.
ທ່ານສາມາດເຊື້ອເຊີນລູກໆຂອງທ່ານໃຫ້ແຕະຫົວຂອງພວກເຂົາ ແລະ ໜ້າເອິກຂອງພວກເຂົາ ຂະນະທີ່ທ່ານອ່ານຄຳວ່າ “ຈິດໃຈ” ແລະ “ຫົວໃຈ” ເຊັ່ນກັນ ໃນ ຄຳສອນ ແລະ ພັນທະສັນຍາ 8:2. ບອກລູກໆຂອງທ່ານ, ຈາກປະສົບການຂອງທ່ານ, ວ່າມັນເປັນຈັ່ງໃດ ເມື່ອພຣະວິນຍານບໍລິສຸດກ່າວຕໍ່ຈິດໃຈ ແລະ ຫົວໃຈຂອງທ່ານ. ຊ່ວຍພວກເຂົາໃຫ້ພົບເຫັນຄຳຕອບຕໍ່ຄຳຖາມທີ່ວ່າ “ພຣະວິນຍານບໍລິສຸດກ່າວກັບເຮົາແນວໃດ?” ໃນຂໍ້ເຫລົ່ານີ້: ຄຳສອນ ແລະ ພັນທະສັນຍາ 6:15–16, 22–23; 8:2; 9:7–9.

ໃຊ້ເລື່ອງເລົ່າ. ເລື່ອງເລົ່າຊ່ວຍໃຫ້ເດັກນ້ອຍເຂົ້າໃຈຫລັກທຳພຣະກິດຕິຄຸນ ເພາະມັນສະແດງໃຫ້ເຫັນວ່າຄົນອື່ນດຳລົງຊີວິດຕາມຫລັກທຳເຫລົ່ານີ້ແນວໃດ. ຂະນະທີ່ທ່ານສິດສອນ, ໃຫ້ຊອກຫາວິທີລວມເລື່ອງເລົ່າ—ຈາກພຣະຄຳພີ, ຈາກປະຫວັດສາດຂອງສາດສະໜາຈັກ, ຫລື ຈາກຊີວິດຂອງທ່ານເອງ—ທີ່ສະແດງໃຫ້ເຫັນຫລັກທຳໃນພຣະຄຳພີ.

ຄຳສອນ ແລະ ພັນທະສັນຍາ 6:34

ຍ້ອນພຣະເຢຊູຄຣິດ, ເຮົາຈຶ່ງ “ບໍ່ຢ້ານກົວ.”

ພຣະຜູ້ເປັນເຈົ້າໄດ້ບອກໂຈເຊັບ ແລະ ອໍລີເວີວ່າ, “ຢ່າຢ້ານກົວ, ຝູງແກະນ້ອຍເອີຍ” (ຄຳສອນ ແລະ ພັນທະສັນຍາ 6:34). ທ່ານອາດເຊື້ອເຊີນລູກໆຂອງທ່ານເວົ້າລຶ້ມຄືນວະລີນັ້ນຫລາຍເທື່ອກັບທ່ານ. ພວກເຂົາອາດມ່ວນຊື່ນກັບການທຳທ່າເປັນຝູງແກະທີ່ຢ້ານກົວ. ຝູງແກະອາດຢ້ານກົວສິ່ງໃດ? ແລ້ວທ່ານ ແລະ ລູກໆຂອງທ່ານສາມາດຫລຽວເບິ່ງຮູບຂອງພຣະຜູ້ຊ່ວຍໃຫ້ລອດ ໃນຖານະຜູ້ລ້ຽງແກະທີ່ດີ (ມີຮູບໜຶ່ງຢູ່ໃນທ້າຍຂອງໂຄງຮ່າງນີ້) ແລະ ເວົ້າກ່ຽວກັບວິທີທີ່ພຣະອົງເຝົ້າດູແລເຮົາເໝືອນດັ່ງຜູ້ລ້ຽງແກະເຝົ້າດູແລຝູງແກະຂອງພຣະອົງແນວໃດ.
ໃຫ້ພິຈາລະນາທີ່ຈະຫລິ້ນ ຫລື ຮ້ອງເພງກ່ຽວກັບການຊອກຫາຄວາມກ້າຫານໃນພຣະຄຣິດ, ເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ຫລື “ຂໍໃຫ້ເຮົາເດີນໄປ” (ເພງສວດ ແລະ ເພງຂອງເດັກນ້ອຍ, 10). ເພງນີ້ສິດສອນຫຍັງແດ່ກ່ຽວກັບວິທີທີ່ພຣະຜູ້ຊ່ວຍໃຫ້ລອດຊ່ວຍໃຫ້ເຮົາບໍ່ຢ້ານກົວ?

ຄຳສອນ ແລະ ພັນທະສັນຍາ 6:36

ເຮົາສາມາດຫວັງເພິ່ງພຣະຄຣິດໃນທຸກຄວາມຄິດ.

ຫລັງຈາກທີ່ອ່ານ ຄຳສອນ ແລະ ພັນທະສັນຍາ 6:36 ນຳກັນ, ທ່ານ ແລະ ລູກໆຂອງທ່ານສາມາດແຕ້ມຮູບ ເພື່ອຊ່ວຍໃຫ້ພວກທ່ານຈື່ຈຳທີ່ຈະ “ຫວັງເພິ່ງ [ພຣະເຢຊູຄຣິດ] ໃນທຸກຄວາມຄິດ.” ແບ່ງປັນສິ່ງທີ່ພວກທ່ານໄດ້ແຕ້ມນຳກັນ, ແລະ ຊ່ວຍໃຫ້ລູກໆຂອງທ່ານຄິດເຖິງສະຖານທີ່ທີ່ພວກເຂົາສາມາດວາງມັນໄວ້ ເພື່ອວ່າພວກເຂົາຈະໄດ້ຫລຽວເຫັນມັນເລື້ອຍໆ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະຄຣິດກັບຝູງແກະ — The Lord Is My Shepherd [ພຣະຜູ້ເປັນເຈົ້າເປັນຜູ້ລ້ຽງຂ້ານ້ອຍ], ໂດຍ ຢອງຊຸງ ຄິມ