« សម្លេងនៃការស្ដារឡើងវិញ ៖ សាក្សីទាំងឡាយនៃព្រះគម្ពីរមរមន » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥( ឆ្នាំ ២០២៥ )
« សាក្សីទាំងឡាយនៃព្រះគម្ពីរមរមន » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
សម្លេងនៃការស្តារឡើងវិញ
សាក្សីទាំងឡាយនៃព្រះគម្ពីរមរមន
ទេវតាមរ៉ូណៃបានបង្ហាញផ្ទាំងចំណារមាសដល់ យ៉ូសែប ស៊្មីធ, អូលីវើរ ខៅឌើរី,ដាវីឌវិតមើរ និង ម៉ាទិន ហារីស នៅក្នុងព្រៃក្បែរផ្ទះរបស់គ្រួសារ វិតមើរ នៅក្នុងភូមិហ្វាយ៉ែតរដ្ឋញូវយ៉ក ។ ឪពុកម្ដាយរបស់ យ៉ូសែប បានទៅលេងគ្រួសារ វិតមើរ នៅពេលនោះ ។ លូស៊ី ម៉ាក ស្ម៊ីធ ជាម្ដាយរបស់ យ៉ូសែប បានពិពណ៌នាអំពីឥទ្ធិពលនៃបទពិសោធន៍ដ៏អព្ភូតហេតុនេះដែលមានលើពួកសាក្សី ៖
« វានៅចន្លោះម៉ោងបី និងម៉ោងបួន ។ លោកស្រី វិតមើរ និងលោក ស្ម៊ីធ និងខ្លួនខ្ញុំកំពុងអង្គុយនៅក្នុងបន្ទប់គេង ។ ខ្ញុំអង្គុយនៅចំហៀងគ្រែ ។ នៅពេលយ៉ូសែបចូលមក គាត់បានទម្លាក់ខ្លួនគាត់ក្បែរខ្ញុំ ។ គាត់បានពោលថា‹ ពុក ! ម៉ែ ! › ‹ ពុកម៉ែមិនដឹងទេថាកូនរីករាយប៉ុណ្ណា ។ ព្រះអម្ចាស់បានបណ្ដាលឲ្យមនុស្សបីនាក់ថែមទៀតក្រៅពីកូនបានឃើញផ្ទាំងចំណារនោះ ពួកគេក៏បានឃើញទេវតា ហើយនឹងត្រូវថ្លែងទីបន្ទាល់អំពីសេចក្ដីពិតនៃអ្វីដែលកូនបានថ្លែងផងដែរ ។ ដោយសារពួកគេដឹងដោយខ្លួនគេថាកូនមិនបានដើរបោកប្រាស់មនុស្សឡើយ ។ ហើយកូនមានអារម្មណ៍ហាក់ដូចជាកូនបានស្រាកស្រាន្តពីបន្ទុកដ៏ធ្ងន់នេះដែលស្ទើរតែធ្ងន់ពេកឲ្យកូនស៊ូទ្រាំទៅហើយ ។ ប៉ុន្ដែឥឡូវនេះពួកគេនឹងត្រូវរែកមួយផ្នែក ហើយវាធ្វើឲ្យព្រលឹងកូនអររីករាយដែលកូនលែងនៅម្នាក់ឯងទាំងស្រុងក្នុងពិភពលោកនេះទៀតហើយ › ។ រួច ម៉ាទិន ហារីស បានដើរចូលមក ។ គាត់ហាក់ស្ទើរតែសន្ធប់ដោយក្ដីអំណរដ៏ខ្លាំង ។ បន្ទាប់មក គាត់បានថ្លែងទីបន្ទាល់អំពីអ្វីដែលគាត់បានឃើញ និងបានឮព្រមទាំងអ្នកផ្សេងទៀតផងដែរគឺ អូលីវើរ និង ដាវីឌ ។ ទីបន្ទាល់របស់ពួកគេគឺដូចគ្នានឹងអ្វីដែលមាននៅក្នុងព្រះគម្ពីរមរមនដែរ ។ …
« ជាពិសេស ម៉ាទិន ហារីស មើលទៅមិនអាចបញ្ចេញអារម្មណ៍របស់គាត់ជាពាក្យសម្ដីបានទេ ។ គាត់បានពោលថា ‹ ឥឡូវ ខ្ញុំបានឃើញទេវតាមកពីស្ថានសួគ៌ដែលបានថ្លែងទីបន្ទាល់យ៉ាងប្រាកដអំពីសេចក្ដីពិតនៃអ្វីទាំងអស់ដែលខ្ញុំបានឮទាក់ទងនឹងកំណត់ត្រា ហើយភ្នែកខ្ញុំបានឃើញទ្រង់ ។ ខ្ញុំក៏បានមើលទៅផ្ទាំងចំណារនោះ ហើយបានកាន់វាក្នុងដៃរបស់ខ្ញុំ ហើយអាចថ្លែងទីបន្ទាល់ដូចគ្នានេះទៅកាន់ពិភពលោកទាំងមូល ។ ប៉ុន្ដែខ្ញុំបានទទួលសាក្សីដោយខ្លួនឯងផ្ទាល់ដែលមិនអាចរៀបរាប់ជាពាក្យពេចន៍បានឡើយ អណ្ដាតមិនអាចពិពណ៌នាបាន ហើយខ្ញុំបានថ្វាយដល់ព្រះដោយស្មោះអស់ពីព្រលឹងខ្ញុំដែលទ្រង់រើសខ្ញុំឲ្យធ្វើជាសាក្សីនៃសេចក្ដីអស្ចារ្យនៃកិច្ចការ និងការរៀបចំឡើងរបស់ទ្រង់ជំនួស [ ឲ្យ ] កូនចៅមនុស្ស › ។ អូលីវើរ និង ដាវីឌក៏បានចូលរួមនឹងគាត់ក្នុងការសរសើរដល់ព្រះយ៉ាងមុតមាំសម្រាប់សេចក្ដីល្អ និងសេចក្តីមេត្តារបស់ទ្រង់ ។ យើងបានត្រឡប់មកផ្ទះ [ នៅភូមិប៉ាលម៉ៃរ៉ា រដ្ឋញូវយ៉ក ] វិញនៅថ្ងៃបន្ទាប់ក្នុងអារម្មណ៍ដ៏សប្បាយរីករាយ » ។
អូលីវើរ ខៅឌើរី ,ដាវីឌ វិតមើរ និង ម៉ាទិន ហារីស
លូស៊ី ម៉ាក ស្ម៊ីធ ក៏មានវត្តមានផងដែរនៅពេលដែលពួកសាក្សីប្រាំបីនាក់បានត្រឡប់មកពីការដកពិសោធន៍របស់ពួកគេវិញ ៖
« ក្រោយពីសាក្សីប្រាំបីនាក់បានត្រឡប់មកផ្ទះវិញ ទេវតាបានបង្ហាញព្រះកាយទ្រង់ម្ដងទៀតមកកាន់ យ៉ូសែប ដែលពេលនោះ យ៉ូសែប បានកាន់ផ្ទាំងចំណារនៅក្នុងដៃគាត់ ។ នៅល្ងាចនោះ យើងមានការប្រជុំមួយដែលសាក្សីទាំងអស់បានថ្លែងទីបន្ទាល់ចំពោះការពិតដូចបានរៀបរាប់ខាងលើនេះ ហើយគ្រួសារយើងទាំងអស់គ្នាសូម្បីតែ ដន ខាឡូស [ ស្ម៊ីធ ] ដែលទើបមានអាយុ ១៤ ឆ្នាំ បានថ្លែងទីបន្ទាល់អំពីសេចក្ដីពិតនៃគ្រាកាន់កាប់ត្រួតត្រាចុងក្រោយនេះ—ថាពេលនោះវាត្រូវបាននាំមកយ៉ាងពេញលេញ » ។
រូបចម្លាក់ផុសរបស់ យ៉ូសែប ស្ម៊ីធ និងសាក្សីប្រាំបីនាក់
បន្ថែមពីលើពួកសាក្សីបីនាក់ និងពួកសាក្សីប្រាំបីនាក់ គឺ ម៉ារី វីតមឺ ដែលជាម្តាយរបស់ ដាវីឌ វិតមើរ ក៏ត្រូវបានប្រសិទ្ធិពរឲ្យធ្វើជាសាក្សីនៃផ្ទាំងមាសផងដែរ ។ ទេវតា មរ៉ូណៃ បានបង្ហាញផ្ទាំងចំណារមាសទាំងនោះដល់នាងទុកជាការបញ្ជាក់នៃពលិកម្មដែលនាងបានលះបង់កាល យ៉ូសែប អិមម៉ា និង អូលីវើរ បានរស់នៅក្នុងផ្ទះរបស់នាង ។ មរ៉ូណៃ បានប្រាប់នាងថា « អ្នកមានសេចក្តីស្មោះត្រង់ និងឧស្សាហ៍ព្យាយាមក្នុងការងារអ្នក » ។ ហេតុដូច្នេះហើយ វាជាការត្រឹមត្រូវណាស់ ដែលអ្នកគួរតែបានធ្វើជាសាក្សីម្នាក់ដើម្បីឲ្យសេចក្តីជំនឿអ្នកត្រូវបានពង្រឹង » ។