« ថ្ងៃទី ២៤ ខែ កុម្ភៈ-ថ្ងៃទី ២ ខែ មីនា ‹ តម្លៃនៃព្រលឹងទាំងឡាយ គឺមហិមាណាស់ › ៖ គោលលទ្ធិ និងសេចក្តីសញ្ញា ១៨ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )
« គោលលទ្ធិ និងសេចក្តីសញ្ញា ១៨ » ចូរមកតាមខ្ញុំ—សម្រាប់ គេហដ្ឋាន និងសាសនាចក្រ ៖ ឆ្នាំ ២០២៥
ថ្ងៃទី ២៤ ខែ កុម្ភៈ–ថ្ងៃទី ២ ខែ មីនា ៖ « តម្លៃនៃព្រលឹងទាំងឡាយ គឺមហិមាណាស់ »
គោលលទ្ធិ និងសេចក្ដីសញ្ញា ១៨
មានវិធីផ្សេងៗជាច្រើនដើម្បីព្យាយាមវាស់ស្ទង់តម្លៃរបស់មនុស្សម្នាក់ ។ ទេពកោសល្យ ការអប់រំ ទ្រព្យសម្បត្តិ និងរូបរាងកាយ ទាំងអស់អាចប៉ះពាល់ដល់របៀបដែលយើងវាយតម្លៃគ្នាទៅវិញទៅមក និងខ្លួនឯង ។ ប៉ុន្តែក្នុងព្រះនេត្រនៃព្រះ តម្លៃរបស់យើងគឺជារឿងសាមញ្ញ ជាងនេះ ហើយវាត្រូវបានបញ្ជាក់យ៉ាងច្បាស់នៅក្នុង គោលលទ្ធិ និងសេចក្ដីសញ្ញា ១៨ ថា ៖ « ចូរចាំចុះថា តម្លៃនៃព្រលឹងទាំងឡាយ គឺមហិមាណាស់ចំពោះព្រះនេត្រនៃព្រះ » ( ខទី ១០ ) ។ សេចក្ដីពិតដ៏សាមញ្ញនេះពន្យល់យ៉ាងច្រើនអំពីអ្វីដែលព្រះធ្វើ និង មូលហេតុដែលទ្រង់ធ្វើវា ។ តើហេតុអ្វីបានជាព្រះបង្គាប់ យ៉ូសែប ស៊្មីធ និង អូលីវើរ ខៅឌើរី ទៅបង្កើតសាសនាចក្ររបស់ព្រះយេស៊ូវគ្រីស្ទនៅក្នុងជំនាន់របស់យើង ? ( សូមមើល ខទី ១-៥ ) ។ ពីព្រោះតម្លៃនៃព្រលឹងទាំងឡាយ គឺមហិមាណាស់ ។ ហេតុអ្វីបានជាទ្រង់ « បញ្ជាមនុស្សលោកទាំងអស់ នៅគ្រប់ទិសទីឲ្យប្រែចិត្ត » ហើយបញ្ជូនសាវកឲ្យទៅផ្សាយអំពីការប្រែចិត្ត ? ( ខទី ៩ ) ។ ពីព្រោះតម្លៃនៃព្រលឹងទាំងឡាយ គឺមហិមាណាស់ ។ ហើយហេតុអ្វីបានជាព្រះយេស៊ូវគ្រីស្ទទទួលរងនូវ « សេចក្ដីស្លាប់នៅក្នុងសាច់ឈាម » និង « ការឈឺចាប់នៃមនុស្សលោកទាំងអស់ » ? ( ខទី ១១ ) ។ ពីព្រោះតម្លៃនៃព្រលឹងទាំងឡាយ គឺមហិមាណាស់ ។ បើទោះជាព្រលឹងមួយក្នុងចំណោមព្រលឹងទាំងនេះជ្រើសរើសទទួលយកអំណោយរបស់ព្រះអង្គសង្គ្រោះក៏ដោយ ក៏ទ្រង់អរព្រះទ័យ ហើយ « សេចក្ដីអំណររបស់ទ្រង់មហិមាណាស់ហ្ន៎ចំពោះព្រលឹងណាដែលប្រែចិត្ត » ( ខទី ១៣ ) ។
គំនិតសម្រាប់ការរៀនសូត្រនៅឯគេហដ្ឋាន និងនៅព្រះវិហារ
គោលលទ្ធិ និងសេចក្តីសញ្ញា ១៨:១–៥
« កសាងសាសនាចក្ររបស់យើងឡើង » ។
នៅក្នុង កណ្ឌ ទី ១៨ ព្រះអម្ចាស់បានប្រទានសេចក្ដីណែនាំដល់ អូលីវើរ ខៅឌើរី ឲ្យជួយដាក់គ្រឹះនៃសាសនាចក្រនៃព្រះយេស៊ូវគ្រីស្ទ ។ តើបងប្អូនកត់សម្គាល់ឃើញអ្វីខ្លះអំពីដំបូន្មានដែលទ្រង់បានផ្ដល់ឲ្យ—ជាពិសេសនៅក្នុង ខទី ១–៥ ? បងប្អូនអាចពិចារណាអំពីរបៀបដែលដំបូន្មានដូចគ្នានេះអនុវត្តចំពោះបងប្អូននៅពេលដែលបងប្អូន « កសាង » សេចក្តីជំនឿរបស់បងប្អូនទៅលើព្រះគ្រីស្ទ ។ ឧទាហរណ៍ ៖
-
តើបងប្អូន « ប្រាថ្នាចង់ដឹងអ្វីខ្លះ » ពីព្រះអម្ចាស់ ? ( ខទី ១ ) ។
-
តើវាមានន័យយ៉ាងណាចំពោះបងប្អូនក្នុងការ « ពឹងទៅការណ៍ទាំងនោះដែលបានសរសេរ » ? ( ខទី ៣ ) ។ តើព្រះវិញ្ញាណ « បានបង្ហាញដល់បងប្អូនយ៉ាងដូចម្ដេច » ថារឿងទាំងនេះពិត ? ( ខទី ២; សូមមើលផងដែរ គោលលទ្ធិ និងសេចក្តីសញ្ញា ៦:២២-២៤ ) ។
-
តើបងប្អូនកសាងជីវិតរបស់បងប្អូននៅលើ « គ្រឹះនៃដំណឹងល្អ [ របស់ព្រះអង្គសង្គ្រោះ ] និងលើថ្មដា [ របស់ទ្រង់] ដោយរបៀបណា ? ( ខទី ៥ ) ។
សួរសំណួរ ។ គោលលទ្ធិ និងសេចក្តីសញ្ញាគឺជាភស្ដុតាងថាសំណួរនឹងដឹកនាំទៅរកវិវរណៈ ។ កាលបងប្អូនសិក្សាព្រះគម្ពីរ សូមកត់ត្រាសំណួរដែលអ្នកមាន ។ រួចហើយជញ្ជឹងគិត និងអធិស្ឋានដើម្បីស្វែងរកចម្លើយ ។
គោលលទ្ធិ និងសេចក្ដីសញ្ញា ១៨:១០–១៣
« តម្លៃនៃព្រលឹងទាំងឡាយគឺមហិមាណាស់ចំពោះព្រះនេត្រនៃព្រះ » ។
តើយើងកំណត់តម្លៃអ្វីមួយដោយរបៀបណា ? ឧទាហរណ៍ ហេតុអ្វីបានជារបស់ខ្លះនៅផ្សារថ្លៃជាងរបស់ផ្សេងទៀត ? នៅពេលបងប្អូនអាន កណ្ឌទី ១៨ សប្ដាហ៍នេះ ជាពិសេស ខទី ១០-១៣ បងប្អូនអាចបែងចែកអំពីរបៀបដែលមនុស្សតែងតែកំណត់តម្លៃជាមួយនឹងអ្វីដែលធ្វើឲ្យព្រលឹងមានតម្លៃនៅក្នុងព្រះនេត្ររបស់ព្រះ ។ សូមពិចារណាជំនួសឈ្មោះរបស់បងប្អូននៅកន្លែងដែលមានពាក្យ« ព្រលឹង » « ព្រលឹងទាំងឡាយ » និង « មនុស្សទាំងអស់ » ។ តើខគម្ពីរទាំងនេះអាចជួយនរណាម្នាក់ដែលសួរអំពីតម្លៃរបស់គាត់ដោយរបៀបណា ?
នេះគឺជាវគ្គមួយចំនួនទៀតដែលបង្រៀនអំពីតម្លៃនៃព្រលឹង ៖ លូកា ១៥:១-១០; យ៉ូហាន ៣:១៦-១៧; នីហ្វៃទី២ ២៦:២៤-២៨; ម៉ូសេ ១:៣៩ ។ ដោយផ្អែកលើវគ្គបទគម្ពីរទាំងនេះ តើបងប្អូននឹងសង្ខេបអំពីព្រះទ័យរបស់ព្រះចំពោះបងប្អូនដោយរបៀបណា ? បងប្អូនក៏អាចស្វែងរកសាររបស់ប្រធាន ឌៀថើរ អេហ្វ អុជដូហ្វ « You Matter to Him » ( Liahona ខែ វិច្ឆិកា ឆ្នាំ ២០១១ ទំព័រ ១៩-២២ ) ដើម្បីស្វែងរកពាក្យ និងឃ្លាដែលជួយបងប្អូនឲ្យដឹងអំពីតម្លៃរបស់បងប្អូនចំពោះព្រះ ។
តើព្រះបង្ហាញបងប្អូនថាបងប្អូនមានតម្លៃដ៏មហិមាចំពោះទ្រង់តាមរបៀបណា ? តើការដឹងអំពីសេចក្ដីពិតនេះជះឥទ្ធិពលលើរបៀបដែលបងប្អូនមើលឃើញខ្លួនឯង និងអ្នកដទៃយ៉ាងដូចម្ដេច ?
សូមមើលផងដែរ ចយ ឌី ចូនស៍ « Value beyond Measure » Liahona ខែ វិច្ឆិកា ឆ្នាំ ២០១៧ ទំព័រ ១៣–១៥; Topics and Questions « Children of God » នៅលើបណ្ណាល័យដំណឹងល្អ ។
គោលលទ្ធិ និងសេចក្ដីសញ្ញា ១៨:១១–១៦
ព្រះអម្ចាស់សប្បាយព្រះទ័យនៅពេលយើងប្រែចិត្ត ។
សូមកត់សម្គាល់ថាតើពាក្យដូចជា ប្រែចិត្ត និង ការប្រែចិត្ត ត្រូវបានប្រើញឹកញាប់ប៉ុណ្ណានៅក្នុង គោលលទ្ធិ និងសេចក្ដីសញ្ញា ១៨ ទាំងមូល ។ សូមពិចារណាអំពីអ្វីដែលបងប្អូនរៀនមកពីពាក្យទាំងនេះរាល់ពេលដែលពាក្យទាំងនោះត្រូវបានប្រើ ។ សូមពិចារណាជាពិសេស ខទី ១១-១៦ ។ តើខគម្ពីរទាំងនេះជះឥទ្ធិពលយ៉ាងណាទៅលើអារម្មណ៍នៃការប្រែចិត្ត—ការប្រែចិត្តរបស់បងប្អូនផ្ទាល់ និងកាតព្វកិច្ចក្នុងការអញ្ជើញមនុស្សដទៃឲ្យប្រែចិត្ត និងកែលម្អ ? នេះជាវិធីមួយដើម្បីកត់ត្រានូវអ្វីដែលបងប្អូនរៀន ៖ ធ្វើបញ្ជីមួយអំពីវិធីជាច្រើនដែលបងប្អូននឹងបំពេញប្រយោគ « ការប្រែចិត្ដ » ។
សូមមើលផងដែរ អាលម៉ា ៣៦:១៨–២១; សេចក្តីណែនាំដល់បទគម្ពីរទាំងឡាយ « ការប្រែចិត្ត » បណ្ណាល័យដំណឹងល្អ; ឌេល ជី រិនឡិន, « Repentance: A Joyful Choice » Liahona ខែ វិច្ឆិកា ឆ្នាំ ២០១៦ ទំព័រ ១២១-១២៤ ។
ព័ត៌មានលម្អិតមកពី The Prodigal Son ( កូនប្រុសខ្ជះខ្ជាយ ) ដោយ ក្លាក ខេលី ផ្រាយ
គោលលទ្ធិ និងសេចក្ដីសញ្ញា ១៨:១៤–១៦
អំណរបានមកពីការជួយអ្នកដទៃឲ្យមករកព្រះគ្រីស្ទ ។
ពេលអាន ខទី ១៤-១៦ សូមពិចារណាអំពីអត្ថន័យ « ស្រែកប្រាប់ពីការប្រែចិត្ត »—និងមូលហេតុដែលនាំឲ្យមានអំណរបែបនេះ ។ តើបងប្អូនបានរកឃើញវិធីអ្វីខ្លះដើម្បីជួយអ្នកដទៃឲ្យមករកព្រះអង្គសង្គ្រោះ ហើយទទួលបានការអភ័យទោស ? តើមនុស្សដទៃបានធ្វើបែបនេះយ៉ាងដូចម្ដេចសម្រាប់បងប្អូន ?
សូមមើលផងដែរ ក្រេហ្គ ស៊ី គ្រីស្ទីនសិន « គ្មានអ្វីជ្រួតជ្រាប ហើយផ្អែមល្ហែមឲ្យស្មើនឹងសេចក្ដីអំណររបស់ឪពុកបានឡើយ » លីអាហូណា ខែ ឧសភា ឆ្នាំ ២០២៣ ទំព័រ ៤៥-៤៧ ។
គោលលទ្ធិ និងសេចក្តីសញ្ញា ១៨:៣៤–៣៦
ខ្ញុំអាចស្តាប់ឮព្រះសូរសៀងរបស់ព្រះអម្ចាស់នៅក្នុងព្រះគម្ពីរ ។
បើនរណាម្នាក់សួរបងប្អូនថាតើសំឡេងរបស់ព្រះអម្ចាស់ដូចម្ដេចទៅ តើបងប្អូននឹងឆ្លើយយ៉ាងណា ? សូមគិតអំពីសំណួរនេះនៅពេលបងប្អូនអាន គោលលទ្ធិ និងសេចក្តីសញ្ញា ១៨:៣៤–៣៦ ។ តើបងប្អូនបានរៀនអ្វីខ្លះអំពីសំឡេងរបស់ព្រះអម្ចាស់មកពីការអានព្រះគម្ពីរគោលលទ្ធិ និងសេចក្តីសញ្ញា ? តើបងប្អូនអាចធ្វើអ្វីខ្លះដើម្បីស្ដាប់ឮសំឡេងរបស់ទ្រង់ឲ្យកាន់តែច្បាស់ ?
សូមមើលផងដែរ « ពេលខ្ញុំស្វែងយល់គម្ពីរពិសិដ្ឋ » ទំនុកតម្កើង ល.រ.១៥៩ ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
គោលលទ្ធិ និងសេចក្ដីសញ្ញា ១៨:១០–១៣
យើងម្នាក់ៗគឺមានតម្លៃដ៏មហិមាចំពោះព្រះ ។
-
នៅពេលដែលបងប្អូន និងកូនៗរបស់បងប្អូនអាន គោលលទ្ធិ និងសេចក្តីសញ្ញា ១៨:១០-១៣ សូមពិចារណាជំនួសឈ្មោះរបស់គ្នាទៅវិញទៅមកនៅកន្លែងដែលមានពាក្យ « ព្រលឹង » « ព្រលឹងទាំងឡាយ » និង « មនុស្សទាំងអស់ » ។ បន្ទាប់មកបងប្អូនអាចនិយាយអំពីរបៀបដែលខគម្ពីរទាំងនេះជួយយើងយល់ពីអារម្មណ៍របស់ព្រះវរបិតាសួគ៌អំពីយើងម្នាក់ៗ ។
-
បងប្អូនក៏អាចសួរកូនរបស់បងប្អូនអំពីអ្វីដែលមនុស្សចាត់ទុកថាមានតម្លៃផងដែរ ។ ឬបងប្អូនអាចបង្ហាញពួកគេនូវអ្វីមួយដែលមានតម្លៃចំពោះបងប្អូន ។ តើយើងនឹងប្រព្រឹត្តចំពោះរបស់ដែលមានតម្លៃចំពោះយើងដោយរបៀបណា ? បន្ទាប់មកអនុញ្ញាតឲ្យពួកគេប្តូរវេនមើលទៅក្នុងកញ្ចក់ ។ ពេលពួកគេធ្វើរួចហើយ ចូរប្រាប់កូនម្នាក់ៗថាគេគឺជាបុត្ររបស់ព្រះ ហើយពួកគេមានតម្លៃមហិមា ។ តើយើងអាចបង្ហាញដល់អ្នកដទៃថា « តម្លៃនៃព្រលឹង[ របស់ពួកគេ ] គឺមហិមា » នៅក្នុង កែវភ្នែករបស់យើងយ៉ាងដូចម្ដេច ?
-
ដើម្បីបញ្ជាក់ថាមនុស្សទាំងអស់មានតម្លៃដ៏អស្ចារ្យចំពោះព្រះវរបិតាសួគ៌កូនៗរបស់បងប្អូនអាចមើលរូបភាពនៅចុងបញ្ចប់នៃគម្រោងមេរៀននេះខណៈដែលបងប្អូនអាន គោលលទ្ធិ និងសេចក្តីសញ្ញា ១៨:១០-១៣ ។ ច្រៀងចម្រៀងរួមគ្នាមួយបទដូចជា « Every Star Is Different » ( សៀវភៅចម្រៀងកុមារ ទំព័រ ១៤២-១៤៣ ) អាចជួយពង្រឹងចំណុចនេះបាន ។
ព័ត៌មានលំអិតមកពី Worth of a Soul ( តម្លៃនៃព្រលឹង ) ដោយ លីស ឡេមិន ស្វីនដល
គោលលទ្ធិ និងសេចក្ដីសញ្ញា ១៨:១៥–១៦
ការចែកចាយដំណឹងល្អនាំមកនូវអំណរដ៏មហិមា ។
-
ដើម្បីបំផុសគំនិតកូនៗរបស់បងប្អូនឲ្យចែកចាយដំណឹងល្អរបស់ព្រះយេស៊ូវគ្រីស្ទ បងប្អូនអាចនិយាយជាមួយគ្នាអំពីបទពិសោធន៍នៅពេលបងប្អូនរកឃើញអ្វីមួយដែលបងប្អូនចង់ចែកចាយជាមួយមិត្តភក្តិ ឬគ្រួសាររបស់បងប្អូន ។ ហេតុអ្វីបានជាបងប្អូនចង់ចែកចាយវា ហើយតើការចែកចាយវាធ្វើឲ្យបងប្អូនមានអារម្មណ៍យ៉ាងដូចម្ដេច ? បន្ទាប់មកបងប្អូនអាចអាន គោលលទ្ធិ និងសេចក្តីសញ្ញា ១៨:១៣,១៦ ។ តើអ្វីខ្លះនាំឲ្យព្រះអម្ចាស់មានអំណរ ? តើទ្រង់មានបន្ទូលថាអ្វីខ្លះនឹងនាំឲ្យយើងមានអំណរ ? បងប្អូន និងកូនៗរបស់បងប្អូនអាចនិយាយអំពីបទពិសោធន៍ណាមួយដែលបងប្អូនបានចែកចាយនូវអំណរនៃដំណឹងល្អរបស់ព្រះអង្គសង្គ្រោះ ។
-
បទចម្រៀងមួយអំពីការចែកចាយដំណឹងល្អដូចជា « ខ្ញុំចង់ក្លាយជាអ្នកផ្សព្វផ្សាយសាសនាពេលនេះ » ( សៀវភៅចម្រៀងកុមារ ទំព័រ ៩០ ) អាចជួយឲ្យកូនរបស់បងប្អូនគិតអំពីវិធីដែលពួកគេអាចចែកចាយដំណឹងល្អបាន ។
គោលលទ្ធិ និងសេចក្តីសញ្ញា ១៨:៣៤–៣៦
ខ្ញុំអាចស្តាប់ឮព្រះសូរសៀងរបស់ព្រះអម្ចាស់នៅក្នុងព្រះគម្ពីរ ។
-
កូនៗរបស់បងប្អូនប្រហែលជារីករាយនឹងល្បែងមួយដែលពួកគេព្យាយាមស្គាល់សំឡេងរបស់មនុស្សផ្សេងគ្នាដូចជាសមាជិកគ្រួសារ មិត្តភក្តិ ឬថ្នាក់ដឹកនាំសាសនាចក្រ ។ តើយើងស្គាល់សំឡេងគ្នាទៅវិញទៅមកយ៉ាងដូចម្ដេច ? តើយើងទទួលស្គាល់សំឡេងរបស់ព្រះអម្ចាស់យ៉ាងដូចម្ដេច ? បងប្អូនអាចអានរួមគ្នា គោលលទ្ធិ និងសេចក្តីសញ្ញា១៨:៣៤-៣៦ ដើម្បីពិភាក្សាអំពីសំណួរនេះ ។ បងប្អូនក៏អាចចែកចាយជាមួយគ្នាទៅវិញទៅមកអំពីរបៀបដែលបងប្អូនបានឮសំឡេងរបស់ព្រះអម្ចាស់នៅក្នុងព្រះគម្ពីរ ។
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
ព្រលឹងនីមួយៗមានតម្លៃចំពោះព្រះ ។