« ថ្ងៃទី ១៧-២៣ ខែ កុម្ភៈ ៖ ‹ នៅលើអ្នក ជាពួកអ្នកបម្រើដូចរូបខ្ញុំអើយ › ៖ គោលលទ្ធិ និងសេចក្តីសញ្ញា ១២-១៧; យ៉ូសែប ស្ម៊ីធ—ប្រវត្ដិ ១:៦៦-៧៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

គោលលទ្ធិ និងសេចក្តីសញ្ញា ១២–១៧; យ៉ូសែប ស្ម៊ីធ—ប្រវត្តិ ១:៦៦–៧៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ទន្លេ សុសគ្វីហាណា នៅជិតភូមិហាម៉ូនី រដ្ឋផែនសិលវេញ៉ា

ថ្ងៃទី ១៧-២៣ ខែ កុម្ភៈ ៖ « នៅលើអ្នក ជាពួកអ្នកបម្រើដូចរូបខ្ញុំអើយ »

គោលលទ្ធិ និងសេចក្ដីសញ្ញា ១២–១៧; យ៉ូសែប ស្ម៊ីធ—ប្រវត្តិ ១:៦៦–៧៥

មនុស្សជាច្រើនទូទាំងពិភពលោកប្រហែលជាមិនធ្លាប់បានឮអំពីកន្លែងមួយ ដែលហៅថាភូមិហាម៉ូនី រដ្ឋផែនសិលវេញ៉ាទេ ។ ប៉ុន្ដែ ជាញឹកញាប់ព្រះអម្ចាស់ជ្រើសរើសទីតាំងមិនសូវល្បី សម្រាប់ព្រឹត្តិការណ៍ដ៏សំខាន់បំផុតក្នុងនគររបស់ទ្រង់ ។ នៅតំបន់ព្រៃក្បែរភូមិហាម៉ូនីនៅ ថ្ងៃទី ១៥ ខែ ឧសភា ឆ្នាំ ១៨២៩ យ៉ូហាន បាទីស្ទ បានបង្ហាញរូបកាយដែលបានរស់ឡើងវិញដល់ យ៉ូសែប ស្ម៊ីធ និង អូលីវើរ ខៅឌើរី ។ លោកបានដាក់ដៃនៅលើក្បាលពួកគាត់ ហើយបានប្រគល់បព្វជិតភាពអើរ៉ុនដល់ពួកគាត់ ដោយហៅពួកគាត់ថាជា« ពួកអ្នកបម្រើដូចរូបខ្ញុំអើយ » ( គោលលទ្ធិ និងសេចក្ដីសញ្ញា ១៣:១ ) ។

យ៉ូហាន បាទីស្ទ គឺជាអ្នកបម្រើដ៏គួរឲ្យទុកចិត្តរបស់ព្រះដែលបានជ្រមុជទឹកព្រះអង្គសង្រ្គោះ ហើយបានរៀបចំផ្លូវសម្រាប់ការយាងមកដល់របស់ទ្រង់ ( សូមមើល ម៉ាថាយ ៣:១-៦, ១៣-១៧ ) ។ ចំពោះយុវជនទាំងពីរនាក់នេះក្នុងវ័យម្ភៃឆ្នាំរបស់ពួកគេ នោះវាច្បាស់ជាមានចិត្តរាបសារ ប្រហែលជាត្រូវបានកោតសរសើរយ៉ាងខ្លាំង រហូតដល់ត្រូវបានហៅថាជាអ្នកបម្រើរបស់យ៉ូហាន ។ នៅពេលនោះ យ៉ូសែប និង អូលីវើរ មិនសូវស្គាល់ច្រើនអំពីភូមិហាម៉ូនីនោះទេ ។ ប៉ុន្ដែការបម្រើនៅក្នុងកិច្ចការរបស់ព្រះតែងតែផ្ដោតលើ របៀប ដែលយើងបម្រើពុំមែនថាតើនរណាខ្លះមើលឃើញនោះទេ ។ មិនថាការរួមចំណែករបស់អ្នកតូច ឬមើលមិនឃើញយ៉ាងណានោះទេ ពេលខ្លះអ្នកក៏ជាអ្នកបម្រើម្នាក់ក្នុង« កិច្ចការដ៏ធំ និងអស្ចារ្យ » របស់ព្រះអម្ចាស់ផងដែរ ( គោលលទ្ធិ និងសេចក្ដីសញ្ញា ១៤:១ ) ។

គំនិតសម្រាប់ការរៀនសូត្រនៅឯគេហដ្ឋាន និងនៅព្រះវិហារ

គោលលទ្ធិ និងសេចក្តីសញ្ញា ១២; ១៤

ខ្ញុំអាចចូលរួមនៅក្នុង « កិច្ចការដ៏ធំ និងអស្ចារ្យ » របស់ព្រះបាន ។

យ៉ូសែប ណៃត៍ និង ដាវីឌ វិតមើរ ទាំងពីរនាក់បានចង់ដឹងអំពីរបៀបដែលពួកគាត់អាចជួយនៅក្នុងកិច្ចការរបស់ព្រះអម្ចាស់ ។ ពេលបងប្អូនអានចម្លើយរបស់ព្រះអម្ចាស់ចំពោះពួកគេ ( គោលលទ្ធិ និងសេចក្ដីសញ្ញា ១២; ១៤ ), ចូរគិតអំពីអត្ថន័យរបស់វាចំពោះបងប្អូន « ដើម្បីនាំមក ហើយតាំងឡើងនូវគតិនៃក្រុងស៊ីយ៉ូនចុះ » ( ១២:៦; សូមមើលផងដែរ១៤:៦ ) ។ តើគោលការណ៍ និងគុណលក្ខណៈដូចជាព្រះគ្រីស្ទដែលបងប្អូនរកឃើញនៅក្នុងផ្នែកទាំងនេះដែលអាចជួយបងប្អូនធ្វើបែបនេះបានមានអ្វីខ្លះ ?

សូមមើលផងដែរ « The Knight and Whitmer Families » Revelations in Context ទំព័រ ២០–២៤ ។

គោលលទ្ធិ និងសេចក្តីសញ្ញា ១៣

ព្រះយេស៊ូវគ្រីស្ទបានបញ្ជូន យ៉ូហាន បាទីស្ទ ឲ្យមកស្ដារបព្វជិតភាពអើរ៉ុនឡើងវិញ ។

យ៉ូហាន បាទីស្ទ បានហៅ យ៉ូសែប ស្ម៊ីធ និង អូលីវើរ ខៅឌើរី ថាជា « ពួកអ្នកបម្រើ » របស់ទ្រង់ ។ តើបងប្អូនគិតថាវាមានន័យយ៉ាងណាក្នុងការធ្វើជាអ្នកបម្រើជាមួយ យ៉ូហាន បាទីស្ទ ? ( សូមមើល ម៉ាថាយ ៣:១៣-១៧; លូកា ១:១៣-១៧; ៣:២-២០ ) ។

នៅពេលដែលបងប្អូនអាននូវអ្វីដែល យ៉ូហាន បាទីស្ទ បាននិយាយអំពីបព្វជិតភាពអើរ៉ុននៅក្នុង កណ្ឌទី ១៣ សូមពិចារណាអំពីរបៀបដែលគន្លឹះនៃបព្វជិតភាពនេះជួយសម្រេចបេសកកម្មរបស់ យ៉ូហាន ដើម្បីរៀបចំផ្លូវរបស់ព្រះអម្ចាស់ ។ ឧទាហរណ៍ ៖

តើអ្វីទៅជា « ការងារបម្រើនៃពួកទេវតា » ?( សូមមើល នីហ្វៃទី២ ៣២:២–៣; មរ៉ូណៃ ៧:២៩–៣២; សេចក្ដីណែនាំដល់បទគម្ពីរទាំងឡាយ « ទេវតា » បណ្ណាល័យដំណឹងល្អ ) ។
តើអ្វីទៅជា « ដំណឹងល្អពីការប្រែចិត្ដ » ? ( សូមមើល គោលលទ្ធិ និងសេចក្តីសញ្ញា ៨៤:២៦–២៧; ឌេល ជី រិនឡិន « The Priesthood and the Savior’s Atoning Power » Liahona ខែ វិច្ឆិកា ឆ្នាំ ២០១៧ ទំព័រ ៦៤-៦៧ ) ។

តើពិធីបរិសុទ្ធរបស់បព្វជិតភាពអើរ៉ុន ( ដូចជាពិធីបុណ្យជ្រមុជទឹក និងសាក្រាម៉ង់ ) អាចជួយរៀបចំផ្លូវឲ្យបងប្អូនទទួលព្រះសង្រ្គោះនៅក្នុងជីវិតរបស់បងប្អូនបានដោយរបៀបណា ?

តើកូនសោបព្វជិតភាពមានអ្វី ?

អែលឌើរ ឌេល ជី រិនឡិន និងភរិយារបស់លោក រូស បានផ្ដល់ការពន្យល់នេះអំពីកូនសោបព្វជិតភាពថា ៖

« ពាក្យថា កូនសោ បព្វជិតភាពត្រូវបានប្រើតាមវិធីពីរយ៉ាង ។ វិធីទីមួយសំដៅទៅលើសិទ្ធិ ឬឯកសិទ្ធិជាក់លាក់មួយដែលបានប្រគល់ដល់អស់អ្នកទាំងឡាយណាដែលទទួលបព្វជិតភាពអើរ៉ុន ឬបព្វជិតភាពមិលគីស្សាដែក ។… ឧទាហរណ៍ ពួកអ្នកកាន់បព្វជិតភាពអើរ៉ុនទទួលកូនសោទាំងឡាយនៃការបម្រើនៃពួកទេវតា និងដំណឹងល្អខាងការរៀបចំ ពីការប្រែចិត្ត និងពិធីបុណ្យជ្រមុជទឹកដោយការជ្រមុជសម្រាប់ការផ្តាច់បាប ( សូមមើល គោលលទ្ធិ និងសេចក្ដីសញ្ញា ១៣:១, ៨៤:២៦–២៧ ) ។ ពួកអ្នកកាន់បព្វជិតភាពមិលគីស្សាដែកទទួលកូនសោនៃសេចក្ដីអាថ៌កំបាំងទាំងឡាយនៃនគរ កូនសោនៃចំណេះវិជ្ជាពីព្រះ និងកូនសោទាំងឡាយនៃអស់ទាំងព្រះពរខាងវិញ្ញាណនៅក្នុងសាសនាចក្រ( សូមមើល គោលលទ្ធិ និងសេចក្ដីសញ្ញា ៨៤:១៩, ១០៧:១៨ ) ។…

« វិធីទីពីរដែលពាក្យកូនសោបព្វជិតភាពត្រូវបានប្រើសំដៅទៅលើភាពជាអ្នកដឹកនាំ ។ ថ្នាក់ដឹកនាំបព្វជិតភាពទទួលកូនសោបព្វជិតភាពបន្ថែម ជាសិទ្ធិដើម្បីធ្វើជាអធិបតីលើផ្នែកនៃអង្គការមួយរបស់សាសនាចក្រ ឬកូរ៉ុមមួយ ។ ដោយសារហេតុនេះហើយ កូនសោបព្វជិតភាពគឺជាសិទ្ធិអំណាច និងអំណាចដើម្បីណែនាំ ដឹកនាំ ហើយគ្រប់គ្រងនៅក្នុងសាសនាចក្រ » ( The Melchizedek Priesthood: Understanding the Doctrine, Living the Principles [ ឆ្នាំ ២០១៨ ] ទំព័រ ២៦ ) ។

យ៉ូសែប ស៊្មីធ កំពុងជ្រមុជទឹកឲ្យ អូលីវើរ ខៅឌើរី — យ៉ូសែប ស៊្មីធ ជ្រមុជទឹកឲ្យ អូលីវើរខៅឌើរី ដោយ ឌេល ផាសុន

យ៉ូសែប ស្ម៊ីធ—ប្រវត្តិ ១:៦៦-៧៥

ពិធីបរិសុទ្ធនាំឲ្យខ្ញុំមានព្រះចេស្ដារបស់ព្រះ ។

តើបងប្អូនធ្លាប់ឆ្ងល់ថាតើវានឹងមានលក្ខណៈបែបណាជាមួយ យ៉ូសែប ស្ម៊ីធ និង អូលីវើរ ខូវឌើរី សម្រាប់ព្រឹត្តិការណ៍សំខាន់ៗនៃការស្តារឡើងវិញនោះ ? ពេលបងប្អូនអាន យ៉ូសែប ស្ម៊ីធ—ប្រវត្តិ ១:៦៦-៧៥ ដាក់បញ្ចូលទាំងកំណត់ចំណាំនៅចុងនៃ ខទី ៧១ បងប្អូនអាចយល់យ៉ាងហោចណាស់នូវអ្វីមួយចំនួនដែលពួកគេមានអារម្មណ៍ ។ តើមានអ្វីដែលធ្វើឲ្យបងប្អូនចាប់អារម្មណ៍ចំពោះពាក្យរបស់ពួកគេ ? សូមកត់សម្គាល់ជាពិសេសគឺពរជ័យដែលពួកគេបានទទួលដោយសារពួកគេបានទទួលបព្វជិតភាព ហើយបានទទួលពិធីបុណ្យជ្រមុជទឹក ។ តើព្រះអង្គបានប្រទានពរអ្វីខ្លះដល់បងប្អូនតាមរយៈពិធីបរិសុទ្ធនៃបព្វជិតភាព ?

ដើម្បីរៀនបន្ថែម សូមពិចារណាអំពីការបង្កើតតារាងមួយដែលមានចំណងជើងថា ពិធីបរិសុទ្ធ និង ពរជ័យទាំងឡាយ ។ បងប្អូនអាចស្រាវជ្រាវបទគម្ពីរដូចតទៅនេះដើម្បីរាយបញ្ជីអំពីពិធីបរិសុទ្ធ និងពរជ័យទាំងឡាយដែលបានមកពីពិធីបរិសុទ្ធ និងពរជ័យទាំងនោះ ៖យ៉ូហាន ១៤:២៦; កិច្ចការ ២:៣៨; គោលលទ្ធិ និងសេចក្ដីសញ្ញា ៨៤:១៩-២២; ១៣១:១-៤; យ៉ូសែប ស្ម៊ីធ—ប្រវត្តិ ១:៧៣–៧៤ ។ តើបងប្អូននឹងបន្ថែមពរជ័យអ្វីផ្សេងទៀតទៅក្នុងបញ្ជីនោះ ? តើពិធីបរិសុទ្ធដែលបងប្អូនបានទទួលបាននាំមកនូវអំណាចរបស់ព្រះអង្គសង្គ្រោះក្នុងជីវិតរបស់បងប្អូនដោយរបៀបណា ?

សូមមើលផងដែ ដេវីឌ អេ បែដណា « ដោយព្រះចេស្តានៃព្រះដោយសិរីល្អដ៏អស្ចារ្យ » លីអាហូណា ខែវិច្ឆិកា ឆ្នាំ ២០២១ ទំព័រ ២៨-៣០ ពួកបរិសុទ្ធ, ១:៦៥-៦៨; « ព្រះនៃអំណាច ព្រះនៃសុចរិត »,ទំនុកតម្កើង ល.រ. ១១; Topics and Questions « Covenants and Ordinances » បណ្ណាល័យដំណឹងល្អ ។

គោលលទ្ធិ និងសេចក្តីសញ្ញា ១៥–១៦

ការនាំព្រលឹងមកកាន់ព្រះគ្រីស្ទគឺមានតម្លៃដ៏មហិមា ។

តើបងប្អូនធ្លាប់ឆ្ងល់ដូចដែល យ៉ូហាន និង ពេត្រុស វិតមើរ ដែរទេថា តើអ្វីដែល « នឹងមានតម្លៃបំផុត » ក្នុងជីវិតរបស់បងប្អូន ? ( គោលលទ្ធិ និងសេចក្តីសញ្ញា ១៥:៤; ១៦:៤ ) ។ នៅពេលអ្នកអាន គោលលទ្ធិ និងសេចក្ដីសញ្ញា ១៥–១៦ សូមពិចារណាអំពីមូលហេតុដែលការនាំព្រលឹងទាំងឡាយមកកាន់ព្រះគ្រីស្ទគឺមានតម្លៃដ៏មហិមា ។ តើបងប្អូនធ្វើអ្វីខ្លះដើម្បី « នាំព្រលឹងទាំងឡាយ » មករកព្រះគ្រីស្ទ ?

សូមមើលផងដែរ ពួកបរិសុទ្ធ, ១:៦៨–៧១ ។

គោលលទ្ធិ និងសេចក្តីសញ្ញា ១៧

ព្រះអម្ចាស់ប្រើសាក្សីទាំងឡាយដើម្បីស្ថាបនាព្រះបន្ទូលរបស់ទ្រង់ ។

តើសាក្សីមានន័យដូចម្ដេច ? ហេតុអ្វីព្រះអម្ចាស់ប្រើសាក្សីទាំងឡាយក្នុងកិច្ចការរបស់ទ្រង់ ? ( សូមមើល កូរិនថូសទី ២ ១៣:១ ) ។ សូមគិតអំពីសំណួរទាំងនេះនៅពេលបងប្អូនអានព្រះបន្ទូលរបស់ព្រះ ទៅកាន់សាក្សីទាំងបីនាក់នៅក្នុង គោលលទ្ធិ និងសេចក្ដីសញ្ញា ១៧ ។ ( សូមមើលផងដែរ « ទីបន្ទាល់នៃពួកសាក្សីបីនាក់ » នៅក្នុងព្រះគម្ពីរមរមន ) ។ តើសាក្សីជួយនាំមកនូវ « គោលបំណងដ៏សុចរិត » របស់ព្រះដោយរបៀបណា ? ( ខទី៤ ) ។

តើបងប្អូនអាចធ្វើសាក្សីអ្វីខ្លះ ?

សូមមើលផងដែរ ពួកបរិសុទ្ធ, ១:៧៣–៧៥; « A Day for the Eternities » ( វីដេអូ ) នៅលើបណ្ណាល័យដំណឹងល្អ ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្ដីសញ្ញា ១៣; យ៉ូសែប ស្ម៊ីធ—ប្រវត្តិ ១:៦៨–៧៤

យ៉ូហាន បាទីស្ទ បានស្តារបព្វជិតភាពអើរ៉ុនឡើងវិញ ។

ស្នាដៃសិល្បៈនៅក្នុងគម្រោងមេរៀននេះអាចជួយឲ្យកូនរបស់បងប្អូនមើលឃើញការស្តារឡើងវិញនៃបព្វជិតភាពអើរ៉ុន ( សូមមើលផងដែរ « ជំពូកទី ៦:យ៉ូសែប និង អូលីវើរទទួលបព្វជិតភាព » នៅក្នុង ដំណើររឿងព្រះគម្ពីរគោលលទ្ធិ និងសេចក្តីសញ្ញា ទំព័រ ២៦–២៧ ឬវីដេអូដែលត្រូវគ្នានៅក្នុងបណ្ណាល័យដំណឹងល្អ ) ។ តើពួកគេចូលចិត្តគូររូបអំពីព្រឹត្តិការណ៍មួយដោយផ្អែកលើអ្វីដែលពួកគេបានអាននៅក្នុង យ៉ូសែប ស្ម៊ីធ—ប្រវត្តិ ១:៦៨–៧៤ ដែរឬទេ ?

2:12
ពួកទេវតាស្តារបព្វជិតភាពឡើងវិញ ៖ អំណាចដើម្បីធ្វើកិច្ចការរបស់ព្រះ
បងប្អូនក៏អាចបង្ហាញរូបភាពរបស់ យ៉ូហាន បាទីស្ទ នៅពេលដែលបងប្អូនអាន ម៉ាថាយ ៣:១៣-១៧; យ៉ូសែប ស្ម៊ីធ—ប្រវត្តិ ១:៦៨-៧០ ជាមួយគ្នាផងដែរ ។ ហេតុអ្វីបានជាវាសំខាន់ដែលព្រះអម្ចាស់បានចាត់ យ៉ូហាន បាទីស្ទ ឲ្យផ្តល់សិទ្ធិអំណាចបព្វជិតភាពដល់ យ៉ូសែប ស៊្មីធ ដើម្បីធ្វើពិធីបុណ្យជ្រមុជទឹក ?

ការរៀបចំកូនៗរបស់បងប្អូនឲ្យនៅលើផ្លូវនៃសេចក្ដីសញ្ញារបស់ព្រះពេញមួយជីវិត ។ សម្រាប់គំនិតបន្ថែមដើម្បីជួយកូនរបស់បងប្អូនឲ្យរៀនអំពីអំណាចបព្វជិតភាព សិទ្ធិអំណាច និងកូនសោទាំងឡាយ សូមមើល ឧបសម្ព័ន្ធ ក ឬ ឧបសម្ព័ន្ធ ខ ។

យ៉ូហាន បាទីស្ទ ជ្រមុជទឹកឲ្យព្រះយេស៊ូវគ្រីស្ទ — រចនារូបភាពអំពីព្រះយេស៊ូវគ្រីស្ទទទួលពិធីបុណ្យជ្រមុជទឹក ដោយ ដាន ប៊ើរ

គោលលទ្ធិ និងសេចក្តីសញ្ញា ១៣

ព្រះវរបិតាសួគ៌ប្រទានពរដល់ខ្ញុំតាមរយៈបព្វជិតភាពអើរ៉ុន ។

ដើម្បីជំរុញឲ្យមានការពិភាក្សាអំពីកូនសោរទាំងឡាយដែលបានលើកឡើងនៅក្នុង គោលលទ្ធិ និងសេចក្ដីសញ្ញា ១៣ បងប្អូន និងកូនៗរបស់បងប្អូនអាចមើលកូនសោរមួយឈុត ហើយនិយាយអំពីកូនសោរអ្វីដែលអនុញ្ញាតឲ្យយើងធ្វើ ។ ប្រហែលជាបងប្អូនអាចជួយពួកគេស្វែងរកពាក្យ កូនសោរ ពាក្យនៅក្នុងកណ្ឌទី ១៣ ។ តើពាក្យ ឬឃ្លាអ្វីផ្សេងទៀតនៅក្នុង គោលលទ្ធិ និងសេចក្ដីសញ្ញា ១៣ ពិពណ៌នាអំពីពរជ័យរបស់បព្វជិតភាពអើរ៉ុន ? កូនៗរបស់បងប្អូនក៏អាចស្វែងរកអំពីរបៀបដែលព្រះវរបិតាសួគ៌ប្រទានពរដល់យើងតាមរយៈបព្វជិតភាពក្នុងវីដេអូ « Blessings of the Priesthood » នៅក្នុង ( បណ្ណាល័យដំណឹងល្អ ) ។

គោលលទ្ធិ និងសេចក្តីសញ្ញា ១៥:៤–៦; ១៦:៤–៦

ការជួយអ្នកដទៃឲ្យមករកព្រះយេស៊ូវគ្រីស្ទគឺ « មានតម្លៃបំផុត » ។

យ៉ូហាន និង ពេត្រុស វិតមើរ ចង់ដឹងអំពីអ្វីដែល « មានតម្លៃបំផុត » នៅក្នុងជីវិតរបស់ពួកគេ ( គោលលទ្ធិ និងសេចក្តីសញ្ញា ១៥:៤; ១៦:៤ ) ។ ប្រហែលជាបងប្អូន និងកូនរបស់បងប្អូនអាចនិយាយអំពីអ្វីដែលមានតម្លៃច្រើនចំពោះបងប្អូន ។ សូមអាន គោលលទ្ធិ និងសេចក្ដីសញ្ញា ១៥:៦ ឬ១៦:៦ សុំឲ្យកូនរបស់បងប្អូនលើកដៃឡើងនៅពេលពួកគេស្ដាប់ឮអ្វីដែលព្រះអម្ចាស់មានបន្ទូលថា« មានតម្លៃបំផុត » ។
តើការ« នាំព្រលឹងទាំងឡាយមករក [ ព្រះយេស៊ូវគ្រីស្ទ ] មានន័យយ៉ាងណា ? សូមជួយកូនរបស់បងប្អូនធ្វើបញ្ជីមួយអំពីគំនិត ដូចជាការធ្វើជាមិត្តនឹងអ្នកដទៃ ការចែកចាយបទគម្ពីរជាមួយនឹងមិត្តម្នាក់ ឬការអធិស្ឋានសម្រាប់នរណាម្នាក់ដែលខ្វះខាត ។ កូនរបស់បងប្អូនអាចស្វែងរករូបភាពនៃដំណើររឿងទាំងនេះនៅក្នុងទស្សនាវដ្ដីសាសនាចក្រ ឬ សៀវភៅរូបភាពដំណឹងល្អ ។ ឬកុមារអាចគូររូបភាពផ្ទាល់ខ្លួនរបស់ពួកគេ ។ សូមអញ្ជើញពួកគេឲ្យជ្រើសរើសអ្វីមួយចេញពីបញ្ជីដែលពួកគេចង់ធ្វើ ។ បងប្អូនក៏អាចច្រៀងរួមគ្នាវគ្គទី ៤ នៃ « ខ្ញុំស្គាល់ក្តីស្នេហ៍ព្រះសង្រ្គោះ » ( សៀវភៅចម្រៀងកុមារ ទំព័រ ៤២ ) ។

គោលលទ្ធិ និងសេចក្តីសញ្ញា ១៧

ខ្ញុំអាចធ្វើជាសាក្សីម្នាក់នៃព្រះគម្ពីរមរមនបាន ។

« ជំពូកទី ៧ ៖ ពួកសាក្សីឃើញផ្ទាំងចំណារមាស » ( នៅក្នុង ដំណើររឿងព្រះគម្ពីរគោលលទ្ធិ និងសេចក្តីសញ្ញា ទំព័រ ៣១-៣៣ ឬវីដេអូដែលត្រូវគ្នានៅក្នុងបណ្ណាល័យដំណឹងល្អ ) អាចជួយកូនៗរបស់បងប្អូនឲ្យរៀនអំពីសាក្សីទាំងបីនាក់បាន ។ បន្ទាប់ពីអាន គោលលទ្ធិ និងសេចក្ដីសញ្ញា ១៧:៥-៦ សូមប្រាប់កូនៗរបស់បងប្អូនអំពីរបៀបដែលបងប្អូនដឹងថាព្រះគម្ពីរមរមនពិត ។ តើយើងអាចធ្វើជាសាក្សីអំពីព្រះគម្ពីរមរមនដោយរបៀបណា ?

4:58

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

យ៉ូសែប និងអូលីវើរ ទទួលបព្វជិតភាពអើរ៉ុនពី យ៉ូហាន បាទីស្ទ — នៅលើអ្នកជាពួកអ្នកបម្រើដូចរូបខ្ញុំអើយ ដោយ លីនដា ឃើរលី គ្រីស្ទានសិន