« បុត្រាបុត្រីនៃព្រះ » ប្រធានបទ ប្រធានបទ និង សំនួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
បុត្រាបុត្រីនៃព្រះ
ការកំណត់លក្ខណៈរបស់មនុស្សគ្រប់រូបនៅលើផែនដី
សូមស្រមៃថាបងប្អូនកំពុងជួបនរណាម្នាក់ជាលើកដំបូង ហើយគាត់និយាយថា « សូមណែនាំពីខ្លួនឯង » ។ តើបងប្អូននឹងនិយាយអ្វី ? ពិតមែនវាអាស្រ័យទៅលើស្ថានភាព ប៉ុន្តែការពិតដែលបងប្អូនជ្រើសរើសដើម្បីចែកចាយអាចបង្ហាញបានច្រើនអំពីរបៀបដែលបងប្អូនមើលឃើញខ្លួនឯង—និងរបៀបដែលបងប្អូនចង់ឲ្យអ្នកដទៃមើលមកបងប្អូន ។
មានការពិតមួយអំពីបងប្អូនដែលសំខាន់ជាងអ្វីៗទាំងអស់ ។ ហើយខណៈដែលបងប្អូនប្រហែលជាមិនបានលើករឿងនោះឡើងនៅពេលបងប្អូនណែនាំខ្លួនក៏ដោយ ក៏វាជាមូលដ្ឋានគ្រឹះចំពោះអត្តសញ្ញាណរបស់បងប្អូនជាងឈ្មោះ ស្រុកកំណើត ឬចំណាប់អារម្មណ៍ផ្ទាល់ខ្លួនរបស់បងប្អូនទៅទៀត ។ វាជាការពិតដែលបងប្អូនគឺជាបុត្រម្នាក់របស់ព្រះ ។ ទ្រង់គឺជាបិតារបស់បងប្អូន ។ ដូចជាបងប្អូនមានឪពុកម្តាយនៅលើផែនដីដែលបងប្អូនបានទទួលលក្ខណៈខាងរូបកាយដែរ បងប្អូនក៏ជា « បុត្រាបុត្រីខាងវិញ្ញាណរបស់ព្រះមាតាបិតាសួគ៌ ដូច្នេះហើយ[ បងប្អូនមាន ] និស្ស័យ និងជោគវាសនានៃព្រះ » ។ តើការពិតនេះអាចមានឥទិ្ធពលលើរបៀបដែលបងប្អូនមើលឃើញខ្លួនឯងដោយរបៀបណា ? តើវាអាចផ្លាស់ប្តូរវិធីសាស្ត្ររបស់បងប្អូនទៅលើឧបសគ្គ និងឱកាសនៅក្នុងជីវិតដោយរបៀបណា ?
តើការក្លាយជាកូនរបស់ព្រះមានន័យដូចម្តេច ?
មនុស្សទាំងអស់គឺជាបុត្រា និងបុត្រីរបស់ព្រះវរបិតាដែលគង់នៅស្ថានសួគ៌ ។ ក្នុងនាមជាបុត្ររបស់ព្រះ ជាទីស្រឡាញ់ខាងវិញ្ញាណនៅក្នុងជីវិតមុនផែនដី បុគ្គលម្នាក់ៗមានសក្តានុពលដ៏ទេវភាពអស់កល្បជានិច្ច ( សូមមើល រ៉ូម ៨:១៦-–១៧ ) ។
ទិដ្ឋភាពទូទៅនៃប្រធានបទ ៖ បុត្រាបុត្រីខាងវិញ្ញាណរបស់ព្រះមាតាបិតាសួគ៌
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ព្រះជាព្រះវរបិតា, ផែនការនៃសេចក្ដីសង្គ្រោះ, ជីវិតមុនជីវិតលើផែនដី
ផ្នែកទី ១
ព្រះមិនមែនគ្រាន់តែជាអង្គបង្កបង្កើតរបស់បងប្អូនប៉ុណ្ណោះទេ ទ្រង់គឺជាបិតារបស់បងប្អូន
មនុស្សគ្រប់គ្នាមានឪពុកលើផែនដី ហើយឪពុកទាំងនោះសុទ្ធតែមិនល្អឥតខ្ចោះ ។ ទោះជាយ៉ាងណាក៏ដោយ មិនថាបទពិសោធន៍របស់យើងជាមួយឪពុក និងភាពជាឪពុកនៅលើផែនដីមានលក្ខណៈបែបណានោះទេ យើងក៏មានព្រះវរបិតាសួគ៌ដែលជាអ្វីៗគ្រប់យ៉ាងដែលឪពុកម្នាក់ គួរតែ ធ្វើតាម—ស្រឡាញ់ គាំទ្រ ឈ្លាសវៃ មិនគិតពីខ្លួនឯង លះបង់ចំពោះភាពជោគជ័យរបស់បងប្អូន ។ ទ្រង់ជាព្រះដ៏មានអំណាច និងរុងរឿងបំផុតនៅក្នុងលោក ដែលស្រឡាញ់បងប្អូនជាបុត្រដ៏មានតម្លៃរបស់ទ្រង់ ។ ទ្រង់យល់ពីបងប្អូនយ៉ាងល្អឥតខ្ចោះ ហើយដឹងច្បាស់ពីអ្វីដែលបងប្អូនត្រូវលូតលាស់ រីកចម្រើន និងស្វែងរកអំណរដ៏អស់កល្បជានិច្ច ។ ងារដូចជា « ព្រះដ៏ខ្ពស់បំផុត » « អង្គបង្កបង្កើត » និង « ព្រះដ៏មានមហិទ្ធិឫទ្ធិ » ទាំងអស់សុទ្ធតែជា ព្រះនាមរបស់ទ្រង់ ។ ប៉ុន្តែលើសពីនេះទៅទៀតទ្រង់ចង់ឲ្យបងប្អូនស្គាល់ទ្រង់ថាជា « បិតា » ។
ការណ៍ទាំងឡាយដែលត្រូវពិចារណា
-
ម៉ូសេ បានរៀននៅក្នុងការនិមិត្តសួគ៌មួយថាលោកគឺជាបុត្ររបស់ព្រះ ។ សូមអានអំពីបទពិសោធន៍របស់លោកនៅក្នុង ម៉ូសេ ១:១–១១ ។ សូមកត់សម្គាល់ផងដែរនៅក្នុង ខទី ១២-–១៨ អំពីរបៀបដែលចំណេះដឹងនេះបានជួយដល់ម៉ូសេ នៅពេលសាតាំងព្យាយាមល្បួងលោក ។ សូមពិចារណាអំពីរបៀបដែលបងប្អូនចងចាំថាបងប្អូនគឺជាកូនរបស់ព្រះអាចជួយបងប្អូនក្នុងអំឡុងពេលនៃការល្បួងបាន ។
-
អែលឌើរ ប្រៃអិន ខេ ថៃលើរ បានប្រាប់រឿងមួយអំពីយុវនារីម្នាក់ដែលបាននិយាយថា « ការដឹងថាខ្ញុំជាកូនរបស់ព្រះគឺជាចំណេះដឹងដ៏មានឥទ្ធិពលបំផុតដែលខ្ញុំមាន ! » អានអំពីនាងនៅក្នុង « Am I a Child of God? » ដើម្បីស្វែងយល់អំពីមូលហេតុដែលនាងបាននិយាយយ៉ាងដូច្នោះ ។ ហេតុអ្វីបានជាការស្គាល់ព្រះ ជាព្រះវរបិតារបស់នាងធ្វើឲ្យមានការផ្លាស់ប្ដូរដ៏ធំបែបនេះក្នុងជីវិតរបស់នាង ? តើសេចក្តីពិតនេះបានធ្វើឲ្យមានភាពខុសប្លែកអ្វីខ្លះនៅក្នុងជីវិតរបស់បងប្អូន ?
-
តើបងប្អូនធ្លាប់បង្កើតសិប្បកម្មធ្វើដោយដៃ ឬការងារសិល្បៈឬទេ ? ឬប្រហែលជាបងប្អូនបានបង្កើតអ្វីមួយដូចជាកាលវិភាគ កញ្ចប់ថវិកា ឬអាហារ ។ ចូរពិចារណាអំពីរបៀបដែលទំនាក់ទំនងរបស់បងប្អូនជាមួយនឹងអ្វីដែលបងប្អូនបានបង្កើតគឺខុសគ្នាពីទំនាក់ទំនងរវាងឪពុក ឬម្ដាយ និងកូន ។ សូមគិតអំពីរឿងនេះនៅពេលបងប្អូនពិចារណាអំពីបទគម្ពីរទាំងនេះ ៖ កាឡាទី ៤:៦–៧; យ៉ូហាន ទី១ ៣:២ ។ ហេតុអ្វីវាសំខាន់សម្រាប់បងប្អូនដើម្បីដឹងថាបងប្អូនគឺជាបុត្រាឬបុត្រី—ដោយមិនមែនគ្រាន់តែជាការបង្កបង្កើត—នៃព្រះប៉ុណ្ណោះទេ ?
សកម្មភាពសម្រាប់ការរៀនសូត្រជាមួយអ្នកដទៃ
-
ដើម្បីបង្រៀនអំពីសក្តានុពលរបស់យើងក្នុងនាមជាកូនរបស់ព្រះ សូមពិចារណាអំពីរបៀបដែលបងប្អូនអាចបង្ហាញថាឪពុកម្ដាយ និងកូនៗរបស់ពួកគេមានចរិតលក្ខណៈខាងរូបកាយដូចគ្នា ។ ប្រហែលជាបងប្អូនអាចបង្ហាញរូបភាពរបស់ឪពុកម្ដាយ និងកូនៗរបស់ពួកគេ ហើយស្វែងរកភាពស្រដៀងគ្នានានា ។ បន្ទាប់មកបងប្អូនអាចអានបទគម្ពីរមួយចំនួនអំពីចរិតលក្ខណៈរបស់ព្រះវរបិតាសួគ៌ ដូចជាបទគម្ពីរទាំងនេះ ៖
តើយើងមើលឃើញភស្ដុតាងអ្វីខ្លះនៅក្នុងចរិតលក្ខណៈទាំងនេះ ? តើយើងអាចអភិវឌ្ឍចរិតលក្ខណៈទាំងនោះបន្ថែមទៀត ហើយកាន់តែប្រែក្លាយដូចជាព្រះវរបិតារបស់យើងដែលនៅគង់នៅស្ថានសួគ៌ដោយរបៀបណា ?
ស្វែងយល់បន្ថែមទៀត
-
រ័សុល អិម ណិលសុន « Choices for Eternity » ( ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី ១៥ ខែ ឧសភា ឆ្នាំ២០២២ ) នៅលើបណ្ណាល័យដំណឹងល្អ ។
-
ដូណល អិល ហលស្ត្រម «I Am a Child of God » Liahona ខែ ឧសភា ឆ្នាំ ២០១៦ ទំព័រ ២៦–២៨
-
រ៉ូស្មែរី អិម វិសុម « Discovering the Divinity Within » Liahona ខែ វិច្ឆិកា ឆ្នាំ ២០១៥ ទំព័រ ៦–៨
ផ្នែកទី ២
ប្រព្រឹត្តិចំពោះមនុស្សគ្រប់គ្នាដូចជាកូនរបស់ព្រះ ។
វាជារឿងធម្មតាពេលឮសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយហៅគ្នាថា« បងប្អូនប្រុស » និង « បងប្អូនស្រី » ។ ដូចដែលប្រធាន ហិនរី ប៊ី អាវរិង បានពន្យល់នូវពាក្យទាំងនេះ « មិនគ្រាន់តែជាពាក្យនៃការគោរពដ៏រាក់ទាក់ ឬ ដែលមានក្ដីស្រឡាញ់ប៉ុណ្ណោះទេ ។ ។ ពាក្យទាំងនេះគឺជាការបង្ហាញពីសេចក្ដីពិតអស់កល្បជានិច្ចមួយគឺ ៖ ព្រះគឺពិតជាព្រះវរបិតានៃមនុស្សលោកទាំងអស់ យើងគឺជាសមាជិកម្នាក់ៗក្នុងគ្រួសារអស់កល្បជានិច្ចរបស់ទ្រង់ » ។ សេចក្ដីពិតដ៏សាមញ្ញនេះមានអំណាចក្នុងការផ្លាស់ប្ដូររបៀបដែលយើងប្រព្រឹត្តចំពោះគ្នាទៅវិញទៅមក ។ យើងអាចមានភាពខុសគ្នានៅក្នុងគំនិត សកម្មភាព និងរូបកាយ របស់យើង ប៉ុន្តែភាពខុសគ្នាទាំងនោះគឺងាយស្រួលជាងមុនក្នុងការដឹងគុណ និងការគោរព នៅពេលដែលយើងចងចាំថា បើនិយាយខាងវិញ្ញាណវិញ គឺយើងទាំងអស់គ្នាជាគ្រួសារនឹងគ្នា ។
ការណ៍ទាំងឡាយដែលត្រូវពិចារណា
-
ព្រះគម្ពីរមរមនប្រាប់មនុស្សពីរក្រុម—គឺពួកសាសន៍នីហ្វៃ និងពួកសាសន៍លេមិន—ដែលជាសត្រូវដ៏កាចសាហាវនឹងគ្នាជាច្រើនជំនាន់ ។ ប៉ុន្តែមានពេលខ្លះដែលក្រុមទាំងនេះបានយកឈ្នះលើការស្អប់របស់ពួកគេ ហើយប្រព្រឹត្តចំពោះគ្នាទៅវិញទៅមកដូចជាបងប្អូនប្រុសស្រី ។ សូមអានអំពីបទពិសោធន៍ទាំងនេះនៅក្នុង ម៉ូសាយ ២៨:១–៣; អាលម៉ា ២៦:២៣–៣១; ២៧:២០–២៤; នីហ្វៃទី៤ ១:១–៣, ១៤–១៨ ។ ពេលបងប្អូនអាន សូមពិចារណាអំពីអ្វីដែលបងប្អូនអាចធ្វើដើម្បីជួយព្រះអង្គសង្គ្រោះនាំមកនូវសេចក្ដីសុខដល់គ្រួសាររបស់ព្រះ ។
-
មនុស្សដែលបងប្អូនជួបប្រហែលជានឹងមិនណែនាំខ្លួនឯងជាកូនរបស់ព្រះទេ ប៉ុន្តែបងប្អូនអាចចាត់ទុកពួកគេជាកូនរបស់ព្រះនៅពេលបងប្អូនជួបពួកគេ ។ សូមសាកល្បងធ្វើវា ! ហើយនៅពេលណាដែលបងប្អូនត្រូវបានល្បួងឲ្យគិតអាក្រក់ទៅលើនរណាម្នាក់ សូមជំនួសគំនិតនោះដោយគិតថា « បុគ្គលនេះគឺជាកូនរបស់ព្រះ » វិញ ។ សូមកត់សម្គាល់អំពីរបៀបដែលបងប្អូនមានអារម្មណ៍ចំពោះមនុស្ស និងរបៀបដែលបងប្អូនប្រព្រឹត្ដចំពោះពួកគេ ។
សកម្មភាពសម្រាប់ការរៀនសូត្រជាមួយអ្នកដទៃ
-
សូមពិចារណាបង្ហាញពីរូបថតរបស់មនុស្សមកពីពូជសាសន៍ វប្បធម៌ និងពង្សសាវតាផ្សេងៗ ។ ចូរនិយាយអំពីវិធីជាច្រើនដែលមនុស្សមានលក្ខណៈស្រដៀងគ្នាទៅវិញទៅមក ។ ចូរពិភាក្សាអំពីមូលហេតុដែលព្រះសព្វព្រះទ័យចង់ឲ្យយើងគោរព និងប្រព្រឹត្តចំពោះអ្នកដទៃដោយសេចក្ដីសប្បុរសជានិច្ច ។
ស្វែងយល់បន្ថែមទៀត
-
ម៉ាឡាគី ២:១០; កិច្ចការ ១៧:២៤–២៩; គោលលទ្ធិ និងសេចក្តីសញ្ញា ១៨:១០; ៧៦:២៤
-
ដាល្លិន អេក អូក « Love Your Enemies » Liahona ខែ វិច្ឆិកា ឆ្នាំ ២០២០ ទំព័រ ២៦–២៩