« ផែនការនៃសេចក្តីសង្គ្រោះ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ផែនការនៃសេចក្តីសង្គ្រោះ
ផែនការរបស់ព្រះវរបិតាសួគ៌សម្រាប់សុវត្ថិភាពរបស់យើង និងការត្រឡប់ទៅរកទ្រង់វិញដោយរីករាយ
តើអ្នកមានធ្លាប់ឆ្ងល់ទេថា ហេតុអ្វីបានជាអ្នកនៅលើផែនដីនេះ ឬតើគោលបំណងរបស់អ្នកនៅក្នុងជីវិតគឺជាអ្វី ? តើពេលខ្លះអ្នកឆ្ងល់ទេថាហេតុអ្វីជីវិតពិបាកម៉េ្លះ ? តើអ្នកព្រួយបារម្ភអំពីអ្វីដែលនឹងកើតឡើងនៅពេលអ្នក ឬមនុស្សជាទីស្រឡាញ់ស្លាប់ដែរឬទេ ? ពេលអ្នកប្រឈមមុខនឹងសំណួរដ៏លំបាកដូចនេះ—ហើយយើងទាំងអស់គ្នាសុទ្ធតែជួប—វាជួយឲ្យដឹងថាព្រះវរបិតាសួគ៌មានផែនការសម្រាប់អ្នក សម្រាប់យើងគ្រប់គ្នា ។ ការយល់ដឹងអំពីផែនការនោះអាចជួយអ្នកស្វែងរកចម្លើយចំពោះសំណួរទាំងនេះ និងស្វែងរកសុភមង្គលពិតប្រាកដ មិនថាមានអ្វីកើតឡើងក្នុងជីវិតរបស់អ្នកនោះទេ ។
តើផែនការនៃសេចក្តីសង្រ្គោះគឺជាអ្វី ?
ផែនការនៃសេចក្ដីសង្គ្រោះ ផែនការនៃសុភមង្គលគឺជាផែនការរបស់ព្រះវរបិតាសួគ៌ ដើម្បីជួយយើងឲ្យក្លាយទៅដូចជាទ្រង់ ហើយត្រឡប់ទៅរកទ្រង់វិញ ។ ការបង្កបង្កើតផែនដី ការធ្លាក់នៃលោកអ័ដាម និងនាងអេវ៉ា ការកើត និងការស្លាប់របស់យើង ដង្វាយធួនរបស់ព្រះយេស៊ូវគ្រីស្ទ ការរស់ឡើងវិញ និងការជំនុំជម្រះចុងក្រោយរបស់យើង និងគ្រប់ច្បាប់ បទបញ្ញត្តិ និងអំណោយទានរបស់ព្រះទាំងឡាយគឺជាផ្នែកនៃផែនការរបស់ទ្រង់ ។ ព្រះយេស៊ូវគ្រីស្ទមានតួនាទីសំខាន់ក្នុងការនាំមកនូវសេចក្ដីសង្គ្រោះដល់បុត្រាបុត្រីរបស់ព្រះវរបិតាសួគ៌ ។ តាមរយៈដង្វាយធួនរបស់ទ្រង់ ទ្រង់ធ្វើឲ្យផែនការនេះអាចធ្វើទៅបាន ដោយធ្វើឲ្យយើងអាចបំពេញគោលបំណងរបស់ផែនការនេះបាន—ដើម្បីទទួលបានជីវិតដ៏អស់កល្បជានិច្ចជាមួយនឹងព្រះ ។
ទិដ្ឋភាពទូទៅនៃប្រធានបទ ៖ ផែនការនៃសេចក្តីសង្រ្គោះ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ជីវិតមុនផែនដី, ជីវិតរមែងស្លាប់, ជីវិតអស់កល្បជានិច្ច
ផ្នែកទី ១
ព្រះវរបិតាសួគ៌បានរៀបចំផែនការរបស់ទ្រង់ដើម្បីឲ្យអ្នកអាចក្លាយដូចជាទ្រង់
យើងទាំងអស់គ្នាដែលធ្លាប់រស់នៅ ឬនឹងរស់នៅលើផែនដីនេះ—បានរស់នៅជាមួយនឹងព្រះមាតាបិតាសួគ៌របស់យើងមុនពេលយើងកើត ។ យើងគឺជាបុត្រា និងបុត្រីខាងវិញ្ញាណរបស់ទ្រង់ទាំងទ្វេ ប៉ុន្តែមានអ្វីជាច្រើនដែលយើងត្រូវដកពិសោធន៍ដើម្បីប្រែក្លាយដូចជាទ្រង់ទាំងទ្វេ ។ ព្រះវរបិតាសួគ៌ស្រឡាញ់យើង ហើយចង់ឲ្យយើងទាំងអស់គ្នារស់នៅដូចទ្រង់ដែរ ៖ នៅក្នុងសិរីរុងរឿងដ៏អស់កល្បជានិច្ចជាមួយនឹងមនុស្សជាទីស្រឡាញ់របស់យើង ។ នេះគឺជាមូលហេតុដែលទ្រង់បានរៀបចំផែនការនៃសេចក្ដីសង្គ្រោះ ។
កិច្ចការ និងសិរីល្អរបស់ទ្រង់គឺដើម្បី « ដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ និយាយម្យ៉ាងទៀតថា គោលបំណងទាំងមូលនៃផែនការនេះគឺដើម្បីឲ្យយើងក្លាយដូចជាព្រះ ហើយរស់នៅអស់កល្បជានិច្ចជាមួយនឹងទ្រង់ ។ ការដឹងអំពីផែនការនេះអាចជួយអ្នកឲ្យយល់ពីអត្តសញ្ញាណដ៏ទេវភាពរបស់អ្នក និងសក្តានុពលដ៏អស់កល្បជានិច្ចរបស់អ្នក ។
រឿងទាំងឡាយដែលត្រូវពិចារណា
-
សូមអាន ឬទស្សនាសុន្ទរកថារបស់ប្រធាន ឌៀថើរ អេហ្វ អុជដូហ្វ « You Matter to Him » ។ តើវាមានន័យយ៉ាងណាចំពោះអ្នកដែលដឹងថាព្រះ « ទតឃើញអ្នកថាអ្នកមានសមត្ថភាព ហើយអ្នកត្រូវបានរចនាឡើងដើម្បីក្លាយជាអ្នកមានសមត្ថភាព » ? តើចំណេះដឹងនោះអាចផ្លាស់ប្ដូររបៀបដែលអ្នកគិត និងប្រព្រឹត្តចំពោះខ្លួនអ្នក និងអ្នកដទៃដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
តាមរយៈគំរូរបស់ទ្រង់ ព្រះយេស៊ូវគ្រីស្ទបានបង្ហាញយើងអំពីរបៀបដែលយើងអាចប្រែក្លាយដូចជាព្រះ ។ សូមធ្វើបញ្ជីនៃគុណលក្ខណៈមួយចំនួនដែលមានក្នុងគំនិតនៅពេលអ្នកគិតដល់ទ្រង់ ។ ( អ្នកអាចមើល ជំពូកទី ៦ នៃ ប្រកាសដំណឹងល្អរបស់យើង សម្រាប់គំនិតមួយចំនួន ) ។ ចែកចាយអំពីរបៀបដែលអ្នកមើលឃើញគុណសម្បត្តិទាំងនេះនៅក្នុងគ្នាទៅវិញទៅមក ។ សូមអញ្ជើញមនុស្សម្នាក់ៗឲ្យជ្រើសរើសគុណលក្ខណៈមួយក្នុងចំណោមគុណលក្ខណៈទាំងនោះដែលគាត់ចង់អភិវឌ្ឍ និងធ្វើផែនការដើម្បីពង្រឹងគុណលក្ខណៈនោះ ។ ចែកចាយផែនការរបស់អ្នកជាមួយគ្នាទៅវិញទៅមក ហើយលើកទឹកចិត្តគ្នាទៅវិញទៅមកនៅពេលដែលអ្នកព្យាយាមដើម្បីសម្រេចគោលដៅរបស់អ្នក ។
ស្វែងយល់បន្ថែមទៀត
-
រ៉ូបឺត ឌី ហែល « The Plan of Salvation: A Sacred Treasure of Knowledge to Guide Us » Ensign ខែ តុលា ឆ្នាំ ២០១៥ ទំព័រ ២៥–៣១ ។
ផ្នែកទី ២
ការយល់ដឹងអំពីផែនការនេះនឹងជួយអ្នកឆ្លងកាត់ស្ថានភាពលំបាកទាំងឡាយ
នៅពេលអ្នកយល់ដឹងថាជីវិតនេះគ្រាន់តែជាផ្នែកដ៏តូចមួយនៃជីវិតរបស់អ្នក នោះអ្នកអាចឈោងទៅចាប់សេចក្តីសង្ឃឹមបាននៅពេលអ្នកជួបប្រទះការសាកល្បង ។ នោះមិនមែនមានន័យថា អ្នកនឹងតែងតែអាចឆ្លើយសំណួរដូចជា « ហេតុអ្វីបានជារឿងនេះកើតឡើង ? »នោះទេ ប៉ុន្តែទោះបីជាការយល់ដឹងរបស់អ្នកមានកម្រិតក៏ដោយ ក៏អ្នកអាចប្រាកដថាព្រះស្រឡាញ់អ្នក ( សូមមើល នីហ្វៃទី១ ១១:១៧ ) ហើយថាឧបសគ្គរបស់អ្នកនឹងមិននៅជារៀងរហូតឡើយ ។ អ្នកក៏អាចដឹងដែរថា ដោយសារតែព្រះយេស៊ូវគ្រីស្ទ នោះសេចក្ដីស្លាប់មិនមែនជាទីបញ្ចប់នោះទេ វាគ្រាន់តែជាជំហានមួយនៅលើផ្លូវដើម្បីប្រែក្លាយដូចជាព្រះ ។
រឿងទាំងឡាយដែលត្រូវពិចារណា
-
សូមទស្សនា « Plan of Salvation—We’re Still a Family »( នាទីទី ៤:៤៧ ) ។ យុវជននៅក្នុងវីដេអូនេះបានសួរថា « តើការមានទស្សនវិស័យដ៏អស់កល្បជានិច្ចមានន័យយ៉ាងណា ? » សូមពិចារណាអំពីរបៀបដែលអ្នកនឹងឆ្លើយសំណួរនេះ ។ អ្នកប្រហែលជាចង់ចែកចាយគំនិតរបស់អ្នកជាមួយសមាជិកគ្រួសារ ឬមិត្តភក្តិ ឬកត់ត្រាវាទុកនៅក្នុងកំណត់ហេតុមួយ ។
-
សូមអានបទគម្ពីរខាងក្រោមនេះដោយស្វែងរកឈ្មោះផ្សេងគ្នាសម្រាប់ផែនការនៃសេចក្ដីសង្គ្រោះ ៖ នីហ្វៃទី២ ៩:៦, ១៣; ១១:៥; អាលម៉ា ៣៤:១៦; ៤១:២; ៤២:៨, ៣១ ។ តើឈ្មោះទាំងនេះបង្រៀនអ្នកអ្វីខ្លះអំពីផែនការរបស់ព្រះ ?
សកម្មភាពសម្រាប់ការរៀនសូត្រជាមួយអ្នកដទៃ
-
តើអ្នកអាចផ្ដោតអារម្មណ៍ទៅលើផែនការរបស់ព្រះវរបិតាសួគ៌ពេលអ្នកឈានទៅមុខក្នុងជីវិតដោយរបៀបណា ? ប្រធាន រ័សុល អិម ណិលសុន បានបង្រៀនថា « ពេលជីវិតរបស់យើងផ្តោតលើផែនការនៃសេចក្តីសង្គ្រោះ… និងព្រះយេស៊ូវគ្រីស្ទ ព្រមទាំងដំណឹងល្អរបស់ទ្រង់នោះយើងអាចមានអំណរ មិនថាមានអ្វីកំពុងកើតឡើង—ឬ មិនកើតឡើង—នៅក្នុងជីវិតយើងនោះទេ » ។ សូមនិយាយជាមួយគ្នាអំពីរបៀបដែលអ្នកអាចធ្វើឲ្យព្រះគ្រីស្ទ និងដំណឹងល្អរបស់ទ្រង់ក្លាយជាចំណុចកណ្ដាលនៃជីវិតរបស់អ្នក ។ អ្នកអាចប្តូរវេនគ្នាថតរូបបន្ទប់មួយ ។ បន្ទាប់មកសូមឲ្យមនុស្សម្នាក់ៗជ្រើសរើសផ្នែកណាមួយនៃបន្ទប់ដែលគាត់នឹងផ្តោតទៅលើ ។ មើលរូបថតជាមួយគ្នា ហើយនិយាយអំពីរបៀបដែលបន្ទប់នេះមើលទៅខុសគ្នាដោយចេញពីទស្សនៈផ្សេងៗគ្នា ។ ចូរនិយាយអំពីរបៀបដែលការផ្ដោតទៅលើព្រះគ្រីស្ទ អាចជួយយើងឲ្យមើលឃើញជីវិតរបស់យើងចេញពីទស្សនវិស័យអស់កល្បជានិច្ច ។
ស្វែងយល់បន្ថែមទៀត
-
រ័សុល អិម ណិលសុន « ការទាញយកព្រះចេស្ដានៃព្រះយេស៊ូវគ្រីស្ទមកក្នុងជីវិតរបស់យើង » Liahona ខែ ឧសភា ឆ្នាំ ២០១៧ ទំព័រ ៣៩–៤២
-
រ័សុល អិម ណិលសុន « ព្រះគ្រីស្ទមានព្រះជន្មរស់ឡើងវិញ ៖ សេចក្តីជំនឿលើទ្រង់នឹងរើភ្នំចេញបាន » លីអាហូណា ខែ ឧសភា ឆ្នាំ ២០២១ ទំព័រ ១០១–១០៤
-
ថូម៉ាស អេស ម៉នសុន « មាគ៌ាដ៏ឥតខ្ចោះឆ្ពោះទៅកាន់សុភមង្គល » លីអាហូណា ខែ វិច្ឆិកា ឆ្នាំ ២០១៦ ទំព័រ ៨០–៨១
ផ្នែកទី ៣
ព្រះយេស៊ូវគ្រីស្ទធ្វើឲ្យផែនការអាចធ្វើទៅបានសម្រាប់មនុស្សគ្រប់រូប
ប្រហែលជាអ្នកមានអារម្មណ៍ថាអ្នកបានធ្វើកំហុសច្រើនពេក ឬថាអ្នកនឹងមិនល្អគ្រប់គ្រាន់ ដើម្បីទទួលបានពរជ័យដែលបានសន្យាទាំងអស់របស់ព្រះឡើយ ។ ប្រសិនបើភាពជោគជ័យនៃផែនការរបស់ព្រះគឺពឹងផ្អែកតែលើការខិតខំផ្ទាល់ខ្លួនរបស់អ្នក នោះការណ៏នេះអាចជាការពិត ។ ប៉ុន្តែព្រះយេស៊ូវគ្រីស្ទធ្វើឲ្យផែនការដ៏អស់កល្បជានិច្ចរបស់ព្រះអាចធ្វើទៅបានសម្រាប់មនុស្សគ្រប់គ្នា ។ ដោយសារតែការពលិកម្មដ៏ធួនរបស់ទ្រង់ នោះយើងមិនចាំបាច់ធ្វើវាទាំងអស់ដោយខ្លួនឯងនោះទេ ។ ទ្រង់អញ្ជើញអ្នកទាំងអស់គ្នាឲ្យរៀនអំពីផែនការ ប្រែចិត្ត ធ្វើ និងរក្សាសេចក្ដីសញ្ញាជាមួយនឹងទ្រង់ ហើយរីករាយនឹងពរជ័យដែលបានសន្យានៃផែនការនេះ ។ នៅពេលយើងធ្វើអ្វីៗគ្រប់យ៉ាងដែលយើងអាចធ្វើបានដើម្បីអនុវត្តសេចក្តីជំនឿលើទ្រង់ ប្រែចិត្ត ហើយរក្សាសេចក្ដីសញ្ញារបស់យើង នោះទ្រង់នឹងបំពេញនូវភាពខ្វះចន្លោះ ហើយពង្រឹងយើង ។ យើងអាចរកឃើញសុភមង្គលនៅក្នុងផែនការនេះដោយដឹងថាការសន្យារបស់ទ្រង់គឺពិតប្រាកដ ។
រឿងទាំងឡាយដែលត្រូវពិចារណា
-
សូមអាន ឬទស្សនាសុន្ទរកថារបស់អែលឌើរ អេឌ្រាន អូឆាវ មកពីសន្និសីទទូទៅប្រចាំ ខែ មេសា ឆ្នាំ ២០២២ « តើផែនការនេះដំណើរការដែរឬទេ ? » អែលឌើរ អូឆាវ រៀបរាប់អំពីគោលការណ៍បីដែលអាចជួយបាន ប្រសិនបើអ្នកមានអារម្មណ៍ថាផែនការនៃសេចក្ដីសង្គ្រោះមិនដំណើរការក្នុងជីវិតរបស់អ្នក ។ សូមកត់សម្គាល់អំពីរបៀបដែលព្រះយេស៊ូវគ្រីស្ទមានសារៈសំខាន់ចំពោះគោលការណ៍នីមួយៗទាំងនោះ ។ ដាក់គោលដៅផ្ដោតបន្ថែមទៀតទៅលើទ្រង់ ។ ពេលអ្នកធ្វើការលើគោលដៅរបស់អ្នក សូមកត់ត្រាអារម្មណ៍របស់អ្នកអំពីរបៀបដែលអ្នកមើលឃើញផែនការនៃសុភមង្គលដែលដំណើរការក្នុងជីវិតរបស់អ្នក ។
ស្វែងយល់បន្ថែមទៀត
-
ដាល្លិន អេក អូក « The Great Plan » Liahona ខែ ឧសភា ឆ្នាំ ២០២០ ទំព័រ ៩៣–៩៦
-
ដាល្លិន អេក អូក « The Godhead and the Plan of Salvation » Liahona ខែ ឧសភា ឆ្នាំ ២០១៧ ទំព័រ ១០០–១០៣
-
អិល ថម ភែរី « The Plan of Salvation » លីអាហូណា ខែ វិច្ឆិកា ឆ្នាំ ២០០៦ ទំព័រ ៦៩-៧២
-
« The Plan of Salvation » ( វីដេអូ ) នៅលើបណ្ណាល័យដំណឹងល្អ
ធនធានផ្សេងទៀតអំពីផែនការនៃសេចក្តីសង្រ្គោះ
-
ធនធានសម្រាប់កុមារ