« តួនាទីរបស់ពួកព្យាការី » ប្រធានបទ និង សំណួរ ( ឆ្នាំ២០២៣ )
សំណួរអំពីសាសនាចក្រ និងដំណឹងល្អ
តួនាទីរបស់ពួកព្យាការី
ការស្វែងរកចម្លើយចំពោះសំណួររបស់យើងអាចទាញយើងឲ្យខិតទៅជិតព្រះយេស៊ូវគ្រីស្ទ ប្រសិនបើយើងអនុវត្តគោលការណ៍ត្រឹមត្រូវ ។ ការយល់ដឹងពីរបៀបទទួលបានវិវរណៈពេលស្វែងរកចម្លើយគឺមានសារៈសំខាន់ ។ សូមមើលប្រធានបទ « ទទួលស្គាល់ថាវិវរណៈគឺជាដំណើរការមួយ » ដើម្បីរុករកគន្លឹះបន្ថែមក្នុងការឆ្លើយសំណួរ ។
ទិដ្ឋភាពទូទៅ
ចាប់តាំងពីសម័យបុរាណ ព្រះបានហៅពួកព្យាការីឲ្យថ្លែងទីបន្ទាល់អំពីព្រះយេស៊ូវគ្រីស្ទ ហើយប្រកាសព្រះបន្ទូលរបស់ទ្រង់ ។ ព្រះរៀបចំ ហៅ និងដឹកនាំពួកព្យាការីដើម្បីសម្រេចគោលបំណងដ៏នៅអស់កល្បជានិច្ចរបស់ទ្រង់ ។ ព្រះគម្ពីរមានការបង្រៀនរបស់ព្យាការីជាច្រើនដូចជា ម៉ូសេ អេសាយ អេលីយ៉ា និងនីហ្វៃ ។ ព្យាការីម្នាក់ៗបានមានប្រសាសន៍ទៅកាន់ប្រជាជនជាភាសា ពេលវេលា និងទីកន្លែងរបស់ពួកលោកផ្ទាល់ ដោយផ្ដល់នូវការដឹកនាំដ៏បំផុសគំនិត និងការព្រមានទាន់ពេលវេលា ។
ព្រះបន្តហៅពួកព្យាការីនៅសម័យរបស់យើង ។ ព្យាការី យ៉ូសែប ស្ម៊ីធ បានទទួលសិទ្ធិអំណាចពីព្រះដើម្បីចាត់ចែងសេចក្ដីសញ្ញានៃដំណឹងល្អ និងពិធីបរិសុទ្ធនៃបព្វជិតភាព ហើយស្ដារសាសនាចក្រនៃព្រះយេស៊ូវគ្រីស្ទឡើងវិញ ។ លោកក៏បានទទួលវិវរណៈដែលបញ្ជាក់ពីសេចក្តីពិតសំខាន់ៗអំពីព្រះ និងផែនការរបស់ទ្រង់សម្រាប់បុត្រាបុត្រីរបស់ទ្រង់ផងដែរ ។ ការបន្តតំណែងរបស់លោកក្នុងនាមជាប្រធានសាសនាចក្រ គឺមានសិទ្ធិអំណាចដូចគ្នាក្នុងការទទួលវិវរណៈ ដើម្បីបន្ថែមចំណេះដឹងអំពីដំណឹងល្អ និងដើម្បីដឹកនាំសាសនាចក្រ ។ គោលការណ៍នៃវិវរណៈដែលមានជាបន្តបន្ទាប់នេះ គឺជាលក្ខណៈសំខាន់នៃដំណឹងល្អដែលបានស្ដារឡើងវិញ ។
ពួកបរិសុទ្ធថ្ងៃចុងក្រោយក៏គាំទ្រប្រធាននៃសាសនាចក្រ និងទីប្រឹក្សារបស់លោកនៅក្នុងគណៈប្រធានទីមួយ និងសមាជិកក្នុងកូរ៉ុមនៃពួកសាវកដប់ពីរនាក់ ជាព្យាការី ជាអ្នកមើលឆុត និង ជាអ្នកទទួលវិវរណៈផងដែរ ។ ការបង្រៀនរបស់សាសនាចក្រត្រូវបានប្រកាសដោយសំឡេងដ៏រួបរួមរបស់ព្យាការីដែលនៅរស់ទាំងនេះ ។ គោលលទ្ធិត្រូវបានប្រកាស និងបកស្រាយដោយប្រធានសាសនាចក្រ ហើយគាំទ្រដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ ដែលធ្វើសកម្មភាពជាមតិតែមួយ តាមគំរូដែលបានផ្ដល់ឲ្យនៅក្នុង គោលលទ្ធិ និងសេចក្តីសញ្ញា ១០៧:២៧–៣១ ។
ព្រះអម្ចាស់បានហៅមនុស្សរមែងស្លាប់ឲ្យធ្វើជាព្យាការីរបស់ទ្រង់ ។ ដូចជាបុត្រាបុត្រីរបស់ព្រះទាំងអស់ដែរ ពួកលោកឆ្លងកាត់ការសាកល្បងនៃជីវិតរមែងស្លាប់ ប៉ុន្តែព្រះអម្ចាស់ធ្វើការតាមរយៈពួកលោកដើម្បីបំពេញកិច្ចការរបស់ទ្រង់ ។ ទ្រង់បានបញ្ជាឲ្យសាសនាចក្រស្តាប់តាមដំបូន្មានរបស់ពួកលោក « ដោយសេចក្ដីអត់ធន់ និងសេចក្ដីជំនឿគ្រប់យ៉ាង » ។ ប្រសិនបើយើងធ្វើដូច្នេះ ទ្រង់សន្យាថានឹង « កម្ចាត់អំណាចនៃសេចក្ដីងងឹតចេញពី [ យើង ] ទៅ ហើយនឹងបណ្ដាលឲ្យផ្ទៃមេឃញាប់ញ័រ ដើម្បីសេចក្ដីល្អដល់ [ យើង ] ។
មគ្គុទ្ទេសក៍សិក្សាដំណឹងល្អដែលទាក់ទង ៖
-
« ពួកព្យាការី »
-
« កូនសោបព្វជិតភាព »
ការស្វែងយល់ពីសំណួររបស់អ្នក
ហេតុអ្វីបានជាវាសំខាន់សម្រាប់ខ្ញុំ ដើម្បីស្ដាប់ពួកព្យាការី ?
ព្រះយេស៊ូវគ្រីស្ទបានស្ដារសាសនាចក្ររបស់ទ្រង់ឡើងវិញនៅថ្ងៃចុងក្រោយដើម្បីជួយទ្រង់សម្រេចកិច្ចការដ៏អស្ចារ្យរបស់ទ្រង់ ៖ ទ្រង់មានព្រះរាជបំណងចង់បង្រៀនពីពរជ័យនៃសេចក្ដីសញ្ញា សម្រួលនូវការអភ័យទោសចំពោះអំពើបាប និងប្រទានជំនួយតាមរយៈការសាកល្បងដល់បុត្រាបុត្រីរបស់ព្រះទាំងអស់ បង្រួបបង្រួមពិភពលោកដែលបែងចែកជុំវិញការបង្រៀន និងគំរូរបស់ទ្រង់ ហើយភ្ជាប់គ្រប់ជំនាន់នៃគ្រួសារមនុស្សលោកតាមរយៈពិធីបរិសុទ្ធនៃសេចក្ដីសង្គ្រោះ និងភាពតម្កើងឡើង ។
ព្រះអម្ចាស់ហៅពួកព្យាការី ហើយប្រទានសិទ្ធិអំណាចដល់ពួកលោកដើម្បីដឹកនាំកិច្ចការនេះ ។ ទ្រង់ប្រទានវិវរណៈដល់ពួកលោក ដើម្បីជួយពួកលោកដឹងពីអ្វីដែលត្រូវគូសបញ្ជាក់ និងរបៀបដើម្បីជំរុញកិច្ចការរបស់ព្រះទៅមុខ ។ ទោះជាពួកព្យាការីមកពីមជ្ឈដ្ឋានផ្សេងៗគ្នា ហើយមានទេពកោសល្យ និងទស្សនៈខុសៗគ្នាក៏ដោយ ពួកលោកស្វែងរក និងទទួលព្រះហឫទ័យរបស់ព្រះអម្ចាស់ដោយរាបសាចំពោះសាសនាចក្ររបស់ទ្រង់ដែរ ។
ការស្វែងរកការយល់ដឹង និងការបញ្ជាក់អំពីការហៅដ៏ទេវភាពរបស់ពួកព្យាការី តាមរយៈការអនុវត្តការបង្រៀនរបស់ពួកលោកដោយស្មោះត្រង់ គឺជាធាតុផ្សំនៃភាពជាសិស្ស ។ ការធ្វើតាមពួកព្យាការីអាចតម្រូវឲ្យមាន « សេចក្ដីអត់ធន់ និងសេចក្ដីជំនឿ » ដោយសារយើងប្រហែលជាមិនតែងតែយល់អំពីព្រះរាជបំណងដ៏ទេវភាពនៃវិវរណៈ និងការបង្រៀនដែលបង្ហាញដល់ព្យាការីម្នាក់ជានិច្ចនោះទេ ។ ទោះបីជាយើងអាចមានសំណួរក៏ដោយ ព្រះអម្ចាស់បង្គាប់ឲ្យយើងធ្វើតាមការដឹកនាំរបស់ពួកអ្នកបម្រើរបស់ទ្រង់ដោយសេចក្តីជំនឿលើចំណេះដឹងដ៏ឥតខ្ចោះរបស់ទ្រង់ និងព្រះចេស្តានៃដង្វាយធួនរបស់ទ្រង់ ។
នៅពេលយើងស្តាប់តាមប្រសាសន៍របស់ព្យាការី យើងយាងព្រះវិញ្ញាណបរិសុទ្ធមកគង់នៅក្នុងជីវិតរបស់យើង ។ យើងចូលរួមជាមួយសហគមន៍នៃភាពជាសិស្សនៅជុំវិញពិភពលោករបស់ព្រះយេស៊ូវគ្រីស្ទ ដែលបានតាំងចិត្តក្នុងស្ថាបនានគរនៃព្រះនៅលើផែនដី ។ នៅពេលយើងធ្វើតាមដំបូន្មានរបស់ព្យាការី នោះយើងទទួលបានពរជ័យនៃអំណាចដ៏ទេវភាព និងសេចក្តីសុខសាន្តដ៏នៅអស់កល្បជានិច្ច ដែលបានសន្យាចំពោះអ្នកដែលធ្វើ និងរក្សាសេចក្តីសញ្ញានៃដំណឹងល្អ ។
តើខ្ញុំអាចទទួលបានសាក្សីថា ព្រះអម្ចាស់ដឹកនាំសាសនាចក្ររបស់ទ្រង់តាមរយៈព្យាការីដោយរបៀបណា ?
ព្រះសព្វព្រះទ័យឲ្យបុត្រាបុត្រីរបស់ទ្រង់ស្តាប់ ហើយទុកចិត្តលើពួកព្យាការីរបស់ទ្រង់ ។ នៅពេលយើងស្វែងរកដោយស្មោះអស់ពីចិត្ត នោះយើងអាចទទួលបានទីបន្ទាល់ផ្ទាល់ខ្លួនមួយថា ទ្រង់ដឹកនាំសាសនាចក្ររបស់ទ្រង់នៅសព្វថ្ងៃនេះ ។
យើងអាចអនុវត្តដំបូន្មានរបស់ព្យាការីអាលម៉ា ។ « ធ្វើការពិសោធន៍ដល់ពាក្យសម្ដីរបស់ខ្ញុំ » លោកបានលើកទឹកចិត្តដល់សាសន៍សូរាំ « ហើយអនុវត្តសេចក្ដីជំនឿមួយតូច មែនហើយ គឺបើសិនជាអ្នករាល់គ្នាពុំអាចធ្វើអ្វីក៏ដោយ ក្រៅពីការចង់ជឿ នោះសូមឲ្យចំណង់នេះមាននៅក្នុងខ្លួនអ្នក គឺរហូតដល់អ្នកអាចទុកកន្លែងមួយ សម្រាប់ពាក្យសម្ដីរបស់ខ្ញុំមួយចុះ » ។
អាលម៉ាបន្តពន្យល់ ៖ « យើងនឹងប្រៀបធៀបព្រះបន្ទូលទៅនឹងគ្រាប់ពូជមួយគ្រាប់ ។ ឥឡូវនេះ បើសិនជាអ្នករាល់គ្នាទុកកន្លែងមួយ សម្រាប់ឲ្យគ្រាប់ពូជនោះអាចដុះនៅក្នុងចិត្តរបស់អ្នក មើលចុះ បើសិនជាគ្រាប់ពូជនោះជាគ្រាប់ពិត ឬជាគ្រាប់ល្អ » ហើយ « បើសិនជាអ្នករាល់គ្នាពុំបោះវាចោលដោយការឥតជំនឿរបស់អ្នក … គ្រាប់ពូជនោះនឹងចាប់ផ្ដើមរីកឡើងនៅក្នុងទ្រូងរបស់អ្នក » ហើយអ្នកនឹងនិយាយថា « គ្រាប់នោះរីកឡើង នោះអ្នករាល់គ្នានឹងនិយាយដោយខ្លួនឯងថា នេះច្បាស់ជាគ្រាប់ពូជល្អ ឬក៏ ព្រះបន្ទូលនោះល្អ ព្រោះវាចាប់ផ្ដើមពង្រីកព្រលឹងរបស់ខ្ញុំ មែនហើយ វាចាប់ផ្ដើមបំភ្លឺយោបល់របស់ខ្ញុំ មែនហើយ វាចាប់ផ្ដើមមានរសជាតិឆ្ងាញ់ចំពោះខ្ញុំ » ។
ដូចដែលអាលម៉ាបានបង្រៀន យើងអាចពិសោធន៍លើសម្តីរបស់ពួកព្យាការីបាន ។ ឧទាហរណ៍ ប្រសិនបើអាចធ្វើទៅបាន យើងអាចធ្វើតាមដំបូន្មានរបស់ព្យាការី ដើម្បីធ្វើការណាត់ជួបជាទៀងទាត់ដើម្បីថ្វាយបង្គំនៅក្នុងព្រះដំណាក់របស់ព្រះអម្ចាស់ ។ នៅពេលយើងធ្វើដូច្នោះ យើងអាចរង់ចាំមើលពរជ័យដែលព្យាការីបានសន្យា ។ ការស្គាល់ពីពរជ័យទាំងនេះពង្រឹងសេចក្ដីជំនឿរបស់យើងចំពោះប្រសាសន៍របស់ព្យាការីដែលដែលនៅរស់ ។
ការបណ្ដុះគ្រាប់ពូជដោយសេចក្ដីជំនឿរបស់យើងគឺជាដំណើរការពេញមួយជីវិត ប៉ុន្តែយើងអាចចាប់ផ្តើមនៅថ្ងៃនេះដើម្បីទទួលបានការធានាខាងវិញ្ញាណពីព្យាការីដែលនៅរស់ ហើយធ្វើតាមដំបូន្មានរបស់ពួកលោកដោយសេចក្ដីអត់ធន់ និងសេចក្ដីជំនឿ ។
តើថ្នាក់ដឹកនាំសាសនាចក្រល្អឥតខ្ចោះឬ ?
មានតែព្រះយេស៊ូវគ្រីស្ទដែលរស់នៅក្នុងព្រះជន្មដ៏ឥតខ្ចោះ ។ ថ្នាក់ដឹកនាំសាសនាចក្រខិតខំរស់នៅដោយសុចរិត ហើយនាំមនុស្សឲ្យមករកព្រះយេស៊ូវគ្រីស្ទ តាមរយៈប្រសាសន៍ និងទង្វើរបស់ពួកលោក ប៉ុន្តែពួកលោកត្រូវស្ថិតក្រោមនូវភាពទន់ខ្សោយរបស់មនុស្សលោក ។ ថ្នាក់ដឹកនាំសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយមិនឥតខ្ចោះនោះទេ ។
ប៉ុន្តែ យើងមិនគួរបាត់បង់ការយល់ដឹងពីតួនាទីសំខាន់របស់ពួកលោកឡើយ ។ ព្រះអម្ចាស់ហៅសមាជិកនៃគណៈប្រធានទីមួយ និងកូរ៉ុមនៃពួកសាវកដប់ពីរនាក់របស់សាសនាចក្រដើម្បីធ្វើជា « ពួកសាក្សីពិសេសអំពីព្រះនាមនៃព្រះគ្រីស្ទ » និងដើម្បីធ្វើជាពួកព្យាការី ជាអ្នកមើលឆុត និងជាអ្នកទទួលវិវរណៈនៅសម័យរបស់យើង ។ ដូចជាព្យាការីពីបុរាណដែរ ពួកលោកទាក់ទងជាមួយព្រះ ហើយបង្ហាញព្រះឆន្ទៈរបស់ទ្រង់ ។ ពួកលោកមានសិទ្ធិអំណាចដ៏ទេវភាពដើម្បីដឹកនាំសាសនាចក្រតាមរយៈវិវរណៈ ការចាត់ចែងពិធីបរិសុទ្ធនៃដំណឹងល្អ និងដឹកនាំកិច្ចការរបស់ព្រះអម្ចាស់នៅលើផែនដី ។ ការណ៍នេះមិនមានន័យថា ពួកលោកដឹងអ្វីៗទាំងអស់នោះទេ ។ ពួកលោកធ្វើការស្របតាមពន្លឺដែលព្រះអម្ចាស់បានប្រទានដល់ពួកលោក ស្វែងរកចំណេះដឹងបន្ថែមតាមរយៈវិវរណៈដែលមានជាបន្ត ហើយពឹងផ្អែកលើអំណាចពង្រឹងពួកលោកបានទទួលតាមរយៈព្រះយេស៊ូវគ្រីស្ទ និងដង្វាយធួនរបស់ទ្រង់ ។
ព្រះអម្ចាស់តែងតែធ្វើការតាមរយៈពួកព្យាការីដែលមានជីវិតរមែងស្លាប់ ទោះជាពួកលោកមានភាពទន់ខ្សោយក៏ដោយ ។ ដូចជាយ៉ូណាសដែលរត់គេចពីការហៅរបស់គាត់ទៅក្រុងនីនីវេ ពេត្រុសបានកាត់ត្រចៀករបស់ទាហាន ឬ យ៉ូសែប ស៊្មីធ បានឲ្យសន្លឹកការបកប្រែព្រះគម្ពីរមរមនទៅ ម៉ាទិន ហារិស ជួនកាលព្យាការីក៏អាចធ្វើខុសដែរ ។ ក្នុងករណីបែបនេះ ព្រះអម្ចាស់កែតម្រូវពួកអ្នកបម្រើរបស់ទ្រង់ ហើយបន្ទាប់ពីពួកលោកប្រែចិត្ត ទ្រង់ប្រទានពរពួកលោកឲ្យបំពេញកិច្ចការដែលទ្រង់បានហៅពួកលោកឲ្យធ្វើ ។
វាជាការសំខាន់ក្នុងការចងចាំពីរបៀបដែលគោលលទ្ធិនៃសាសនាចក្រត្រូវបានបង្កើតឡើង ។ គោលលទ្ធិត្រូវបានប្រកាស និងបកស្រាយដោយប្រធានសាសនាចក្រ ហើយគាំទ្រដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ ដែលធ្វើសកម្មភាពជាមតិតែមួយ តាមគំរូដែលបានផ្ដល់ឲ្យនៅក្នុង គោលលទ្ធិ និងសេចក្តីសញ្ញា ១០៧:២៧–៣១ ។ « តម្រូវការនៃការមូលមតិគ្នានេះ ផ្តល់នូវការត្រួតពិនិត្យលើភាពលំអៀង និងលក្ខណៈពិសេសផ្ទាល់ខ្លួន ។ វាធានាថា ព្រះគ្រប់គ្រងតាមរយៈព្រះវិញ្ញាណ មិនមែនមនុស្សតាមរយៈមតិភាគច្រើន ឬការសម្រុះសម្រួលឡើយ » ។ ការបង្រៀនដោយថ្នាក់ដឹកនាំសាសនាចក្រម្នាក់ៗអាចតំណាងឲ្យ « លក្ខណៈផ្ទាល់ខ្លួន ទោះបានពិចារណាយ៉ាងប្រុងប្រយ័ត្ន ជាគំនិត វាពុំមានន័យថា ជាផ្លូវការ ឬសម្រាប់សាសនាចក្រទាំងមូលទេ » ។
តាមរយៈព្រះវិញ្ញាណបរិសុទ្ធ យើងម្នាក់ៗអាចនឹងទទួលបានការធានាផ្ទាល់ខ្លួនថា ពួកព្យាការីត្រូវបានហៅដោយព្រះ ហើយថាទ្រង់ដឹកនាំកិច្ចការរបស់ទ្រង់តាមរយៈពួកលោក ។
តើការដែលថា ព្យាការីនឹងមិនដឹកនាំសាសនាចក្រឲ្យវង្វេងឡើយ មានអត្ថន័យដូចម្តេច ?
ប្រធាន វិលហ្វូឌ វូឌដ្រុព្វ បានមានប្រសាសន៍ថា « ព្រះអម្ចាស់នឹងមិនអនុញ្ញាតឲ្យខ្ញុំ ឬនរណាផ្សេងទៀតដែលឈរជាប្រធាននៃសាសនាចក្រនេះ ដឹកនាំអ្នកឲ្យវង្វេងចេញឡើយ » ។ ពួកព្យាការី និងសាវកបានបញ្ជាក់ជាថ្មីនូវការបង្រៀននេះនៅគ្រប់ជំនាន់ទាំងអស់ ។ គោលលទ្ធិត្រូវបានប្រកាស និងបកស្រាយដោយប្រធានសាសនាចក្រ ហើយគាំទ្រដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ ដែលធ្វើសកម្មភាពជាមតិតែមួយ តាមគំរូដែលបានផ្ដល់ឲ្យនៅក្នុង គោលលទ្ធិ និងសេចក្តីសញ្ញា ១០៧:២៧–៣១ ។
ពួកបរិសុទ្ធថ្ងៃចុងក្រោយជឿថា ភាពពេញលេញនៃដំណឹងល្អដែលបានស្ដារឡើងវិញ និងសិទ្ធិអំណាចនៃបព្វជិតភាពនឹងមិនត្រូវបានដកចេញពីផែនដីទៀតទេ ។ ការណ៍នេះមានន័យថា ព្រះនឹងដឹកនាំពួកព្យាការីជានិច្ច ដើម្បីធានាថា សាសនាចក្របំពេញបេសកកម្មរបស់ខ្លួនក្នុងការរៀបចំបុត្រាបុត្រីរបស់ទ្រង់សម្រាប់ពរជ័យនៃជីវិតដ៏នៅអស់កល្បជានិច្ច ។ ទ្រង់នឹងបន្តបើកសម្ដែងព្រះទ័យរបស់ទ្រង់ចំពោះពួកព្យាការីមួយបន្ទាត់ម្តងៗ បង្កើនការយល់ដឹងរបស់យើង និងការលុបបំបាត់កំហុស ដែលជាផ្នែកមួយនៃការស្ដារឡើងវិញនៃដំណឹងល្អដែលបានបើកសម្តែង ។
ហេតុអ្វីបានជាកិច្ចការមួយចំនួនក្នុងសាសនាចក្រផ្លាស់ប្ដូរទៅតាមពេលវេលា ?
នៅក្នុង គោលលទ្ធិ និងសេចក្តីសញ្ញា ១:៣០ ព្រះអម្ចាស់បានប្រកាសថាសាសនាចក្រនេះគឺជា « សាសនាចក្រតែមួយដែលពិត ហើយសកម្មនៅលើផ្ទៃផែនដីទាំងមូល » ។ ប៉ុន្តែអ្វីៗដែលមានជីវិតទាំងអស់មានការអភិវឌ្ឍ និងផ្លាស់ប្តូរ ។ ការអនុវត្តរបស់សាសនាចក្រនៅសព្វថ្ងៃនេះគឺខុសពីប៉ុន្មានឆ្នាំមុន ។ នេះជាលក្ខណៈសំខាន់មួយនៃសាសនាចក្រ ដែលត្រូវបានបង្កើតឡើងលើគោលការណ៍នៃវិវរណៈដែលមានជាបន្ត ។ ពួកបរិសុទ្ធថ្ងៃចុងក្រោយជឿថា ព្រះ « បើកសម្ដែងនូវការណ៍ដ៏ធំ និងសំខាន់ៗជាច្រើន » ។
វិវរណៈដែលមានជាបន្តអាចពង្រីក ឬសម្រិតសម្រាងការយល់ដឹងរបស់យើង នាំយើងឲ្យផ្លាស់ប្តូរទំនៀមទម្លាប់ខ្លះៗរបស់យើង ហើយជួយយើងឲ្យខិតកាន់តែជិតទីក្រុងស៊ីយ៉ូនដ៏ប្រសើរបំផុត ។ សាសនាចក្រទូទាំងពិភពលោកកែតម្រូវ ដើម្បីឲ្យគោលនយោបាយរបស់ខ្លួនអាចបំពេញតម្រូវការនៃពេលវេលា និងទីកន្លែងជាក់លាក់ ។ បន្ទាប់ពីអ្វីៗទាំងអស់ តម្រូវការរបស់ពួកបរិសុទ្ធនៅព្រំដែនអាមេរិកក្នុងសតវត្សទី ១៩ មានលក្ខណៈជាច្រើនខុសគ្នាយ៉ាងខ្លាំងពីសមាជិកសាសនាចក្ររាប់លាននាក់ដែលបានខ្ចាត់ខ្ចាយជុំវិញពិភពលោកនៅសព្វថ្ងៃនេះ ។
ការផ្លាស់ប្តូរភាគច្រើនដែលយើងដកពិសោធន៍នៅក្នុងសាសនាចក្រទាក់ទងនឹងការអនុវត្តគោលការណ៍នៃដំណឹងល្អជាក់ស្តែង ដូចជារបៀបដែលយើងធ្វើការថ្វាយបង្គំនៅថ្ងៃឈប់សម្រាក ឬការធ្វើការងារបម្រើដល់គ្នាទៅវិញទៅមកនៅក្នុងវួដ និងសាខារបស់យើង ។ ពេលខ្លះវិវរណៈបាននាំទៅរកការផ្លាស់ប្តូរដ៏សំខាន់បន្ថែមទៀតក្នុងការបង្រៀន និងការអនុវត្តក្នុងសាសនាចក្រ ។ ឧទាហរណ៍រួមមាននូវសេចក្តីប្រកាសជាផ្លូវការ ដែលមាននៅក្នុងគោលលទ្ធិ និងសេចក្តីសញ្ញា ដែលនាំទៅរកការបញ្ចប់នៃការអនុវត្តអាពាហ៍ពិពាហ៍ប្រពន្ធច្រើន និងការផ្ដល់បព្វជិតភាព និងពរជ័យនៃព្រះវិហារបរិសុទ្ធដល់មនុស្សគ្រប់រូបដោយមិនគិតពីពូជសាសន៍ឡើយ ។
តើការបង្រៀនរបស់ពួកព្យាការីដែលនៅរស់មានសារៈសំខាន់ជាងបទគម្ពីរ ឬរបស់ថ្នាក់ដឹកនាំសាសនាចក្រពីមុនៗដែរឬទេ ?
ពួកព្យាការីដែលនៅរស់ ព្រះគម្ពីរ និងថ្នាក់ដឹកនាំសាសនាចក្រពីមុនៗ គឺសុទ្ធតែសំខាន់ទាំងអស់ ។ គោលបំណងចម្បងនៃប្រភពនៃសេចក្តីពិតទាំងបីនេះគឺដើម្បីធ្វើជាសាក្សីអំពីបេសកកម្មនៃសេចក្តីសង្គ្រោះរបស់ព្រះយេស៊ូវគ្រីស្ទ ។ យើងគួរតែស្វែងយល់ពីតួនាទីសំខាន់ដែលប្រភពនីមួយៗដើរតួ និងរបៀបដែលវាទាក់ទងគ្នាទៅវិញទៅមក ។
ព្រះគម្ពីរទាំងឡាយគឺជាប្រភពនៃសេចក្តីពិតដ៏សំខាន់ ដែលបានបើកសម្តែងក្នុងរយៈពេលរាប់ពាន់ឆ្នាំ និងនៅក្នុងបរិបទវប្បធម៌ជាច្រើន ។ វារក្សានូវសេចក្ដីពិតសំខាន់ៗនៃដំណឹងល្អជានិច្ចនៅចំពោះមុខយើង ។ វាថ្លែងទីបន្ទាល់អំពីព្រះគ្រីស្ទ ហើយផ្តល់ឱកាសឲ្យព្រះវិញ្ញាណមានព្រះបន្ទូលមកយើង ។ ការបង្រៀនរបស់ព្យាការីពីមុនៗនៃការស្ដារឡើងវិញផ្ដល់នូវធនធានខាងវិញ្ញាណស្រដៀងគ្នានេះដែរ ។ យើងគួរស្វែងរកដើម្បីស្វែងយល់ពីព្រះគម្ពីរទាំងឡាយ និងការបង្រៀនរបស់ពួកព្យាការីពីមុនៗក្នុងបរិបទដែលការណ៍នេះបានផ្ដល់ឲ្យ និងឱបក្រសោបយកសេចក្ដីពិតដែលបានបើកសម្ដែងដែលវាចែកចាយដោយអំណរគុណ ។
ពួកព្យាការីដែលនៅរស់កាន់កូនសោបព្វជិតភាពដែលចាំបាច់ដើម្បីដឹកនាំសាសនាចក្រ និងចាត់ចែងពិធីបរិសុទ្ធនៃដំណឹងល្អនៅសព្វថ្ងៃនេះ ។ ពួកលោកបន្ថែមទីបន្ទាល់របស់ពួកលោកអំពីព្រះគ្រីស្ទចំពោះអ្វីដែលបានថ្លែងដោយព្យាការីពីមុនៗ ។ ពួកលោកជួយយើងមើលឃើញពីរបៀបដែលសេចក្ដីពិតនៃដំណឹងល្អអនុវត្តចំពោះស្ថានភាពបច្ចុប្បន្នរបស់យើង ។ ពួកលោកទទួលបានវិវរណៈថ្មីៗសម្រាប់សាសនាចក្រ ដោយកែសម្រួលការដឹកនាំពីមុនៗទៅនឹងកាលៈទេសៈបច្ចុប្បន្នតាមការណែនាំដោយព្រះអម្ចាស់ ។ ជួនកាលការបង្រៀនរបស់ពួកលោកបានជំនួសការបង្រៀនរបស់ពួកព្យាការីពីមុនៗ ។ ជាញឹកញាប់ ប្រសាសន៍របស់ពួកលោកពង្រឹងការបង្រៀននៃព្រះគម្ពីរ និងប្រសាសន៍របស់ព្យាការីពីមុនៗ ។
ស្វែងយល់បន្ថែមទៀត
-
រ័សុល អិម ណិលសុន « Revelation for the Church, Revelation for Our Lives » Liahona ខែឧសភា ឆ្នាំ២០១៨ ទំព័រ ៩៣–៩៦
-
នែល អិល អាន់ឌើរសិន « The Prophet of God » Liahona ខែឧសភា ឆ្នាំ២០១៨ ទំព័រ ២៤–២៧