« អព្ភូតហេតុទាំងឡាយ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
អព្ភូតហេតុទាំងឡាយ
ការបង្ហាញពីអំណាច និងសេចក្ដីស្រឡាញ់របស់ព្រះ
តើមានមូលហេតុអ្វីខ្លះដែលបងប្អូនជឿថា ព្រះមាន ពិត ហើយថាទ្រង់ស្គាល់បងប្អូន ? តើបងប្អូនអាចគិតពីគ្រាដែលបងប្អូនបានដឹងថាទ្រង់កំពុងបង្ហាញសេចក្ដីស្រឡាញ់របស់ទ្រង់ចំពោះបងប្អូនបានទេ ? ប្រធាន រ័សុល អិម ណិលសុន បានបង្រៀនថា « អធិស្ឋានដោយកែវភ្នែកចង់មើលឃើញព្រះហស្តរបស់ព្រះនៅក្នុងជីវិតរបស់បងប្អូន ហើយនឹងពិភពលោកជុំវិញបងប្អូន » ។ អព្ភូតហេតុតំណាងឲ្យគ្រាដែលព្រះធ្វើការដោយអំណាចរបស់ទ្រង់ជំនួសឲ្យបុត្រាបុត្រីរបស់ទ្រង់ ។
នៅក្នុងព្រះគម្ពីរយើងបានរៀនអំពីអព្ភូតហេតុដ៏អស្ចារ្យដែលព្រះយេហូវ៉ាបានធ្វើឡើងសម្រាប់ប្រជាជនរបស់ទ្រង់នៅក្នុងព្រះគម្ពីរសញ្ញាចាស់ ។ យើងក៏បានរៀនអំពីអព្ភូតហេតុដែលធ្វើឡើងដោយព្រះយេស៊ូវគ្រីស្ទក្នុងអំឡុងពេលជីវិតរមែងស្លាប់របស់ទ្រង់ នៅក្នុងព្រះគម្ពីរសញ្ញាថ្មី និងជាព្រះអម្ចាស់ដែលមានព្រះជន្មរស់ឡើងវិញនៅក្នុងព្រះគម្ពីរមរមនផងដែរ ។ ប៉ុន្តែអព្ភូតហេតុដ៏អស្ចារ្យបំផុតគឺដង្វាយធួនរបស់ទ្រង់នៅពេលដែលទ្រង់បានប្រោសមនុស្សឲ្យរួចផុតពីអំពើបាប ហើយបានរស់ឡើងវិញពីសេចក្តីស្លាប់ ។ សព្វថ្ងៃនេះយើងអាចឃើញស្នាព្រះហស្ដ និងអព្ភូតហេតុរបស់ទ្រង់ ទាំងធំទាំងតូច នៅក្នុងជីវិតរបស់យើងផ្ទាល់ ហើយដឹងថា « ព្រះយេហូវ៉ាទ្រង់ល្អដល់មនុស្សទាំងអស់ ៖ ហើយព្រះហឫទ័យទន់សន្តោសរបស់ទ្រង់ ក៏គ្របលើកិច្ចការរបស់ទ្រង់ទាំងប៉ុន្មាន » ( ទំនុកតម្កើង ១៤៥:៩ ) ។
តើអ្វីជាអព្ភូតហេតុ ?
អព្ភូតហេតុគឺជាការបើកសម្តែងនូវអំណាចដ៏ទេវភាព ។ អព្ភូតហេតុគឺជាផ្នែកដ៏សំខាន់មួយនៃកិច្ចការរបស់ព្រះយេស៊ូវគ្រីស្ទ ទាំងក្នុងសម័យបុរាណ និងសព្វថ្ងៃនេះ ។
ទិដ្ឋភាពទូទៅនៃប្រធានបទ ៖ អព្ភូតហេតុ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ការងារបម្រើក្នុងជីវិតរមែងស្លាប់របស់ព្រះយេស៊ូវគ្រីស្ទ, ការអធិស្ឋាន, សេចក្តីជំនឿលើព្រះយេស៊ូវគ្រីស្ទ, ពរជ័យបព្វជិតភាព
ផ្នែកទី ១
ព្រះយេស៊ូវគ្រីស្ទគឺជាព្រះនៃអព្ភូតហេតុ
អព្ភូតហេតុតែងតែជាផ្នែកមួយនៃកិច្ចការរបស់ព្រះក្នុងចំណោមបុត្រាបុត្រីរបស់ទ្រង់ ។ ព្រះគម្ពីរសញ្ញាចាស់ និងសញ្ញាថ្មីរួមបញ្ចូលដំណើររឿងជាច្រើនអំពីព្រះយេស៊ូវគ្រីស្ទបង្ហាញពីអំណាចដ៏ទេវភាពជំនួសឲ្យបុត្រាបុត្រីរបស់ព្រះវរបិតាសួគ៌ ។ អ្នកដើរតាមព្រះយេស៊ូវគ្រីស្ទសព្វថ្ងៃនេះដឹងថាព្រះហស្ដរបស់ព្រះនៅតែបន្តធ្វើកិច្ចការតាមរបៀបដ៏អស្ចារ្យនៅក្នុងសាសនាចក្ររបស់ទ្រង់ និងក្នុងជីវិតរបស់បុគ្គលម្នាក់ៗ និងក្រុមគ្រួសារផងដែរ ។ ព្រះបានប្រកាសថា « ដ្បិតមើលចុះ យើងជាព្រះ ហើយយើងជាព្រះនៃអព្ភូតហេតុទាំងឡាយ ហើយយើងនឹងបង្ហាញដល់មនុស្សលោកថា យើងនៅតែដដែល ទោះពីថ្ងៃម្សិល ថ្ងៃនេះ និងរហូតតទៅ ហើយយើងមិនធ្វើកិច្ចការណានៅក្នុងចំណោមកូនចៅមនុស្សឡើយ លើកលែងតែស្របតាមសេចក្ដីជំនឿរបស់ពួកគេតែប៉ុណ្ណោះ » ( នីហ្វៃទី២ ២៧:២៣ ) ។
រឿងទាំងឡាយដែលត្រូវពិចារណា
-
នៅពេលសិស្សពីរនាក់របស់ យ៉ូហាន បាទីស្ទ បានសួរព្រះយេស៊ូវថា « តើទ្រង់ជាព្រះអង្គដែលត្រូវយាងមកនោះ ឬត្រូវឲ្យយើងខ្ញុំចាំ១អង្គទៅទៀត ? » ព្រះយេស៊ូវបានលើកឧទាហរណ៍ដើម្បីបង្ហាញថាទ្រង់ជានរណា ( សូមមើល ម៉ាថាយ ១១:៣-៦ ) ។ ហេតុអ្វីបានជាឧទាហរណ៍ទាំងនេះបង្ហាញថាទ្រង់ជានរណា ? សូមពិចារណាផងដែរអំពីអ្វីដែលព្រះយេស៊ូមានបន្ទូលនៅក្នុង យ៉ូហាន ៥:៣៦ ។ តើអ្វីជាគោលបំណងនៃ « កិច្ចការ » ដែលព្រះយេស៊ូវបានធ្វើ ?
-
អែលឌើរ រ៉ូណល អេ រ៉ាសបាន បានបង្រៀនថា « ព្រះអម្ចាស់ធ្វើនូវអព្ភូតហេតុដើម្បីរំឭកយើងពីព្រះចេស្តារបស់ទ្រង់ សេចក្តីស្រឡាញ់របស់ទ្រង់ចំពោះយើង ឥទ្ធិពលទ្រង់ពីស្ថានសួគ៌មកកាន់បទពិសោធន៍ជីវិតរមែងស្លាប់របស់យើង និងព្រះទ័យរបស់ទ្រង់ដើម្បីបង្រៀនអំពីអ្វីដែលមានតម្លៃបំផុត » ។ តើអព្ភូតហេតុណាខ្លះដែលអ្នកចូលចិត្តជាងគេដែលបានកត់ត្រាទុកនៅក្នុងព្រះគម្ពីរ ? តើបទពិសោធន៍ទាំងនេះបានបង្រៀនអ្នកអ្វីខ្លះអំពីទ្រង់ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអញ្ជើញសមាជិកក្រុមនីមួយៗឲ្យជ្រើសរើសដំណើររឿងមួយក្នុងចំណោមដំណើររឿងដូចខាងក្រោមអំពីអព្ភូតហេតុរបស់ព្រះអង្គសង្គ្រោះចេញពីព្រះគម្ពីរសញ្ញាថ្មី ។ កំណត់អត្តសញ្ញាណ « អ្នកណា អ្វី នៅកន្លែងណា នៅពេលណា និង ហេតុអ្វី »នៃអព្ភូតហេតុ ដែលបានរៀបរាប់នៅក្នុងវគ្គបទគម្ពីរដែលបានជ្រើសរើសនេះ ។ ពិភាក្សាអំពីភាពស្រដៀងគ្នា និងភាពខុសគ្នារវាងព្រឹត្តិការណ៍ទាំងនេះ ។ តើដំណើររឿងទាំងនេះអាចត្រូវបានប្រើដើម្បីពង្រឹងសេចក្តីជំនឿរបស់មនុស្សដែលអ្នកស្គាល់ដោយរបៀបណា ?
-
ការព្យាបាលបុរសខ្វាក់ភ្នែកពីរនាក់ ( សូមមើល ម៉ាថាយ ៩:២៧–៣១ )
-
ការប្រោសកូនប្រុសរបស់ស្ត្រីមេម៉ាយម្នាក់ឲ្យរស់ឡើងវិញ ( សូមមើល លូកា ៧:១១-១៦ )
-
ការព្យាបាលបុរសខ្វាក់ពីកំណើតម្នាក់ ( សូមមើល យ៉ូហាន ៩ )
-
ការប្រោសឡាសារឲ្យរស់ឡើងវិញ ( សូមមើល យ៉ូហាន ១១:១–៤៥ )
-
ស្វែងយល់បន្ថែមទៀត
-
ពង្សាវតារក្សត្រ ទី១ ១៧:៨-២៤; ម៉ាថាយ ៤:២៣; យ៉ូហាន ២:២៣; ម៉ូសាយ ៣:៥-១១; នីហ្វៃទី៣ ១៧:៦–៩
-
ដាល្លិន អេក អូក « Miracles » Ensign ខែ មិថុនា ឆ្នាំ ២០០១ ទំព័រ ៦–១៧
ផ្នែកទី ២
អព្ភូតហេតុទាំងឡាយកើតមានឡើងតាមរយៈសេចក្តីជំនឿទៅលើព្រះយេស៊ូវគ្រីស្ទ
នៅក្នុងព្រះគម្ពីរសញ្ញាថ្មី ព្រះយេស៊ូវបានសន្យាដល់ពួកសិស្សរបស់ទ្រង់ថា « ទីសំគាល់ទាំងនេះនឹងជាប់តាមអស់អ្នកដែលជឿ » ( ម៉ាកុស ១៦:១៧-១៨ ) ។ នៅថ្ងៃចុងក្រោយនេះ ទ្រង់មានបន្ទូលថា « ហេតុដូច្នេះហើយ ដូចជាយើងបានប្រាប់ដល់ពួកសាវករបស់យើងយ៉ាងណា នោះយើងក៏ប្រាប់ដល់អ្នកម្ដងទៀតជាយ៉ាងនោះដែរ ថាមនុស្សគ្រប់រូបណាដែលជឿដល់ព្រះបន្ទូលទាំងឡាយរបស់យើង ហើយទទួលបុណ្យជ្រមុជដោយទឹកសម្រាប់ការផ្ដាច់បាបទាំងឡាយ នោះឈ្មោះថានឹងបានទទួលព្រះវិញ្ញាណបរិសុទ្ធ ។ ហើយ … ទីសំគាល់ទាំងនេះនឹងជាប់តាមពួកអ្នកដែលជឿ » ( គោលលទ្ធិ និងសេចក្តីសញ្ញា ៨៤:៦៤-៦៥ ) ។ សម្រាប់អស់អ្នកដែលជឿលើព្រះ និងព្រះយេស៊ូវគ្រីស្ទ អព្ភូតហេតុគឺជាលទ្ធភាពដែលនឹងកើតឡើងពិតប្រាកដណាស់ ប៉ុន្តែពួកគេត្រូវតែមានសេចក្តីជំនឿជាមុនសិន ( សូមមើល អេធើរ ១២:១២-១៨ ) ។
ប៉ុន្តែយើងមិនគួរស្វែងរកអព្ភូតហេតុទាំងឡាយដើម្បីធ្វើជាវិធីមួយក្នុងការស្ថាបនា ឬបង្ហាញពីសេចក្តីជំនឿរបស់យើងនោះទេ ។ ព្រះអម្ចាស់ទ្រង់បានប្រាប់ យ៉ូសែប ស្ម៊ីធ ថា ៖ « សេចក្ដីជំនឿពុំមែនមានឡើងដោយសារទីសំគាល់ទាំងឡាយឡើយ ប៉ុន្តែទីសំគាល់ទាំងឡាយមកតាមក្រោយអស់អ្នកដែលជឿវិញ ។ មែនហើយ ទីសំគាល់ទាំងឡាយមានឡើងដោយសារសេចក្ដីជំនឿ ពុំមែនដោយសារបំណងរបស់មនុស្ស ឬតាមដែលពួកគេចង់បាននោះទេ ប៉ុន្តែតាមព្រះហឫទ័យនៃព្រះវិញ » ( គោលលទ្ធិ និងសេចក្តីសញ្ញា ៦៣:៩-១០ ) ។ ព្យាការីមរ៉ូណៃបានសរសេរថា « អ្នករាល់គ្នាពុំទទួលសាក្សីឡើយ លុះដល់ពេលក្រោយពីការសាកល្បងនៃសេចក្ដីជំនឿរបស់អ្នកសិន » ( អេធើរ ១២:៦ ) ។ ទីបន្ទាល់មួយដែលចាប់ផ្តើមដោយការមើលឃើញអព្ភូតហេតុមួយនឹងមិននៅយូរឡើយ ប្រសិនបើវាមិនត្រូវបានចិញ្ចឹមបីបាច់ដោយសេចក្ដីជំនឿ និងការគោរពប្រតិបត្តិជាបន្តបន្ទាប់ទេនោះ ។
អព្ភូតហេតុមួយចំនួនកើតឡើងដោយស្ងៀមស្ងាត់ ដូចជានៅពេលដែលមនុស្សម្នាក់ទទួលបានទីបន្ទាល់អំពីសេចក្ដីពិតរបស់ព្រះ មានបទពិសោធន៍នូវការផ្លាស់ប្ដូរចិត្តដ៏ខ្លាំងក្លា ទទួលបានការអភ័យទោសពីព្រះអម្ចាស់ ឬក៏មានពរដោយសេចក្ដីសុខ និងកម្លាំងក្នុងអំឡុងពេលដ៏លំបាកមួយ ( សូមមើល អាលម៉ា ៣៧:៦-៧ ) ។
រឿងទាំងឡាយដែលត្រូវពិចារណា
-
សូមពិចារណាអំពីអ្វីដែលទេវតាបានប្រាប់នាងម៉ារាថា ៖ « ដ្បិតការអ្វីដែលព្រះទ្រង់ធ្វើពុំបាន នោះគ្មានសោះឡើយ » ( លូកា ១:៣៧ ) ។ តើអ្នកធ្លាប់ប្រឈមមុខនឹងអ្វីមួយដែលហាក់ដូចជាមិនអាចសម្រេច ឬដោះស្រាយបានដែរឬទេ ? តើការសិក្សាអំពីដំណើររឿងព្រះគម្ពីរអំពីអព្ភូតហេតុដែលធ្វើឡើងដោយអំណាចរបស់ព្រះ រៀបចំអ្នកឲ្យបែរទៅរកទ្រង់ ហើយទុកចិត្តលើសេចក្ដីស្រឡាញ់ សេចក្តីមេត្តាករុណា និងព្រះឆន្ទះរបស់ទ្រង់ដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ប្រធាន ហាវើដ ដបុលយូ ហឹនធើរ បានមានប្រសាសន៍អំពីអព្ភូតហេតុដ៏គួរឲ្យភ្ញាក់ផ្អើលជាច្រើនដែលបើកសម្តែងដោយព្រះយេស៊ូវគ្រីស្ទ ។ បន្ទាប់មកលោកបានចែកចាយថា ៖
« វាគួរឲ្យអស្ចារ្យបំផុតក្នុងការធ្វើជាសាក្សីចំពោះបុគ្គលម្នាក់ដែលថ្លង់ ដែលត្រូវបានធ្វើឲ្យស្តាប់ឮម្ដងទៀត ។ ប៉ុន្តែប្រាកដណាស់ថាពរជ័យដ៏អស្ចារ្យនោះមិនគួរឲ្យភ្ញាក់ផ្អើលជាងការផ្សំគ្នាដ៏អស្ចារ្យនៃឆ្អឹង និងស្បែក និងសរសៃទាំងឡាយដែលអនុញ្ញាតឲ្យត្រចៀករបស់យើងទទួលបានពិភពដ៏ស្រស់ស្អាតនៃសំឡេងនោះទេ ។ តើយើងមិនគួរស្ញប់ស្ញែងនឹងពរជ័យនៃការស្ដាប់ឮ ហើយសរសើរតម្កើងដល់ព្រះចំពោះអព្ភូតហេតុនោះទេឬ សូម្បីតែនៅពេលដែលការស្ដាប់ត្រូវបានធ្វើឲ្យឮវិញ បន្ទាប់ពីវាបានបាត់បង់ទៅនោះ ?
« តើវាមិនដូចគ្នាទេឬសម្រាប់ការវិលត្រឡប់មកវិញនៃការមើលឃើញ ឬការនិយាយស្តីរបស់យើង ឬសូម្បីតែអព្ភូតហេតុដ៏ធំបំផុត—គឺការស្តារឡើងវិញនៃជីវិត ? ការបង្កបង្កើតដំបូងរបស់ព្រះវរបិតាគឺជាពិភពមួយដែលពោរពេញដោយភាពអស្ចារ្យពិតប្រាកដ ។ ការដែលយើងមានជីវិត និងអវយវៈ និងការមើលឃើញ និងការនិយាយស្តីមុនគេនេះ តើការណ៍នេះមិនមែនអព្ភូតហេតុ ដ៏ធំបំផុត ដែលយើងមានទេឬអី ? »
តើទស្សនៈអំពីអព្ភូតហេតុជាច្រើននៅក្នុងជីវិតរបស់យើងនេះ អាចបង្កើនការដឹងគុណរបស់យើងចំពោះអព្ភូតហេតុរបស់ព្រះដោយរបៀបណា ?
ស្វែងយល់បន្ថែមទៀត
-
ហាវើដ ដបុលយូ ហឹនធើរ « The God That Doest Wonders » Ensign ខែ ឧសភា ឆ្នាំ ១៩៨៩ ទំព័រ ១៥–១៧
-
ម៉ៃឃើល អេ ដុន « How to Invite Miracles into Your Life » YA Weekly ខែ មិថុនា ឆ្នាំ ២០២១ នៅលើបណ្ណាល័យដំណឹងល្អ
ផ្នែកទី ៣
ស្វែងរក និងរំពឹងទុកអព្ភូតហេតុទាំងឡាយនៅក្នុងជីវិតរបស់អ្នក
នឹងមានអព្ភូតហេតុជានិច្ច ដរាបណាមានមនុស្សដែលមានសេចក្តីជំនឿ ( សូមមើល មរ៉ូណៃ ៧:២៧-២៩ ) ។ ប្រធាន រ័សុល អិម ណិលសុន បានបង្រៀនថា យើងគួរតែ « ស្វែងរក និងរំពឹងថាមានអព្ភូតហេតុ » ។ ព្រះអម្ចាស់នឹងប្រទានពរដល់ បងប្អូន នូវអព្ភូតហេតុ បើ បងប្អូនជឿលើទ្រង់ ‹ ដោយឥតសង្ស័យអ្វី › [ មរមន ៩:២១ ] ។ សូមធ្វើកិច្ចការខាងវិញ្ញាណដើម្បីស្វែងរកអព្ភូតហេតុ ។ សូមអធិស្ឋានទូលសូមព្រះឲ្យជួយបងប្អូនអនុវត្តសេចក្ដីជំនឿបែបនោះ » ។
អព្ភូតហេតុទាំងឡាយមាននៅជុំវិញយើងជារៀងរាល់ថ្ងៃ ។ អែលឌើរ រ៉ូណល អេ រ៉ាសបាន បានពន្យល់ថា ៖ « បងប្អូនជាច្រើននាក់បានធ្វើជាសាក្សីនៃអព្ភូតហេតុ ច្រើនជាងអ្វីដែលបងប្អូនដឹងទៅទៀត ។ អព្ភូតហេតុទាំងនោះអាចមើលទៅតូចតាច បើសិនជាប្រៀបធៀបទៅរឿងដែលព្រះយេស៊ូវបានធ្វើឲ្យមនុស្សស្លាប់រស់ឡើងវិញ ។ ប៉ុន្តែភាពអស្ចារ្យមិនមែនជាធាតុផ្សំនៃអព្ភូតហេតុនោះទេ លើកលែងតែវាមកពីព្រះប៉ុណ្ណោះ » ។
រឿងទាំងឡាយដែលត្រូវពិចារណា
-
សូមពិចារណាអំពីដំបូន្មានរបស់ប្រធាន ណិលសុន ។ តើការ « ស្វែងរក » អព្ភូតហេតុក្នុងជីវិតរបស់អ្នកមានន័យដូចម្តេច ? តើ « កិច្ចការខាងវិញ្ញាណ »ដែលអ្នកត្រូវធ្វើដើម្បី « ស្វែងរកអព្ភូតហេតុ » មានអ្វីខ្លះ ? តើអ្នកអាចទទួលពរតាមរយការស្វែងរករបៀបដែលព្រះកំពុងធ្វើការក្នុងជីវិតរបស់អ្នកដោយរបៀបណា ?
-
សូមអាន មរមន ៩:៧–២១ ។ ប្រសិនបើទ្រង់ពុំផ្លាស់ប្ដូរឡើយ និងបានប្រទាននូវចក្ខុវិស័យ ពរជ័យ និងវិវរណៈលើបុត្រាបុត្រីរបស់ទ្រង់ពីបុរាណ តើនេះមានន័យយ៉ាងណាចំពោះអ្នក ? តើអ្នកស្គាល់អ្នកណាដែលអាចទទួលបានប្រយោជន៍ពីការយល់ដឹងកាន់តែប្រសើរឡើងថា « ទ្រង់ពុំឈប់ធ្វើជាព្រះទេ ហើយទ្រង់ជាព្រះនៃអព្ភូតហេតុ »ឬទេ ? ( មរមន ៩:១៨ )
សកម្មភាពសម្រាប់ការរៀនសូត្រជាមួយអ្នកដទៃ
-
តាមដែលសមរម្យ សូមអញ្ជើញសមាជិកក្រុមឲ្យចែកចាយពីពេលវេលាមួយដែលពួកគេបានឃើញព្រះហស្ដរបស់ព្រះប្រទានពរជ័យ ឬអព្ភូតហេតុនៅក្នុងជីវិតរបស់ពួកគេផ្ទាល់ ។ សូមពិភាក្សាអំពីវិធីផ្សេងៗដែលអព្ភូតហេតុទាំងនេះបានកើតឡើង និងគោលបំណងផ្សេងៗដែលវាបានបម្រើ ។
ស្វែងយល់បន្ថែមទៀត
-
នីហ្វៃទី២ ២៨:៣–៦; នីហ្វៃទី៣ ២៩:៦–៧; មរ៉ូណៃ ៧:២៧–៣៧; គោលលទ្ធិ និងសេចក្តីសញ្ញា ៣៥:៨
-
ដូណល អិល ហលស្ត្រម « Has the Day of Miracles Ceased? » Liahona ខែ វិច្ឆិកា ឆ្នាំ ២០១៧ ទំព័រ ៨៨-៩០
-
ស៊ីដនី អេស រេណលស៍ « A God of Miracles » Ensign ខែ ឧសភា ឆ្នាំ ២០០១ ទំព័រ ១២-១៣