« ការអធិស្ឋាន » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ការអធិស្ឋាន
ស្មោះត្រង់ ការប្រាស្រ័យទាក់ទងដ៏ស្មោះស្ម័គ្រជាមួយនឹងព្រះវរបិតាសួគ៌
អ្នកប្រហែលជាអាចគិតពីគ្រានានានៅក្នុងជីវិតរបស់អ្នកនៅពេលអ្នកត្រូវការជំនួយ ឬការណែនាំដ៏ទេវភាព ។ ប្រហែលជាអ្នកបានបាត់បង់អ្វីមួយ មានសំណួរសំខាន់មួយ ឬមានបទពិសោធន៍ពីតម្រូវការបន្ទាន់ដើម្បីជួយសង្គ្រោះ ។ ហើយពេលខ្លះអ្នកប្រហែលជាបានស្វែងរកកម្លាំង ឬភាពក្លាហានដើម្បីបន្តឆ្ពោះទៅមុខ ។ ការអធិស្ឋានគឺជាទង្វើនៃការងាកទៅរកព្រះដោយស្មោះអស់ពីចិត្ត ហើយចែកចាយជាមួយនឹងទ្រង់នូវអារម្មណ៍ គំនិត និងសេចក្តីត្រូវការរបស់អ្នក ។ អព្ភូតហេតុនៃការអធិស្ឋានគឺថានៅពេលដែលអ្នកអំពាវនាវទៅដល់ព្រះវរបិតាសួគ៌ នោះទ្រង់ឮអ្នក ( សូមមើល យេរេមា ២៩:១២-១៣ ) ។ មិនថាអ្នកជានរណាទេ ទោះជាអ្នកមានកំហុស ឬមិនល្អឥតខ្ចោះក៏ដោយ ក៏ព្រះវរបិតាសួគ៌សព្វព្រះទ័យចង់ឲ្យអ្នកប្រាស្រ័យទាក់ទងជាមួយនឹងទ្រង់តាមរយៈការអធិស្ឋាន ។ សេចក្ដីស្រឡាញ់ដ៏ល្អឥតខ្ចោះរបស់ព្រះធានាថាអ្នកអាចប្រាប់ទ្រង់នូវអ្វីៗគ្រប់យ៉ាង ហើយទ្រង់នឹងចាំស្ដាប់ ។
តើការអធិស្ឋានជាអ្វី ?
ការអធិស្ឋានគឺជារបៀបដែលយើងប្រាស្រ័យទាក់ទងជាមួយនឹងព្រះវរបិតាសួគ៌ដោយស្មោះ ។ វាជាពរជ័យដ៏អស្ចារ្យមួយដែលព្រះប្រទានដល់បុត្រាបុត្រីរបស់ទ្រង់ ដើម្បីស្វែងរកការណែនាំពីស្ថានសួគ៌របស់ទ្រង់ជារៀងរាល់ថ្ងៃ ។ ព្រះយេស៊ូវគ្រីស្ទបានបង្រៀនថា « អ្នករាល់គ្នាត្រូវអធិស្ឋានដល់ព្រះវរបិតាដោយនូវនាមយើងជានិច្ច » ( នីហ្វៃទី៣ ១៨:១៩ ) ។
ទិដ្ឋភាពទូទៅនៃប្រធានបទ ៖ ការអធិស្ឋាន
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ព្រះជាព្រះវរបិតា, ការថ្វាយបង្គំព្រះជាព្រះវរបិតា, វិវរណៈផ្ទាល់ខ្លួន, ការតមអាហារ, ការរស់នៅតាមដំណឹងល្អរបស់ព្រះយេស៊ូវគ្រីស្ទ
ផ្នែកទី ១
ព្រះអញ្ជើញបុត្រាបុត្រីរបស់ទ្រង់ឲ្យអធិស្ឋានជានិច្ច
ព្រះយេស៊ូវគ្រីស្ទបានបង្រៀនពួកអ្នកដើរតាមទ្រង់ឲ្យអធិស្ឋានដល់ព្រះជាព្រះវរបិតា ( សូមមើល ម៉ាថាយ ៦:៥-១៣; នីហ្វៃទី៣ ១៧:១១-២០ ) ។ ព្រះវរបិតាសួគ៌បញ្ជាយើងឲ្យ « អធិស្ឋានជានិច្ច » ( គោលលទ្ធិ និងសេចក្តីសញ្ញា ១៩:៣៨ ) ពីព្រោះទ្រង់ស្រឡាញ់យើង និងមានបំណងប្រាថ្នាចង់ប្រទានពរដល់យើង ។ ទ្រង់ចង់ឲ្យយើងបង្កើតគំរូមួយនៃការបែរទៅរកទ្រង់ជារៀងរាល់ថ្ងៃក្នុងការអធិស្ឋាន ។ ទ្រង់ក៏ចង់ឲ្យយើងបន្តអធិស្ឋានក្នុងចិត្តពេញមួយថ្ងៃផងដែរ ( សូមមើល ម៉ូសាយ ២៤:១១-១២; នីហ្វៃទី៣ ២០:១ ) ។ នៅពេលយើងអធិស្ឋានទៅកាន់ព្រះវរបិតាសួគ៌ក្នុងព្រះនាមនៃព្រះយេស៊ូវគ្រីស្ទ ( សូមមើល នីហ្វៃទី៣ ១៨:១៩; ១៩:៦ ) នោះយើងបង្ហាញសេចក្ដីជំនឿរបស់យើងលើព្រះអង្គសង្រ្គោះរបស់យើង និងឆន្ទៈរបស់យើងដើម្បីធ្វើតាមទ្រង់ ។ ហេតុដូច្នេះហើយ យើងនិយាយដោយគាវរភាពនូវព្រះនាមរបស់ព្រះអម្ចាស់នៅពេលយើងបិទការអធិស្ឋានដោយនិយាយថា « នៅក្នុងព្រះនាមព្រះយេស៊ូវគ្រីស្ទ អាម៉ែន » ។
ពីព្រោះការអធិស្ឋានគឺជារបៀបដែលយើងខិតទៅជិតព្រះជាព្រះវរបិតា យើងព្យាយាមប្រើពាក្យដែលបង្ហាញពីភាពស្មោះ និងការគោរព ។ ប្រធាន ដាល្លិន អេក អូក បានពន្យល់ ៖ « ព្យាការី យ៉ូសែប ស្ម៊ីធ បានមានប្រសាសន៍ថា ‹ វាជាការណ៍ដ៏អស្ចារ្យដើម្បីទូលសួរក្នុងព្រះហស្ដនៃព្រះ ឬចូលមកនៅក្នុងទីវត្តមានរបស់ទ្រង់ › ។ … ភាសាពិសេសនៃការអធិស្ឋានរំឭកយើងអំពីភាពអស្ចារ្យនៃអភ័យឯកសិទ្ធិនោះ » ។ ដោយភាពពិសិដ្ឋនៃការអធិស្ឋាននៅក្នុងដួងចិត្ត យើងគួរតែប្រើ « ពាក្យសព្វនាមនៃព្រះគម្ពីរនៅពេលយើងនិយាយទៅកាន់ព្រះ—ព្រះអើយ ទ្រង់ និងរបស់ព្រះ និងនៃទ្រង់ ជាជាងប្រើពោលពាក្យសព្វនាមដែលសាមញ្ញទូទៅ អ្នក និងរបស់អ្នក » តាមដែលសមរម្យ ។
រឿងទាំងឡាយដែលត្រូវពិចារណា
-
ព្រះអម្ចាស់បានប្រាប់ យ៉ូសែប ស្ម៊ីធ ថា « ចូរអធិស្ឋានជានិច្ច ប្រយោជន៍ឲ្យអ្នកអាចក្លាយទៅជាអ្នកជម្នះបាន មែនហើយ ប្រយោជន៍ឲ្យអ្នកអាចយកឈ្នះលើអារក្សសាតាំងបាន ហើយប្រយោជន៍ឲ្យអ្នកអាចរួចផុតពីកណ្ដាប់ដៃនៃពួកអ្នកបម្រើរបស់អារក្សសាតាំង ដែលទ្រទ្រង់កិច្ចការរបស់វានោះ » ( គោលលទ្ធិ និងសេចក្តីសញ្ញា ១០:៥ ) ។ តើការអធិស្ឋានជានិច្ចមានន័យដូចម្តេច ? តើមូលហេតុអ្វីខ្លះដែលយើងម្នាក់ៗត្រូវការការការពារខាងវិញ្ញាណមកពីព្រះវរបិតាសួគ៌ ?
សកម្មភាពសម្រាប់ការរៀនសូត្រជាមួយអ្នកដទៃ
-
ព្រះគម្ពីរមាននូវគំរូនៃការអធិស្ឋានជាច្រើន ។ សូមអាន នីហ្វៃទី២ ៤:៣០-៣៥ និង អាលម៉ា ៣៤:១៧-២៧ ជាមួយអ្នកដទៃដោយស្វែងរកការណែនាំអំពីពេលណាយើងគួរអធិស្ឋាន និងយើងគួរអធិស្ឋានសម្រាប់អ្វី ។ តើលំនាំនៃការអធិស្ឋានដែលបានរកឃើញនៅក្នុងវគ្គគម្ពីរទាំងនេះមានឥទ្ធិពលយ៉ាងណាទៅលើរបៀបដែលយើងជ្រើសរើសដើម្បីអធិស្ឋាន ?
ស្វែងយល់បន្ថែមទៀត
-
ទំនុកដំកើង ៥៥:១៧; ម៉ាថាយ ៧:៧-១១; នីហ្វៃទី២ ៣២:៨–៩; អាលម៉ា ៣៧:៣៦–៣៧; នីហ្វៃទី៣ ១៨:១៥, ១៨-១៩; គោលលទ្ធិ និងសេចក្តីសញ្ញា ១៩:២៨
-
អិម រ័សុល បាឡឺដ « ចូរចាំយាមហើយអធិស្ឋានជានិច្ច » Liahona ខែ វិច្ឆិកា ឆ្នាំ ២០២០ ទំព័រ ៧៧–៧៩
-
ដេវីឌ អេ បែដណា «Pray Always » Liahona ខែ វិច្ឆិកា ឆ្នាំ ២០០៨ ទំព័រ ៤១–៤៤
ផ្នែកទី ២
ការអធិស្ឋានដ៏ស្មោះនឹងធ្វើឲ្យអ្នកខិតទៅជិតព្រះវរបិតាសួគ៌ និងព្រះយេស៊ូវគ្រីស្ទ
ជួនកាលនៅពេលយើងអធិស្ឋាន យើងអាចរកឃើញថាខ្លួនយើងប្រើពាក្យ ឬឃ្លាដូចគ្នាច្រំដែលៗ ។ តើអ្នកអាចស្រមៃថាអ្នកអាចប្រើភាសាតាមទម្លាប់ ឬគ្មានន័យគ្រប់ពេលដែលអ្នកទៅលេងជាមួយមិត្តភក្តិ ឬសមាជិកគ្រួសារបានទេ ? ការខិតខំរបស់យើងក្នុងការប្រាស្រ័យទាក់ទងដោយស្មោះជាមួយមនុស្សដទៃគួររំឭកយើងអំពីរបៀបនិយាយទៅកាន់ព្រះវរបិតាសួគ៌នៅក្នុងការអធិស្ឋាន ។ ព្រះសព្វព្រះទ័យឲ្យយើងអធិស្ឋានដោយស្មោះត្រង់ ។ នៅក្នុងព្រះគម្ពីរមរមន ព្យាការី អេណុស « បានប្លុងព្រលឹង [ របស់លោក ] ទាំងមូលទៅព្រះ » ក្នុងការអធិស្ឋានស្វែងរកពរ ( អេណុស ១:៩ ) ។ តាមរបៀបស្រដៀងគ្នានេះ យើងបែរទៅរកព្រះសម្រាប់ពរជ័យជាក់លាក់ទាំងសម្រាប់ខ្លួនយើង និងសម្រាប់អ្នកដទៃ ។
ដោយនៅក្នុងទម្រង់នៃការថ្វាយបង្គំ ការអធិស្ឋានមានអំណាចដើម្បីទាញយើងឲ្យនៅជិតព្រះវរបិតាសួគ៌ ( សូមមើល គោលលទ្ធិ និងសេចក្ដីសញ្ញា ៨៨:៦២-៦៤ ) ។ នៅពេលការអធិស្ឋានដោយស្មោះគួបផ្សំជាមួយនឹងការតមអាហារ នោះយើងអាចទទួលបាននូវវិញ្ញាណនៃវិវរណៈ ហើយចិត្តរបស់យើងអាចបានបរិសុទ្ធ និងបានញែកចេញជាបរិសុទ្ធ ( សូមមើល អាលម៉ា ១៧:៣; ហេលេមិន ៣:៣៥ ) ។
រឿងទាំងឡាយដែលត្រូវពិចារណា
-
សាវកប៉ុលបានបង្រៀនពួកបរិសុទ្ធឲ្យ « អធិស្ឋានឥតឈប់ឈរ » និង « អរព្រះគុណក្នុងគ្រប់ការណ៍ទាំងអស់ » ( ថែស្សាឡូនីច ទី១ ៥:១៧-១៨ ) ។ តើការ « អធិស្ឋានឥតឈប់ឈរ » មានន័យយ៉ាងណាចំពោះអ្នក ? ហេតុអ្វីការមានអារម្មណ៍ដឹងគុណគឺជាផ្នែកមួយដ៏សំខាន់ក្នុងការអធិស្ឋាន ? តើអ្នកអាចធ្វើអ្វីខ្លះដើម្បីធ្វើឲ្យការអធិស្ឋានដោយស្មោះត្រង់ក្លាយជាផ្នែកដ៏ធំមួយនៃការខិតខំរបស់អ្នកដើម្បីខិតចូលទៅជិតព្រះវរបិតាសួគ៌ ?
-
ព្រះវរបិតាសួគ៌ស្ដាប់ឮ ហើយឆ្លើយតបរាល់ការអធិស្ឋានដោយស្មោះត្រង់ទាំងអស់ ។ ការអធិស្ឋានខ្លះនៅក្នុងចិត្ត ខ្លះទៀតដោយការនិយាយឮៗ ។ សូមអានគំរូនៃការអធិស្ឋានឮៗខាងក្រោម ៖ ម៉ាថាយ ២៦:៣៩-៤៤; យ៉ូហាន ១៧:១; នីហ្វៃទី២ ៤:២៤; អេណុស ១:៤; យ៉ូសែប ស្ម៊ីធ—ប្រវត្តិ ១:១៤ ។ តើអ្នកមានបទពិសោធន៍អ្វីខ្លះជាមួយនឹងការអធិស្ឋានឮៗ ? តើអ្នកបានរកឃើញអ្វីខ្លះដែលមានប្រយោជន៍អំពីការអធិស្ឋានឮៗ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអាន ឬមើល « បំណងប្រាថ្នាដ៏ស្មោះរបស់ព្រលឹង » ដោយស៊ីស្ទើរ ខារ៉ុល អេហ្វ ម៉ាកខន់ឃី ។ នៅក្នុងសារលិខិតនេះ ស៊ីស្ទើរ ម៉ាកខន់ឃី បានមានប្រសាសន៍ថា « ដោយមានសេចក្តីជំនឿ យើងអធិស្ឋាន យើងស្តាប់ ហើយយើងគោរពតាម ដើម្បីយើងអាចរៀនហើយក្លាយជាតែមួយជាមួយនឹងព្រះវរបិតា និងព្រះរាជបុត្រា » ។ ពិភាក្សាអំពីអ្វីដែលមនុស្សគ្រប់គ្នាបានរៀនចេញពីសារលិខិតនេះ ។ តើការអធិស្ឋានអាចត្រូវបានចាត់ទុកថាជាពេលវេលាដែលបានចំណាយជាមួយនឹងព្រះវរបិតាសួគ៌ដោយរបៀបណា ?
ស្វែងយល់បន្ថែមទៀត
-
រ័សុល អិម ណិលសុន « Ask, Seek, Knock » Liahona ខែ វិច្ឆិកា ឆ្នាំ ២០០៩ ទំព័រ ៨១–៨៤
-
ដេវីឌ អេ បែដណា « Ask in Faith » Liahona ខែ ឧសភា ឆ្នាំ ២០០៨ ទំព័រ ៩៤–៩៧
-
នែល អិល អាន់ឌើរសិន « I Hear Him through Sincere Prayer and Reflection » Inspiration (blog) ថ្ងៃទី ២៧ ខែ ធ្នូ ឆ្នាំ ២០២១ នៅលើគេហទំព័រ ChurchofJesusChrist.org
ផ្នែកទី ៣
ព្រះវរបិតាសួគ៌ស្ដាប់ឮ ហើយឆ្លើយតបការអធិស្ឋានរបស់អ្នក ។
តើអ្នកធ្លាប់ឆ្ងល់ទេថា តើព្រះស្តាប់ឮការអធិស្ឋានរបស់អ្នកដែរឬទេ ? ព្រះវរបិតាសួគ៌តែងតែស្តាប់ឮ និងឆ្លើយតបការធិស្ឋានដោយស្មោះត្រង់របស់យើង ៖ « ចូរសូម នោះតែងនឹងឲ្យមកអ្នក ចូររក នោះតែងនឹងឃើញ ចូរគោះ នោះតែងនឹងបើកឲ្យអ្នក » ( ម៉ាថាយ ៧:៧ ) ។ ប៉ុន្តែព្រះអម្ចាស់ឆ្លើយតបនឹងការអធិស្ឋានរបស់យើងតាមបំណង និងពេលវេលារបស់ទ្រង់ ( សូមមើល ម៉ូសាយ ៧:៣៣; គោលលទ្ធិ និងសេចក្តីសញ្ញា ៦៤:៣១-៣២ ) ។
« ការអធិស្ឋានគឺជាទង្វើដែលបំណងរបស់ព្រះវរបិតា និងបំណងរបស់បុត្រត្រូវបាននាំមកនូវការឆ្លើយឆ្លងគ្នាទៅវិញទៅមក ។ កម្មវត្ថុនៃការអធិស្ឋានគឺមិនមែនដើម្បីផ្លាស់ប្ដូរបំណងរបស់ព្រះនោះទេ ប៉ុន្តែដើម្បីធានាដល់ខ្លួនយើង និងសម្រាប់ពរជ័យរបស់អ្នកដទៃដែលព្រះមានបំណងប្រទានឲ្យរួចទៅហើយ ប៉ុន្តែវាត្រូវបានធ្វើឡើងដោយលក្ខខណ្ឌលើការសុំរបស់យើងចំពោះពរជ័យទាំងនោះ » ។
រឿងទាំងឡាយដែលត្រូវពិចារណា
-
តើបំណងប្រាថ្នាដ៏ធំបំផុតនៅក្នុងដួងចិត្តអ្នកគឺជាអ្វី ? តើការស្វែងរកដើម្បីធ្វើតាមព្រះរាជបំណងរបស់ព្រះកំណត់បំណងប្រាថ្នា និងការអធិស្ឋានរបស់អ្នកតាមរបៀបណា ?
-
ជាធម្មតា ព្រះឆ្លើយតបការអធិស្ឋានរបស់យើងតាមរយៈព្រះវិញ្ញាណបរិសុទ្ធ ។ ពេលខ្លះការអធិស្ឋានរបស់យើងត្រូវបានឆ្លើយនៅពេលយើងអាន និងសិក្សាអំពីព្រះគម្ពីរ ។ ព្រះក៏ធ្វើការតាមរយៈមនុស្សដទៃដើម្បីផ្ដល់ជំនួយ ឬចម្លើយដែលយើងស្វែងរកផងដែរ ។ សូមអានវគ្គបទគម្ពីរខាងក្រោមនេះដើម្បីពិចារណាអំពីវិធីមួយចំនួនដែលការប្រាស្រ័យទាក់ទងមកពីព្រះអាចមានដល់អ្នកតាមរយៈព្រះវិញ្ញាណបរិសុទ្ធ ៖ ពង្សាវតារក្សត្រ ទី១ ១៩:១២; គោលលទ្ធិ និងសេចក្តីសញ្ញា ៨:២–៣; ១១:១១–១៤ ។ តើអ្នកបានស្គាល់ថាព្រះបានឮការអធិស្ឋានរបស់អ្នកនៅពេលណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ជាមួយក្រុមរបស់អ្នក សូមរាយបញ្ជីពីវិធីមួយចំនួនដែលយើងអាចប្រើបច្ចេកវិទ្យាដើម្បីប្រាស្រ័យទាក់ទងជាមួយអ្នកដទៃ ។ សូមពិភាក្សាសំណួរថា « ហេតុអ្វីពេលខ្លះយើងពិបាកក្នុងការប្រាស្រ័យទាក់ទងដោយមានប្រសិទ្ធភាពជាមួយនឹងព្រះវរបិតាសួគ៌របស់យើង ? សូមអាន នីហ្វៃទី៣ ១៤:៧-១១ ជាមួយគ្នា ។ តើព្រះយេស៊ូវគ្រីស្ទបានបង្រៀនអ្វីខ្លះអំពីព្រះរាជបំណងរបស់ព្រះវរបិតាសួគ៌ក្នុងការឆ្លើយតបទៅនឹងការអធិស្ឋានរបស់យើង ?
ស្វែងយល់បន្ថែមទៀត
-
ថូម៉ាស អេស ម៉នសុន « Come unto Him in Prayer and Faith » Ensign ខែ មីនា ឆ្នាំ ២០០៩ ទំព័រ ៥–៩
-
« Prayer »( វីដេអូ ) នៅលើបណ្ណាល័យដំណឹងល្អ
-
រីឆាដ ជី ស្កត « Learning to Recognize Answers to Prayer » Ensign ខែ វិច្ឆិកា ឆ្នាំ ១៩៨៩ ទំព័រ ៣០–៣២
-
ជេមស៍ ប៊ី ម៉ាទីណូ « Turn to Him and Answers Will Come » Liahona ខែ វិច្ឆិកា ឆ្នាំ ២០១៥, ទំព័រ ៥៨–៦០
-
« Are You Really There? » ( វីដេអូ ) នៅលើបណ្ណាល័យដំណឹងល្អ